កម្ពុជា-ថៃ

ពួកអាវលឿងថៃ​ដកថយ​ចេញ​ពីព្រំដែន

ប្រាសាទ​តាមាន់ ដែល​ស្ថិត​នៅ​ក្នុង​ទឹកដី​ខ្មែរ
ប្រាសាទ​តាមាន់ ដែល​ស្ថិត​នៅ​ក្នុង​ទឹកដី​ខ្មែរ ©រក្សាសិទ្ធិ

ពួកជ្រុលនិយម​ថៃ ដែល​ប៉ុនប៉ង​មកដក​បង្គោល​ព្រំដែន​ខ្មែរ-ថៃ បាន​ដកថយ​ទៅវិញ​ហើយ នៅថ្ងៃ​សៅរ៍នេះ។ ទោះជាយ៉ាងណា ទាហាន​ការពារ​ព្រំដែន​ខ្មែរ​បាន​ត្រៀម​លក្ខណៈ​ជា​ស្រេច ​ ដើម្បី​ការពារ​បង្គោល​​ព្រំដែន​លេខ​២៣ ​​ក្បែរ​ប្រាសាទ​តាមាន់​តូច​​ ក្នុង​ស្រុក​បន្ទាយ​អំពិល ​​ខេត្ត​ឧត្តរ​មានជ័យ។​​ មេ​បញ្ជាការ​កងទ័ព​ខ្មែរ​បាន​​អះអាង​ថា​​នឹង​ការពារ​​ទឹកដី​មិន​ឲ្យ​បាត់​បង់​ ឡើយ។​

ផ្សាយពាណិជ្ជកម្ម

 

សេចក្តីរាយការណ៍​របស់ ប៉ែន បូណា ពីភ្នំពេញ

ព័ត៌មាន​ចុងក្រោយ​បំផុត ​ដែល​ទើប​ទទួល​បាន​ពី​តំបន់​ជាយដែន​ ឲ្យ​ដឹង​ថា​​ ក្រុម​ជ្រុល​និយម​​អាវ​លឿង​ថៃ​ ដែល​ប៉ុនប៉ង​ចូល​មក​ដក​បង្គោល​ព្រំដែន បាន​ដក​ថយ​ត្រឡប់​ទៅ​វិញ​ហើយ ​​បន្ទាប់​ពី​មាន​ការ​រារាំង​ពី​ទាហាន​ថៃ។​​ នេះ​បើ​​យោង​តាម​ការ​អះអាង​របស់​លោក​ឈុំ​​ សុជាតិ​​ អ្នក​នាំពាក្យ​ក្រសួង​ការពារ​ជាតិ​​។​​

លោក​ទិត្យ ​​សុធា​​ អ្នក​នាំពាក្យ ​នៃ​ក្រុម​ប្រតិកម្ម​រហ័ស​​របស់​​ទីស្តីការ​គណៈ​រដ្ឋមន្ត្រី​​ ក៏​បាន​ទទួល​ព័ត៌មាន​ដូចគ្នា​ដែរ ហើយ​​បាន​​អបអរ​ចំពោះ​ព័ត៌មាន​នេះ​ ដោយ​ចាត់ទុក​ថា​​ នេះ​ជា​ការ​​ទទួល​ខុស​ត្រូវ​មួយ​របស់​រដ្ឋាភិបាល​លោក​អាប់ភីស៊ីត​​វាចាជីវា ​​ក្នុង​ការ​ទប់ស្កាត់​មិន​​ឲ្យ​មាន​បញ្ហា​កើត​ឡើង។ ​លោក​​ទិត្យ​​ សុធា​​ បាន​អំពាវនាវ​ឲ្យ​រដ្ឋាភិបាល​ក្រុង​បាងកក​បន្ត​ទប់​ស្កាត់​បញ្ហា​ទាំងឡាយ​ណា ​ដែល​បង្ក​ឡើង​ ដោយ​ក្រុម​ជ្រុល​និយម​ថៃ​ ដែល​ប៉ុនប៉ង​បង្ក​​បញ្ហា​ជាមួយ​កម្ពុជា។

ទោះជាយ៉ាងណា នៅមុនពេល ដែល​ពួកអាវលឿងថៃ​បាន​ដកថយ​ កង​ការពារ​ព្រំដែន​ខ្មែរ​បាន​ត្រៀម​ជា​ស្រេច​ហើយ​ក្នុង​លក្ខណៈ​ការពារ​បង្គោល​​ឡាក់​លេខ​២៣។​ បង្គោល​នោះ គឺជា​បង្គោល​ព្រំដែន​ ដែល​មាន​តាំង​ពី​សម័យ​​បារាំង ​​ហើយ​ដែល​ទទួល​ស្គាល់​ដោយ​សន្ធិសញ្ញា​បារាំង​សៀម​​១៩០៤​​ និង​១៩០៧។​ ប៉ុន្តែ​ពេល​នេះ​​ ពួក​ជ្រុល​និយម​ថៃ​បែរ​​ជា​​អះអាង​ថា​​ បង្គោល​នោះ​ធ្វើ​ឲ្យ​បាត់បង់​ទឹកដី​របស់​ខ្លួន​ទៅ​វិញ។

ក្រុម​អាវ​លឿង​ជ្រុល​និយម​ថៃ​ ដែល​មាន​គ្នា​ប្រមាណ​​ជា​១៥០​នាក់​ បាន​​ព្យាយាម​រុល​មក​កាន់​ប្រាសាទ​តាមាន់​​ ប៉ុន្តែ​​ពួក​គេ​ត្រូវ​បាន​រារាំង​ដោយ​​យោធា​ថៃ។​​ លោក​ឧត្តមសេនីយ៍​ជា ​​តារា ​​ក៏​បាន​បញ្ជាក់​ដែរ​ថា​​ មេទ័ព​ខ្មែរ​​ និង​ថៃ​ ដែល​ឈរ​​ជើង​នៅ​សមរភូមិ​មុខ​ បាន​ទាក់ទង​គ្នា​ជា​ប្រចាំ​​ និង​បាន​សហការ​គ្នា​យ៉ាង​ល្អ​ ក្នុង​ការ​ទប់​​ស្កាត់​មិន​ឲ្យ​ពួក​ជ្រុល​និយម​ថៃ​ចូល​មក​បង្ក​បញ្ហា​ឡើយ។ ​​​លោក​ឧត្តមសេនីយ៍​ឈុំ ​​សុជាតិ​​​ អ្នក​នាំពាក្យ​ក្រសួង​ការពារ​ជាតិ​​ ក៏​បាន​ឲ្យ​ដឹង​នៅ​ថ្ងៃ​នេះ​ដែរ​ថា ​​ភាគី​កម្ពុជា​មិន​ប្រាថ្នា​​ចង់​ឲ្យមាន​បញ្ហា​នៅ​តាម​ព្រំដែន​ទេ ​​ប៉ុន្តែ​​កងទ័ព​មាន​ភារកិច្ច​ការពារ​ទឹកដី​មិន​ឲ្យ​មាន​ការ​​ឈ្លានពាន​ឡើយ។

ការ​ប៉ុនប៉ង​ដក​បង្គោល​ព្រំដែន​លេខ​២៣​នេះ​ត្រូវ​បាន​ប្រធាន​គណៈកម្មការ​​បណ្តាញ​ប្រជាជន​ប្រឆាំង​អំពើ​ពុក​រលួយ​របស់​ថៃ​ឈ្មោះ​​វីរៈ​​ស៊ុមខ្វាមឃីត​​ប្រកាស​ឲ្យ​​ដឹង​តាំង​ពី​សប្តាហ៍​កន្លង​ទៅ​ម្ល៉េះ។ ​​ការ​ប្រកាស​បែប​នេះ​បាន​ធ្វើ​ឲ្យ​តំណាងរាស្រ្ត​​អង្គការ​​សង្គម​ស៊ីវិល​​​ពលរដ្ឋខ្មែរ​​ រួមទាំង​ទាហាន​ការពារ​ព្រំដែន​ផង​​ ថ្កោល​ទោស​ចំពោះ​​ចេតនា​ដ៏អាក្រក់​របស់​ជនជាតិ​ថៃ​រូប​នេះ​​ ដោយ​ចាត់ទុក​ថា ​​នេះ​គឺជា​ចេតនា​ឈ្លានពាន​​ទឹកដី​ខ្មែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI