កម្ពុជា

រដ្ឋាភិបាល​បង្ហាញ​គោល​នយោបាយ​លើកស្ទួយ​សិទ្ធិ​កុមារ

រដ្ឋាភិបាល​កម្ពុជា​ដាក់​ចេញ​គោលនយោបាយ​លើកស្ទួយ​សិទ្ធិកុមារ ក្នុងឱកាស​ទិវា​សិទ្ធិ​កុមារ​អន្តរជាតិ ១មិថុនា ២០១៣
រដ្ឋាភិបាល​កម្ពុជា​ដាក់​ចេញ​គោលនយោបាយ​លើកស្ទួយ​សិទ្ធិកុមារ ក្នុងឱកាស​ទិវា​សិទ្ធិ​កុមារ​អន្តរជាតិ ១មិថុនា ២០១៣ RFI/Bona Pen

នៅ​ថ្ងៃទី១មិថុនា​នេះរដ្ឋាភិបាល​កម្ពុជា​បាន​ប្រារព្ធ​ទិវា​កុមារ​អន្តរជាតិ​លើក​ទី៦៤និង​ទិវា​កុមារ​កម្ពុជា​ក្រោម​ប្រធានបទ«អភិវឌ្ឍន៍​កុមារ​ជា​គ្រឹះ​នៃ​ការអភិវឌ្ឍ​ជាតិ»។លោកនាយក​រដ្ឋមន្ត្រីហ៊ុនសែនបានប្រកាស​គោលនយោបាយ​ជាច្រើន​ស្តីពី​ការលើកស្ទួយ​សិទ្ធិ​កុមារ​កម្ពុជា​ក្នុងនោះ​សិទ្ធិ​ទទួលបាន​ការអប់រំ​គឺជា​សិទ្ធិ​សំខាន់​មួយ។ យ៉ាងណាក៏ដោយកុមារ​កម្ពុជា​ជាច្រើន​ជាពិសេស​កូនអ្នកក្រីក្រ​នៅ​ទីជនបទ​កំពុង​ប្រឈម​នឹង​ការបោះបង់​ការសិក្សានិង​ពលកម្ម​កុមារ​ក្នុង​ទម្រង់​ធ្ងន់ធ្ងរ។

ផ្សាយពាណិជ្ជកម្ម

ក៏ដូចជា​រៀងរាល់ឆ្នាំ​ដែរ រដ្ឋាភិបាល​កម្ពុជា​បាន​ប្រារព្ធ​ទិវា​កុមារ​អន្តរជាតិ និង​ទិវា​កុមារ​កម្ពុជា១មិថុនា​ដើម្បី​សម្តែង​ការ​គាំពារ​ដល់​សិទ្ធិ​កុមារ។ ឆ្នាំនេះ ទិវា​កុមារ​អន្តរជាតិ​បាន​ប្រារព្ធ​ឡើង​នៅ​ព្រឹក​ថ្ងៃ​សៅរ៍​នេះ​នៅឯ​កោះ​ពេជ្រ​ក្នុង​រាជធានី​ភ្នំពេញ។ លោកនាយក​រដ្ឋមន្ត្រី ហ៊ុន សែន បានលើកឡើង​ពី​គោលនយោបាយ​ជាច្រើន​របស់​រដ្ឋាភិបាល​ក្នុងការ​លើកស្ទួយ​សិទ្ធិ​កុមារ។

ប្រមុខ​រដ្ឋាភិបាល​បក្ស​កាន់អំណាច​ដែល​រំពឹងថា​ខ្លួន​នឹង​ឈ្នះឆ្នោត​កាន់អំណាច​បន្តទៀត​នោះបាន​សុំ​ឲ្យ​ក្រសួង​ពាក់​ព​ន្ធ័​បង្កើន​មណ្ឌល​សុខភាព និង​សាលារៀន​បន្ថែមទៀត​ដល់​តំបន់​ដាច់ស្រយាល​នៅ​ទីជនបទ​ដើម្បី​ឲ្យ​កុមារ​បានទទួល​សេវា​សុខាភិបាល និង​ការអប់រំ។ ការលើកកម្ពស់​អត្រា​ចូលរៀន​របស់​កុមារ ការធ្វើសមាហរណកម្ម​កុមារ​ពិការ និង​ជំរុញ​ការអប់រំ​ក្រៅ​ប្រព​ន្ធ័​ជាដើម សុទ្ធតែជា​គោលនយោបាយ​ដែល​រដ្ឋាភិបាល​បាននិងកំពុង​ធ្វើ។

ប្រទេស​កម្ពុជា​បានផ្តល់​សច្ចាប័ន​លើ​អនុសញ្ញា​ស្តីពី​សិទ្ធិ​កុមារ​កាលពី​ឆ្នាំ១៩៩២ ព្រមទាំង​ពិធីសារ​និង​អនុសញ្ញា​ជាច្រើន​ទៀត​សំដៅ​ការពារ​កុមារ និង​លុបបំបាត់​ទម្រង់​ធ្ងន់ធ្ងរ​បំផុត​នៃ​ពលកម្ម​កុមារ។ យ៉ាងណាក៏ដោយ កុមារ​កម្ពុជា​នៅតែ​ប្រឈមមុខ​នឹង​បញ្ហា​ជាច្រើន​ជាពិសេស​កូនអ្នកក្រីក្រ​នៅតាម​ទីជនបទ។ ស្ថិតិ​របស់​ក្រសួង​អប់រំ​កាលពី​ឆ្នាំ ២០១១ ឲ្យ​ដឹងថា នៅ​ទូទាំងប្រទេស​មាន​កុមារ​ថ្នាក់​មតេយ្យ​ចំនួន​ជាង២សែន​នាក់ និង​កុមារ​ថ្នាក់​បឋមសិ​ក្សា​ចំនួន​ជាង២លាន​នាក់។

លោក រ៉ុង ឈុន ប្រធាន​សមាគម​គ្រូបង្រៀន​កម្ពុជា​ឯករាជ​បាន​កត់សម្គាល់ថា អត្រា​បោះបង់​ការសិក្សា​របស់​កុមារ​កម្ពុជា​ជាពិសេស​នៅតាម​តំបន់​ជនបទ​នៅតែមាន​កម្រិត​ខ្ពស់​គួរ​ឲ្យ​ព្រួយបារម្ភ។ បើតាម​លោក រ៉ុង ឈុន គោលនយោបាយ​ជាតិ​ស្តីពី​ការអប់រំ​របស់​រដ្ឋាភិបាល​មាន​លក្ខណៈ​ល្អប្រសើរ ប៉ុន្តែ ការអនុវត្ត​នៅ​មិនទាន់​សម្រេចបាន​ដូច​ការរំពឹងទុក​នៅឡើយ​ទេ។ ភាពក្រីក្រ​គឺជា​មូលហេតុ​សំខាន់​មួយ​ដែល​ជំរុញ​ឲ្យ​កុមារ​បាត់បង់​សិទ្ធិ​ទទួលបាន​ការអប់រំ។

ធ្ងន់ធ្ងរ​ជាង​នេះ កុមារ​កម្ពុជា​ជាច្រើន​កំពុង​ញាំញី​ដោយ​គ្រឿងញៀន និង​កំពុងធ្វើការ​ក្នុង​ទម្រង់​ធ្ងន់ធ្ងរ​ជាពិសេស​ការងារ​ជា​អ្នកបម្រើ​តាម​ផ្ទះ​គឺជា​បញ្ហា​ធ្ងន់ធ្ងរ​មួយ។ កុមារ​មួយចំនួនទៀត​កំពុង​ជាប់ពន្ធនាគារ។ យោងតាម​របាយការណ៍​របស់​អង្គការ​លីកាដូបច្ចុប្បន្ន មាន​អ្នកទោស​ជា​អនីតិជន​សរុប​ប្រមាណ​ជិត៥០០នាក់ ដែល​កំពុង​ជាប់ឃុំ​នៅក្នុង​ពន្ធនាគារ​នៅ​ទូទាំងប្រទេស។ បើ​យោងតាម​លោក រ៉ុង ឈុន ការកាត់បន្ថយ​ភាពក្រីក្រ​គឺជា​មធ្យោបាយ​ដ៏​សំខាន់​មួយ​ក្នុងការ​លើកស្ទួយ​សិទ្ធិ​កុមារ​កម្ពុជា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI