ការឃុបឃិត​ជា​ប្រភព​នៃ​បញ្ហា​រាប់រយ​ជំពូក​ដោះស្រាយ​មិនចេញ

សំឡេង ០៤:៣៥
ជម្លោះដីធ្លី​ករណីខ្លះ​កើតឡើង​ដោយសារ​តែ​មាន​ការ​ឃុបឃិត​គ្នា ​រវាង​អាជ្ញាធរ​និង​ឈ្មួញ
ជម្លោះដីធ្លី​ករណីខ្លះ​កើតឡើង​ដោយសារ​តែ​មាន​ការ​ឃុបឃិត​គ្នា ​រវាង​អាជ្ញាធរ​និង​ឈ្មួញ © សុវណ្ណារ៉ា/RFI

ក្នុង​ចំណោម​បញ្ហា​រាប់រយ​ជំពូក​ដែល​កំពុង​ចាក់ស្រែះ​ក្នុង​សង្គម​កម្ពុជា​បច្ចុប្បន្ន ​បញ្ហា​ភាគច្រើន​មាន​ប្រភព​ចេញ​ពី​ការ​ឃុបឃិត។ ​ការ​ឃុបឃិត​មាន​ច្រើន​សណ្ឋាន ​និង​ច្រើន​ដំណាក់កាល ​ដូចជា​ការ​ឃុបឃិត​រវាង​ឈ្មួញ​និង​អាជ្ញាធរ​ដែនដី ​រវាង​បុគ្គល​ដែល​ចង់​បាន​ផលប្រយោជន៍​ជាមួយ​មន្ត្រី​ថ្នាក់​លើ ​ឬ​ក៏​រវាង​មន្ត្រី​ថ្នាក់​ក្រោម ​និង​មន្ត្រី​ថ្នាក់​លើ។ ​ជាទូទៅ​ បញ្ហា​ដែល​កើត​ចេញ​ពី​ការ​ឃុបឃិត​បែប​នេះ​ពិបាក​នឹង​ដោះស្រាយ ​ពីព្រោះ​អ្នក​ដែល​ដោះស្រាយ​បញ្ហា​គឺ​ជា​អ្នក​បង្កើត​បញ្ហា ​និង​ទទួល​ប្រយោជន៍​ពី​បញ្ហា។

ផ្សាយពាណិជ្ជកម្ម

 

នៅ​ក្នុង​ប្រទេស​កម្ពុជា​បច្ចុប្បន្ន​ មាន​បញ្ហា​ជាច្រើន​ដែល​គេ​មើល​ពី​ខាងក្រៅ​ទៅ​ហាក់​គ្មាន​អ្វី​គួរឲ្យ​ពិបាក​ដោះស្រាយ​ឡើយ ​ប៉ុន្តែ ​បញ្ហា​បាន​អូស​បន្លាយ​រាប់​ខែ ​ឬ​រាប់​ឆ្នាំ​នៅ​តែ​មិន​ទាន់​ចប់​ ឬ​ក៏​ដោះស្រាយ​មិន​ចេញ​តែម្តង​ លើក​លែង​តែ​មាន​បញ្ជា​ផ្ទាល់​ពី​នាយក​រដ្ឋមន្ត្រី។ ​ប្រសិន​បើ​គេ​ពិនិត្យ​ឲ្យ​ស៊ីជម្រៅ​មែន​ទែន​ បញ្ហា​ទាំង​នោះ​ភាគ​ច្រើន​សុទ្ធ​តែ​ជាប់​ពាក់ពន្ធ័​នឹង​ការ​ឃុបឃិត​គ្នា​ជា​បណ្តាញ​ដូច​សម្ល​កំពឹស។ ​មាន​បញ្ហា​ច្រើន​យ៉ាង​ដែល​មាន​ដើម​ហេតុ​ចេញ​ពី​ការ​ឃុបឃិត។

នៅ​ពេល​ដែល​បុគ្គល​អ្នក​មាន​ប្រាក់​ ឬ​អ្នក​មាន​អំណាច ​ចង់​ទិញ​ដី​មួយ​កន្លែង ​ពួកគេ​តែង​រត់ការ​តាម​រយៈ​អាជ្ញាធរ​ដែនដី​ ដើម្បី​ទទួល​បាន​ឯកសារ​ស្របច្បាប់​ជាថ្នូរ​នឹង​កម្រៃ​ជើងសា។ ​កម្រៃ​ជើងសា​នេះ​ឯង ​ដែល​ជំរុញ​ឲ្យ​អាជ្ញាធរ​ដែនដី​ខ្លះ​ត្រូវ​ប្រើ​គ្រប់​មធ្យោបាយ ​ដើម្បី​ធ្វើ​ឯកសារ​ឲ្យ​បាន​ បើ​ទោះបី​ជា​ពេល​ខ្លះ​ត្រូវ​រំលោភ​សិទ្ធិ​ប្រជាពលរដ្ឋ​ក្តី។ ​អ៊ីចឹង​ហើយ​បាន​ជា​គេ​តែង​ឮករណី​ដី​មួយ​មាន​ប្លង់​ជាន់​គ្នា ​ឬ​ក៏​សុខៗ​ស្រាប់​តែ​មាន​អ្នក​មក​ប្តឹង​ប្រជាពលរដ្ឋ​យក​ដី​ដោយ​សំអាង​លើ​ប្លង់​កម្មសិទ្ធិ​ ដែល​ជួនកាល​កើត​ចេញ​ពី​ការ​ឃុបឃិត។ ទំនាស់​ដីធ្លី​ទាក់ទង​នឹង​ដីសម្បទាន​មួយ​ចំនួន​ក៏មាន​ប្រវត្តិ​ស្រដៀង​គ្នា​ដែរ ​គឺ​ការ​ឃុបឃិត​ក្នុង​បណ្តាញ​រត់ការ។ ​នៅ​ទី​បំផុត​ បញ្ហា​បាន​ផ្ទុះ​ឡើង​នៅ​ពេល​ចាប់​ផ្តើម​វាស់វែង ​និង​ឈូស​ឆាយ​ដី ​ហើយ​ប៉ះ​ដល់​កម្មសិទ្ធិរ​បស់​ពលរដ្ឋ។

ករណី​នាំពលករ​ទៅ​ក្រៅ​ប្រទេស​ក៏​មាន​សាវតារ​ស្រដៀង​គ្នា​ដែរ​ ពោល​គឺ ​ភ្នាក់ងារ​នាំ​ពលករ​មួយចំនួន​មាន​អ្នក​ធ្វើខ្នងបង្អែកនៅ​ពីក្រោយ​ខ្នង។ ​អ៊ីចឹង​ហើយ​បាន​ជា​ ក្រុមហ៊ុន​មួយចំនួន​បាន​ធ្វើ​សកម្មភាព​តាម​អំពើ​ចិត្ត​ ហើយ​នៅ​ពេល​មាន​បញ្ហា​គេ​មិន​ងាយ​នឹង​ដោះស្រាយ​បាន​ឡើយ ​បើ​ទោះបី​ជា​មាន​រឿង​អាស្រូវ​កើត​ឡើង​ម្តង​ហើយ​ម្តង​ទៀត​ក៏ដោយ។ ​ការ​ឃុបឃិត​ក៏​ជា​ប្រភព​នៃ​អប្រសិទ្ធិភាព​នៃ​សេវាកម្ម​របស់​រដ្ឋ​ជា​ច្រើន​ដែរ។ ​ជាក់ស្តែង​ ការ​ត្រួត​ពិនិត្យ​គុណភាព​ទំនិញ​ ការងារ​អធិការកិច្ច​ក្នុង​វិស័យ​មួយចំនួន​ ឬ​ការងារ​ត្រួត​ពិនិត្យ​គុណភាព​សំណង់​ផ្ទះ ​អគារ​ រហូត​ដល់​សំណង់​ផ្លូវស្ពាន។ល។​ និង។ល។​ ការ​ឃុបឃិត​ក៏​ជា​ចំណែក​ចូលរួម​បំផ្លាញ​សង្គម​ខ្លាំង​ណាស់​ដែរ។ ​ការ​ចាប់​ខ្លួន​មន្ត្រីធំៗ​ទាក់ទង​នឹង​គ្រឿង​ញៀន​រយៈពេល​ចុងក្រោយ​នេះ​គឺ​ជា​ឧទាហរណ៍​ជាក់ស្តែង​មួយ​ទៀត​អំពី​ការ​ឃុបឃិត​ដើម្បី​ផល​ប្រយោជន៍​របស់​មន្ត្រី​ខិលខូច​មួយចំនួន​ដែល​សុខ​ចិត្ត​ជាន់​ពន្លិច​កិច្ច​ខិតខំ​ប្រឹងប្រែង​របស់​រដ្ឋាភិបាល។

ជំនួញ​ឈើ​មាន​តម្លៃ​ដែល​នៅ​តែ​កើត​មាន​ជា​ហូរហែ ​បង្ក្រាប​មិន​ចេះ​អស់​ បើទោះបី​ជា​ប្រមុខ​រដ្ឋាភិបាល​បាន​ចាត់​វិធានការ​ក្តៅ​យ៉ាង​ណា​ក៏ដោយ​នោះ ​ក៏​ត្រូវ​គេ​មើល​ឃើញ​ថា​មាន​ប្រភព​ចេញ​ពី​ការ​ឃុបឃិត​គ្នា​នេះ​ដែរ។ ​ប្រសិន​បើ​គ្មាន​ការ​អនុញ្ញាត​ពី​សមត្ថកិច្ច​ដែនដី ​ឈើ​មិន​អាច​ចេញ​ពីព្រៃ​បាន​ឡើយ។ ​ប្រសិន​បើ​គ្មាន​ការ​បិទភ្នែក​ពី​សមត្ថកិច្ច​ផ្សេង​ទៀត​តាម​ផ្លូវ​ ឈើ​ក៏​មិន​អាច​ត្រូវ​គេ​ដឹក​រាប់​រយ​គីឡូម៉ែត្រ​បាន​ដែរ។ ​ប្រសិន​បើ​គ្មាន​ខ្នង​បង្អែក​ឬ​ការ​ឃុបឃិត​ជា​បណ្តាញ​ក៏​ឈ្មួញ​ឈើ​មិន​អាច​រកស៊ី​បាន​ដែរ។ ​នេះ​គ្រាន់​តែ​ជា​ឧទាហរណ៍​ខ្លះៗ​ប៉ុណ្ណោះ​ ដែល​រំលេច​ឲ្យ​ឃើញ​ពី​ការ​ឃុបឃិត​គ្នា​នៃ​មន្ត្រី​ថ្នាក់​ក្រោម ​ដែល​ជា​ញឹកញាប់​ធ្វើ​ឲ្យ​បទបញ្ជា​របស់​នាយក​រដ្ឋមន្ត្រី​គ្មាន​ប្រសិទ្ធិភាព។ ​និយាយ​ជារួម​ ការ​ឃុបឃិត​គឺ​ជា​ប្រភព​នៃ​បញ្ហា​រាប់រយ​ជំពូក​និង​ពិបាក​ដោះស្រាយ។

ជាការ​ពិត​ណាស់​ ការ​ឃុបឃិត​គ្នា​ដើម្បី​ផ​លប្រយោជន៍​ហាក់​បាន​ក្លាយ​ជា​ទម្លាប់​ធម្មតា​មួយ​ទៅ​ហើយ​នៅ​ក្នុង​បណ្តាញ​រដ្ឋបាល​សាធារណៈ ​រាប់តាំង​ពី​កិច្ចការ​តូចតាច​ រហូត​ដល់​កិច្ចការ​ធំៗ។ ​ការ​ចាប់​ខ្លួន​មន្ត្រី​ទីប្រឹក្សា​មេដឹកនាំ​កំពូល​ស្ថាប័នជាតិ​កាលពី​ពេល​ថ្មីៗ​នេះ​គឺជា​ឧទាហរណ៍​ជាក់ស្តែង​បំផុត​នៃ​ការ​ឃុបឃិត​គ្នា​ជា​បណ្តាញ​ដោយ​យក​ឈ្មោះ​មេដឹកនាំ​ទៅ​ប្រើប្រាស់។ អំពើ​ឃុបឃិត​បែបនេះ​មិន​ត្រឹម​តែ​ធ្វើ​ឲ្យ​ប៉ះពាល់​កិត្តិយស​មេដឹកនាំ​ស្ថាប័នជាតិ​ប៉ុណ្ណោះ​ទេ ​ប៉ុន្តែ វា​ក៏​បាន​ធ្វើ​ឲ្យ​ប៉ះពាល់​ដល់​គោល​នយោបាយ​រដ្ឋាភិបាល​ ជាពិសេស​ប៉ះពាល់​​កិត្តិយស​ប្រទេស​ជាតិ​​ទាំងមូល ​នៅ​ពេល​ដែល​ក្រសែភ្នែក​សហគមន៍​អន្តរជាតិ​ និង​អ្នក​វិនិយោគទុន​បរទេស​សម្លឹង​មក​កម្ពុជា​ជា​ទីកន្លែង​ស្មុគស្មាញ​សម្រាប់​ជំនួញ។ ​ដូច្នេះ ​ដល់​ពេល​ហើយ​ដែល​ត្រូវ​ផ្លាស់ប្តូរ​​ទម្លាប់​នេះ​ចោល ដើម្បី​ភាព​ស្អាតស្អំ​នៃ​រដ្ឋបាល​សាធារណៈ​កម្ពុជា​ ដែល​ជា​គន្លឹះ​សម្រាប់​អភិវឌ្ឍន៍​ប្រទេស​ដោយ​ប្រសិទ្ធិភាព៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI