អានតួអត្ថបទ
ចិន-ប៉ាឡេស្ទីន

ប្រធានាធិបតី​ចិន​ជួប​សន្ទនា​ជា​មួយ​លោក Abbas​​មុន​នឹង​​ជួប​លោក​Netanyahu​

លោកប្រធានាធិបតិចិន Xi Jinping (ស្តាំ)ចាប់ដៃប្រធានរដ្ឋអំណាចប៉ាឡេស្ទីន Mahmoud Abbas នៅប៉េកាំងថ្ងៃទី៦ឧសភា២០១៣
លោកប្រធានាធិបតិចិន Xi Jinping (ស្តាំ)ចាប់ដៃប្រធានរដ្ឋអំណាចប៉ាឡេស្ទីន Mahmoud Abbas នៅប៉េកាំងថ្ងៃទី៦ឧសភា២០១៣ REUTERS/Jason Lee
ដោយ៖ នុយ ប៊ែរណាដែត
១៨ នាទី

ប្រធានាធិបតីចិនលោក Xi Jingping បានជួបសន្ទនា​ជាមួយលោក Mahmoud Abbas ប្រធាន​រដ្ឋអំណាច​ប៉ាឡេស្ទីន​ នៅ​ថ្ងៃ​ចន្ទ​៦​ឧសភា​នេះ នៅ​ទីក្រុង​ប៉េកាំង ក្នុង​ឱកាស​ដំណើរ​ទស្សនកិច្ច​ផ្លូវ​រដ្ឋ​ចំនួន​៣​ថ្ងៃ​នៅ​ប្រទេស​ចិន​ចាប់តាំង​ពី​ថ្ងៃ​អាទិត្យ​រហូត​ដល់​ថ្ងៃ​អង្គារ​ស្អែក។ លោក​​ប្រមុខ​រដ្ឋ​ចិន ក៏នឹង​​ត្រូវ​ជួប​ប្រាស្រ័យ​ជាមួយ លោក នាយក រដ្ឋមន្ត្រី អ៊ីស្រាអែល Benyamin Netanyahu ដែរ ដែល​បាន​អញ្ជើញ​មក​ដល់​ប្រទេស​ចិន​នៅ​ថ្ងៃ​ចន្ទ​នេះដែរ ក្នុង​ដំណើរ​ទស្សនកិច្ច​ផ្លូវរដ្ឋ​៥​ថ្ងៃ ​នៅក្រុង​សៀងហៃក្នុងថ្ងៃ​ចន្ទ​និង​អង្គារ​ស្អែក​និង​បន្ទាប់​មក​នៅ​ប៉េកាំង។

ផ្សាយពាណិជ្ជកម្ម

នៅ​ក្នុង​​រដ្ឋធានី​ចិន លោក​ប្រធាន​រដ្ឋ​អំណាច​ប៉ាឡេស្ទីន ត្រូវ​បាន​ទទួល​ស្វាគមន៍​យ៉ាង​​អធិក​អធម​​នៅ​លើ​ទីលានTiananmen  ដោយ​មាន​ការ​ប្រារព្ធ​​ពិធី​ត្រួតពល​ជា​កិតិយសផង។ ក្នុង​ឱកាស​នោះ​ លោក​ប្រធានាធិបតី​ចិន បានសម្តែង​គារវកិច្ច​និង សរសើរ​ចំពោះ​សកម្មភាព​នយោបាយ​របស់​លោក Mahmoud Abbas ​ក្នុងការ​ប្រកាន់​យក​​យុទ្ធសាស្ត្រ​សន្តិភាព។

ជាការឆ្លើយតបវិញ លោក Mahmoud Abbas ​បាន​អបអរសាទរ ចំពោះ​រដ្ឋាភិបាល​ចិនជា​បន្ត​បន្ទាប់​គ្នាក្នុង​អំឡុង​ប៉ុន្មាន​ឆ្នាំ​ចុង​ក្រោយ​នេះ ដែលបាន​អនុម័ត​យក​នយោបាយមួយ​​ប្រកប​ដោយ​​វិចារណញ្ញាណ​ដែល​​ជា​ប្រភព​ផ្តល់​ផ្លែផ្កា​ដ៏សំខាន់មួយ​​ដល់​ប្រទេសចិន​ ដោយបាន​ ចៀស​វាង​នូវ​​ការ​បង្ក​កំហុសនានាដែរ។

វត្តមាន​​ជា​បន្ត​បន្ទាប់​គ្នា​របស់​លោក Mahmoud Abbas ​និង​លោក Nétanyahu នៅក្នុង​ប្រទេស​ចិន បានធ្វើ​ឲ្យ​មតិ​សាធារណៈ​មាន​ការ​ចាប់​អារម្មណ៍​យ៉ាង​ខ្លាំង បើទោះបី​ជា​ថ្នាក់ដឹកនាំ អ៊ីស្រាអែល​​និង​ប៉ាឡេស្ទីន មិន​ត្រូវ​ជួប​ប្រាស្រ័យ​ជា​មួយ​គ្នា​ក៏​ដោយ- នេះ​បើ​យោងតាម​ទីភ្នាក់ងារ​​ព័ត៌មាន​ផ្លូវការ​ចិន​ថ្មី។​

ប្រមុខ​ដឹក​នាំ​ប៉ាឡេស្ទីន បានថ្លែង​ប្រាប់​ដល់​ទីភ្នាក់ងារ​ព័តមាន​ចិន​ថ្មីដែរ​ថា លោក​មាន​បំណង​ចង់​​ពិភាក្សា​ជា​មួយ​ថ្នាក់​ដឹក​នាំ​ចិន អំពី បញ្ហា​ឧបសគ្គនា​នា​នៅ​ក្នុង​កិច្ច​ចរចាសន្តិភាព​​ជាមួយ​អ៊ីស្រាអែល​ដោយ បាន​​សុំ​ឲ្យ ​ចិន​ ​ជួយ​អន្តរាគមន៍ដើម្បី​រក​ដំណោះ​ស្រាយ​​​​​នេះដែល​​ជា​ឧបសគ្គ​​ដ៏​ចំបងក្នុងការរាំស្ទះដំណើរ​​សេដ្ឋកិច្ចរបស់​​​ប៉ាឡេស្ទីន។​

លោក​នាយក​រដ្ឋមន្ត្រី​អ៊ីស្រាអែល​ ដែល​អញ្ជើញ​មក​បំពេញ​ទស្សនកិច្ច​នៅ​ប្រទេស​ចិន​នា​ពេល​នេះ​គឺ ​ដើម្បី​ពង្រីក​ពាណិជ្ជកម្ម​ជាមួយ​ប្រទេស​ចិន​ដែល​ជា​មហា​អំណាច​​ក្នុង​តំបន់​អាស៊ី នៅ​ខណៈ​​ដែល​តំបន់​ដើម​បូព៌ា​កំពុង​ជួប​​ភាពតាន​យ៉ាង​តឹង​ខ្លាំង ក្រោយពី​មាន​ប្រតិបត្តិការ​វាយ​លុក​ពីរ​លើក​របស់​អ៊ីស្រាអែល​នៅ​ប្រទេស​ស៊ីរី​​ក្នុង​រយៈពេល​៤៨​ម៉ោងប៉ុណ្ណោះ។

គួររំលឹកថា ចាប់តាំងពី​ជាង​២ឆ្នាំមកហើយ ចិន នៅ​តែ​បដិសេធ ពុំ​ព្រម​ស្តាប់​ការ​ពាវនាវ​របស់​សហគមន៍​អន្តរជាតិ​ដែល បាន​សុំ​ឲ្យ​ចិន​ដាក់​សម្ពាធ​ឲ្យ​បាន​ច្រើន​​ថែម​ទៀត​ទៅ​លើ​របប​លោកប្រធានាធិបតីស៊ីរី​ អាសាដ ដោយ​ប្រើ​សិទ្ធិ​វេតូ​របស់​ខ្លួន​នៅ​ក្នុង​ក្រុម​ប្រឹក្សា​សន្តិសុខ​នៃ​អសប។ ដោយឡែក​ប្រទេស​ចិន​ដែល​ជា​សមាជិក​អចិន្ត្រៃយ៍​នៃ​ក្រុម​ប្រឹក្សា​សន្តិសុខ​អសប​ ធ្លាប់​បាន​គាំទ្រ​សំណើរ​ប៉ាឡេស្ទីន​ក្នុង​ការ​សុំ​ចូល​ជា​សមាជិក​របស់​អង្គការសហប្រជាជាតិ។

ម្យ៉ាងទៀត ប្រទេសចិន ក៏​ជា​ប្រទេស​ទី​មួយ ដែល​បាន​បើក​ការិយាល័យ​តំណាង​មួយរបស់ខ្លួន​នៅ​ក្នុង​ដែន​ដី​ប៉ាឡេស្ទីន​ក្នុង​ដើម​ទស្សវត្សរ៍​៦០ និង​ក៏​ធ្លាប់​ទទួល​លោក Yasser Arafat ចាប់ពី​ឆ្នាំ​១៩៦៣​ទៅដែរ-នេះជាការកត់សម្គាល់​របស់​លោក ប្រធានរដ្ឋអំណាចប៉ាឡេស្ទីន Mahmoud Abbas៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ