កម្ពុជា

លោកទៀ បាញ់​នឹង​មាន​ជំនួប​ខ្លី​ជាមួយ​រដ្ឋមន្រ្តី​ការពារ​ជាតិ​ថៃ

លោក​ទៀ បាញ់ រដ្ឋមន្រ្តី​ការពារ​ជាតិ​កម្ពុជា ទៅ​ប្រជុំ​នៅ​ឥណ្ឌូណេស៊ី នៅ​ថ្ងៃ​ទី ១៧ ខែ ឧសភា ២០១១
លោក​ទៀ បាញ់ រដ្ឋមន្រ្តី​ការពារ​ជាតិ​កម្ពុជា ទៅ​ប្រជុំ​នៅ​ឥណ្ឌូណេស៊ី នៅ​ថ្ងៃ​ទី ១៧ ខែ ឧសភា ២០១១ ©ស៊ីវ ចាន់ណា

រដ្ឋមន្ត្រី​ការពារ​ជាតិ​កម្ពុជា​បាន​ចេញ​ដំណើរ ទៅ​ប្រជុំ​រដ្ឋមន្ត្រី​ការពារជាតិ​អាស៊ាន នៅប្រទេស​ឥណ្ឌូណេស៊ី កាលពី​ព្រឹកថ្ងៃ​អង្គារ​ទី ១៧ ឧសភា។ មិន​មែន​មាន​តែកិច្ច​ប្រជុំ​ថ្នាក់រដ្ឋមន្ត្រី​អាស៊ាន​ប៉ុណ្ណោះ​ទេ លោកទៀ បាញ់​បានថ្លែង​ថា លោក​នឹង​មានជំនួប​ខ្លី​ជាមួយ​សមភាគី​ថៃ​របស់​លោក​នៅ​ថ្ងៃទី​១៨​ឧសភា​ស្អែក​នេះ ដើម្បី​ជជែក​អំពី​ជម្លោះយោធា នៅតាម​ព្រំដែន។

ផ្សាយពាណិជ្ជកម្ម

 

រដ្ឋមន្ត្រី​ការពារ​ជាតិ​កម្ពុជា លោក​ឧបនាយករដ្ឋមន្ត្រី​ទៀ បាញ់​បាន​ដឹកនាំ​ប្រតិភូ​យោធា​ជាន់ខ្ពស់​ចេញ​ទៅប្រទេស​ឥណ្ឌូណេស៊ី កាលពី​ព្រឹកថ្ងៃ​អង្គារ​នេះ ដើម្បី​ចូលរូម​ក្នុង​កិច្ចប្រជុំ​រដ្ឋមន្ត្រី​ការពារ​ជាតិ​អាស៊ាន។ ប៉ុន្តែ មុន​ឡើង​យន្តហោះ លោក​ទៀ បាញ់​បាន​ថ្លែង​ប្រាប់​អ្នកសារព័ត៌មាន​អោយដឹង​ថា លោក​នឹង​ជួប​ជាមួយ​រដ្ឋមន្ត្រី​ការពារ​ជាតិ​ថៃ លោក​ប្រាវីត វង់សុវណ្ណ នៅល្ងាច​ថ្ងៃទី​១៨​ឧសភា​ស្អែក ដើម្បី​ជជែក​អំពី​បញ្ហា​ជម្លោះ​យោធា​តាម​ព្រំដែន។ លោក​រដ្ឋមន្ត្រី​ការពារ​ជាតិ​កម្ពុជា មិនបាន​លំអិត​អំពី​ប្រធានបទ​ដែល​នឹងត្រូវ​លើកឡើង ក្នុង​ជំនួប​ជាមួយ​រដ្ឋមន្ត្រី​ការពារ​ជាតិ​ថៃនោះទេ។

ប៉ុន្តែ​ដោយសារតែ រដ្ឋមន្ត្រី​ទាំងពីរ​ត្រូវ​មាន​សមត្ថកិច្ច​ក្នុង​ការជួបគ្នា ក្នុង​ក្របខណ្ឌ​នៃ​គណៈកម្មការ​ព្រំដែន​ទូទៅ​ផងនោះ តើ​ជំនួប​លើក​នេះ​អាច​ផ្តល់​បរិយាកាស​ធូរស្រាល​សម្រាប់​គូភាគី​ទាំងពីរ​ដែរឬទេ? ចំពោះ​លោក​ទៀ បាញ់​ជំនួប​លើក​នេះ វា​មិនមែន​អត់ប្រយោជន៍​នោះទេ។ ហើយ​ម្យ៉ាងវិញ​ទៀត វាក៏​ជា​ជំនួប​នៅលើ​ទឹកដី​ប្រទេស​ឥណ្ឌូណេស៊ី​ផងដែរ ដែល​នេះ​បង្ហាញថា វាបាន​ពាក់ព័ន្ធ​ជាមួយ​ឥណ្ឌូណេស៊ី ក្នុងនាម​ជា​អ្នកសម្របសម្រួល​រួច​ទៅហើយ។

ប៉ុន្តែ​បើ​និយាយ​អំពី​ជំនួប​គណៈកម្មការ​ព្រំដែន​ទូទៅ​នោះ លោក​ទៀ បាញ់​បាន​រម្លឹក​ទៅ​ដល់​ការព្រមព្រៀង​ចុងក្រោយ​រវាង​រដ្ឋមន្ត្រី​ការបរទេស​កម្ពុជា​ថៃ ក្រោម​ការសម្របសម្រួល​របស់​ឥណ្ឌូណេស៊ី​ដែល​ជា​ប្រធាន​អាស៊ាន។ នោះ​គឺ​ការអនុម័ត​របស់​ថៃ​លើ​លក្ខខណ្ឌ​ការងារ​នៃ​ក្រុមអ្នក​សង្កេតការណ៍​ឥណ្ឌូណេស៊ី​ និង​ការមក​ដល់​នៃ​អ្នកសង្កេតការណ៍​ឥណ្ឌូណេស៊ី​ជាមុន​សិន បន្ទាប់​មក ទើបអាច​រៀប​ចំកិច្ចប្រជុំ​តាម​យន្តការ​នានា ដែល​ក្នុងនោះ​មាន​ការជួបគ្នា​រវាង​រដ្ឋមន្ត្រី​ការពារ​ជាតិនេះ​ឯង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI