សហចៅក្រមស៊ើបអង្កេតជាតិនិងអន្តរជាតិប៉ះទង្គិចគ្នាក្នុងសំណុំរឿង០០៣និង០០៤
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃអង្គារនេះ សហចៅក្រមស៊ើបអង្កេតអន្តរជាតិបម្រុង លោក Laurent Kasper-Ansermet បានចេញប្រកាសមួយថា លោក និងសហចៅក្រមស៊ើបអង្កេតជាតិក្នុងតុលាការខ្មែរក្រហម នឹងខិតខំ ពន្លឿនលើដំណើរការស៊ើបអង្កេត ក្នុងសំណុំរឿង០០៣ និង០០៤។ ក៏ប៉ុន្តែភ្លាមៗ នៅថ្ងៃនេះ លោកសហចៅក្រមស៊ើបអង្កេតជាតិ យូ ប៊ុនឡេង បានចេញប្រកាសថា លោក Laurent Kasper-Ansermet មិនទាន់ត្រូវបានតែងតាំងជាផ្លូវការ ជាចៅក្រមស៊ើបអង្កេតអន្តរជាតិថ្មី ជំនួសលោក Siefried Blunk ដែលបានលាលែងកាលពីខែតុលាទេ។ ដូច្នេះរាល់ចំណាត់ការរបស់លោក Laurent Kasper-Ansermet មិនមានសុពលភាព ផ្លូវច្បាប់ទេ។
សហចៅក្រមស៊ើបអង្កេតអន្តរជាតិបម្រុង លោក Laurent Kasper-Ansermet បានចេញសេចក្តីប្រកាសនៅថ្ងៃទី៦ធ្នូ ឆ្នាំ២០១១ ថា បន្ទាប់ពីបានបំពេញការងារតាមអាណត្តិរបស់ខ្លួន តាមមធ្យោបាយពីចម្ងាយពីប្រទេសក្រៅ ចាប់តាំងពីថ្ងៃទី១៤ ខែវិច្ឆិកា ឆ្នាំ២០១១ ដោយអនុលោមតាមវិធាន ១៤(៦) នៃវិធានផ្ទៃក្នុងរបស់ អ.វ.ត.ក បច្ចុប្បន្នលោកសហចៅក្រមស៊ើបអង្កេតអន្តរជាតិបម្រុង បានបំពេញការងារ នៅការិយាល័យ ក្នុងទីក្រុងភ្នំពេញហើយ។
លោកចៅក្រមស៊ើបអង្កេតអន្តរជាតិបម្រុង បានលើកឡើងថា ក្នុងការគោរពតាមគោលការណ៍ នៃការយកចិត្តទុកដាក់សមស្រប (វិធាន ២១.៤ នៃវិធានផ្ទៃក្នុង) សហចៅក្រមអន្តរជាតិបម្រុង រួមជាមួយនឹងសហចៅក្រមជាតិ នឹងចាត់ចែង ធ្វើកិច្ចស៊ើបសួរ ព្រមទាំងចាត់រាល់វិធានការចាំបាច់នានា ដើម្បីគ្រប់គ្រងការិយាល័យរបស់ខ្លួន។
សេចក្តីប្រកាសក៏បានបញ្ជាក់ថា លោកសហចៅក្រមស៊ើបអង្កេតអន្តរជាតិបម្រុង រួមជាមួយនឹងសហចៅក្រមជាតិ នឹងព្យាយាមផ្ដល់ព័ត៌មានទៅសាធារណជន ឲ្យបានគ្រប់គ្រាន់ អំពីការវិវឌ្ឍន៍សំខាន់ៗ នៅក្នុងសំណុំរឿង ០០៣ និង ០០៤ ដ៏ចម្រូងចម្រាស។
កាលពីថ្ងៃទី២១ ខែកុម្ភៈ ឆ្នាំ២០១១ លោក Laurent Kasper-Ansermet ត្រូវបានតែងតាំង តាមផ្លូវច្បាប់ ជាសហចៅក្រមស៊ើបអង្កេតអន្តរជាតិបម្រុង។ លោកចៅក្រមស៊ើបអង្កេតអន្តរជាតិបម្រុង អះអាងថា តាមច្បាប់ រូបលោកបានទទួលកាន់តួនាទី ដែលចៅក្រម Siefried Blunk បានអនុវត្តរហូតដល់ពេលដែលគាត់បានលាលែងពីតំណែងយ៉ាងលឿន ចាប់ពីថ្ងៃ៣១ ខែតុលា ឆ្នាំ២០១១។
ក៏ប៉ុន្តែសហចៅក្រមស៊ើបអង្កេតជាតិ ក្នុងតុលាការខ្មែរក្រហម លោក យូ ប៊ុនឡេង បានចេញប្រកាសជាលាយលក្ខណ៍អក្សរ នៅថ្ងៃនេះ បដិសេធនូវការលើកឡើងរបស់សហចៅក្រមស៊ើបអង្កេតអន្តរជាតិបម្រុង លោក Laurent Kasper-Ansermet។
លោកចៅក្រមជាតិ យូ ប៊ុនឡេង លើកឡើងថា លោក Laurent Kasper-Ansermet បានចេញសេចក្ដីប្រកាសព័ត៌មាន ដោយមិនមានការពិគ្រោះយោបល់ជាមួយនឹងសហចៅក្រមស៊ើបអង្កេតជាតិ។ ដូច្នេះការលើកឡើងរបស់សហចៅក្រមស៊ើបអង្កេតអន្តរជាតិបម្រុង មិនមានសុពលភាព តាមផ្លូវច្បាប់ឡើយ។
តាមលោកយូប៊ុនឡេង បន្ទាប់ពីសហចៅក្រមស៊ើបអង្កេតអន្តរជាតិ Siegfried Blunk បានលាឈប់ កាលពីថ្ងៃទី៩ ខែតុលា ឆ្នាំ២០១១ រហូតមកទល់ពេលនេះ មិនទាន់មានការតែងតាំងសហចៅក្រមស៊ើបអង្កេតអន្តរជាតិថ្មី ជាផ្លូវការមកជំនួសនៅឡើយទេ។
ទាក់ទងនឹងតុលាការខ្មែរក្រហម នៅថ្ងៃទី៦ធ្នូនេះ តុលាការបានបន្តបើកសវនាការលើសំណុំរឿង០០២ ដោយសួរដេញដោលលោកនួនជា ពីប្រវត្តិបក្សកុម្មុយនិស្តកម្ពុជា។ ប៉ុន្តែបញ្ហាសុខភាព ចាស់ជរា លោកនួនជា អាយុ ៨៥ ឆ្នាំ មិនអាចអង្គុយក្នុងរង្វង់ក្រចកសេះ តតាំងនឹងតុលាការបានទេ នៅព្រឹកមិញ។
សវនាការ បានបន្តដោយការសួរដេញដោលពីប្រវត្តិបដិវត្តខ្មែរក្រហម មុនឡើងកាន់អំណាច ដោយមានអន្តរាគមន៍ពីដើមបណ្តឹងរដ្ឋប្បវេណីមួយរូប ជាជនជាតិភាគតិចនៅខេត្តរតនគិរី។ សវនាការនឹងបន្តទៅថ្ងៃ៧ធ្នូស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ