អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

ចិន និង​ប្រទេស ២០ទៀត​បាន​ព្រមព្រៀងគ្នា​បង្កើត « ធនាគារវិនិយោគ​ហេដ្ឋារចនាសម្ព័ន្ធ​អាស៊ី »

សំឡេង ០៥:៤៨
លោក​ប្រធានាធិបតី​ចិនស៊ី ជីនពីង
លោក​ប្រធានាធិបតី​ចិនស៊ី ជីនពីង REUTERS/Jason Lee/Files
៣២ នាទី

នៅ​ថ្ងៃ​សុក្រ ទី២៤ តុលា​នេះ ប្រទេស​ចិន​រួម​ជាមួយ​នឹង​ប្រទេស​ចំនួន ២០ទៀត​បាន​ចុះ​ហត្ថលេខា​លើ​អនុស្សរណៈ​មួយ​ដើម្បី​បង្កើត​ធនាគារ​វិនិយោគ​ហេដ្ឋារចនាសម្ព័ន្ធ​អាស៊ី។ ការ​បង្កើត​ឲ្យ​មាន​ស្ថាប័ន​ហិរញ្ញវត្ថុ​នេះ​ឡើង​ត្រូវ​បាន​គេ​មើល​ឃើញ​ថា ជា​ការ​ប្រជែង​នឹង​ស្ថាប័នហិរញ្ញវត្ថុ​អន្តរជាតិ​ផ្សេង​ទៀត​ដែល​កំពុង​មាន​ស្រាប់​បច្ចុប្បន្ន ដូច​ជា​ធនាគារពិភពលោក ធនាគារអភិវឌ្ឍន៍អាស៊ី ឬមួយ​ក៏​ស្ថាប័ន​របស់​ក្រុមប្រទេស​សមាជិក BRICS ជា​ដើម។ លោក​ប្រធានាធិបតី​ចិន​ស៊ី ជីនពីង​ដែល​បាន​ចូលរួម​ជា​អធិបតី​នៅ​ក្នុង​ពិធី​ចុះ​ហត្ថលេខា​បាន​គូសបញ្ជាក់​ពី​សារៈសំខាន់​របស់​ធនាគារវិនិយោគ​ហេដ្ឋារចនាសម្ព័ន្ធ​អាស៊ី និង​ថា ដំណើរការ​របស់​វា​ក៏​មិន​ខុស​ពី​ស្ថាប័ន​ហិរញ្ញវត្ថុ​អន្តរជាតិ​ផ្សេង​ទៀត​ដែរ។

ផ្សាយពាណិជ្ជកម្ម

គឺ​ប្រទេស​ចិន​ដែល​ជា​អ្នក​ផ្តួចផ្តើម​គំនិត​ឲ្យ​បង្កើត​ស្ថាប័ន​ហិរញ្ញវត្ថុ​នេះ​ឡើង​ដោយ​ដាក់​ឈ្មោះ​ថា « ធនាគារ​វិនិយោគ​ហេដ្ឋារចនាសម័្ពន្ធ​អាស៊ី » ដែល​ចូលរួម​ដោយ​ប្រទេស​ចំនួន ២០ទៀត រួម​មាន កម្ពុជា វៀតណាម ឡាវ ភូមា សិង្ហបុរី ម៉ុងហ្គោលី ម៉ាឡេស៊ី គូវ៉ែត ព្រុយណេ បង់ក្លាដែស នេប៉ាល់ អូម៉ង់ ប៉ាគីស្ថាន ឥណ្ឌា ហ្វីលីពីន ស្រីលង្កា អ៊ូសបេគីស្ថាន កាហ្សាក់ស្ថាន និង ប្រទេស​កាតា។ ប្រទេស​ដែល​អវត្តមាន​នៅ​ក្នុង​ស្ថាប័ន​ហិរញ្ញវត្ថុ​ថ្មី​នេះ​មាន​ជប៉ុន កូរ៉េខាងត្បូង ឥណ្ឌូណេស៊ី ឬ មួយ​ក៏​ប្រទេស​អូស្រ្តាលី។ កម្មវត្ថុ​សំខាន់​នៃ​ការ​បង្កើត​ឲ្យ​មាន​ធនាគារ​វិនិយោគ​ហេដ្ឋារចនាសម័្ពន្ធ​អាស៊ី​នេះ​ឡើង គឺ​ដើម្បី​ចូលរួម​ជួយ​ទំនុកបម្រុង​ផ្នែក​ថវិកា​ដល់​គម្រោង​អភិវឌ្ឍ​របស់​ប្រទេស​សមាជិក ពិសេស​ការ​អភិវឌ្ឍ​ក្នុង​វិស័យ​ហេដ្ឋារចនាសម្ព័ន្ធ​មាន​ដូច​ជា​ទំនប់ទឹក កំពង់ផែ ប្រព័ន្ធផ្លូវថ្នល់ ឬ​មួយ​ក៏​ផ្នែក​ផ្សេងៗ​​ទៀត​ដែល​ជា​តម្រូវការ​ចំា​បាច់​របស់​ប្រទេស​ជាតិ។ គេ​អាច​និយាយ​ដោយ​សាមញ្ញ​ថា ធនាគារ​វិនិយោគ​ហេដ្ឋារចនាសម័្ពន្ធ​អាស៊ី គឺ​ជា​ប្រភព ហិរញ្ញវត្ថុ​រួម​មួយ​ដែល​ចូលរួម​ដាក់​វិភាគទាន​ដោយ​សមាជិក​នីមួយៗ។

ប្រភព​ព័ត៌មាន​ផ្លូវការ​ចិន​ឲ្យ​ដឹង​ថា ធនាគារ​វិនិយោគ​ហេដ្ឋារចនាសម័្ពន្ធ​អាស៊ី មាន​គម្រោង​ដាក់​ដើមទុន​ដំបូង​ចំនួន ៥០ ០០០លានដុល្លារ ក្នុង​នោះ​ចិន​ម្នាក់​ឯង​ត្រៀម​ខ្លួន​ចេញ​ជាង ៥០%។ រីឯ​ចំនួន​ដែល​នៅ​សេសសល់​នឹង​ត្រូវ​ចែក​គ្នា​ចេញ​នៅ​ក្នុង​រង្វង់​ប្រទេស​សមាជិក​ផ្សេង​ទៀត តែ​គេ​នៅ​មិន​ទាន់​ដឹង​ពី​ចំនួន​ភាគរយ​ដែល​សមាជិក​នីមួយៗ​ត្រូវ​ចេញ​ទេ។ មួយ​វិញ​ទៀត វិធានផ្ទៃក្នុង ដំណើរការ ឬ​មួយ​ក៏​ជម្រើស​ទីកន្លែង​ដើម្បី​តំាង​ទីស្នាក់ការកណ្តាល​របស់​ធនាគារ​វិនិយោគ​ហេដ្ឋារចនាសម័្ពន្ធ​អាស៊ី​ក៏​នៅ​មិន​ទាន់​បាន​កំណត់​ដែរ។ ទំាង​អស់​នេះ​សុទ្ធសឹង​ជា​សំណុំរឿង​ដែល​ប្រទេស​ហត្ថលេខី​នឹង​បន្ត​ជជែក​គ្នា​នៅ​ខែ​ខាង​មុខៗ និង​ដែល​គ្រោង​បញ្ចប់​ឲ្យ​រួច​រាល់​នៅ​មុន​ដំណាច់​ឆ្នំា ២០១៥។

ក្នុង​នាម​ជា​មហាអំណាច​សេដ្ឋកិច្ច​ទី២ ក្នុង​លោក ចិន​ចង់​កាត់​បន្ថយ​ការ​ពឹងផ្អែក​លើ​អ្នក​ដទៃ

ការ​ដែល​ចិន​បាន​បង្កើត​ឲ្យ​មាន​ស្ថាប័ន​ហិរញ្ញវត្ថុ​ថ្មី​ពេល​នេះ​ឡើង គឺ​ដើម្បី​ចូលខ្លួន​ប្រជែង​ជាមួយ​នឹង​ស្ថាប័នហិរញ្ញវត្ថុ​អន្តរជាតិ​ផ្សេង​ទៀត​ដែល​ចិន​យល់​ថា កំពុង​បន្ត​គ្រប់គ្រង​ដោយ​ក្រុមប្រទេស​លោកខាងលិច។ មូលនិធិ​រូបិយវត្ថុ​អន្តរជាតិ​បន្ត​ស្ថិត​ក្នុង​កណ្តាប់ដៃ​អឺរ៉ុប ធនាគារ​ពិភពលោក​ស្ថិត​ក្នុង​កណ្តាប់ដៃ​អាមេរិកំាង និង​ធនាគារអភិវឌ្ឍអាស៊ី​ស្ថិត​ក្នុង​ដៃ​ប្រទេស​ជប៉ុន​ដែល​ជា​គូប្រជែង​របស់​ចិន​នៅ​ក្នុង​តំបន់​អាស៊ី។ ចិន​បាន​មើល​ឃើញ​ថា នេះ​ពិត​ជា​រឿង​អយុត្តិធម៌​មួយ​ដែល​ខ្លួន​មិន​អាច​បន្ត​ឈរ​ឱបដៃ​មើល​បាន​ទៀត​ឡើយ។ ក្នុង​នាម​ជា​មហាអំណាច​សេដ្ឋកិច្ច​ទី២ ចិន​បាន​យល់ឃើញ​ថា វា​ល្មម​ដល់​ពេល​ដែល​ចិន​ត្រូវ​កាត់​បន្ថយ​ការ​ពឹងផ្អែក​លើ​អ្នក​ដទៃ និង​ត្រូវ​ធ្វើ​អ្វី​មួយ​ដើម្បី​ពិភពលោក ក៏​ដូច​ជា​ដើម្បី​ពង្រឹង​ឥទ្ធិពល​របស់​ខ្លួន។

កន្លង​មក មហិច្ឆតា​របស់​ចិន​នៅ​ក្នុង​វិស័យ​ហិរញ្ញវត្ថុ​ក៏​ធ្លាប់​បាន​ស្តែង​ឡើង​តាម​រយៈ​ការ​ទាមទារ​ឲ្យ​ប្រើ​លុយយ័ន​ចិន​នៅ​ក្នុង​ការ​ដោះដូរ​ពាណិជ្ជកម្ម​អន្តរជាតិ ពោល​មិន​ត្រូវ​ប្រើ​តែ​លុយដុល្លារ​អាមេរិក​មួយ​ប៉ុណ្ណោះ​ទេ។ ម្យ៉ាង​ទៀត​នា​ជំនួបកំពូល​នៃ​ក្រុមប្រទេស BRICS ដែល​មាន​ចិន ប្រេស៊ីល រុស្ស៊ី ឥណ្ឌា និង​អាហ្រ្វិកខាងត្បូង​ជា​សមាជិក ក៏​បាន​បង្កើត​ឲ្យ​មាន​ស្ថាប័ន​ហិរញ្ញវត្ថុ​រួមគ្នា​មួយ​ដែរ។ នៅ​ក្នុង​ស្ថាប័ន​ហិរញ្ញវត្ថុ​របស់​ក្រុមប្រទេស BRICS មាន ២ គឺ​ធនាគារ​អភិវឌ្ឍ និង​មូលនិធិ​ទុនបម្រុង។ កម្មវត្ថុ​របស់​ក្រុមប្រទេស BRICS ក៏​ដើម្បី​ជួយ​ដល់​ប្រទេស​សមាជិក​ខ្លួន​នៅ​ក្នុង​គម្រោង​អភិវឌ្ឍ ក៏​ដូច​ជា​ក្នុង​ករណី​មាន​វិបត្តិ​ហិរញ្ញវត្ថុ ដោយ​កាត់​បន្ថយ​ការ​ពឹងផ្អែក​ខ្លាំង​លើ​ធនាគារ​ពិភពលោក ក៏​ដូច​ជា​មូលនិធិ​រូបិយវត្ថុ​អន្តរជាតិ។

អាមេរិក​អំពាវនាវ​ឲ្យ​មាន​អភិបាលកិច្ចល្អ និង​មាន​តម្លាភាព

រហូត​មក​ដល់​ពេល​នេះ ក្រុម​ប្រទេសលោកខាងលិច​បាន​ស្វាគមន៍​ការ​បង្កើត​ធនាគារវិនិយោគ​ហេដ្ឋារចនាសម្ព័ន្ធ​អាស៊ី​ដោយ​ចុងមាត់ ចុង ក។ ទំាង​អស់​គ្នា​កំពុង​រង់ចំា​មើល ព្រោះ​វា​នៅ​ជា​រឿង​មួយ​ថ្មីថ្មោង​ពេក។ លោក​តាកេហ៊ីកូ ណាកាវ ប្រធាន​ធនាគារ​អភិវឌ្ឍ​អាស៊ី​ដែល​ជា​ជនជាតិ​ជប៉ុន​បាន​បញ្ជាក់​ថា លោក​កំពុង​រង់ចំា​មើល ដោយ​មិន​ទាន់​ហ៊ាន​សន្និដ្ឋាន​យ៉ាង​ម៉េច​ទេ។ តែ​លោក​បាន​អះអាង​ថា លោក​យល់​ពី​កម្មវត្ថុ​ចម្បង​របស់​ធនាគារ​វិនិយោគ​ហេដ្ឋារចនាសម័ន្ធ​អាស៊ី គឺ​ដើម្បី​ឆ្លើយ​តប​នឹង​តម្រូវការ​ថវិកា​នៅ​ក្នុង​តំបន់។ ចំណែក​អាមេរិក​វិញ លោក​ប្រមុខ​ការទូត​ចន ឃ៊ែរី​បាន​បញ្ជាក់​ថា អាមេរិក​មិន​ជំទាស់​នឹង​ការ​បង្កើត​ធនាគារ​វិនិយោគ​ហេដ្ឋារចនាសម័ន្ធ​អាស៊ី​នេះ​ទេ តែ​អ្វី​ដែល​អាមេរិក​សំណូមពរ​នោះ គឺ​សុំ​ឲ្យ​ចិន និង​ប្រទេស​សមាជិក​ដទៃ​ទៀត​គោរព​នូវ​បទដ្ឋានអន្តរជាតិ ពិសេស​ត្រូវ​មាន​អភិបាលកិច្ច​ល្អ និង​តម្លាភាព។

យ៉ាង​ណា​ក៏​ដោយ លោក​ប្រធានាធិបតី​ចិន​ស៊ី ជីនពីង​ដែល​បាន​ចូលរួម​ជា​អធិបតី​នៅ​ក្នុង​ពិធី​ចុះ​ហត្ថលេខា​លើ​អនុស្សរណៈ​ដើម្បី​បង្កើត​ធនាគារ​វិនិយោគ​ហេដ្ឋារចនាសម្ព័ន្ធ​អាស៊ី​ក្នុង​ទីក្រុង​ប៉េកំាង​បាន​ធានា​ថា ធនាគារ​ថ្មី​នោះ​នឹង​ដើរ​តាម​គន្លង​ល្អៗ ព្រម​ទាំង​យក​គំរូ​នយោបាយ​ប្រកប​ដោយ​ប្រសិទ្ធិភាព​ដែល​ធនាគារពិភពលោក ក៏​ដូច​ជា​ធនាគារ​អភិវឌ្ឍអាស៊ី​បាន​អនុវត្ត​កន្លង​មក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ