សហជីពសេរីកម្មករប្រកាសធ្វើកូដកម្មចំពេលបក្សប្រឆាំងធ្វើបាតុកម្ម
ចុះផ្សាយនៅថ្ងៃ៖ កែប្រែថ្ងៃទី៖
សហជីពសេរីកម្មករ របស់លោក ជាមុនី បានចេញសេចក្តីអំពាវនាវមួយទៅកាន់មេដឹកនាំសហជីព និងកម្មករតាមបណ្តារោងចក្រ សហគ្រាសទាំងអស់ឲ្យធ្វើកូដកម្មមិនធ្វើការនៅថ្ងៃទី២២ និងថ្ងៃទី២៣ ខែតុលាសប្តាហ៍ក្រោយនេះ។ កូដកម្មនេះត្រូវគេពន្យល់ថាដើម្បីទាមទារ ផលប្រយោជន៍កម្មករនិងសហជីព។ ប៉ុន្តែ វាបានកើតឡើងចំពេលដែលគណបក្សសង្គ្រោះជាតិធ្វើមហាបាតុកម្មដែរ។
សហជីពសេរីកម្មករដែលមានទំនោទៅរកគណបក្សប្រឆាំងបានអំពាវនាវឲ្យសហជីពកម្មកររោងចក្រផ្អាកការងាររយៈពេលពីរថ្ងៃគឺនៅថ្ងៃទី ២២ និង ២៣ តុលាខាងមុខនេះដើមធ្វើកូដកម្ម។ គឺជាកូដកម្មដែលសហជីពនេះពន្យល់ថា ដើម្បីទាមទារឲ្យតុលាការដោះលែងបុគ្គលិកសហជីព និងកម្មកររោងចក្រសាប្រ៊ីណាទាំង ៨ នាក់ ដែលតុលាការឃុំខ្លួនអស់រយៈពេលជាង ៤ ខែមកហើយ។ កូដកម្មនេះក៏ដើម្បីទាមទារដំឡើងប្រាក់ឈ្នួលឲ្យដល់ចំនួន១៥០ដុល្លារអាមេរិកក្នុងមួយខែផងដែរ។
ក្នុងសេចក្តីអំពាវនាវ ដែលត្រូវបានគេចែកផ្សាយនៅថ្ងៃទី១៩ តុលានេះ លោក ជា មុនី ប្រធានសហជីពសេរីកម្មករ បានគូសបញ្ជាក់ថា ការធ្វើកូដកម្មនេះគឺដើម្បីប្រាប់ទៅបណ្តារោងចក្រ សហគ្រាសទាំងអស់ថា កម្មករ កម្មការិនី ត្រូវការប្រាក់ឈ្នួល ចំនួន ៦០ ម៉ឺនរៀល ឬ ១៥០ ដុល្លារអាមេរិក ក្នុងមួយខែ ដើម្បីទ្រទ្រង់ជីវភាព និងសុខភាពរបស់ខ្លួន។ ម្យ៉ាងទៀត វាក៏ជាការទាមទាររកយុត្តិធម៌ ជូនកម្មករផងដែរ។
សេចក្តីអំពាវនាវនេះមិនបានចងភ្ជាប់ទៅនឹងបញ្ហានយោបាយទេ ប៉ុន្តែការអំពាវនាវឲ្យមានកូដកម្មកម្មករនេះបានកើតឡើងចំពេល ដែលគណបក្សសង្គ្រោះជាតិធ្វើមហាបាតុកម្មដែរនៅថ្ងៃទី២៣តុលាខាងមុខនេះ។ លោក កឹម សុខា ប្រធានស្តីទីគណបក្សសង្គ្រោះជាតិ បានប្រាប់វិទ្យុបារាំងអន្តរជាតិថា បាតុកម្មនេះនឹងធ្វើឡើងរយៈពេល៣ថ្ងៃយ៉ាងតិច គឺធ្វើរហូតដល់ការទាមទាររបស់ខ្លួនបានសម្រេច។ គណបក្សសង្គ្រោះជាតិនៅតែទាមទារឲ្យមានការស៊ើបអង្កេតភាពមិនប្រក្រតីនៃការបោះឆ្នោត និងឲ្យមានតុល្យភាពអំណាចនៅក្នុងរដ្ឋសភា។
សូមបញ្ជាក់ថា គណបក្សសង្គ្រោះជាតិបានធ្វើមហាបាតុកម្មពីរលើករួចមកហើយចាប់តាំងពីក្រោយការបោះឆ្នោតសភាអាណត្តិទី៥មក។ កាលពីបាតុកម្មលើកមុនៗ មេដឹកនាំសហជីពដែលមានទំនោរទៅរកបក្សប្រឆាំង ដូចជាសហជីពសេរីកម្មកររបស់លោក ជាមុនី និងសហភាពសហជីពរបស់លោក រ៉ុង ឈុន ជាដើម ធ្លាប់បានអំពាវនាវជាចំហឲ្យសមាជិករបស់ខ្លួនចូលរួមមហាបាតុកម្មរបស់គណបក្សសង្គ្រោះជាតិតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ