កម្ពុជា

រដ្ឋាភិបាល​ថ្មី​មិន​អាច​បញ្ឃប់​ការ​ឡើង​ថ្លៃ​ឈ្មួល​រថយន្ត​ក្នុង​ពេល​បុណ្យ​ភ្ជុំបិណ្ឌ​

ប្រជាជន​ខ្មែរ​ ធ្វើ​ដំណើរ​ទៅ​ស្រុក​កំណើត​មុន​ថ្ងៃបុណ្យភ្ជុំបិណ្ឌ។
ប្រជាជន​ខ្មែរ​ ធ្វើ​ដំណើរ​ទៅ​ស្រុក​កំណើត​មុន​ថ្ងៃបុណ្យភ្ជុំបិណ្ឌ។ RFI/Siv Channa

ខណៈ​ដែល​ពិធី​បុណ្យ​ភ្ជុំបិណ្ឌ​ប្រពៃណីជាតិ​ខ្មែរ នឹង​ចាប់​ផ្តើម​នៅ​ថ្ងៃ​ទី ៣,៤,៥ ខែ​តុលា តំលៃ​រថយន្ត​ក្រុង បាន​ចាប់ផ្តើម​ឡើង​ថ្លៃ​ជា​បណ្តើរៗ​ហើយ។ ការ​ឡើង​ថ្លៃ​ឈ្នួល​រថយន្ត​ដឹក​អ្នក​ដំណើរ​តែងតែ​កើត​មាន​ជា​ប្រចាំ នៅ​ក្នុង​ប្រទេស​កម្ពុជា ក្នុង​ឱកាស​មាន​បុណ្យ​ទាន​សំខាន់ៗ ទោះបីជា​មាន​ការ​ណែនាំ​ពី​រាជរដ្ឋាភិបាល​ក៏​ដោយ។ ទម្លាប់​នេះ​នៅ​តែ​បន្ត​ដដែល​ទោះបីជា​រដ្ឋាភិបាល​ថ្មី​កើត​ចេញ​ជា​រូបរាង​ហើយ​ក៏​ដោយ។

ផ្សាយពាណិជ្ជកម្ម

វា​មិន​ខុសពី​រាល់​ពេល​នោះទេ នៅ​ពេល​មាន​បុណ្យទានសំខាន់ម្តងៗ តំលៃ​ឈ្មួ​ល​រថយន្ត​គ្រប់​ប្រភេទ គឺ​តែងតែ​ឡើងថ្លៃ​យ៉ាង​គំហុក។ ជាក់ស្តែង នៅ​ក្នុង​ឱកាស​បុណ្យ​ភ្ជុំបិណ្ឌ​ឆ្នាំ​នេះ ទាំង​តំលៃ​ឡានក្រុង និង​ឡាន​តាក់ស៊ី​ធម្មតា សុទ្ធ​តែ​ឡើង​ថ្លៃ​ទាំងអស់។ ទោះ​បី​ជាមាន​សំណូមពរ​ពី​រដ្ឋាភិបាល​ក្នុងពេល​កន្លងមក ប៉ុន្តែ សំណូមពរ​ទាំងនោះ វា​ហាក់​ដូចជា​មិនបាន​រសើប​ដល់​អ្នករកស៊ី​ផ្នែក​មធ្យោបាយ​ដឹក​អ្នក​ដំណើរ​បន្តិច​ណា​សោះ។

 
ទោះជា​មានការ​ឡើងថ្លៃ​យ៉ាងណា ក៏​អ្នកដំណើរ​នៅតែ​ជ្រើស​យក​មធ្យោបាយ​ទាំង​នោះដែរ។ លោក ជិន បញ្ញាវ័ន ដែល​ធ្វើ​ដំណើរ​ពី​ក្រុង​ភ្នំពេញ ទៅ​ខេត្តពោធិ៍សាត់ បាន​ប្រាប់ថា លោក​ពិតជា​អន់ចិត្ត​ខ្លាំង​ណាស់ នៅ​ពេល​ដែល​រដ្ឋាភិបាល​បាន​ត្រឹម​តែ​សំណូមពរ ប៉ុន្តែ មិនបាន​អនុវត្ត​ឲ្យ​បាន​តឹងរឹង​ចំពោះ​ការឡើង​ថ្លៃ​របស់​ឈ្មួញ​ទាំង​នោះ។ លោក ជិន បញ្ញា​វ័ន ឲ្យ​ដឹងថា ធម្មតា​តំលៃ​សំបុត្រ​តែ ប្រមាណ​ជា ២ម៉ឺន​រៀល​ប៉ុណ្ណោះ តែ​ពេលនេះ គឺ​ឡើងដល់​ទៅ ៣ម៉ឺន៥ពាន់​រៀល។ អ្នក​ដំណើរ​រូបនេះ​បន្ត​ថា ការពិត ប្រសិនបើ​រដ្ឋាភិបាល ចាត់​វិធានការណ៍​ឲ្យ​បាន​ច្បាស់​លាស់ ឈ្មួញ​ក៏​មិន​ហ៊ាន​ល្មើស​បែបនេះ​ដែរ។

ចំនែក​អ្នក​ធ្វើ​ដំណើរ​ពី​ក្រុងភ្នំពេញ ទៅ​ខេត្តសៀមរាប កញ្ញា ហ៊ីង ស្រីរ័ត្ន បាន​និយាយ ថា គាត់​ត្រូវ​ចំណាយ​លើស​ពី​តំលៃ​ធម្មតា ដល់​ទៅ​ប្រមាណ​ជា ១ម៉ឺន​រៀល ។ ស្រីរ័ត្ន​បន្តថា ការធ្វើ​បែប​នេះ វា​អាច​បង្ខំចិត្ត​ឲ្យ​អ្នក​ដែល​គ្មាន​ប្រាក់​គ្រប់គ្រាន់ ស្វែងរក​មធ្យោបាយ ដែល​ចំណាយ​តិច តែ​មិន​ធានា​សុវត្ថិភាព។

ឆ្លើយ​តប​នឹង​ការ​រអ៊ូរ​រទាំ​ពី​សំណាក់​អ្នកជិះរថយន្ត លោក ឈួន វី អ្នក​រត់​តាក់ស៊ី ពី​ភ្នំពេញ​ទៅ​ស្រុក​ពន្លៃ ខេត្តកំពង់ឆ្នាំង បាន​និយាយ​ថា លោក​បង្ខំ​ចិត្ត​ដំឡើងថ្លៃ​ឈ្នួល ព្រោះ​តែ​អ្នក​ទារ​ភាស៊ី​ក៏​ឡើង​ថ្លៃ​លើសពី​ថ្ងៃ​ធម្មតា​ដែរ រីឯ​ប៉ូលីស​យាម​នៅតាម​ផ្លូវ ក៏​ចេះតែ​ទារលុយ​ថ្លៃ​ចេញ​ចូល​រហូត។

គួរ​បញ្ជាក់ថា សាលា​រាជធានី និង​សហជីព​កម្មករ កាល​ពី​ពេល​កន្លងមក បាន​អំពាវនាវ​ដល់​ក្រុមហ៊ុន​ដឹក​ជញ្ជូន និង​ម្ចាស់​រថយន្ត​ឈ្នួល មិន​អោយ​ពួកគេ​ដំឡើង​ថ្លៃ​ឈ្នួល​ដឹកជញ្ជូន​ឡើយ ក្នុង​ពេល​បុណ្យ​ភ្ជុំបិណ្ឌ​ខាង​មុខ​នេះ។ ដោយសារតែ​ការអំពាវនាវ​របស់​សាលា​រាជធានី​មិន​ដែលមាន​ប្រសិទ្ធភាព​នោះ លោក​អាត់ ធន់ ប្រធាន​សហភាព​ការងារ​កម្ពុជា ក៏​បាន​អំពាវនាវ​បន្ថែម​ឲ្យ​រដ្ឋាភិបាល​ត្រូវ​មាន​វិធានការ​ទប់ស្កាត់​ការដំឡើង​ថ្លៃ​ឈ្នួល​ដឹកជញ្ជូន​ហួស​ហេតុ ក៏​ដូចជា​ការ​លុប​បំបាត់​ប៉ុស្តិ៏​ត្រួតពិនិត្យ​យក​លុយ​របស់​សមត្ថកិច្ច​នៅ​តាម​ដងផ្លូវ​ផង​ដែរ។

លោក​ចង់​ឲ្យ​មាន​បម្រាម​តឹងរ៉ឹង​មួយ​ចំពោះ​ការដំឡើង​ថ្លៃឈ្នួល​ចំណតរថយន្ត​ដឹកជញ្ជូន តាមរយៈ​ការដាក់ពិន័យ​ចំពោះ​ក្រុមហ៊ុន​ដឹកជញ្ជូន​ណា​ដែល​ដំឡើង​ថ្លៃឈ្នួល​ហួសហេតុ​នោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI