ទស្សនៈព្រឹត្តិការណ៍ខ្មែរ

សម្តេចឳ​នៅ​ក្នុង​អារម្មណ៍​ប្រជារាស្ត្រ​ខ្មែរ​

សំឡេង ០៤:១៩
ឡារី អាយុ២៧ឆ្នាំ លុតជង្គង់យំ កើតទុក្ខពីដំណឹងចូលទិវង្គត​របស់សម្តេចឪ ជាមួយ​ពលរដ្ឋ​ខ្មែរ​ជា​ច្រើន​ទៀតនៅ​មុខ​ព្រះបរម​រាជវាំង ថ្ងៃ១៥​តុលា២០១២
ឡារី អាយុ២៧ឆ្នាំ លុតជង្គង់យំ កើតទុក្ខពីដំណឹងចូលទិវង្គត​របស់សម្តេចឪ ជាមួយ​ពលរដ្ឋ​ខ្មែរ​ជា​ច្រើន​ទៀតនៅ​មុខ​ព្រះបរម​រាជវាំង ថ្ងៃ១៥​តុលា២០១២ REUTERS/Damir Sagolj
ដោយ៖ ប៉ែន បូណា
២៤ នាទី

ការ​សោយ​ទិវង្គត​របស់​អតីតព្រះមហាក្សត្រ នរោត្តម សីហនុ បានធ្វើ​ឲ្យ​ប្រជាពលរដ្ឋ​ខ្មែរ​ជាទូទៅ​មាន​ក្តី​រន្ធត់ និង​ក្រៀមក្រំ។ ក្តី​រន្ធត់​ក្រៀមក្រំ​ជា​រឿង​មួយ ប៉ុន្តែ ការសោកស្តាយ​និង​អារម្មណ៍​ដិតដាម​នូវ​ការគោរព​ស្រឡាញ់ និង​សក្ការៈ ពី​សំណាក់​ប្រជារាស្ត្រ​ទូទៅ​គឺជា​រឿង​មួយទៀត។តើ​ហេតុអ្វី​បានជា​សម្តេច​ឳ នរោត្តម សីហនុ ទទួលបាន​ការគោរព ស្រឡាញ់​យ៉ាងខ្លាំង​ពី​សំណាក់​ប្រជារាស្ត្រ​ខ្មែរ?

ផ្សាយពាណិជ្ជកម្ម

ពាក្យ​ថាស​ម្តេច​ឳ​ដែល​ប្រជារាស្ត្រ​ខ្មែរ​គ្រប់គ្នា​បាន​ប្រើ​សម្រាប់​ហៅ​អង្គ​អតីតព្រះមហាក្សត្រ បានបង្ហាញ​រួចជាស្រេច​អំពី​ការគោរព​ស្រឡាញ់​យ៉ាង​ជ្រាលជ្រៅ​របស់​ពួកគេ​ចំពោះ​ព្រះអង្គ។ នៅក្នុង​អារម្មណ៍​របស់​ប្រជាពលរដ្ឋ​ខ្មែរ​ជាទូទៅ ជាពិសេស​មនុស្ស​វ័យ​ចំណាស់ ដែល​ធ្លាប់បាន​ឆ្លងកាត់​របប​សង្គមរាស្ត្រនិយម សមានចិត្ត​ដែល​ពួកគេ​មាន​ចំពោះ​អង្គ​សម្តេច​ឳ​គឺ​មិនមែនជា​ក្តី​គោរព​ស្រឡាញ់​ធម្មតា​ទេ ប៉ុន្តែ គឺជា​ការគោរព​ស្រឡាញ់​ដែលមាន​សភាព​ជ្រាលជ្រៅ «ជាទី​សក្ការៈ» ដែល​ពិបាក​ពិពណ៌នា។

 

ជាក់ស្តែង មាន​ប្រជាពលរដ្ឋ​ខ្មែរ​ជាច្រើន​បាន​ចាត់ទុកថា​ខ្លួន​មានសំណាង​ក្នុង​ជីវិត​ពេល​បាន​ចាប់​ព្រះហស្ត​ផ្ទាល់​របស់​ព្រះអង្គ។ ក្រៅពីនោះ មាន​ពលរដ្ឋ​ខ្មែរ​ជាច្រើន​ទៀត​បានចាត់ទុក​ព្រះឆាយាល័ក្ខណ៍​របស់​ព្រះអង្គ​ប្រៀបដូចជា​វត្ថុ​ជាទី​សក្ការៈ​អ៊ីចឹង។ ពិត​ហើយ​ថា មាន​អ្នក​រិះគន់ថា នេះ​បណ្តាលមកពី​នយោបាយ«ប្រជាភិថុតិ» ប៉ុន្តែ ទោះជា​យ៉ាងណា ក៏​អង្គ​សម្តេច​ឳ​គឺជា​ក្សត្រ និង​ជា​អ្នកនយោបាយ​ដែលមាន​ប្រជាប្រិយភាព​យ៉ាងខ្លាំង​ណាស់​ក្នុងចំណោម​ពលរដ្ឋ​ខ្មែរ។

ជាការ​ពិត សម្រាប់​ក្រុមអ្នកតាមដាន​ស្ថានការណ៍​នយោបាយ​ប្រទេស​កម្ពុជា អង្គ​សម្តេច​ឳ​មិនមែន​គ្រាន់តែ​ជា​អង្គ​ក្សត្រ ឬ​អ្នកនយោបាយ​ដែល​ទទួលបាន​ប្រជាប្រិយ​ភាពខ្លាំង​ពិបាក​រក​គូ​ប្រៀប​នៅក្នុង​ឆាកនយោបាយ​ប្រទេស​កម្ពុជា​ប៉ុណ្ណោះ​ទេ តែ​ព្រះអង្គ​ក៏​ជា​អ្នកនយោបាយ​ដែល​ត្រូវបានគេទទួលស្គាល់​នៅក្នុង​ឆាក​អន្តរជាតិ​ទៀតផង។ ចំណុចខ្លាំង​របស់​ព្រះអង្គ​ដែល​សំខាន់​ជាងគេ​បំផុត​ក្នុងការ​ទាក់ទាញ​ចំណាប់អារម្មណ៍​របស់​ប្រជារាស្ត្រ​គឺ ព្រះ​អង្គជា​អ្នក​នយោបាយ​​ដែល​ចេះ​ផ្សារភ្ជាប់​ព្រះកាយ​ទៅនឹង​ជីវភាព​របស់​ប្រជារាស្ត្រ ពោលគឺ ព្រះអង្គ​អាច​សម្រប​ខ្លួន​ជាមួយ​កសិករ កម្មករ ឬ​ទាហាន​ដោយ​ចូលប្រឡូក​ក្នុង​ជីវិត​ជាក់ស្តែង​ជាមួយ​អ្នក​ទាំងនោះយ៉ាងពិត។ នេះ​ជា​ចំណុច​ពិសេស​ដែល​អ្នកនយោបាយ​ទូទៅ ជាពិសេស​អ្នក​នយោបាយ​​​ដែល​ចេញពី​ត្រកូល​ខ្ពង់ខ្ពស់ ឬ​ពី​គ្រួសារ​រាជវង្ស មិនសូវ​បាន​ចាប់អារម្មណ៍ និង​ធ្វើបាន​ដូច្នេះ​ឡើយ។ គេ​អាច​និយាយបានថា ការផ្សារភ្ជាប់​ខ្លួន​ជាមួយ​ប្រជាពលរដ្ឋ​គឺជា​គន្លឹះ​ក្នុងការ​ទាក់ទាញ​ប្រជាប្រិយភាព​របស់​អ្នកនយោបាយ។

នេះ​ជា​ទស្សនៈវិជ្ជា​ដែល​សម្តេច​ឳ​បាន​បានបង្ហាញ​ឲ្យ​ឃើញ និង​អាចជា​បទពិសោធន៍​សម្រាប់​អ្នកនយោបាយ​ស្រករ​ក្រោយ។ ក្រៅពីនោះ​នៅមាន​ចំណុចពិសេសៗជាច្រើន​ទៀត​ដែល​អង្គ​សម្តេច​ឳ​បានបង្ហាញ​ឲ្យ​ឃើញ​ក្រោម​ការដឹកនាំ​របស់​ព្រះអង្គ ។​ជាពិសេស​ព្រះអង្គ​បាន​បំពេញ​ព្រះរាជ​បូជនីយកិច្ចធំៗជាច្រើន​ដូចជា៖ ការទាមទារ​ខេត្ត​មួយចំនួន​ពី​ប្រទេស​ថៃ​មកវិញ។ ការទាមទារ​ឯករាជ្យ​ភាព​ពី​បារាំង និង​ការឈ្នះក្ដី​ប្រាសាទព្រះវិហារ​នាទី​ក្រុង​ឡាអេ ជាមួយ​ប្រទេស​ថៃ​ជាដើម សុទ្ធសឹង​ជា​ជោគជ័យ​ដែល​គេ​ចាត់ទុកជា​គុណសម្បត្តិ​របស់​សម្តេច​ឳ។
ម្យ៉ាងទៀត ព្រឹត្តិការណ៍​នយោបាយ​មួយចំនួន​ក្រោយពី​រដ្ឋប្រហារ១៨មីនា ឆ្នាំ ១៩៧០ ដែល​បានធ្វើ​ឲ្យ​ប្រទេសជាតិ​ធ្លាក់ចុះ​ជា​បន្តបន្ទាប់ រហូតដល់​ធ្លាក់​ក្នុង​វាលពិឃាត​នៃ​របប​ខ្មែរក្រហម បានធ្វើ​ឲ្យ​ប្រជាពលរដ្ឋ​ខ្មែរ​ជាទូទៅ​នឹកភ្នក​ដល់​របប​សង្គម​រាស្ត្រនិយម ក្រោម​ព្រះរាជកិច្ច​ដឹកនាំ​របស់​អង្គ​សម្តេច​ឳ ឡើងវិញ។ សម្រាប់​អ្នក​ដែល​បាន​ហែល​ឆ្លងភ្លើង​សង្គ្រាម និង​ការកាប់សម្លាប់​នៃ​មហា​សោកនាដកម្ម​ទាំងនោះ តួអង្គ​សម្តេច​ឳ គឺជា​តំណាង​ឲ្យ​ភាពរុងរឿង​របស់​ប្រទេស​កម្ពុជា។ ជ័យជម្នះ​របស់​ចលនា​រាជានិយម ហ្វ៊ុនស៊ិនប៉ិច កាលពី​ឆ្នាំ ១៩៩៣ គឺជា​ឧទាហរណ៍​ជាក់ស្តែង។

សរុប​មកវិញ អតីតព្រះមហាក្សត្រ នរោត្តម សីហនុ គឺជា​អ្នកនយោបាយ​ដ៏​មាន​ប្រជាប្រិយ​ភាពខ្លាំង​គ្មាន​គូ​ប្រៀប​សម្រាប់​ឆាកនយោបាយ​ប្រទេស​កម្ពុជា នោះ​គឺជា​ភាពខ្លាំង​ដែល​មិនអាច​ប្រជែង​បាន។ ព្រះអង្គ​ក៏​ជា​អ្នកនយោបាយ​ដ៏​ខ្លាំងពូកែ និង​វាងវៃ​ខាង​ការទូត​ម្នាក់​នៅលើ​ឆាក​អន្តរជាតិ​ផងដែរ។ ដូច្នេះ ការ​សោយ​ទិវង្គត​របស់​សម្តេច​ឳ​នៅពេលនេះ គឺជា​ការបាត់បង់​អ្នក​នយោបាយ​ជាទីគោរព សក្ការៈ​មួយអង្គ​សម្រាប់​ពលរដ្ឋ​ខ្មែរ ជាពិសេស​នៅក្នុង​បរិបទ​រាជានិយម​នៅ​កម្ពុជានេះ​គឺជា​ការបាត់បង់​ដ៏​ធំធេង​បំផុត​មួយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI