អានតួអត្ថបទ
កម្ពុជា

ប្រតិ​កម្ម​ផ្ទុះ​ឡើង​ពេល​ដែល​កម្ពុជា​ចុះ​ហត្ថ​លេខា​ទទួល​យក​ជន​ភៀស​ខ្លួន​ពី​អូស្ត្រាលី

សង្គម​ស៊ីវិល និង​ប្រជា​ជន​នៅ​ក្នុង​សហគមន៍​បុរីកីឡា បឹង​កក់ ថ្មគោល ប្រតិ​កម្ម​នឹង​ការ​សម្រេច​របស់​រដ្ឋាភិបាល​កម្ពុជា​ ក្នុង​ការ​ផ្តល់​ទី​ជំរក​ដល់​ជន​ភាស​ខ្លួន​អូស្រ្តាលី។
សង្គម​ស៊ីវិល និង​ប្រជា​ជន​នៅ​ក្នុង​សហគមន៍​បុរីកីឡា បឹង​កក់ ថ្មគោល ប្រតិ​កម្ម​នឹង​ការ​សម្រេច​របស់​រដ្ឋាភិបាល​កម្ពុជា​ ក្នុង​ការ​ផ្តល់​ទី​ជំរក​ដល់​ជន​ភាស​ខ្លួន​អូស្រ្តាលី។ @RFI/ Siv Channa
ដោយ៖ ស៊ុន មេសា
២៣ នាទី

នៅ​ថ្ងៃ​សុក្រ​ទី​២៦​នេះ រដ្ឋា​ភិបាល​កម្ពុជា​និង​ចុះ​ហត្ថ​លេខា​ជា​មួយ​រដ្ឋា​ភិបាល​អូស្ត្រាលី​ស្តី​ពី​ការ​តាំង​ទីលំ​នៅ​ជន​ភៀស​ខ្លួន​ពី​អូស្ត្រាលី​មក​កាន់​កម្ពុជា​។ ទន្ទឹម​នឹង​នេះ ប្រិត​កម្ម​ពី​ប្រជា​ពលរដ្ឋ និង​អង្គការ​សង្គម​ស៊ីវិល​បាន​ផ្ទុះ​ឡើង​ប្រឆាំង​នឹង​ការ​តាំង​ពី​លំ​នៅ​នេះ​។ ពល​រដ្ឋ​បាន​លើក​ឡើង​ថា​កម្ពុជា​មិន​អាច​ទទួលបាន​យក​បាន​ទេ​ព្រោះ​កម្ពុជា​ជា​ប្រទេស​ក្រី​ក្រ​។

ផ្សាយពាណិជ្ជកម្ម

ប្រជា​ពលរដ្ឋ ព្រះ​សង្ឃ សកម្មជន​ដីធ្លី និង​សង្គម​ស៊ីវិល នៅ​ព្រឹក​ថ្ងៃ​សុក្រ​នេះ បាន​បញ្ចេញ​ប្រតិកម្ម​ប្រឆាំង​នឹង​ការ​ចុះ​ហត្ថ​លេខា​រវាង​រដ្ឋា​ភិបាល​កម្ពុជា​និង​អូស្ត្រាលី​ស្តី​ពី​ពី​ការ​តាំង​ពី​លំ​នៅ​ជន​ភៀស​ខ្លួន​ពី​ប្រទេស​អូស្ត្រាលី​មក​កាន់​កម្ពុជា​។ ការ​បញ្ចេញ​ប្រតិកម្ម​ដែល​មាន​ទាំង​ការ​ប្រមូល​ផ្តុំ​គ្នា​ដើរ​ដង្ហែ​ក្បួន​លើក​បដា​តវ៉ា និង​ការ​ដាក់​ញត្តិ​រួម​ទាំង​សេច​ក្តី​អំពាវ​ផង​បាន​ផ្ទុះ​ឡើង​តែ​ប៉ុន្មាន​ម៉ោង​ប៉ុណ្ណោះ​មុន​ពេលដែល​រដ្ឋ​មន្ត្រី​ក្រសួង​មហា​ផ្ទៃ​កម្ពុជា​លោក ស ខេង និង​ចុះ​ហត្ថ​លេខា​លើ​អនុស្ស​រណៈ​យោគ​យល់​ជា​មួយ​រដ្ឋ​មន្ត្រី​ជន​អន្តោ​ប្រវេសន៍​អូស្ត្រាលី លោក ស្កុត ម៉ូរីសុន នៅ​រសៀល​ថ្ងៃ​សុក្រ​នេះ។

 
អ្នក​តវ៉ា​ទាំង​អស់​មក​ពី​បណ្តាញ​សហគមន៍​បឹង​កក់ ថ្ម​គោល បណ្តាញ​ព្រះ​សង្ឃ​ឯក​រាជ្យ និង​សម្ព័ន្ធ​និស្សិត​បញ្ញ​វន្ត​កម្ពុជា​ផង​ដែរ។ តាំង​ពី​ម៉ោង​ប្រមាណ​ជាង​៧​ព្រឹក​ក្រុម​អ្នក​តវ៉ា បាន​ប្រមូល​ផ្តុំ​គ្នា​នៅ​ជិត​អគារ​រដ្ឋ​សភា ស្ថាន​ទូត​អូស្ត្រាលី និង​ក្រសួង​មហាផ្ទៃ។ តំណាង​អ្នក​តវ៉ា​ត្រូវ​បាន​អនុញ្ញាតិ​ឱ្យ​ចូល​ដាក់​ញត្តិ​បដិ​សេធ។ ញត្តិ​ទាំង​បី​ច្បាប់​មាន​ខ្លឹម​សារ​ដូច​ៗ​គ្នា​ថា ការ​ទទួល​យក​ជន​ភៀស​ខ្លួន​អូស្ត្រាលី​គឺ​ជា​បន្ទុក​ដល់​សង្គម​កម្ពុជា​ព្រោះ​ថា បញ្ហា​ចារ​កម្ម ភេរវ​កម្ម និង​បញ្ហា​អសន្តិ​សុខ ហើយ​ពួក​គេ​ក៏​បាន​ព្រួយបារម្ភ​ខ្លាច​ជន​ភៀស​ខ្លួន​ទាំង​នោះ នឹង​ក្លាយ​ជា​ឈ្នាន់​របស់​រដ្ឋា​ភិបាល​ខ្មែរ​ដើម្បី​កំចាត់​អ្នក​តវ៉ា។ 

ទន្ទឹម​នឹង​នោះ គណៈកម្មការ​ប្រ​ព្រឹត្តិ​កម្ម​នៃ​អង្គការ សមាគម​ការពារ​សិទ្ធ​មនុស្ស​កម្ពុជា (CHRAC) ក៏​បាន​ចេញ​សេចក្តី​អំពាវ​នាវ​មួយ​ទៅកាន់​រដ្ឋាភិបាល​កម្ពុជា​និង​អូស្ត្រាលី​ផងដែរ។ ក្រុម​សង្គម​ស៊ីវិល​បានបង្ហាញ​ចម្ងល់​របស់​ខ្លួន​ទាក់​ទង​នឹង​ចំនួន​ជន​ភៀស​ខ្លួន ការ​ជ្រើស​រើស​ជន​ភៀស​ដោយ​ស្មគ្រ​ចិត្ត​មកកាន់​កម្ពុជា និង​ការ​បើកចំហរ​នូវ​ជំនួយ​ដែល​រដ្ឋា​ភិបាល​អូស្ត្រាលី​ផ្តល់ឱ្យ​កម្ពុជា​ជាដើម។ ជាមួយ​ចម្ងល់​ដូចនេះ CHRAC បាន​ស្នើ​ឱ្យ​ភាគី​ទាំង កុំ​ទាន់​ចុះ​ហត្ថលេខា​លើ​MOU ដោយ​ត្រូវ​រង់ចាំ​ការ​សិក្សា និង​ព័ត៌មាន​ច្បាស់​លាស់​ពី​គណបក្ស​នយោបាយ និង​សង្គម​ស៊ីវិល​ជាមុន​សិន។ សូម​កត់​សំគាល់​ថា នៅ​មិនទាន់​មាន​ការ​បញ្ជាក់​ណា​មួយ​ជា​ផ្លូវ​ការ​ពី​រដ្ឋា​ភិបាល​កម្ពុជា​នៅ​ឡើយ​នោះ​ទេ អំពី​ព័ត៌​មាន​លំអិត​ទាក់ទង​នឹង​ហេតុ​ផល និង​ផល​ប្រយោជន៍​នៃ​ការ​ព្រម​ទទួល​យក​ជន​ភៀស​ខ្លួន​ពី​អូស្ត្រាលី​នេះ។

ក្នុង​បទ​សម្ភាសន៍​ជា​មួយ​សារ​ព័ត៌មាន​អូស្ត្រាលី រដ្ឋ​មន្ត្រី​អន្តោប្រវេសន៍​លោក ស្កុត​ម៉ូរីសុន បាន​បញ្ជាក់ថា រដ្ឋាភិបាល​អូស្ត្រាលី​នឹង​ចំណាយ​ប្រាក់​មក​ឱ្យ​រដ្ឋា​ភិបាល​កម្ពុជា​ប្រមាណ​៣៥​លាន​ដុល្លា​អាមេរិក​សម្រាប់​រយៈ​ពេល​៤​ឆ្នាំ។ ហើយ​លោក​បាន​បន្ត​ថា ជន​ភៀស​ខ្លួន​ក្នុង​ជំរំ​របស់​អូស្ត្រាលី​នោះ ប្រមាណ១ពាន់​២​រយ​នាក់ ហើយ​ភាគ​ច្រើន​ជា​ជន​ភៀស​ខ្លួន​មក​ពី​អាស៊ី​ខាង​ត្បូង និង​មជ្ឈឹម​បូព៌ា។ ប៉ុន្តែ​លោក ម៉ូរីសុន បាន​បញ្ជាក់​ថា ជន​ភៀស​ខ្លួន​ទាំង​នោះ​នឹង​អាច​មក​តាំង​ទី​លំ​នៅ​ថ្មី​នៅ​កម្ពុជា​ក្នុង​ករណី​ស្ម័គ្រ​ចិត្ត​តែប៉ុណ្ណោះ​។ ប៉ុន្តែ​លោក ស ខេង រដ្ឋ​មន្ត្រី​ក្រសួង​មហា​ផ្ទៃ​ដែល​ជា​អ្នក​ចុះ​ហត្ថ​លេខា​កាល​ពី​ម្សិល​មិញ បាន​បញ្ជាក់​ថា កម្ពុជា​នឹង​សាក​ល្បង​យក​ជន​ភៀស​ខ្លួន​ទាំង​នោះ​តែ​៤​ឬ​៥​នាក់​តែ​ប៉ុណ្ណោះ​។ ហើយ​លោក​ថា រដ្ឋា​ភិបាល​នឹង​បន្ត​សិក្សា​លំអិត​ពី​កិច្ច​ព្រម​ព្រៀង​នេះ ក្នុង​ន័យ​ផល​ប្រយោជន៍​កម្ពុជា​។ តំណាង​រាស្ត្រ​គណ​បក្ស​សង្គ្រោះ​ជាតិ លោក សុន ឆ័យ បាន​បញ្ជាក់​ថា លោក​នឹង​សរសេរ​លិខិត​ទៅកាន់​រដ្ឋា​ភិបាល​កម្ពុជា​ស្នើ​សុំ​ឱ្យ​មាន​ការ​ពន្យល់​ពី​ការ​យល់​ព្រម​ទទួល​តាំង​ទី​លំនៅ​នេះ​។ ព្រោះ​ថា​រដ្ឋា​ភិបាល​មិន​បាន​ពិភាក្សា​ឆ្លង​សភា​នោះ​ទេ។

បើ​ទោះ​បីជា​មាន​ប្រតិ​កម្ម​ប្រឆាំង​តវ៉ា​ពី​សង្គម​ស៊ីវិល និង​ប្រជា​ពលរដ្ឋ​ក៏ដោយ កា​ចុះហត្ថ​លេខា​ព្រមព្រៀង​រវាង​រដ្ឋាភិបាល​កម្ពុជា និង​អូស្ត្រាលី​នៅតែ​បន្ត​ដោយ​គ្មាន​ការកែប្រែ​ឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ