កម្ពុជា

កម្ពុជា​ចិន​បន្ត​ចុះហត្ថលេខា​លើ​កិច្ច​សហប្រតិបត្តិការ​ទ្វេភាគី​

ពិធី​ចុះ​ហត្ថលេខា​លើ​កិច្ច​សហប្រតិបត្តិការ​ទ្វេ​ភាគី​រវាង​រាជ​រដ្ឋាភិបាល​នៃព្រះរាជាណាចក្រ​កម្ពុជា​និង​រដ្ឋាភិបាល​នៃសាធារណរដ្ឋ​ប្រជាមានិត​ចិន​
ពិធី​ចុះ​ហត្ថលេខា​លើ​កិច្ច​សហប្រតិបត្តិការ​ទ្វេ​ភាគី​រវាង​រាជ​រដ្ឋាភិបាល​នៃព្រះរាជាណាចក្រ​កម្ពុជា​និង​រដ្ឋាភិបាល​នៃសាធារណរដ្ឋ​ប្រជាមានិត​ចិន​ RFI/Siv Channa

មាន​​ឯកសារ​​យ៉ាង​តិច​​ក៏​ ៧​ ដែរ​​ដែល​​ត្រូវ​បាន​​ចុះ​ហត្ថលេខា​​នៅ​​ទីក្រុង​​ភ្នំពេញ​​នា​​ព្រឹក​​ថ្ងៃ​​​ពុធ​​នេះ​​រវាង​​កម្ពុជា​​និង​​ចិន។ ​ពិធី​​ចុះ​ហត្ថលេខា​​នេះ​​ ​បាន​​ធ្វើ​ឡើង​​ក្នុង​​ដំណើរ​​ទស្សនកិច្ច​​នៅ​​កម្ពុជា​​របស់​លោក​ ហ៊ី គូ​ឈាង​ ( He Guoqiang )​ សមាជិក​​គណៈ​អចិន្ត្រៃយ៍​​ការិយាល័យ​​នយោបាយ​​នៃ​​គណៈកម្មាធិការ​​ម​ជ្ឈិ​ម​បក្ស​និង​​ជា​​លេខា​គណៈ​កម្មាធិការ​​ត្រួត​ពិនិត្យ​​វិន័យ​​ម​ជ្ឈិ​ម​​បក្ស​​កុម្មុយនិស្ត​​ចិន។​ នេះ​​ជា​​ដំណើរ​​ទស្សនកិច្ច​​របស់​​មន្ត្រី​ជាន់​ខ្ពស់​​ចិន​​ម្នាក់​ទៀត​​មក​កាន់​​កម្ពុជា​​ក្នុង​ចំណោម​​ទស្សនកិច្ច​​បន្ត​កន្ទុយ​​គ្នា​​ក្នុង​ន័យ​​ពង្រឹង​​ចំណង​ទាក់ទង​​ទ្វេ​ភាគី​​រវាង​​ភ្នំពេញ​និង​​ប៉េកាំង។

ផ្សាយពាណិជ្ជកម្ម

ពិធី​ចុះហត្ថលេខា​លើ​ឯកសារ​កិច្ចសហប្រតិបត្តិការ​ទាំ​ង​នោះបាន​ធ្វើឡើង​នៅ​ព្រឹក​ថ្ងៃ​ពុធ​នេះ​នៅ​ទីស្តីការគណៈរដ្ឋមន្ត្រី​ក្រុងភ្នំពេញ​នៅ​ចំពោះមុខ​លោកនាយក​រដ្ឋមន្ត្រី ហ៊ុន សែន និង​លោក ហ៊ី គូ​ឈាង (He Guoqiang) សមាជិក​គណៈអចិន្ត្រៃយ៍​ការិយាល័យ​នយោបាយ​នៃ​គណៈកម្មាធិការ​ម​ជ្ឈិម​បក្ស និង​ជា​លេខា​គណៈកម្មាធិការ​ត្រួតពិនិត្យ​វិន័យ​ម​ជ្ឈិ​ម​បក្ស​កុម្មុយនិស្ត​ចិន។

 
ក្រសួង​សេដ្ឋកិច្ច​និង​ហិរញ្ញវត្ថុ ក្រសួងសុខាភិបាល ក្រសួងមហាផ្ទៃ និង​ក្រសួងការពារជាតិ​កម្ពុ​ជា​គឺជា​អ្នកចុះហត្ថលេខា​ទទួល​ក្នុងនោះ​ក៏មាន​ការចុះហត្ថលេខា​ទ​ទួល​យន្តហោះ​ប្រភេទ MA 60 ចំនួន​ពីរ​គ្រឿង​ពី​ប្រទេស​ចិន​ផងដែរ។

លោក ហ៊ី គូ​ឈាងនិង​លោកនាយក​រដ្ឋមន្ត្រី ហ៊ុន សែន ក៏បាន​បើកសម្ពោធ​ជា​និមិត្តរូប​នូវ​តំបន់​​សេដ្ឋកិច្ច​ពិសេស​កម្ពុ​ជា​ចិន​ក្នុង​ខេត្ត​ព្រះសីហនុ​ផងដែរ។ គ្មាន​ការបញ្ជាក់​ឲ្យ​ដឹង​ពី​ទំហំ​ទឹកប្រាក់​សម្រាប់​គ្រោង​អភិវឌ្ឍន៍​ដែល​ត្រូវបាន​ចុះហត្ថលេខា​នៅ​ព្រឹក​មិញ​នេះ​ទេ។ លោក អ៊ាង សុផល្លែត ជំនួយការ​របស់លោក​នាយករដ្ឋមន្ត្រី បាន​ប្រាប់​អ្នកកាសែត​ថា ប្រមុខ​រដ្ឋាភិបាល​​កម្ពុ​ជា បាន​ថ្លែង​អំណ​រគុណ​ប្រទេស​ចិន​និង​បាន​ហៅ​ប្រទេស​មហា​យក្ស​អាស៊ី​មួយ​នេះ​ថា​ជា​មិត្ត​ជិតខាង​ល្អ និង​គួរ​ជាទី​ទុកចិត្ត។

ប្រមុខ​រដ្ឋាភិបាល​កម្ពុ​ជា​ក៏បាន​សុំ​ឲ្យ​ចិន​បន្ត​ផ្តល់ជំនួយ​ឥណទាន​បន្ថែមទៀត​ដល់​កម្ពុជា និង​ជួយ​ទិញ​ទំនិញ​ពី​កម្ពុជា​ឲ្យ​បាន​ច្រើន​ថែមទៀត​ដើម្បី​បង្កើន​ទឹកប្រាក់​ពាណិជ្ជកម្ម​ប្រទេស​ទាំង​ពីរ​​ឲ្យ​ដល់ ៥០០០ លាន​ដុល្លារ​ដូច​ការគ្រោងទុក។ លោកនាយក​រដ្ឋមន្ត្រី ហ៊ុន សែន ក៏​ចង់​ឲ្យ​ចិន​ជំរុញ​អ្នកវិនិយោគទុន និង​អ្នកទេសចរ​ជនជាតិ​ចិន​ឲ្យ​មក​កម្ពុជា​ឲ្យ​បាន​កាន់តែច្រើន​ផង​ដែរ។​ លោក ហ៊ី គូ​ឈាង បាន​យល់ព្រម​តាម​សំណើ​នេះ និង​ក៏បាន​ថ្លែងអំណរគុណ​ដល់​កម្ពុជា​​វិញ​ដែល​តែង​គាំទ្រ​ប្រទេស​ចិន​ជានិច្ច។

លោក ហ៊ី គូ​ឈាង បាន​មកដល់​កម្ពុជា​នៅ​ថ្ងៃទី ១២ មិថុនា ក្នុង​ដំណើរ​ទស្សនកិច្ច​រយៈពេល​ពីរ​ថ្ងៃ​ដើម្បី​រឹតចំណង​កិច្ចសហប្រតិបត្តិការ​រ​វាង​ទីក្រុង​ភ្នំពេញ និង​ប៉េកាំង។ លោក​គឺជា​មន្ត្រី​ជាន់​​ខ្ពស់​​បំផុត​លំដាប់​ទី ២ របស់​ចិន​ដែល​បានមក​បំពេញ​ទស្សនកិច្ច​នៅ​កម្ពុជា បន្ទាប់ពី​ទស្សនកិច្ចរបស់លោក​ប្រធានាធិបតី​ហ៊ូ ជីន​តាវ កាលពីដើម​ខែមេសា។

ទស្សនកិច្ច​របស់​មេ​ដឹកនាំ​​ចិន​មក​កម្ពុជា​ដ៏​ដូចជា​ទស្សនកិច្ច​របស់​មេដឹកនាំ​កម្ពុជា​ទៅកាន់​ប្រទេស​​ចិន​ដែរ តែងតែ​នាំមក​នូវ​ជំនួយ​សន្ធឹកសន្ធាប់​សម្រាប់​កម្ពុជា​ជានិច្ច។ នេះ​ជា​ហេតុផល​ដែល​លោកនាយក​រដ្ឋ​មន្ត្រី​ហ៊ុន សែន ប្រាប់​មេដឹកនាំ​បក្ស​កុម្មុយនិស្ត​ចិន​ថា ការអភិវឌ្ឍន៍​កម្ពុជា​មិនអាច​កាត់ផ្តាច់​ពី​ជំនួយ​របស់​ចិន​បានឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI