ទស្សនៈព្រឹត្តិការណ៍ពិភពលោក

អន្តោប្រវេសន៍​អឺរ៉ុប ៖ នយោបាយ​ខ្លួន​ទី​ពឹង​ខ្លួន !

សំឡេង ០៤:១៣
ទាហាន​ដឹក​សាក​សព​ជន​អន្តោប្រវេសន៍​​លិច​ទូក​ នៅ​កំពង់​ផែLampedusa ប្រទេស​អ៊ីតាលី ថ្ងៃទី​៦​តុលា ២០១៣
ទាហាន​ដឹក​សាក​សព​ជន​អន្តោប្រវេសន៍​​លិច​ទូក​ នៅ​កំពង់​ផែLampedusa ប្រទេស​អ៊ីតាលី ថ្ងៃទី​៦​តុលា ២០១៣ REUTERS/Antonio Parrinello

សោកនាដកម្ម​លិច​ទូក នៅ​ជិត​កោះ​អ៊ីតាលី​ ដែល​មាន​ជនភៀស’ខ្លួនជាង​បី​រយ’នាក់​ស្លាប់​ នៅ​តែ​បន្ត​ដាក់​សម្ពាធ​យ៉ាង​ខ្លាំង​លើ​សហភាព​អឺរ៉ុប។ ដំណើរ​ទស្សនកិច្ច​របស់​ប្រធាន​គណៈកម្មការ​អឺរ៉ុបនៅកោះ​អ៊ីតាលី​ ថ្ងៃ​ពុធ​ម្សិលមិញ ប្រព្រឹត្ត​ទៅ​ក្រោម​សម្រែក​រិះគន់​​របស់​បណ្តាជន​ដងតាម​ផ្លូវ។ សោកនាដកម្មនេះ​ក៏​បាន​​​ឆ្លុះ​បញ្ចាំង​យ៉ាងច្បាស់ ​អំពី​ភាព​កំខ្សោយ​ ផ្នែក​នយោបាយ​​​គ្រប់គ្រង​អន្តោប្រវេសន៍​ខុស​ច្បាប់ នៅ​អឺរ៉ុប​។ ​អន្តោប្រវេសន៍​ ដែល​បាន​និង​កំពុង​ចែក​អឺរ៉ុប​ជាពីរ រវាង​ក្រុម​ប្រទេស​ដែល​នៅ​ជាប់​ព្រំដែន និង​ក្រុមប្រទេស​ដែល​នៅ​ឆ្ងាយ ឱ្យ​មើល​ឃើញ​ផ្ទុយ​គ្នា​ពី​ប្រយោជន៍​នៃ​ការ​បង្កើត​ច្បាប់​អន្តោប្រវេសន៍​រួម។

ផ្សាយពាណិជ្ជកម្ម

នៅ​រាល់​ពេល​មាន​សោកនាដកម្ម​លិច​ទូកជន​ភៀស​ខ្លួន​ម្តងៗ សហភាព​អឺរ៉ុប និង​ប្រទេស​ជា​សមាជិក​ តែង​ទម្លាក់​កំហុស​ដាក់​ទៅ​គ្នា​ទៅ​វិញ​ទៅ​មក។ សោកនាដកម្ម​នៅក្បែរ​កោះ​អ៊ីតាលី កាលពី​សប្តាហ៍​មុន ហាក់​បាន​ដាស់​អឺរ៉ុប​ ឱ្យ​នឹក​ឃើញ​​ជា​ថ្មី​ដល់​បញ្ហា​អន្តោប្រវេសន៍​ឆ្លង​សមុទ្ទនេះ​ ប៉ុន្តែ​​សំណាង​នៃ​ការ​សម្រេច​រក​វិធាន​ប្រកប​ដោយ​ប្រសិទ្ធិភាព​​ទំនង​ជា​មិន​អាច​ចេញ​ទៅ​កើត​ទេ ព្រោះ សហភាព​អឺរ៉ុ​ប​ គ្មាន​នយោបាយ​​អន្តោប្រវេសន៍​រួម ការ​ព្រមព្រៀង​ជួយ​សង្គ្រោះ​​និង​រក្សា​សុវត្ថិភាព​ក៏​គ្មាន​ចម្លើយ​វិជ្ជមាន​រួម​ដែរ។

 
តាម​ការពិត​ទិស​ដៅចម្បង​​របស់​ជន​អន្តោប្រវេសន៍​អាហ្វ្រិក​-អារ៉ាប-អាស៊ី​(តិចតួច) គឺ​ប្រទេស​អង់គ្លេស ស៊ុយអែត អាល្លឺម៉ង់ ពោល​គឺ​បណ្តា​ប្រទេស​ជា​សមាជិក​ នៅ​ប៉ែក​ខាង​ជើងអឺរ៉ុប​។ ប៉ុន្តែ ​គឺ​​ប្រទេស​ដែល​មាន​ទីតាំង​នៅ​ភាគ​ខាង​ត្បូង តាម​បណ្តោយ​ឆ្នេរ​សមុទ្ទ​មេឌីទែរ៉ាណេ មាន​ជា​អាទិ៍​ប្រទេស អេស្ប៉ាញ ​អ៊ីតាលី ម៉ាលត៍ ក្រិក ស៊ីប​ ឬ​ក្រូអាស៊ី ជា​អ្នក​ប្រឈម​ខ្លាំង​នឹង​រលក​អន្តោប្រវេសន៍​ជាងគេ​។ ប្រទេស​ខាង​ជើង​ទទួល​គិត​គូរ​បញ្ហា​អន្តោប្រវេសន៍ ដោយ​ឈរ​លើ​គោលការណ៍​ស្ម័គ្រ​ចិត្តិ​​តែប៉ុណ្ណោះ។

ទន់​ខ្សោយ​ ព្រោះ​មាន​​វិបត្តិ​សេដ្ឋកិច្ច​ បណ្តា​ប្រទេស​ភាគ​ខាង​ត្បូង​​សហភាព​អឺរ៉ុបបាន​ក្លាយ​ជា​សមរភូមិ ជួរ​មុខប្រឈម​នឹង​ ​រលក​អន្តោប្រវេសន៍​បុក​ខ្លាំង​ក្រោយ​​បដិវត្តិ​អារ៉ាប​ និង​សង្គ្រាម​នៅ​តំបន់​ដើម​បូព៌ា (ស៊ីរី)។ កោះ​អ៊ីតាលី​​មួយ​ចំនួន​ ជាក់​ស្តែង កោះ​ឡាំប៉េឌូសា ដែលស្ថិត​​នៅ​ក្បែរ​ទ្វីប​អាហ្វ្រិក​ជាងគេ ទទួល​​ជន​អន្តោប្រវេសន៍​ប្រថុយ​ជីវិត​ឆ្លងទូក​កាត់​សមុទ្ទ កើន​ឡើង​មួយ​ទ្វេ​ជាពីរ​។ ប៊ុលហ្ការី សមាជិក​ថ្មី ត្រូវ​ប្រឈម​មុខនឹង​ចលនា​ជន​ភៀសខ្លួន​​ឆ្លង​កាត់​សមុទ្ទ​ខ្មៅ​ មក​ពី​ប្រទេស​តួកគី ព្រោះ​ក្រិក​បាន​​​ចាក់​ស៊ីម៉ង់​បិទ​ទ្វារ​ព្រំដែន។

ក្រោយ​សោកនាដកម្ម​នៅ​កោះ​អ៊ីតាលី​នេះ​​ភ្លាម រដ្ឋមន្ត្រី​ក្រសួង​មហាផ្ទៃ​សហភាព​​អឺរ៉ុប បាន​ជួប​ប្រជុំ​គ្នា​នៅ​ថ្ងៃ​អង្គារ​ទី ៨ តុលា​ ដើម្បី​ពិភាក្សា​អំពី​នយោបាយគ្រប់គ្រង​​អន្តោប្រវេសន៍​អឺរ៉ុប​នេះ ប៉ុន្តែ​​សំណូម​ពរ​របស់​បណ្តា​ប្រទេស​នៅ​ព្រំប្រទល់​ម៉េឌីទែរ៉ាណេ ដែល​ចង់​បាន​ការ​សហការ​ពី​បណ្តាប្រទេស​​​ឆ្ងាយ​ពី​ព្រំ​ប្រទល់​ទំនង​​មិន​ងាយ​សម្រេច​ឡើយ។ មូល​ហេតុ​មក​ពី​បណ្តា​ប្រទេស​នៅភាគខាង​ជើង​ទាំង​អស់​នោះ កំពុង​ប្រឈម​នឹង​ចរន្ត​ជាតិ​និយម។ ចលនា​ជាតិនិយម​របស់​បក្ស​នយោបាយ​តែង​យក​បញ្ហា​អន្តោប្រវេសន៍​មក​​ធ្វើ​ជា​លេស​ ប្រឈម​នឹង​អ្វី​ដែល​គេ​ហៅ​ថា « ការ​ឈ្លានពាន​បរទេស » បង្ក​អស្ថិរភាព​​ដល់​រដ្ឋាភិបាល និង​ដល់​ប្រទេស​ជាតិ។ ម្យ៉ាង​វិញ​ទៀត​ អាជ្ញាធរ​គ្រប់​ប្រទេស​ទាំង​នោះ​មិន​ចង់​ទទួល​ជន​អន្តោប្រវេសន៍​ថ្មី​បន្ថែម​ទៀត​ទេ ព្រោះ​ខ្លាច​រាលដាល​ឱ្យ​មាន​ចលនា​ជាតិ​និយម​ជ្រុល​​ស្ទុះ​ឡើង។ ឯ​គណៈកម្មការ​អឺរ៉ុប​បាន​ត្រឹ​ម​រិះគន់​ប៉ោចៗ​ ថា​ប្រទេស​នេះ ឬ​ប្រទេស​នោះ​អាត្មានិយម​ និង​ទាមទារ​ឱ្យ​មាន​ច្បាប់​អន្តោប្រវេសន៍​អឺរ៉ុប​រួម​ ស៊ីចង្វាក់ និង​មាន​ប្រសិទ្ធិភាព​ រាប់​សិប​ឆ្នាំ​មក​ហើយ ប៉ុន្តែ​ច្បាប់​នៅ​តែ​ជា​ច្បាប់ ក្នុង​អនុវត្ត​ជាក់​ស្តែង គឺ​ ក្បាល​​នរណា​ សក់​អ្នក​នោះ ! មាន​ន័យ​ថា​ប្រទេស​នៅ​តាម​​ព្រំ​ប្រទល់​អឺរ៉ុប​ទទួល​ខុស​ត្រូវ​ម្នាក់​ឯង​ សិក្សា​ការ​សុំ​សិទ្ធិ​ជ្រក​កោន​របស់​​អន្តោប្រវេសន៍​ដែល​ប៉ូលិស​​ប្រទេស​នោះ​ចាប់​បាន។

គេ​អាច​និយាយ​បាន​ថា​អឺរ៉ុប​គ្មាន​ច្បាប់រួម​លើ​ផ្នែកអន្តោប្រវេសន៍​ តែ​អឺរ៉ុប​មាន​​មធ្យោបាយ​គ្រប់​គ្រង​និង​ត្រួត​ពិនិត្យ​ព្រំដែន​សហភាព​ ឬ​អាច​ជួយ​​ជន​ភៀស​ខ្លួន​ជាប់​កុន​គ្រោះ​ថា្នក់ ព្រោះ​អឺរ៉ុប​មាន​ស្ថាប័ន​មួយ​ ទទួល​បន្ទុក​គ្រប់គ្រង​ព្រំដែន​រួម​ឈ្មោះ Frontex និង​មាន​ប្រព័ន្ធ​ការពារ​អឺរ៉ុប Eurosur ដែល​នឹងត្រូវ​ជា​ធរមាន​នៅ​ថ្ងៃ​ទី ២​ខែ​ធ្នូ​ខាង​មុខ។ ប៉ុន្តែ​គួរ​ឱ្យ​សោកស្តាយ​ជា​ថ្មី​ម្តង​ទៀត ! ស្ថាប័ន​នេះ​គ្មាន​ថវិកា​ គ្រប់គ្រាន់​ សម្រាប់​សម្រេច​កម្មវត្ថុ​ទប់​ទល់​នឹង​រលក​អន្តោប្រវេសន៍​​យ៉ាង​គំហុក​នោះ​ទេ។ Frontex រក​តែ​នាវា​មួយ​ប្រចាំ​សមុទ្ទ​មេឌីទែរ៉ាណេ​គ្មាន​ផង ! ចំណែក​ប្រព័ន្ធ​ Eurosur នាពេល​អនាគត​វិញ​ មាន​បំពាក់​ទៅ​ដោយ​បច្ចេកវិទ្យា និង​សម្ភារៈ​ទំនើបៗ អាច​ចាប់​ វែក​រក​ព័ត៌មាន អត្តសញ្ញាណ ឬ​សង្គ្រោះ​ទូក​ផ្ទុក​ជនភៀសខ្លួន​​បានរហ័ស​មែន ប៉ុន្តែ​គ្មានការ​យល់​ព្រម​ជា​ឯកច្ឆ័ន្ទ​ ពី​សំណាក់​ប្រទេស​ជា​សមាជិក និង​មិន​ទាន់​អាច​ដាក់ឱ្យ​ដំណើរ​ការ​បាន​ទេ។ លើស​ពី​នេះ​ក្រុម​អ្នក​រិះគន់​ មើល​ឃើញ​​ប្រព័ន្ធនេះ​ ជា​រនាំង​​​បន្ថែមមួយ​ជាន់ទៀត​​ទប់​នឹង​ចលនា​អន្តោប្រវេសន៍ និង​ជា​​​​មធ្យោបាយ​បញ្ចៀស​អឺរ៉ុប​ឱ្យខ្វល់​ឬ​ចោទ​សួរ​ ​សំណួរគន្លឹះមួយ​ថា ហេតុ​អ្វី​បាន​ជា​ជន​អន្តោប្រវេសន៍​ត្រូវ​ការ​រត់មក​អឺរ៉ុប ?!

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI