អានតួអត្ថបទ
កម្ពុជា

១០០កោដិ​សំឡេង​ដើម្បី​បញ្ចប់​ហិង្សា​លើ​ស្ត្រី

យុទ្ធនាការ មួយរយកោដិសំឡេង ដើម្បី​បញ្ចប់​អំពើហិង្សា​លើ​ស្រ្តី
យុទ្ធនាការ មួយរយកោដិសំឡេង ដើម្បី​បញ្ចប់​អំពើហិង្សា​លើ​ស្រ្តី
ដោយ៖ លាង ដឺលុច
១៣ នាទី

កម្ពុជា​ក៏​បាន​ចូលរួម​ក្នុង​ព្រឹត្តិការណ៍​ពិភពលោក​មួយទៀត​ដែរ​នៅ​ក្នុង​ថ្ងៃ​ទី​១៤​កុម្ភៈ​នេះ គឺ​ចលនា​១០០កោដិ​សំឡេង ​ដើម្បី​ទាមទារ​បញ្ចប់​អំពើ​ហិង្សា​លើស្ត្រី។ សង្គម​ស៊ីវិល មន្ត្រី​ក្រសួង​កិច្ចការ​នារី សិស្ស​និស្សិត សិល្បករ និង​សិល្បការិនី​ជា​ច្រើន​បាន​ជួប​ប្រជុំ​គ្នានៅ​លើ​ទីលាន​សេរីភាព ​នៅ​ល្ងាច​ថ្ងៃ​ព្រហស្បតិ៍​នេះ​ ដើម្បី​ប្រារព្ធ​ចលនា​ទាមទារ​ការ​បញ្ចប់​ហិង្សា​ស្ត្រី​នេះ តាម​រយៈ​សេចក្តី​ថ្លែងការណ៍នានា។

ផ្សាយពាណិជ្ជកម្ម

អ្នក​នយោបាយ សិល្បករ សិល្បការិនី ពលរដ្ឋ មន្ត្រី​សង្គមស៊ីវិលកំពុង​ជួប​ជុំ​គ្នា​នៅ​លើសួន​សេរីភាព​ នៅ​ក្បែរ​ផ្សារចាស់​ នៅ​ល្ងាច​ថ្ងៃ​ទី​១៤​កុម្ភៈ​នេះ ដើម្បី​ប្រារព្ធចលនា​១០០កោដិ​សំឡេង​ ដើម្បី​បញ្ចប់​អំពើ​ហិង្សា​លើ​ស្ត្រី។ កម្ពុជា​កំពុង​ចូលរួម​ក្នុង​ព្រឹត្តិការណ៍​នេះ ដែល​​ជា​ព្រឹត្តិការណ៍​ពិភពលោក​មួយដែល​ត្រូវបាន​រៀបចំ​ឡើង​ដើម្បី​ប្រឆាំង​នឹង​ស្ថិតិ​ដ៏​គួរ​អោយ​ព្រួយ​បារម្ភ​ដែល​បង្ហាញ​ថា ស្ត្រី​១នាក់​ក្នុង​ចំណោម​ស្ត្រី​៣​នាក់​លើ​ពិភពលោក បាន និងកំពុង​ទទួល​រងការ​វាយដំ ឬ​ចាប់​រំលោភ។

សកម្មភាព​​ជាច្រើន​ដូចជា​សេចក្តីថ្លែងការណ៍ ការ​រាំ​ ច្រៀង​ ការ​សម្តែង​សិល្បៈ​ត្រូវបាន​រៀបចំ​ធ្វើ​តាំង​ពី​ម៉ោង​៥​ល្ងាច ហើយ​គ្រោង​បញ្ចប់​នៅ​ម៉ោង​៨​យប់​នេះ។

នៅ​ក្នុង​សេចក្តីប្រកាស​ព័ត៌មាន​មួយ លោកស្រី​រស់ សុភាព​នាយិកា​ប្រតិបត្តិ​នៃ​អង្គការ​យេនឌ័រ និង​ការ​អភិវឌ្ឍ​ដើម្បី​កម្ពុជា​បាន​ប្រកាស​ថា លោកស្រី​បាន​ចូលរួម​ក្នុង​យុទ្ធនាការ​នេះ​ដើម្បីអំពាវនាវ​អោយ​មាន​ការ​បញ្ចប់​អំពើ​ហិង្សា ហើយ​ថាការ​រួមគ្នា​យ៉ាង​នេះ នឹង​អាច​ផ្លាស់​ប្តូរ​ពិភពលោក​បាន។

ការ​តស៊ូ​មតិ​ប្រឆាំង​នឹង​ហិង្សា​លើ​ស្ត្រី​ត្រូវបាន​បង្ហាញ​ជា​ចំបង​តាម​រយៈ​ការ​សម្តែង​សិល្បៈ របាំ​នៃ​ក្រុម​និស្សិត​ដែល​បាន​ហាត់​រាំ​ជា​លក្ខណៈ​សាកលដែល​មាន​ចំណងជើងថា ផ្តាច់​ច្រវាក់។ គឺ​ជាច្រវាក់​ដែល​សម្រាប់​សកម្មជន​ទាំងនេះ បាន​ចងឃាំង​ស្រ្តី​ក្នុង​ទ្រុង​នៃ​ការ​បំភិតបំភ័យ មិន​អាច​និយាយ​ស្តី​ និង​បញ្ចេញ​ទស្សនៈបាន។

យុទ្ធនាការ​នា​ល្ងាច​ថ្ងៃ​ទី​១៤​កុម្ភៈ​នេះ​ដែរ គឺ​ជា​ការ​អំពាវនាវ​អោយ​ពលរដ្ឋ ពិសេស​ស្ត្រី​អោយចេញ​មក​ពិភព​​ខាង​ក្រៅ ​ដើម្បី​ចូលរួម​ផ្តាច់​ច្រវាក់​នេះដែរ។
នៅ​ថ្ងៃ​ទី​១៤​កុម្ភៈ​ដែល​ជា​ថ្ងៃ​បុណ្យ​នៃ​សេចក្តី​ស្រឡាញ់​នេះ ពិភពលោក​កំពុង​តែ​ប្រារព្ធ​ចលនា​១០០កោដិ​សំឡេង​ប្រឆាំង​ហិង្សា​លើ​ស្ត្រី និង​កុមារ ដែល​ព្រឹត្តិការ​ណ៍​នេះ​បាន​ប្រព្រឹត្តិឡើង​១៥​ឆ្នាំ​មកហើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ