បារាំងបង្ហាញជំហរគាំទ្រកូរ៉េខាងត្បូងប្រឈមនឹងកូរ៉េខាងជើង
ចុះផ្សាយនៅថ្ងៃ៖
ក្នុងទស្សនកិច្ចរបស់ប្រធានាធិបតីកូរ៉េខាងត្បូង លោកស្រី ប៉ាក់ គុនហេ នៅប្រទេសបារាំង នៅថ្ងៃសុក្រម្សិលមិញ ប្រធានាធិបតីបារាំងហ្វ្រង់ស៊័រ ហូឡង់ បានសំដែងជំហរគាំទ្រកូរ៉េខាងត្បូង ពេញទី ប្រឈមនឹងការផ្គើនរបស់កូរ៉េខាងជើង។ ម្សិលមិញដែរ បារាំងនិងកូរ៉េខាងជើងបានចុះហត្ថលេខាលើកិច្ចព្រមព្រៀងមួយចំនួន ដែលចូលរួមលើកស្ទួយការវិនិយោគផ្នែកអប់រំ ស្រាវជ្រាវនិងទេសចរណ៍។
ប្រធានាធិបតីកូរ៉េខាងត្បូងបំពេញទស្សនកិច្ចនៅបារាំង នៅថ្ងៃសុក្រម្សិលមិញ មិនមែនដើម្បីតែពង្រឹងទំនាក់ទំនងជាមួយបារាំងតែមួយមុខទេ។ លោកស្រីប៉ាក់ គុនហេ ត្រូវការបារាំងគាំទ្រកូរ៉េខាងត្បូងប្រឈមនឹងការផ្គើនរបស់កូរ៉េខាងជើង។ គួរកត់សំគាល់ថា ថ្មីៗនេះ ក្រុងព្យុងយ៉ាងបានធ្វើអោយក្រុងសេអ៊ូលព្រួយបារម្ភមិនតិចទេ ដោយសារតែការសាកល្បងនុយក្លេអ៊ែរនុយក្លេអ៊ែរជាលើកទី៤ ទោះជាការសាកល្បងនេះបរាជ័យក្តី។
នៅចំពោះមុខថ្នាក់ដឹកនាំបារាំង លោកស្រីប៉ាក់ គុនហេ ថ្លែងថា កូរ៉េខាងជើងត្រូវតែដឹងថា ខ្លួនគ្មានជម្រើសអ្វីក្រៅតែពីការបោះបង់ចោលនូវគម្រោងនុយក្លេអ៊ែរទេ ហើយការបង្រួបបង្រួមឧបទ្វីបកូរ៉េ គឺជាលទ្ធភាពតែមួយគត់សម្រាប់អនាគត។
ប្រធានាធិបតីបារាំងបានសំដែងការគាំទ្រកូរ៉េខាងត្បូង ដោយតបទៅវិញថា បារាំងជាសម្ព័ន្ធមិត្តរបស់កូរ៉េខាងត្បូង ហើយក្នុងនាមបារាំងជាសមាជិកអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិ បារាំងនឹងព្យាយាមធ្វើយ៉ាងណាអោយកូរ៉េខាងជើងទទួលទណ្ឌកម្ម។ យោងតាមលោកហូឡង់ បារាំងមិនចង់អោយសន្តិសុខក្នុងតំបន់ ពិសេសសន្តិសុខកូរ៉េខាងត្បូង រងការប៉ះពាល់ឡើយ។ ម្សិលមិញ បារាំងនិងកូរ៉េខាងត្បូងក៏សំដែងការបារម្ភចំពោះសិទ្ធិមនុស្សនៅកូរ៉េខាងជើងផងដែរ។
ទស្សនកិច្ចលោកស្រីប៉ាក់ គុនហេ នៅទីក្រុងប៉ារីសបានបិទបញ្ចប់ដោយការចុះហត្ថលេខាលើកិច្ចព្រមព្រៀងមួយចំនួន។ ការផ្តោះប្តូរពាណិជ្ជកម្មរវាងបារាំងនិងកូរ៉េខាងត្បូងជួបកំណើនខ្ពស់។ នៅកូរ៉េខាងត្បូង បារាំងមានវត្តមានក្នុងវិស័យវិទ្យាសាស្ត្រនិងបច្ចេកទេសដែនអាកាស គ្រឿងសម្អាង និងថ្នាំពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ