កម្ពុជា

តុលាការ​ខ្មែរ​ក្រហម​ផ្តើម​សវនាការ​សន្និដ្ឋាន​បិទ​បញ្ចប់​ការ​ពិភាក្សា​ដេញដោល​លើ​សំណុំរឿង​០០២​ ដំណាក់កាល​ទី​១​

សាលាក្តី​​ខ្មែរក្រហម​ បើក​កិច្ចប្រជុំ​រៀបចំ​សវនាការ​លើ​សំណុំរឿង​ ០០២​ កាលពី​ដើម​ខែ​មេសា
សាលាក្តី​​ខ្មែរក្រហម​ បើក​កិច្ចប្រជុំ​រៀបចំ​សវនាការ​លើ​សំណុំរឿង​ ០០២​ កាលពី​ដើម​ខែ​មេសា © លី ម៉េងហួរ

ដូច​ការគ្រោងទុក គឺ​នៅ​ម៉ោង ៩ ព្រឹក ថ្ងៃ​អង្គារ ទី១៦តុលា​នេះ អង្គជំនុំជម្រះ​សាលាដំបូង របស់​តុលាការ​ខ្មែរក្រហម បានចាប់ផ្តើម​ដំណើរការ​សវនាការ​សន្និដ្ឋាន​បិទ​បញ្ចប់​ការពិភាក្សា​ដេញដោល លើ​សំណុំរឿង០០២ ដំណាក់កាល​ទី១។ នៅ​ថ្ងៃ​ផ្តើមដំបូង​នេះ ជា​វេទិកា​របស់​សហ​មេធាវី​នាំមុខ តំណាង​ឲ្យ​ដើម​បណ្តឹងរដ្ឋប្បវេណី ឡើង​ធ្វើ​សេចក្តីសន្និដ្ឋាន​បញ្ចប់ ក្នុង​រយៈពេល​ពេញ​មួយថ្ងៃ​នេះ។ សហ​មេធាវី​នាំមុខ បានលើកឡើង​ពី​ទុក្ខវេទនា​របស់​ពលរដ្ឋ​ខ្មែរ ដោយសារតែ​ការជម្លៀស​ដោយ​បង្ខំ នៅ​ទូទាំងប្រទេស ក្នុង​របប​ខ្មែរក្រហម។ ក្នុង​សវនាការ នាពេល​រសៀល សហ​មេធាវី​របស់​ជន​រងគ្រោះ នឹង​លើកឡើង​ពី​ការទាមទារ​សំណង សម្រាប់​ជនរងគ្រោះ។

ផ្សាយពាណិជ្ជកម្ម

សវនាការ​សន្និដ្ឋាន​បិទ​បញ្ចប់​ការពិភាក្សា​ដេញដោល លើ​សំណុំរឿង០០២ ដំណាក់កាល​ទី១ ដែលមាន​រយៈពេល ១០ថ្ងៃ បានចាប់ផ្តើម​ហើយ នៅ​ព្រឹក​ថ្ងៃទី១៦តុលា​នេះ។ គ្រប់ភាគី បាន​បង្ហាញ​មុខ​​ក្នុង​អង្គ​សវនាការ រួមមាន៖ ភាគី​សហ​ព្រះរាជអាជ្ញា សហ​មេធាវី​ដើម​បណ្តឹងរដ្ឋប្បវេណី តំណាង​ឲ្យ​ជនរងគ្រោះ និង​សហ​មេធាវី​ការពារ​ជនជាប់ចោទ។

ជនជាប់ចោទ លោក នួន​ជា និង​លោក ខៀវ សំផន ក៏បាន​បង្ហាញមុខ ក្នុង​បន្ទប់​សវនាការ នៅ​ព្រឹក​មិញ​ផងដែរ។ ប៉ុន្តែ​ លោក នួន​ ជា អាយុ ៨៧ ឆ្នាំ ដោយសារតែ​បញ្ហា​សុខភាព លោក​ត្រូវបាន​​គេ​គ្រា​នាំចេញ ទៅ​បន្ទប់​រង់ចាំ បន្ទាប់ពី​លោក​អង្គុយ​ក្នុង​បន្ទប់​សវនាការ​ប្រមាណ ២០នាទី។

 
ក្នុងពេល​ផ្តើម​សវនាការ នៅ​ថ្ងៃទី១ នៃ​ការសន្និដ្ឋាន​បិទ​បញ្ចប់​ការពិភាក្សា​ដេញដោល លើ​សំណុំរឿង០០២ ដំណាក់កាល​ទី១ នៅ​ព្រឹក​នេះ សហ​មេធាវី​ដើម​បណ្តឹងរដ្ឋប្បវេណី តំណាង​ដោយ​លោក​មេធាវី ពេជ្រ អង្គ និង​លោក​មេធាវី ហុង គឹម​សួន បាន​លើក​បង្ហាញ​ពី​ទុក្ខវេទនា​របស់​ពលរដ្ឋ​ខ្មែរ ដែល​រងគ្រោះ ដោយ​ការជម្លៀស​ដោយ​បង្ខំ​របស់​ក្រុមខ្មែរក្រហម។ ការជម្លៀស​បង្ខំ​ពី​លំនៅដ្ឋាន បានកើត​ឡើង​យ៉ាង​រង្គាល នៅ​ទូទាំងប្រទេស ពិសេស​នៅ​ថ្ងៃ១៧មេសា ១៩៧៥ នៅ​ភ្នំពេញ ខណៈដែល​ខ្មែរក្រហម​ឡើងកាន់​អំណាច។

តាម​លោក​មេធាវី ហុង គឹម​សួន ការជម្លៀសចេញ​នោះ ធ្វើឡើង​ដោយ​អមនុស្សធម៌ គ្មាន​ជំនួយ ប្រឈម​នឹង​ជំងឺ អត់ឃ្លាន ហើយ​ត្រូវ​ធ្វើដំណើរ​លើផ្លូវ​សែនឆ្ងាយ ដោយ​ថ្មើរជើង នៅតាម​ផ្លូវ​ទៀតសោត ក៏មាន​មនុស្ស​ស្លាប់រ​ណូ​ក​រណែល។

សហ​មេធាវី ក៏បាន​លើកឡើង​ពី​ការសម្លាប់​រង្គាល នៅ​ទួល​ពោធិ៍​ជ្រៃ នៅ​ខេត្តពោធិ៍សាត់ លើ​ទាហាន​លន់ នល់។ ក្នុងនោះ រាប់បញ្ចូល​ទាំង​ខ្មែរ​កម្ពុជា​ក្រោម​ផងដែរ។ ខ្មែរក្រោម​ក៏​ទទួលរង​នូវ​ការជម្លៀស​ដោយ​បង្ខំ និង​ត្រូវ​សម្លាប់​ផងដែរ។

ក្នុង​សវនាការ នៅពេល​រសៀល ថ្ងៃនេះ ក្រៅពី​ការស្នើសុំ​ឲ្យ​តុលាការ​ផ្តន្ទាទោស លើ​អតីត​មេ​ខ្មែរក្រហម សហ​មេធាវី​ក៏​នឹង​លើកឡើង​ពី​ការទាមទារ​សំណង ដល់​ជូន​រងគ្រោះ ជាដើម​បណ្តឹងរដ្ឋប្បវេណី​ជាង ៣៨០០ នាក់។ សំណង ដែល​ត្រូវធ្វើឡើង​ដោយ​សមូហភាព និង​សំណង​​ផ្លូវចិត្ត។

ជាការ​កត់សម្គាល់ ភាគី​សហ​ព្រះរាជអាជ្ញា​នឹងធ្វើ​សេចក្តី​ស​ន្និ​ដ្ខា​ន​បញ្ចប់ លើ​សំណុំរឿង០០២ ដំណាក់កាល​ទី១ ដោយ​លើកឡើង​នូវ​សំណើសុំ​ផ្តន្ទាទោស​ជនជាប់ចោទ លោក នួន ​ជា និង​លោក ខៀវ​ សំផន ដោយមាន​រយៈពេល ៣ថ្ងៃ គិត​ចាប់ពី​ថ្ងៃទី១៧តុលា។ ក្រោយមក នឹង​ដល់​វេន​សហ​មេធាវី​ការពារ​ជនជាប់ចោទ និង​ជនជាប់ចោទ លោក នួន​ជា និង​លោក ខៀវ​សំផន ឡើង​ថ្លែងការណ៍៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI