ចិន

ចិន​តវ៉ា​តាម​ផ្លូវទូត​ចំពោះ​ប្រទេស​ដែល​រិះគន់​ជុំវិញ​ការ​ស្លាប់​ជ័យលាភី​ណូបែល​លីវស៊ាវប៉ូ

សកម្មជន​ប្រជាធិបតេយ្យ​នៅ​ហុងកុង​នាំគ្នា​កាន់ទុក្ខ​ជ័យលាភី​ណូបែល​សន្តិភាព លីវ ស៊ាវប៉ូ ដែល​ទទួល​មរណភាព​ដោយ​ជំងឺ​មហារីក
សកម្មជន​ប្រជាធិបតេយ្យ​នៅ​ហុងកុង​នាំគ្នា​កាន់ទុក្ខ​ជ័យលាភី​ណូបែល​សន្តិភាព លីវ ស៊ាវប៉ូ ដែល​ទទួល​មរណភាព​ដោយ​ជំងឺ​មហារីក REUTERS/Bobby Yip

ចិន​បាន​ប្រកាស​ឲ្យដឹង​នៅថ្ងៃ​សុក្រ​នេះ​ថា ខ្លួន​បាន​ធ្វើការ​តវ៉ា​តាមផ្លូវទូត​ជា​ផ្លូវការ​ទៅកាន់​ប្រទេស​មួយចំនួន​ រួមមាន អាមេរិក បារាំង និង​អាល្លឺម៉ង់ ព្រមទាំង​ទៅកាន់​អ.ស.ប​ផងដែរ ក្រោយ​ពី​ពួកគេ​បាន​ធ្វើការ​បរិហារ​រិះគន់​រដ្ឋាភិបាល​ក្រុង​ប៉េកាំង​ ជុំវិញ​ការ​ស្លាប់​របស់​ជ័យលាភីណូបែល​សន្តិភាព លីវ ស៊ាវប៉ូ។ ចិន​ត្រូវ​រង​ការ​រិះគន់​ខ្លាំង​ចំពោះ​រឿង​បដិសេធមិន​ផ្តល់​សេរីភាព​ពេញលេញ​ឲ្យ​លីវ ស៊ាវប៉ូ អាច​ចេញ​ទៅ​ព្យាបាល​ជំងឺ​នៅ​បរទេស​បាន ដោយ​ទុក​បណ្តោយ​រហូតដល់​​ស្លាប់។

ផ្សាយពាណិជ្ជកម្ម

“ចិន​គឺ​ជា​អ្នក​មាន​ការ​ទទួលខុសត្រូវ​ធំបំផុត​ចំពោះ​ការ​ស្លាប់​របស់​លោក​លីវ ស៊ាវប៉ូ” នេះ​គឺ​ជា​ការ​លើកឡើង​របស់​គណៈកម្មាធិការ​ណូបែល​ នៅ​ក្នុង​សេចក្តីសេចក្តីថ្លែងការណ៍ ដែល​បានបង្ហាញ​នូវ​ការ​មិនសប្បាយចិត្ត​ដែល​ចិន​មិន​​បាន​ផ្តល់​ការ​ព្យាបាល​ត្រឹមត្រូវ ហើយ​ទុក​បណ្តោយ​ឲ្យ​ជ័យលាភីណូបែល​សន្តិភាព​រូបនេះ​ត្រូវ​ធ្លាក់​ខ្លួន​ឈឺធ្ងន់ធ្ងរ​រហូតដល់​ស្លាប់​បែបនេះ។

ការ​បរិហាររិះគន់​ធ្ងន់ៗ​បែបនេះ ក៏​មាន​ដែរ​​ពីសំណាក់​រដ្ឋាភិបាល​​អង់គ្លេស ដោយ​រដ្ឋមន្រ្តី​ការបរទេស​អង់គ្លេស​​​បាន​លើកឡើង​ថា វាជាកំហុសឆ្គងដ៏ធំមួយ ដែល​រដ្ឋាភិបាល​ចិន​ចចេស​មិនព្រម​អនុញ្ញាត​ឲ្យ លោក លីវ ស៊ាវប៉ូ ចេញ​ទៅ​ព្យាបាល​ជំងឺ​នៅ​បរទេស។ ដូចគ្នាដែរ ចំពោះ​រដ្ឋាភិបាល​អាល្លឺម៉ង់ ដែល​រហូតមកទល់​នឹង​ថ្ងៃ​ពុធ គឺ​មួយថ្ងៃ​មុន​លោក​ លីវ ស៊ាវប៉ូ ទទួលមរណភាព អាល្លឺម៉ង់​នៅតែ​បន្ត​ទាមទារ​ដោយ​ទទូច​ឲ្យ​ចិន​បង្ហាញ​នូវ​កាយវិកា​មនុស្សធម៌ ហើយ​អនុញ្ញាត​ឲ្យ​លោក​ លីវ ស៊ាវប៉ូ ចេញ​ទៅ​ព្យាបាល​ជំងឺ​នៅ​អាល្លឺម៉ង់។

លោកស្រី​អង់ហ្គេឡា មែរកិល ប្រមុខរដ្ឋាភិបាល​អាល្លឺម៉ង់​ក៏​បាន​លើកសរសើរ​ផងដែរ ដល់​លោក លីវ ស៊ាវប៉ូ ដោយ​បាន​ចាត់ទុកលោក​ថា​ជា “វីរបុរស” នៃ​ប្រជាធិបតេយ្យ និង​ជា​អ្នក​តស៊ូ​ប្រកប​ដោយ​ភាព​ក្លាហានក្នុង​ការ​ការពារ​សិទ្ធិមនុស្ស។

លោក​អាន់តូនីញ៉ូ ហ្គូទែរស៍ អគ្គលេខាធិការ​អ.ស.ប​វិញ ​បានត្រឹមតែ​​សម្តែងនូវ​ភាព​សោកសៅ និង​ការ​ចូលរួម​មរណទុក្ខ​ចំពោះ​ក្រុមគ្រួសារ តែ​លោក​មិនបាន​រិះគន់​ចិន​ចំពោះ​​ការ​មិន​អនុញ្ញាត​ឲ្យ​លោក​លីវ ស៊ាវប៉ូ ចេញ​ទៅ​ព្យាបាល​នៅបរទេសនោះទេ។ ដូចគ្នា​ដែរ ចំពោះ​ប្រធានាធិបតី​បារាំង និង​អាមេរិក ដែល​នៅ​ជាមួយគ្នា​ពេញមួយថ្ងៃ កាល​ពី​ម្សិលមិញ តែ​មិន​បញ្ចេញ​យោបល់​អ្វី​ទាំងអស់​ជុំវិញ​ការ​ស្លាប់​របស់​លោក លីវ ស៊ាវប៉ូ។ ផ្ទុយទៅវិញ ទាំង​រដ្ឋមន្រ្តី​ការបរទេស​បារាំង និង​រដ្ឋមន្រ្តី​ការបរទេស​អាមេរិក សុទ្ធតែ​បាន​ទាមទារ​ឲ្យ​ចិន​ធានា​ឲ្យ​បាន​នូវ​សិទ្ធិសេរីភាព​ពេញលេញ ចំពោះ​ភរិយា​ និង​សាច់ញាតិ​របស់​លោក​លីវ ស៊ាវប៉ូ។

ប្រឈមមុខ​នឹង​ការ​ទាមទារ និង​ការ​រិះគន់​អស់ទាំងនេះ ចិន​បាន​ឆ្លើយតប​វិញ​ដោយ​កំហឹង ដោយ​បាន​បញ្ជាក់សាជាថ្មី​ម្តងទៀត​ថា ទាំងអស់​នេះ គឺ​សុទ្ធតែ​ជា​កិច្ចការ​ផ្ទៃក្នុង​របស់​ចិន ដែល​ប្រទេស​ដទៃ​មិន​ត្រូវ​លូកដៃ​ចូល​មក​ជ្រៀតជ្រែក។ រដ្ឋាភិបាល​ក្រុង​ប៉េកាំង​ក៏​បាន​បរិហាររិះគន់​យ៉ាងចាស់ដៃ​ផងដែរ ចំពោះ​គណៈកម្មាធិការ​ណូបែល ដោយ​បាន​លើកឡើង​ថា ការ​សម្រេច​ផ្តល់​រង្វាន់ណូបែល​សន្តិភាព​ ដល់​មនុស្ស​ដូចជា​លោក​លីវ ស៊ាវប៉ូ វាគឺ​ជា​ការ​ធ្វើ​ផ្ទុយ​នឹង​គោលដៅ​នៃ​ពានរង្វាន់​ណូបែល ហើយវា​ជា​ការ​ប្រមាថ​ដ៏ធ្ងន់ធ្ងរ​មួយ​ចំពោះ​ពានរង្វាន់នេះ។

ក៏ប៉ុន្តែ អតីត​ប្រធានគណៈកម្មាធិការ​ណូបែល​បាន​ឆ្លើយតបមកវិញ​ថា ការតស៊ូ​ដើម្បី​សិទ្ធិមនុស្ស គឺ​ជាផ្នែកមួយ​នៃ​ការ​ប្រឹងប្រែង​ដើម្បី​សន្តិភាព ដែល​សក្តិសម​នឹង​ទទួល​បាន​ពាន​រង្វាន់ណូបែល​សន្តិភាព៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI