កម្ពុជា-ជប៉ុន

ក្រុមហ៊ុនជប៉ុន នឹងសាងសង់ផ្សារទំនើប នៅភ្នំពេញ តម្លៃជាង ២០០ លានដុល្លារ

នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានប្រកាសថា ក្រុមហ៊ុនវិនិយោគដ៏ធំរបស់ប្រទេសជប៉ុន នឹងសាងសង់ហាងលក់ទំនិញ ផ្សារទំនើបមួយ នៅទីក្រុងភ្នំពេញ ដោយចំណាយដើមទុនជាង ២០០ លានដុល្លារអាមេរិក។ ដំណើរការសាងសង់ផ្សារទំនើបរបស់ជប៉ុន ដែលនឹងធ្វើឡើង នៅចុងឆ្នាំ២០១២ នេះ នឹងបង្កើតការងារដល់ពលរដ្ឋកម្ពុជាពី ២.០០០ នាក់ ទៅ ៣.០០០ នាក់។

ចុះផ្សាយនៅថ្ងៃ៖ 25/09/2012 - 15:07

ដោយ៖ លី ម៉េងហួរ

ផ្សាយពាណិជ្ជកម្ម

ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅសាកលវិទ្យាល័យ ជាតិគ្រប់គ្រង នៅព្រឹកថ្ងៃទី២៥ ខែកញ្ញា ឆ្នាំ២០១២ លោកនាយករដ្ឋមន្ត្រី ហ៊ុន សែន បានមានប្រសាសន៍ថា គម្រោងវិនិយោគរបស់ជប៉ុនដ៏ធំមួយ លើហាងលក់ទំនិញ នឹងបង្កើតឡើងនៅភ្នំពេញ។ គម្រោងដ៏ធំនោះ នឹងចាប់ផ្តើមសាងសង់នៅខែធ្នូចុងឆ្នាំនេះ ដោយចំណាយទុនវិនិយោគជាង ២០០ លានដុល្លារ។ លោកនាយករដ្ឋមន្ត្រី បានលើកឡើងថា ការវិនិយោគរបស់ជប៉ុនត្រូវការបុគ្គលិកបម្រើការងារ ប្រមាណជា ២.០០០ នាក់ ទៅ ៣.០០០ នាក់។
ក៏ប៉ុន្តែលោកនាយករដ្ឋមន្ត្រី ក៏បានប្រកាសថា កម្ពុជាក៏ត្រូវពង្រឹងធនធានមនុស្សបន្ថែមទៀត លើមុខជំនាញឲ្យបានច្បាស់លាស់ ទើបអាច ទទួលការងារទាំងនោះបាន។

ផ្សារទំនើបរបស់ជប៉ុននោះ នឹងត្រូវសាងសង់នៅជិតស្ថានទូតរុស្ស៊ី មានកម្ពស់ ៤ជាន់។ ការសម្រេចចិត្តវិនិយោគរបស់ជប៉ុន នៅកម្ពុជា ដូច្នេះ ត្រូវបានលោកនាយករដ្ឋមន្ត្រី ហ៊ុនសែន ប្រកាសថា មកពីកម្ពុជាមានបរិយាកាសវិនិយោគអំណោយផល ពិសេសគឺស្ថិរភាពនយោបាយ។ ក្នុងពិធីនៅព្រឹកមិញ លោកនាយករដ្ឋមន្ត្រី ក៏បានប្រកាសគាំទ្រគម្រោងបង្កើតបណ្ណាល័យ នៅតាមពន្ធនាគារ ដើម្បីឲ្យអ្នកទោសបានសិក្សារៀនសូត្រ។

ជាមួយគ្នានោះ លោកនាយករដ្ឋមន្ត្រី ហ៊ុន សែន ក៏បានប្រកាសពីក្តីរំពឹងថា សេដ្ឋកិច្ចនៅតំបន់ជនបទ នៅទូទាំងប្រទេសកម្ពុជា នឹងងើបឡើង ក្រោយពីក្រុមយុវជនស្ម័គ្រចិត្តរាប់ពាន់នាក់ ដែលដឹកនាំដោយកូនប្រុសរបស់លោក វាស់វែង និងផ្តល់ប័ណ្ណកម្មសិទ្ធិដីធ្លីរួចរាល់។ លោកនាយករដ្ឋមន្ត្រី ក៏បានដាក់បទបញ្ជាផ្ទាល់មាត់ទៅកាន់ក្រសួងអប់រំ ត្រូវពិនិត្យ ដើម្បីសាងសង់សាលារៀន នៅទីតាំងដី ដែលទើបផ្តល់ប័ណ្ណកម្មសិទ្ធិថ្មីជាផ្លូវការទាំងនោះ។
លោកនាយករដ្ឋមន្ត្រី ហ៊ុន សែន ក៏បានប្រកាសឲ្យអាជ្ញាធរ និងប្រជាពលរដ្ឋទូទាំងប្រទេស ត្រូវបង្កើនការប្រុងប្រយ័ត្នបន្តទៀត ចំពោះគ្រោះទឹកជំនន់ រាប់ទាំងទឹកភ្លៀង និងរាប់ទាំងទឹកទន្លេ បើទោះបីជានៅពេលនេះ ទឹកបានស្រកចុះក៏ដោយ។

លោកនាយករដ្ឋមន្ត្រី ហ៊ុន សែន បានលើកឡើងថា អាយុជីវិតរបស់លោក ក្នុងនាមជានាយករដ្ឋមន្ត្រីរបស់កម្ពុជា គឺមានសារសំខាន់បំផុត សម្រាប់រក្សាស្ថិរភាពរបស់ប្រទេសជាតិ ដូចមានកំណត់ក្នុងរដ្ឋធម្មនុញ្ញ។ តាមលោកនាយករដ្ឋមន្ត្រី បើលោកត្រូវស្លាប់ នោះគឺពិបាកជាងព្រះមហាក្សត្រ សោយទីវង្គតទៅទៀត ព្រោះតាមរដ្ឋធម្មនុញ្ញ ត្រូវរុះរើគណៈរដ្ឋមន្ត្រីរបស់រដ្ឋាភិបាលទាំងមូលតែម្តង។ នៅព្រឹកមិញ លោកនាយករដ្ឋមន្ត្រី ក៏បានប្រកាសថា ការបោះឆ្នោតជាតិ នៅខែកក្កដា ឆ្នាំ២០១៣ នឹងមិនជួបឧបសគ្គអ្វីទេ ទោះបីជាគណបក្សប្រឆាំង មិនចូលរួមការបោះឆ្នោតក៏ដោយ៕