ព្រឹត្តិការណ៍អន្តរជាតិប្រចាំថ្ងៃ

រកប្រអប់​ខ្មៅ​របស់​យន្តហោះ MH ៣៧០ គឺ​ដូច​រក​ម្ជុល នៅ​បាត​សមុទ្រ

សំឡេង ០៦:៤៤
វត្ថុ​ដែល​គេ​សង្ស័យ​ថា ជា​បំណែក​របស់​យន្តហោះ​ម៉ាឡេស៊ី អ៊ែរឡាញ ដែល​បាន​បាត់ខ្លួន កាលពី​ថ្ងៃ​ទី ៨​មីនា
វត្ថុ​ដែល​គេ​សង្ស័យ​ថា ជា​បំណែក​របស់​យន្តហោះ​ម៉ាឡេស៊ី អ៊ែរឡាញ ដែល​បាន​បាត់ខ្លួន កាលពី​ថ្ងៃ​ទី ៨​មីនា ©REUTERS/Huang Shubo/Xinhua

ក្រុម​គ្រួសារ​អ្នកដំណើរ​ជនជាតិ​ចិន​បាន​ធ្វើ​បាតុកម្ម​តវ៉ា នៅ​ថ្ងៃ​អង្គារ នៅមុខ​ស្ថានទូត​ម៉ាឡេស៊ី ក្នុង​ទីក្រុង​ប៉េកាំង ដោយ​បាន​ស្រែក​ចាត់ទុក​រដ្ឋាភិបាល និង​ក្រុមហ៊ុន​ហោះហើរ​ម៉ាឡេស៊ី​ថា ជាឃាតករ។ ក្រុមគ្រួសារ​អ្នកដំណើរ​ជនជាតិ​ចិន ផ្ទុះ​កំហឹង​ក្រេវក្រោធ​បន្ទាប់​ពី​លោក​នាយករដ្ឋមន្រ្តី​ម៉ាឡេស៊ី​បាន​ប្រកាស កាលពី​យប់​ថ្ងៃ​ចន្ទ ថា យន្តហោះ MH ៣៧០​ដែល​បាន​បាត់ខ្លួន កាលពី​ថ្ងៃ​ទី ៨​មីនា ពិត​ជា​បាន​ធ្លាក់​ចូល​ទៅក្នុង​មហាសមុទ្រ​ឥណ្ឌា និងថា រដ្ឋាភិបាល​មាន​ការសោកស្តាយ​ដែល​ជូនដំណឹងថា ​គ្មានអ្នក​ដំណើរ និង​អ្នក​បំរើការ​យន្តហោះ ណា​ម្នាក់​មាន​ជីវិត​​រស់រាន​​ទេ។

ផ្សាយពាណិជ្ជកម្ម

អស់​ពី​សប្តាហ៍មកហើយ ដែល​យន្តហោះ ប៊ូអ៊ីង ដឹក​អ្នកដំណើរ និង​បុគ្គលិក​យន្តហោះ​ចំនួន ២៣៩​នាក់ ពី​ទីក្រុង​កូឡាឡាំពួរ​ទៅ​ទីក្រុង​ប៉េកាំង​បាន​បាត់ខ្លួន​យ៉ាង​អាថ៌កំបាំង។ ពីរ​សប្តាហ៍​មកហើយ ដែល​រដ្ឋាភិបាល​ម៉ាឡេស៊ី ផ្តល់​ដំណឹង ដោយ​​ផ្នែកៗ កំណាត់ៗ ខុស​ប្លែកៗ​គ្នា រហូត​ធ្វើ​ឲ្យ​ក្រុមគ្រួសារ​អ្នកដំណើរ​មាន​ក្តី​សង្ឃឹម​ថា បងប្អូន​របស់ខ្លួន ដែល​ធ្វើ​ដំណើរ​នៅលើ​យន្តហោះ ម៉ាឡេស៊ី នៅ​តែ​មាន​ជីវិត​នៅឡើយ។ ដំបូង​ឡើយ នៅពេល​យន្តហោះ​បាត់ពី​រ៉ាដា អាជ្ញាធរ​ម៉ាឡេស៊ី​អះអាងថា យន្តហោះ ម៉ាឡេស៊ី​អ៊ែរឡាញ​ដែល​ហោះ​សំដៅ​ទីក្រុង​ប៉េកាំង បាន​បាត់ខ្លួន និង​អាច​ធ្លាក់​ក្នុង​សមុទ្រ​ចិន​ខាង​ត្បូង។ ក្រោយ​មក រដ្ឋាភិបាល​ម៉ាឡេស៊ី តាម​រយៈ​នាយក​រដ្ឋមន្រ្តី ផ្ទាល់​បានប្រកាស​ថា យន្តហោះ​បាន​បែរ​ក្បាល​ទៅ​ភាគខាងលិច​ម៉ាឡេស៊ី ទៅ​ខាងសមុទ្រ​ឥណ្ឌា។ បន្ទាប់មក នាយក​រដ្ឋមន្រ្តី​ម៉ាឡេស៊ី​បាន​ប្រកាស​ថា ទិសដៅ​ហោះហើរ របស់​យន្តហោះ MH ៣៧០ ទំនង​ជា​ត្រូវ​បាន​ប្តូរផ្លាស់​ដោយ​ស្នាដៃ​មនុស្ស។ មនុស្ស​ដែល​មាន​បទ​ពិសោធន៍ ក្នុង​ការបើកបរ និង​បាន​កាច់បិទ​ទំនាក់ទំនង​ជាមួយ​រ៉ាដា​លើ​ដី។

 
ក្រសួង​ការបរទេស​​ចិន​ក៏ហាក់​​នៅ​មាន​មន្ទិលសង្ស័យ និង​បាន​ទាមទារ​ឲ្យ​រដ្ឋាភិបាល​ម៉ាឡេស៊ី​ផ្តល់​រាល់​ភស្តុតាង និង​ទិន្នន័យ ដែល​អះអាង​បញ្ជាក់​ថា យន្តហោះ​ប៊ូអ៊ីង​៧៧៧​ពិត​ជា​បាន​ធ្លាក់​នៅក្នុង​មហាសមុទ្រ​ឥណ្ឌា។
 

គ្រួសារ​របស់​អ្នកធ្វើដំណើរ​នៅលើយន្តហោះ​បាត់ខ្លួន MH៣៧០​ខឹងក្រេវក្រោធ​បន្ទាប់​ពី​រដ្ឋាភិបាល​ម៉ាឡេស៊ី​ប្រកាសថា យន្តហោះ​ធ្លាក់​ក្នុង​ទឹក​សមុទ្រ​
គ្រួសារ​របស់​អ្នកធ្វើដំណើរ​នៅលើយន្តហោះ​បាត់ខ្លួន MH៣៧០​ខឹងក្រេវក្រោធ​បន្ទាប់​ពី​រដ្ឋាភិបាល​ម៉ាឡេស៊ី​ប្រកាសថា យន្តហោះ​ធ្លាក់​ក្នុង​ទឹក​សមុទ្រ​ ©REUTERS/Jason Lee

នៅក្នុង​សន្និសីទ នៅ​យប់​ថ្ងៃ​ចន្ទ នាយករដ្ឋមន្រ្តី​ម៉ាឡេស៊ី ប្រកាស​ថា យន្តហោះ​ធ្លាក់​ចូល​ក្នុង​មហាសមុទ្រ​ឥណ្ឌា បន្ទាប់​ពី  រដ្ឋាភិបាល​បាន​ទទួល​ព័ត៌មាន​ពី​ក្រុមហ៊ុន​ឯកជន​អង់គ្លេស Inmarsat និង​ការិយាល័យ​ស៊ើបអង្កេត​គ្រោះថ្នាក់​យន្តហោះ របស់​រដ្ឋាភិបាល​អង់គ្លេស។ គឺ​ក្រុមនេះ​ឯង​ដែល​បាន​គូសដៅ​គន្លង​ធ្វើ​ដំណើរ​របស់​យន្តហោះ ម៉ាឡេស៊ី តាមរយៈ​ការទទួល​សញ្ញា​Ping ពី​ម៉ាស៊ីន​របស់​យន្តហោះ ដែល​ផ្កាយរណប​របស់​ក្រុមហ៊ុន​Inmarsat ចាប់បាន។ ក្រុមនេះ​ទើប​តែ​បញ្ចេញ​ព័ត៌មាន​នៅពេលនេះ ដោយយោង​ទៅលើ​មូលហេតុ​ដែល​ថា គេ​ត្រូវពិនិត្យ​ពិច័យ គន់គូរ​ល្អិតល្អន់ មុន​នឹង​ចេញផ្សាយ​ជា​សាធារណៈ។

តាម​អ្នកជំនាញ​របស់ក្រុមហ៊ុន Inmarsat ផ្កាយរណប​របស់​ Inmarsat នៅ​បន្ត​ចាប់បាន​សញ្ញា​របស់​យន្តហោះ នោះ​បើទោះបី​ជា​យន្តហោះ បាន​កាត់ផ្តាច់ បិទ​ទំនាក់​ទំនង មិន​ផ្តល់​សញ្ញា​ទៅ​រ៉ាដា។ មានន័យថា ផ្កាយរណប​របស់ Inmarsat​នៅ​ចាប់​បាន​សញ្ញា​របស់​យន្តហោះ នៅ​ក្នុង​ពេល​ដែល​វា​កំពុង​បន្ត​ហោះហើរ ៥​ម៉ោង​ទៀត នៅក្រោយ​បាត់ខ្លួន​ពី​រ៉ាដា។ សញ្ញា​ចុងក្រោយ​ដែល​គេ​ចាប់បាន ពី​​យន្តហោះ គឺ​នៅ​លើ​ភាគខាងត្បូង​មហាសមុទ្រ​ឥណ្ឌា។ ដោយ​គិតគូរ​តាម​បែប​គណិតវិទ្យា ទៅលើ​ដំណើរ​គោលចរ រយៈល្បឿន និង​ចំនួន​សាំង ដែល​យន្តហោះ មាន អ្នកជំនាញ​អង់គ្លេស អះអាងថា យន្តហោះMH ៣៧០ ​ត្រូវ​បញ្ចប់ដំណើរ​របស់ខ្លួន នៅ​ក្នុង​មហា​សមុទ្រ​ឥណ្ឌា។
 

តាម​អាជ្ញាធរ​អូស្ត្រាលី ដែល​សស្រាក់សស្រាំ ក្នុង​ការរុករក កន្លែង​ដែល​យន្តហោះ​ត្រូវ​ធ្លាក់នោះ ស្ថិតនៅ​កន្លែង​ដាច់ស្រយាល ឆ្ងាយ​ពី​ដីគោក និង​កម្រ​មាន​នាវា​បើកកាត់ណាស់។ មួយ​វិញ​ទៀត អ្នកជំនាញ​បាន​ត្រឹម​តែផ្តល់​តម្រុយ​កន្លែង ដែល​យន្តហោះ​ត្រូវធ្លាក់ ដែល​តាមពិត ក៏ត្រូវ​ស្ថិតនៅក្នុង​បរិវេណ​ធំ​មហាសាល​ដដែល។ តាំងពី​ព្រឹកមិញ នាវា​អូស្ត្រាលី ដែល​ចេញ​ទៅ​រុករក​បំណែក​យន្តហោះ នៅកន្លែង​សង្ស័យ​ដែល​យន្តហោះ​ធ្លាក់ បាន​ផ្អាក​បេសកកម្ម ដោយសារ​​ហេតុផល​អាកាសធាតុ​អាក្រក់ គឺ​សំបូរភ្លៀង និង​ខ្យល់គួចខ្លាំង ដែល​អាច​គំរាម​កំហែង​ដល់​នាវា​រុករក។ អាជ្ញាធរ​អូស្ត្រាលី​និយាយ​ថា គេ​សង្ឃឹម​នឹង​ចាប់ផ្តើម​ប្រតិបត្តិការ​ជា​ថ្មី​ម្តងទៀត នៅ​ថ្ងៃ​ស្អែក បើ​សិន​អាកាសធាតុ​អំណោយផល។

ទាំង​អូស្ត្រាលី ចិន និង​អាមេរិក​សុទ្ធ​តែ​ បាន​បញ្ជូន​រួចហើយ នាវា និង​យន្តហោះ សំដៅ​ទៅ​កន្លែង​ដែល​គេ​សង្ស័យ​ថា យន្តហោះ​ធ្លាក់ ដើម្បី​ពិនិត្យ​មើល និង​ផ្គូផ្គង​វត្ថុ​​ដែល​គេ​ឃើញ​អណ្តែត​​នៅលើ​ទឹក ដើម្បី​ចង់ដឹងថា តើ​វត្ថុ​នោះ ជា​បំណែក​របស់​យន្តហោះ​មែន​ដែរ​ឬទេ។ បើសិនជា​វត្ថុ​ដែលគេ​រកឃើញ​ទាំងនោះ ជា​បំណែក​របស់​យន្តហោះ នោះ ជាថ្មី​ម្តងទៀត គេ​នឹង​អាច​រក​ឃើញ​កន្លែង​ពិតប្រាកដ ក្នុង​ទឹក ដែល​យន្តហោះ​បាន​ធ្លាក់​ក្នុង​ទឹក ​ តាមរយៈ​ការគន់គូរ​បែប​គណិតវិទ្យា​ទៅ​ខ្សែ​ខ្យល់​ដែល​នាំ​បំណែក​អណ្តែត​របស់​យន្តហោះ។

នៅទេ។ គេនៅមិនទាន់​ដឹង​ពី​មូលហេតុ​ដែល​ធ្វើ​ឲ្យ​យន្តហោះ​ប្តូរ​ទិសដៅ និង​ត្រូវ​ធ្លាក់​ចូល​ក្នុង​មហាសមុទ្រទេ។ គេ​នៅ​រង់ចាំ​មើល​ទិន្នន័យ និង​ស្តាប់​សំឡេង ដែល​គេអាចរក​ឃើញ នៅក្នុង​ប្រអប់ខ្មៅ​សិន។ ជាទូទៅ​យន្តហោះ​ពាណិជ្ជកម្ម​មាន​ប្រអប់ខ្មៅ​ពីរ។ មួយ​សម្រាប់​ថតទុក​រាល់​ចរាគោលចរណ៍ របស់​យន្តហោះ និង​មួយទៀត គឺ​ថត​សំឡេង​របស់​អ្នកបើកយន្តហោះ នៅក្នុង​បន្ទប់​បញ្ជា​យន្តហោះ។ បញ្ហា​គឺ​នៅត្រង់​ប្រអប់​ខ្មៅនេះ​តែ​ម្តង ព្រោះថា យន្តហោះ MH ៣៧០​របស់​ម៉ាឡេស៊ី មាន​ប្រអប់ខ្មៅ​ពីរ​​ដែល​មាន​អាយុ​ត្រឹម​៣០​ថ្ងៃ។ មានន័យថា ចាប់តាំងពី​ពេល​ដែល​វា​ធ្លាក់​ទៅប៉ះទឹក នោះ​វា​នឹង​អាច​ផ្តល់​សញ្ញា​Bip Bip ក្នុង​រយៈពេល​៣០ថ្ងៃ។ ឥលូវ​នៅ​សល់​ពេល​តែ​ជាង​១០​ថ្ងៃ​ទៀត ប៉ុណ្ណោះ ដែល​ប្រអប់​ខ្មៅ​អាច​បញ្ជូន​សញ្ញា​ទៅ​ខាងក្រៅ ក្នុង​រយៈ​បរិវេណ ២ ទៅ​៣​គីឡូម៉ែត្រ។ ឥលូវនេះ អាមេរិក​កំពុង​បញ្ជូន​នាវា​របស់ខ្លួន ដែល​អូស​ឧបករណ៍​ស្ទង់ ចាប់រក​សញ្ញា​ប្រអប់ខ្មៅ នៅក្នុង​ទឹក។ គឺ​ឧបករណ៍​ស្ទង់​របស់​អាមេរិក​ដ៏​មាន​​ប្រសិទ្ធិភាព​នេះ​ហើយ ដែល​គេ​បាន​ប្រើ​ដើម្បី​រក​ប្រអប់ខ្មៅ​របស់​យន្តហោះ Air France ដែល​បាន​ធ្លាក់​ចូល​ជ្រៅ​ក្នុង​មហាសមុទ្រ​អាត្លង់ទិក កាលពី​ឆ្នាំ ២០០៩។

ក្នុងករណី​ដែល​ប្រអប់ខ្មៅ​លែង​បញ្ជូន​សញ្ញា នោះ គេ​នៅ​អាច​ប្រើ​ឧបករណ៍​ស្ទង់​ទំនើបៗ ដូចជា​នាវាមុជទឹក​ជាដើម ដើម្បី ស្វែងរក​ប្រអប់ខ្មៅ ដែល​ផ្ទុក​ទៅដោយ​ព័ត៌មាន​សំខាន់ និង​ដែល​អាច​បញ្ជាក់​ពី​មូលហេតុ​ដែល​ធ្វើ​ឲ្យ​យន្តហោះ បាន​ប្តូរទិសដៅ​ហោះហើរ​របស់ខ្លួន និង​ធ្លាក់​ក្នុង​ទឹក​សមុទ្រ។ នៅ​ត្រង់​ចំណុចនេះ គេ​បារម្ភថា ប្រអប់ខ្មៅ ដែល​ថត​សំឡេង​នៅក្នុង​បន្ទប់​បើកបរ ​នឹង​អាច​មិន​ផ្តល់​ព័ត៌មាន​អ្វី​ធំដំ។ ទីមួយ គឺ​វា​អាច​ថត​សំឡេង​បាន​តែ​ពីរម៉ោង។ ទីពីរ​ទៀត គឺ​គេ​ខ្លាច​ថា វាត្រូវ​គេ​លុបចោល​ទាំងអស់ ឬ​មិន​ថត​បាន​អ្វី​ទាំងអស់ ក្នុងករណី​មាន​មនុស្ស មាន​ចេតនា​បិទ កាច់ផ្តាច់​ភ្លើង​របស់​​ប្រអប់ខ្មៅ។ ​​កាល​ពី​ជាង​១០​ថ្ងៃ​មុន នាយករដ្ឋមន្រ្តី​ម៉ាឡេស៊ី​បាន​និយាយ​ថា យន្តហោះម៉ាឡេស៊ី​​ត្រូវ​បាន​បញ្ជា​ដោយ​មនុស្ស​ដែល​មាន​ជំនាញ​ខាង​ការហោះហើរ​និង​ដែល​ មាន​ចេតនា​បើក​យន្តហោះ​ចេញ​ខុស​ពី​គន្លង​ដែល​ត្រូវ​ធ្វើ​ដំណើរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI