ចិន-វៀតណាម

ចិន​និង​វៀតណាម​ស្វះស្វែង​រក​មធ្យោបាយ​បន្ធូរបន្ថយ​ភាពតានតឹង​ក្នុង​ជម្លោះ​ដែន​សមុទ្រ

លោក​យ៉ាង ជៀឈី (ឆ្វេង) ពេល​ជួប​ជាមួយ​លោក​ផាម ប៊ិញ មិញ នៅទីក្រុង​ហាណូយ ថ្ងៃ​ចន្ទ ២៧ តុលា ២០១៤
លោក​យ៉ាង ជៀឈី (ឆ្វេង) ពេល​ជួប​ជាមួយ​លោក​ផាម ប៊ិញ មិញ នៅទីក្រុង​ហាណូយ ថ្ងៃ​ចន្ទ ២៧ តុលា ២០១៤ REUTERS/Kham

ចិន និង​វៀតណាម បាន​បង្ហាញ​នូវ​ជំហរ​រួមគ្នា ចង់​បន្ធូរបន្ថយ​ភាព​តានតឹង ដែល​បង្កឡើង​ដោយ​ជម្លោះ​នៅ​ក្នុង​សមុទ្រ​ចិន​ខាង​ត្បួង។ នេះ​បើតាម​សេចក្តី​ថ្លែងការណ៍ ចេញផ្សាយ នៅថ្ងៃ​ចន្ទ ក្រោយ​ពី​មាន​ជំនួប​ នៅ​ទីក្រុង​ហាណូយ រវាង​រដ្ឋមមន្រ្តី​ក្រសួង​ការបរទេស​វៀតណាម និង​មន្រ្តី​ការទូតជាន់ខ្ពស់​របស់​ចិន។

ផ្សាយពាណិជ្ជកម្ម

ដំណើរទស្សនកិច្ច​នៅ​ក្នុង​ប្រទេស​វៀតណាម ​របស់​​ក្រុម​ប្រឹក្សា​រដ្ឋចិន គឺ​លោក​យ៉ាង ជៀឈី នៅថ្ងៃ​ចន្ទ គឺ​ជា​ដំណើរទស្សនកិច្ច​លើកទី២ ចាប់តាំង​ពី​ចិន និង​វៀតណាម​ផ្ទុះជម្លោះ​នឹង​គ្នា​ខ្លាំង ក្រោយ​ពី​ចិន​បញ្ជូន​នាវា​ឲ្យ​ចូល​ទៅ​ខួងរក​ប្រេង​ក្រោម​បាតសមុទ្រ នៅ​ក្នុង​តំបន់សមុទ្រ​ជាប់ជម្លោះ កាល​ពីខែ​ឧសភា។

គេ​នៅចាំបាន​ថា កាល​ពីក្នុង​អំឡុង​ទស្សនកិច្ច កាល​ពីលើកមុន គឺ​នៅ​ខែ​មិថុនា លោក​យ៉ាង ជៀឈី ដែល​ជា​មន្រ្តី​មាន​អំណាច​ខាង​កិច្ចការ​បរទេស​លើស​រដ្ឋមន្រ្តី​ការបរទេស​ចិន​ទៅទៀត​នោះ មិនត្រឹមតែ​មិន​បាន​រក​ការ​សម្រុះសម្រួល​ជាមួយ​វៀតណាម​នោះទេ តែ​ថែម​ទាំង​បាន​ព្រមាន​រដ្ឋាភិបាល​ក្រុងហាណូយ​ថែម​ទៀត​ថា “ឲ្យ​ឈប់​ដុតបញ្ឆេះ​ជម្លោះ” នៅ​សមុទ្រ​ចិន​ខាងត្បូង។

ប្រមុខការទូតចិន​ហាក់ដូចជា​មាន​ជំហរ​ទន់ភ្លន់​ជាងមុន នៅ​ក្នុង​អំឡុង​ដំណើរទស្សនកិច្ច ទៅកាន់​វៀតណាម​លើកទីពីរ នៅថ្ងៃ​ចន្ទ។ នៅ​ក្នុង​សេចក្តីថ្លែងការណ៍​​ចេញផ្សាយ នៅ​ក្រោយ​ពី​មាន​ជំនួប រវាង​លោក​យ៉ាង ជៀឈី និង​លោក​ផាម ប៊ិញមិញ រដ្ឋមន្រ្តី​ការបរទេស​វៀតណាម ក្រសួង​ការបរទេស​វៀតណាម​បាន​អះអាង​ថា ភាគី​ទាំងពីរ​បាន​ទទួលស្គាល់ថា ដំណោះស្រាយ​សមស្រប​នៃ​ជម្លោះ​ដែនសមុទ្រ​មាន​សារៈសំខាន់​បំផុត​ សម្រាប់​ទំនាក់ទំនង​ទ្វេភាគីវៀតណាម-ចិន។

ពី​ទីក្រុង​ប៉េកាំង​ឯណោះវិញ អ្នក​នាំពាក្យ​ក្រសួង​ការបរទេស​ចិន​​បាន​ថ្លែង​ប្រាប់​អ្នក​សារព័ត៌មានថា ទំនាក់ទំនង​ទ្វេភាគី​ចិន-វៀតណាម​បាន​​ជួប​នឹង​បញ្ហា​ស្មុគស្មាញ​មួយរយៈ ក៏ប៉ុន្តែ អ្វីៗ​កំពុងតែ​មាន​ភាពប្រសើរឡើងវិញ។ ក្រសួង​ការបរទេស​ចិន​ក៏​បាន​ចេញផ្សាយ​សេចក្តីថ្លែងការណ៍​មួយ​ផងដែរ ដោយ​លើកឡើង​ថា ចិន និង​វៀតណាម​បាន​ឯកភាព​គ្នា​ថា​នឹង​​បញ្ចៀស​នូវរាល់​សកម្មភាព​ដែល​អាច​​នាំ​ឲ្យ​ជម្លោះ​​បច្ចុប្បន្ន​កាន់តែ​រីកដុះដាល​​ថែម​ទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI