កម្ពុជា

គ្រោះថ្នាក់​ចរាចរណ៍​បន្ត​សម្លាប់​មនុស្ស​យ៉ាងរង្គាល​ជា​រៀងរាល់​ថ្ងៃ

ការ​បើកបរ​ល្មើស​នឹង​ច្បាប់​គឺ​ជា​មូលហេតុ​ចម្បង​ដែល​នាំ​ឲ្យ​មាន​គ្រោះថ្នាក់​ចរាចរណ៍​ស្ទើរតែ​រាល់ថ្ងៃ
ការ​បើកបរ​ល្មើស​នឹង​ច្បាប់​គឺ​ជា​មូលហេតុ​ចម្បង​ដែល​នាំ​ឲ្យ​មាន​គ្រោះថ្នាក់​ចរាចរណ៍​ស្ទើរតែ​រាល់ថ្ងៃ ©Reuters

បន្ទាប់ពី​សោកនាដកម្ម​សង្គ្រាម​បាន​បញ្ចប់​ទៅ ​ប្រទេស​កម្ពុជា​កំពុង​ស្ថិត​ក្នុង​ដំណាក់កាល​នៃ​ការ​អភិវឌ្ឍន៍។ ​ប៉ុន្តែ ​គ្រោះថ្នាក់​ចរាចរណ៍​បាន​និង​កំពុង​ក្លាយ​ជា​សោកនាដកម្ម​ថ្មី​មួយ​ដែល​ឆក់​ យក​ជីវិត​មនុស្ស​ជា​រៀងរាល់​ថ្ងៃ។ ​នៅ​ចុង​សប្តាហ៍​នេះ ​មាន​មនុស្ស​៧​នាក់​ស្លាប់​ និង​១១​នាក់​រង​របួស ​នៅក្នុង​គ្រោះថ្នាក់​ចរាចរណ៍​មួយ​ ដែល​បាន​កើត​ឡើង​នៅ​ក្នុង​ខេត្ត​កំពង់ធំ។ ​នេះ​ជា​សោក​នាដកម្ម​ធំ​ទី២​ហើយ ​ដែល​បាន​កើត​ឡើង ​ក្នុង​អំឡុង​ខែ​មីនា​នេះ​បន្ទាប់​ពី​ឧបទ្ទវហេតុ​ដូចគ្នា​បាន​កើត​ឡើង​ កាលពី​ដើម​ខែមីនា​ នៅ​តាម​ផ្លូវ​ជាតិ​លេខ​៤​ ដែល​បណ្តាល​ឱ្យ​មនុស្ស​១៩​នាក់​ស្លាប់​ក្នុង​ពេល​តែ​មួយ។

ផ្សាយពាណិជ្ជកម្ម

សេចក្តី​រាយការណ៍​របស់ ប៉ែន បូណា ពីភ្នំពេញ

មនុស្ស​៧​នាក់​បាន​ស្លាប់ និង​ ១១​នាក់​ផ្សេង​ទៀត​រង​របួស​ធ្ងន់​និង​ស្រាល។ ​នេះជា​តុល្យការបឋម​នៅ​ឯ​កន្លែង​កើត​ហេតុ​នៃ​គ្រោះថ្នាក់​ចរាចណ៍​មួយ​ ដែល​កើត​ឡើង​លើ​បណ្តោយ​ផ្លូវ​លេខ​៧១ ​ក្នុង​ទីប្រជុំជន​កំពង់ថ្ម ​ខេត្ត​កំពង់ធំ​ កាលពី​ពាក់​កណ្តាល​អធ្រាត្រ​ឈាន​ចូល​ថ្ងៃ​ទី២៧​មីនា​ចុង​សប្តាហ៍​នេះ។​ គ្រោះថ្នាក់​ចរាចណ៍​នេះ​បាន​កើត​ឡើង​ដោយសារ​រថយន្ត​ដឹក​ទំនិញ​មួយ​គ្រឿង​បាន​បុក​រ៉ឺម៉ក​ ដែល​ដឹក​មនុស្ស​ពេញ​ ហើយ​ដែល​កំពុង​បើក​ក្នុង​ល្បឿន​យ៉ាង​លឿន​រៀងៗ​ខ្លួន។

នេះ​ជា​គ្រោះថ្នាក់​ដ៏​គួរ​ឱ្យ​រន្ធត់​ដែល​បាន​សម្លាប់​មនុស្ស​ជាក្រុម​ ជា​លើក​ទី២​ហើយ​ ក្នុង​អំឡុង​ខែ​មីនា​នេះ។ ​កាលពី​ថ្ងៃទី​៤​មីនា ឆ្នាំ​២០១១ ​គ្រោះថ្នាក់​ដ៏​សាហាវ​ជាងគេ​បំផុត​មួយ​បាន​កើត​ឡើង​នៅ​តាម​បណ្តោយ​ផ្លូវ​ជាតិ​លេខ​៤ ​ក្នុង​ខេត្ត​ព្រះសីហនុ​ ដែល​បង្ក​ឲ្យ​មាន​អ្នក​ស្លាប់​ ១៩​នាក់ ​និង​របួស​ធ្ងន់​៨​នាក់​ក្នុង​មួយ​ប៉ប្រិច​ភ្នែក។ ​សោកនាដកម្ម​ក្នុង​គ្រោះថ្នាក់​ចរាចរណ៍​ដែល​បាន​សម្លាប់​មនុស្ស​ជា​ក្រុម​ៗ​ទាំងនេះ​បាន​បង្ក​ឱ្យ​មាន​ការ​ព្រួយ​បារម្ភ​ពី​គ្រប់​មជ្ឈដ្ឋាន។

ក្រុម​អង្គការ​សង្គម​ស៊ីវិល​កម្ពុជា​ដែល​ជា​សមាជិក​នៃ​សម្ព័ន្ធភាព​ប្រជាពលរដ្ឋ​ ដើម្បី​គណនេយ្យ​ភាព​សង្គម ​ដែល​ជា​បណ្តុំ​អង្គការ​-​សមាគម​មិនមែន​រដ្ឋាភិបាល​ចំនួន ១៣ បាន​សម្តែង​ការព្រួយ​បារម្ភយ៉ាង​ខ្លាំង ​នៅពេល​ដែល​ចំនួន​គ្រោះថ្នាក់​ចរាចរណ៍​ចេះតែ​កើន​ឡើង​ ហើយ​កំពុង​ក្លាយ​ជា​សោកនាដកម្ម​សម្លាប់​ជីវិត​ជនស្លូតត្រង់​កម្ពុជា​ជា​បន្តបន្ទាប់​។ ក្រុម​សង្គម​ស៊ីវិល​ទាំង​នោះ​បាន​ចេញ​សេចក្តី​ថ្លែងការណ៍​មួយ​កាលពី​ពេល​ថ្មីៗ​នេះ ​ដោយ​កត់សម្គាល់​ថា​ សោកនាដកម្ម​ដោយ​សារ​តែ​គ្រោះថ្នាក់​ចរាចរណ៍​មិន​ត្រឹម​តែ​ធ្វើ​ឱ្យ​មនុស្ស​ស្លាប់​យ៉ាង​រង្គាល​ប៉ុណ្ណោះ​ទេ ​ប៉ុន្តែ​ក៏​បាន​បន្សល់​ទុក​នូវ​ស្ត្រី​មេម៉ាយ​ កុមារកំព្រា ​ជនពិការ ​ភាពក្រីក្រ ​និងក្តី​អស់​សង្ឃឹម​សម្រាប់​អ្នក​រស់​នៅ​គ្មាន​ទីពឹង​។​

ប្រឈមមុខ​ចំពោះ​គ្រោះ​មហន្តរាយ​ថ្មី​នេះ ​ក្រុម​អង្គការ​សង្គម​ស៊ីវិល​ទាំង​នោះ​បាន​អំពាវនាវ​ឱ្យ​រដ្ឋាភិបាល​ចាត់​វិធានការ​ចាំបាច់​ជា​បន្ទាន់​ ដើម្បី​កាត់​បន្ថយ​គ្រោះថ្នាក់​ចរាចរណ៍​នៅ​លើ​ដង​ផ្លូវ។ គ្រោះថ្នាក់​ដែល​ភាគច្រើន​បណ្តាល​មក​ពី​អាកប្បកិរិយា​មិន​គោរព​ច្បាប់​របស់​អ្នក​បើកបរ។

កាលពី​ក្នុង​ឆ្នាំ​២០១០ គ្រោះថ្នាក់​ចរាចរណ៍​នៅ​កម្ពុជា​បាន​សម្លាប់​មនុស្ស​ជាង ​១.៦០០ នាក់។ ការ​សិក្សា​របស់​អង្គការ​ជនពិការ​ប៊ែលហ្សិក  Handicap International កាលពី​ឆ្នាំ​២០០៩ ​បាន​បង្ហាញ​ថា ​គ្រោះថ្នាក់​ចរាចរណ៍​នៅ​កម្ពុជា​បាន​ធ្វើឱ្យ​ខាតបង់​ទឹកប្រាក់​រហូត​ដល់ ​២៤៨ ​លាន​ដុល្លារ​អាមេរិក​ក្នុង​មួយ​ឆ្នាំ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI