អានតួអត្ថបទ
កម្ពុជា

សហព័ន្ធ​កីឡា​ចំបាប់​កម្ពុជា​យល់​ថា​ ការ​ប្រកួត​ស៊ីហ្គេម​ នៅ​ប្រទេស​មីយ៉ាន់ម៉ា មិន​មាន​សុក្រិតភាព​

ក្រុម​កីឡាករ-ការនី ចំបាប់ទាំង១៤ និង​ប្រតិភូ ក្រោយ​ពេល​បញ្ចប់​ការ​ប្រកួត​កីឡាស៊ីហ្គេម នៅ​ប្រទេសមីយ៉ាន់ម៉ា។
ក្រុម​កីឡាករ-ការនី ចំបាប់ទាំង១៤ និង​ប្រតិភូ ក្រោយ​ពេល​បញ្ចប់​ការ​ប្រកួត​កីឡាស៊ីហ្គេម នៅ​ប្រទេសមីយ៉ាន់ម៉ា។ @Facebook
១៩ នាទី

កីឡាករ កីឡាការនី​កម្ពុជា ដែល​បាន​ទៅ​ចូលរួម ​នៅ​ក្នុង​ព្រឹត្តិការណ៏​នៃ​ការ​ប្រកួត​កីឡា​ស៊ីហ្គេម​លើកទី ២៧ នៅ​ប្រទេសមីយ៉ាន់​ម៉ា ចំនួន ៤​ប្រភេទ នៅ​យប់​ថ្ងៃអាទិត្យ​ទី ១៥ធ្នូ​មិ្សលមិញ​​នេះ បាន​វិល​ត្រលប់​មក​កាន់​ប្រទេសកម្ពុជាវិញហើយ។ កីឡា​ ៤​ប្រភេទ ដែលត្រលប់​មក​វិញ​នោះ រួម​មានប្រដាល់​សាកល វាយសី វូស៊ូ និង​ចំបាប់។ ស្របពេល​ជាមួ​យ​នឹង​ភាព​រីករាយ​ ក្នុង​ការ​ទទួលបាន​មេដាយ ចំពោះ​ប្រភេទកីឡាចំបាប់ សហព័ន្ធកីឡា​ចំបាប់​កម្ពុជា ក៏​បាន​បង្ហាញ​ភាព​តូចចិត្ត​ខ្លះៗ ចំពោះ​ការ​កាត់សេចក្តី​របស់​គណៈកម្មាការ​ប្រកួត​កីឡា​នេះ​ នៅ​ប្រទេសមីយ៉ាន់ម៉ា។

ផ្សាយពាណិជ្ជកម្ម

ប្រតិភូនិង​កីឡាករ កីឡាការនី កីឡា​បួន​ប្រភេទ ដែល​បាន​ទៅ​ចូលរួម​ប្រកួត​កីឡាស៊ីហ្គេម លើកទី ២៧​ នៅ​ប្រទេសមីយ៉ាន់​ម៉ា បាន​វិល​ត្រលប់​មក​កាន់​ប្រទេសកម្ពុជាវិញ​ហើយ នៅ​យប់​ថ្ងៃអាទិត្យ​ម្សិលមិញ។ ដំណើរ​ត្រលប់​មក​វិញ​នេះ គឺ​អត្តពលិក​កម្ពុជា បាន​នាំយក​នូវ​មេដាយ​ ចំនួន ២៣ ជូន​ជាតិ​មាតុភូមិ។ ក្នុងនោះ​ប្រភេទ​កីឡាចំបាប់ គឺ​ទទួល​បាន​មេដាយ​ច្រើន​ជាង​គេ ពោល​គឺ​បាន​មេដាយ​មាស ៤ ប្រាក់ ២ និង​សំរិទ្ធ ៤។

យ៉ាងណា​ក៏​ដោយ សហព័ន្ធ​កីឡាចំបាប់កម្ពុជា នៅ​មានការ​មិន​សប្បាយចិត្ត​ខ្លះ​ៗ ចំពោះ​ការ​រៀប និងចាប់​គូ​ប្រកួត របស់​ប្រទេសម្ចាស់ផ្ទះ​មីយ៉ាន់ម៉ា។ លោក ធិន វិចិត្រ អគ្គលេខាធិការ​នៃ​សហព័ន្ធកីឡាចំបាប់កម្ពុជា បាន​ប្រាប់​វិទ្យុបារាំងអន្តរជាតិ នៅ​ព្រឹក​ថ្ងៃ​ច័ន្ទ​នេះ​ថា ការពិតទៅ​គណៈកម្មាការ​មីយ៉ាន់ម៉ា បាន​ផ្គូផ្គង​កីឡាករ​ខ្មែរ និង​មីយ៉ាន់​ម៉ា ឲ្យ​ប្រកួត​គ្នា ខុស​ពី​ប្រភេទ​ទំងន់​​យ៉ាងច្រើន។ តួយ៉ាង ​កីឡា​ខ្មែរដែល​មាន​ទំងន់ ៩៦គីឡូក្រាម ត្រូវប្រកួត​ជាមួយនឹង កីឡាករ​មីយ៉ាន់​ម៉ា ទំងន់ ១២០គីឡូក្រាម ហើយ​ក្នុង​អំឡុងពេល​ប្រកួត មីយ៉ាន់ម៉ា​ថែម​ទាំង​​បាន​​ដក​ការប្រកួត​ពី​កីឡាករ​ខ្មែរ​ទៀតផង ដែល​ជាហេតុធ្វើឲ្យ​កីឡាករ-កីឡាការនី ចំបាប់​ខ្មែរ ៣រូប​ ដែល​បាន​ទៅ​ដល់​ប្រទេសមីយ៉ាន់ម៉ាហើយ ​មិន​បានធ្វើការ​​ប្រកួត។

ទោះជាយ៉ាងណា ចំបាប់​កម្ពុជា បើ​ទោះជាមិន​មាន​ប្រជាប្រិយភាព​ក្នុង​ប្រទេសកម្ពុជា ហើយ​ជួប​បញ្ហា​ខ្លះ នៅពេល​ទៅ​ប្រកួត​ក្នុង​ប្រទេសមីយ៉ាន់ម៉ា ប៉ុន្តែកីឡាករ កីឡាការនី​ខ្មែរ ៤នាក់ នៅ​តែអាច​នាំយក​មេដាយ​មាស មក​ប្រទេសកំណើត​វិញ។ លោក ធិន វិចិត្រ ដែល​តំណាងឲ្យ​កីឡាករ​ចំបាប់​ខ្មែរ បានប្រាប់​ថា លោក​ពិត​ជាមាន​មោទនភាពជាខ្លាំង។ មោទនភាពបំផុត ពេល​ឃើញ​ទង់​ជាតិ និង​ភ្លេងជាតិ​ខ្មែរ ត្រូវ​បាន​បង្ហូត​លើឆាក​អន្តរជាតិ ហើយ​មាន​ជាតិ​សាសន៍​ដទៃ ឈរគោរពជាមួយ។ លើសពី​នេះ គឺ​មោទនភាព​ដែល​កីឡាករ កីឡាការនី បាន​ប្រឹង​ប្រែង ជំនះ​​គ្រប់​ឧបសគ្គ ដើម្បី​​ឈាន​បាន​ដល់​កម្រិតនេះ។

ចំពោះ​ទស្សនវិស័យ​​សម្រាប់​ការ​ប្រកួត​ស៊ីហ្គេម លើកទី ២៨​វិញ លោក ធិន​ វិចិត្រ បាន​ប្រាប់ថា​ លោក​មិន​ប្រាកដ​ទេ​ថា នឹង​អាចដណ្តើម​បាន​មេដាយ​ច្រើន​ជាង​នេះ ឬយ៉ាងណានោះ ដោយសារ​​កីឡាករ​ ដែល​បាន​ទទួល​មេដាយ​នៅ​ឆ្នាំ​នេះ បាន​ស្នើសុំ​ចូលនិវត្តន៏ ដូច្នេះ​គឺ​សហព័ន្ធ​​កីឡាចំបាប់ ត្រូវប្រឹង​ប្រែង​ បណ្តុះបណ្តាល​កីឡាករ​ថ្មីៗបន្ថែមទៀត ចាប់ពី​ឆ្នាំ ២០១៣​នេះ រហូតដល់​ឆ្នាំ ២០១៥។

សូម​បញ្ជាក់ថា កម្ពុជា​បាន​បញ្ជូន​ប្រភេទ​កីឡាចំនូន ២៣​ទៅ​ចូលរួម​ការ​ប្រកួត​កីឡាស៊ីហ្គេម លើកទី២៧ នៅ​ក្នុង​ប្រទេសមីយ៉ាន់ម៉ា។ បើគិត​ត្រឹម​ព្រឹក​ថ្ងៃទី ១៦ធ្នូនេះ កម្ពុជាទទួល​បាន​មេដាយ​ចំនួន ២៣ហើយ ដែល​ក្នុងនោះ​រួម​មាន មេដាយ​មាស ៤ ប្រាក់ ៧ និង​សំរិទ្ធ ១២។ លទ្ធផល​របស់​កម្ពុជា គឺ​នៅ​ពីលើ​ ប្រទេសឡាវ ព្រុយណេ និង​ទីម័រខាងកើត។ ហើយ​ចំពោះ​លទ្ធផល​នេះដូចគ្នា គឺ​រដ្ឋាភិបាល​កម្ពុជា ដែល​សន្យា​ថានឹង​ផ្តល់​ទឹកប្រាក់លើកទឹក​ចិត្ត​ ដល់​អ្នក​ទទួល​បាន​មេដាយ​ នឹង​ត្រូវ​ចំនាយ​ប្រាក់រដ្ឋ ៩ម៉ឺន៥ពាន់ ដុល្លារ។​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ