អានតួអត្ថបទ
រុស្ស៊ី

មេបក្សប្រឆាំង​បរិហារ​អាក្រាត អំពី​របៀប​រស់នៅ​ដ៏​ហ៊ឺហា​របស់​លោក​ប្រមុខរដ្ឋ​ពូទីន

លោក Boris Niemtsov ប្រធាន​គណបក្ស​ប្រឆាំង​នៅ​រុស្ស៊ី
លោក Boris Niemtsov ប្រធាន​គណបក្ស​ប្រឆាំង​នៅ​រុស្ស៊ី
ដោយ៖ កែវ ឆាយា
១៦ នាទី

ខ្លឹមសារ​នៃ​ការ​បរិហារ​នេះ ធ្វើ​លើ​ទំព័រកាសែត​ថ្ងៃ​នេះ ដោយ​មេដឹកនាំ​បក្សប្រឆាំង គឺ​ថា លោក​ពូទីន “កំពុង​បាត់បង់​ប្រជាប្រិយភាព” ហើយ “នៅ​តោង​អំណាច​ដូច​ខ្មោច​ចូល” ចំណែក​មូលហេតុ​មួយ​នៃ​បាតុភាព​នេះ គឺ​មក​ពី”បរិយាកាស​នៃ​ទ្រព្យសម្បត្តិ និង​ភាព​ស្តុកស្តម្ភ​ដែល​គាត់​ទម្លាប់​ទៅ​ហើយ រួច​ដែល​គាត់​មិន​ព្រម​បណ្តោយ​ឲ្យ​វា​របូត​ពី​ខ្លួន​គាត់​ឡើយ”។

ផ្សាយពាណិជ្ជកម្ម

មេបក្សប្រឆាំង​នេះ​គឺ​ឈ្មោះ Boris Niemtsov ក្នុង​ទសវត្សរ៍​ទី៩០ ធ្លាប់​ធ្វើ​ជា​អភិបាលខេត្ត និង​ជា​ឧបនាយក​រដ្ឋមន្ត្រី ហើយ​បច្ចុប្បន្ន ជា​សហប្រធាន​នៃ​សម្ព័ន្ធ “គណបក្ស​សាធារណរដ្ឋ​ស្តាំនិយម” និង “គណបក្ស​ប្រជាសេរីភាព PARNAS”។ រូបគាត់​ល្បី ដោយ​ក្នុង​អង្គមីទ្ទិញ និង​បាតុកម្ម​តែង​បន្លឺ​ឡើង​នូវ​ការ​ទាមទារ​ពី​លោក​ពូទីន​ឲ្យ​ចុះ​ចេញ​ពី​អំណាច​ទៅ ក្រោម​ពាក្យ​ស្លោក​ថា “ ប្រទេស​រុស្ស៊ី​ឥត​ត្រូវ​ការ​រូប​ពូទីន​ទេ”។ ​លើ​ទំព័រកាសែត Kommersant លេខ​ថ្ងៃ​នេះ គាត់​សរសេរ​ហែក​កេរ្តិ៍​លោក​ពូទីន​ថា លោក​ពូទីន ក្នុង​សម័យ​ឃោសនា​បោះឆ្នោត​ប្រធានាធិបតី​កាល​ពី​ខែ​មិនា​កន្លង​ទៅ បាន​បោកប្រាស់​ប្រជាជន​ម្ចាស់ឆ្នោត​ដោយ​ប្រកាស​ជា​សាធារណៈ​ថា មាន​ប្រាក់ចំណូល​ក្នុង​១ឆ្នាំ​តែ​៤លានរូប្ល៍ ឬ​ស្មើ​នឹង ១២៥.០០០ដុល្លារ​ប៉ុណ្ណោះ។ តាម​មេបក្សប្រឆាំង បើ​ខ្ទង់​ចំណូល​តែ​ប៉ុណ្ណឹង ហេតុ​ម៉េច​ក៏​ពូទីន​រស់នៅ​ដូច​ជីវភាព​ពួក​ស្តេច​នៃ​ប្រទេស​តំបន់​ឈូង​សមុទ្រ Persique អ៊ីចឹង!

របាយការណ៍​មេបក្សប្រឆាំង​នោះ ធ្វើ​ការ​បូក​គុណ​ដូច​តទៅ ៖សព្វថ្ងៃ​សម្រាប់​តម្រូវការ​លោក​ពូទីន គឺ​មាន​វិមាន​ភូម៌គ្រឹះ​និវេសនដ្ឋាន សរុប​ទៅ​២០កន្លែង​ដែល​ពី​ក្នុង​នោះ វិមាន​៩កន្លែង​ត្រូវ​បាន​សង់​ឡើង​គឺ សម័យ​ក្រោម​អំណាច​ពូទីន​តែ​ម្តង។ ក្នុង​យានដ្ឋាន​បម្រើការ​ហោះហើរ​លោក​ពូទីន គឺ​មាន យន្តហោះ ៤៣គ្រឿង និង​ឧទ្ធម្ភាគចក្រ ១៥គ្រឿង​ដែល​តម្លៃ​សរុប​របស់​វា​គឺ ១.០០០លានដុល្លារ។ នៅ​មាន​នាវា​កំសាន្ត​តូចៗ ៤ទៀត តម្លៃ​ប្រមាណ ១០០.០០០ដុល្លារ។

មេ​បក្សប្រឆាំង​ថែម​ទាំង​រាប់​អំពី​ចំនួន​នាឡិកាដៃ​លោក​ពូទីន​ទៅ​ផង ដែល​សរុប​ទៅ​មាន​ចំនួន ១១ ក្នុង​តម្លៃ​សរុប ២២លានរូប្ល៍ ទាំង​ផ្គើន​ឲ្យ​លោក​ពូទីន​ទៅ​ផង​ថា គ្រាន់​តែ​ដើម្បី​ទិញ​នាឡិកា​ទាំង​នេះ លោក​ពូទីន​ត្រូវ​ចំណាយ​ប្រាក់ខែ​ខ្លួន​ទាំង​ស្រុង​អស់៦ឆ្នាំ​ជាប់ ដោយ​ធ្វើ​ពលីកម្ម​មិន​ហូប មិន​ចុក ពេញ​ទាំង​៦ឆ្នាំ​នោះ។ របាយការណ៍​នោះ ភាគច្រើន គឺ​ជា​រូបថត​ដែល​ចំណងជើង​វា សុទ្ធ​តែ​យោង​ទៅ​លើ​ប្រភព​ជាក់លាក់ ដើម្បី​បញ្ចៀស​ឲ្យ​ផុត​ពី​ការ​ចោទប្រកាន់ តាម”បទ​មួល​បង្កាច់” ដែល​ច្បាប់​ស្តី​អំពី​ប្រការ”មួលបង្កាច់” នេះ អាច​ផ្តន្ទាទោស​ឲ្យ​ជាប់​ពន្ធនាគារ​រហូត​ដល់​៣ឆ្នាំ​ឯណោះ។

អ្នកនាំពាក្យ​ផ្លូវការ​របស់​វិមាន​ក្រេមឡាំង​បាន​ប្រតិកម្ម​ទៅ​ហើយ តប​នឹង​របាយការណ៍​មេបក្សប្រឆាំង គឺ​ថា រាល់​អ្វីៗ​ដែល​ប្រធានាធិបតី​ជាប់​ឆ្នោត ប្រើប្រាស់​សម្រាប់​តម្រូវការ​ខ្លួន គឺ​សុទ្ធ​តែ​ជា​កម្មសិទ្ធិ​របស់​រដ្ឋ​ទេ​តើ។ ​គឺ​ថ្ងៃ​ស្អែក ទី២៨ សីហា​ដែល​នឹង​ប្រព្រឹត្ត​ទៅ ពិធី​បង្ហាញ​របាយការណ៍​នោះ ដែល​បោះពុម្ពផ្សាយ​តែ​ចំនួន ៥ពាន់ច្បាប់​ប៉ុណ្ណោះ ប៉ុន្តែ​ពួក​ប្រឆាំង​រំពឹង​ទៅ​លើ​ការ​ផ្សព្វផ្សាយ​វា ឲ្យ​បាន​ខ្ចរខ្ចាយ​តាម​បណ្តាញ​សង្គម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ