កម្ពុជា

សង្គមស៊ីវិល​ទាមទារ​ជាថ្មី​ឲ្យ​បង្កើត​ស្ថាប័ន​សិទ្ធិមនុស្ស​ជាតិឯករាជ្យ​នៅ​កម្ពុជា​

តំណាង​ពិសេស​អ.ស.ប.​ទទួល​បន្ទុក​សិទ្ធិមនុស្ស ពេល​ជួប​ជាមួយ​នាយករដ្ឋមន្រ្តី​ហ៊ុន សែន
តំណាង​ពិសេស​អ.ស.ប.​ទទួល​បន្ទុក​សិទ្ធិមនុស្ស ពេល​ជួប​ជាមួយ​នាយករដ្ឋមន្រ្តី​ហ៊ុន សែន ©វណ្ណារ៉ា
ដោយ៖ ប៉ែន បូណា
១៤ នាទី

សកម្មជន​សិទ្ធិមនុស្ស​របស់​អង្គការ​សង្គម​ស៊ីវិល​ជាច្រើន ​បានចេញ​សេចក្តីថ្លែងការណ៍​រួមមួយ​នៅ​ល្ងាច​ថ្ងៃ​ព្រហស្បតិ៍​ទី ២៨ វិច្ឆិកា​ ដោយ​ទាមទារ​ឲ្យ​មាន​ស្ថាប័ន​សិទ្ធិមនុស្ស​ឯករាជ្យ​ថ្នាក់​ជាតិ​មួយ ​នៅ​កម្ពុជា។ ក្រុម​អង្គការសិទ្ធិមនុស្ស​ទាំង​នោះ​យល់ឃើញថា ​ស្ថាប័ន​សិទ្ធិ​មនុស្ស​ឯករាជ្យ​ថ្នាក់ជាតិ​នេះ​ មាន​សារៈសំខាន់​សម្រាប់​ប្រទេស​កម្ពុជា​ ខណៈដែល​បញ្ហា​សិទ្ធិមនុស្ស​ជា​ចំណុច​ប្រឈម​ជាប្រចាំ​មួយ​របស់​កម្ពុជា។

ផ្សាយពាណិជ្ជកម្ម

នៅក្នុង​សេចក្តីថ្លែងការណ៍​រួម​របស់ខ្លួន អង្គការ​សមាគម​ដែល​ធ្វើការ​ងារ​ខាង​សិទ្ធិមនុស្ស​ជាង១០ស្ថាប័ន​ បាន​កត់សម្គាល់ថា កម្ពុជា​គួរតែមាន​ស្ថាប័ន​សិទ្ធិមនុស្ស​ឯករាជ្យ​ថ្នាក់ជាតិ​មួយ​ជា​ចាំបាច់​ ដើម្បី​ឲ្យ​ស្របទៅនឹង​គោលការណ៍​កិច្ចព្រមព្រៀង​ទីក្រុង​ប៉ារីស ​ស្តីពី​ស្ថាប័ន​ជាតិ​សិទ្ធិមនុស្ស ហើយ​វា​ក៏​ជា​សេចក្តីត្រូវការ​ចាំបាច់រ​បស់​កម្ពុជា​ដែល​កំពុង​ប្រឈម​នឹង​បញ្ហា​សិទ្ធិមនុស្ស​ជាប្រចាំ។

លោក ប៉ា ងួនទៀង អនុប្រធាន​ក្រុមការងារ​ដើម្បី​បង្កើត​យន្តការ​សិទ្ធិមនុស្ស​ជាតិ​និង​អាស៊ាន​បាន​ប្រាប់​វិទ្យុ​បារាំង​អន្តរជាតិ​ថា ក្រុម​សង្គម​ស៊ីវិល​ធ្លាប់​បានធ្វើការ​ជាមួយ​គណៈកម្មាធិការ​សិទ្ធិមនុស្ស​របស់​រដ្ឋាភិបាល​ជាច្រើន​ឆ្នាំ​មកហើយ​ ក្នុងការ​តាក់តែង​សេចក្តី​ព្រាង​ច្បាប់​ស្តីពី​ការបង្កើត​យន្តការ​សិទ្ធិមនុស្ស​ឯករាជ្យ​នេះ។ ប៉ុន្តែ កិច្ចការ​នេះ​នៅ​មិនទាន់​ជឿនលឿន​ទៅមុខ​នៅឡើយ​ទេ។ កាលពី​ថ្ងៃ ២៨ វិច្ឆិកា ក្រុមការងារ​សង្គម​ស៊ីវិល​ក៏បាន​ជួបជុំគ្នា​ក្នុង​សិក្ខាសាលា​ពិគ្រោះ​យោបល់​មួយ ​ដើម្បី​ជជែក​អំពី​បញ្ហា​នេះ​ឡើងវិញ។

នៅ​មិនទាន់មាន​ចម្លើយ​តប​ពី​រដ្ឋាភិបាល​យ៉ាងណា​នៅឡើយ​ទេ​ចំពោះ​បញ្ហា​នេះ ប៉ុន្តែ គេ​នៅ​ចាំបាន​ថា លោកនាយក​រដ្ឋមន្ត្រី ហ៊ុន សែន ធ្លាប់បាន​ថ្លែង​គាំទ្រ​ឲ្យ​មាន​ស្ថាប័ន​ជាតិ​សិទ្ធិមនុស្ស​ឯករាជ្យ​មួយ​នៅ​កម្ពុជា។ ប្រមុខ​រដ្ឋាភិបាល​បាន​ថ្លែង​ដូច្នេះ​នៅក្នុង​សន្និសីទ​អន្តរជាតិ​ស្តីពី​ការបង្កើត​ស្ថាប័ន​សិទ្ធិមនុស្ស​ជាតិ​នៅ​កម្ពុជា ​ដែល​បាន​បើក​ធ្វើ​ក្នុង​ខេត្តសៀមរាប ​កាលពី​ឆ្នាំ២០០៦ ។

ទោះជា​យ៉ាងនេះ​ក្តី រហូតមកទល់​ពេលនេះ ស្ថាប័ន​សិទ្ធិមនុស្ស​ឯករាជ្យ​ថ្នាក់ជាតិ​នៅ​មិនទាន់​កើតចេញ​ជា​រូបរាង​នៅឡើយ​ទេ។

គួរ​បញ្ជាក់ថា រដ្ឋាភិបាល​ក៏បាន​បង្កើត​គណៈកម្មាធិកា​រ​សិទ្ធិមនុស្ស​របស់ខ្លួន​មួយ​ដែរ ក៏ប៉ុន្តែ ស្ថាប័ន​នេះ​ត្រូវបាន​ក្រុម​សង្គម​ស៊ីវិល​មើលឃើញថា​មិន​ឯករាជ្យ​ទេ។ លោកស្រី ពុង ឈី​វ​កេក នាយិកា​អង្គការ​លីកាដូ និង​ជា​ប្រធាន​ក្រុមការងារ​ដើម្បី​បង្កើត​យន្តការ​សិទ្ធិ​មនុស្សជាតិ និង​អាស៊ាន បាន​មានប្រសាសន៍​តាមរយៈ​សេចក្តីថ្លែងការណ៍​ថា ការបង្កើត​ស្ថាប័ន​សិទ្ធិមនុស្ស​មិន​ឯករាជ្យ ​វា​អាក្រ​ក់ជាង​ការមិន​បង្កើត​ស្ថាប័ន​ឯករាជ្យ​ទៅទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI