អានតួអត្ថបទ

រដ្ឋមន្ត្រី​យុត្តិធម៌​អោយ​នាយកដ្ឋាន​ព្រហ្មទណ្ឌ​សិក្សា​លើ​ការ​សុំ​លើកលែងទោស​ជនជាតិ​ថៃ

ជនជាតិ​ថៃ​ដែល​ត្រូវ​តុលាការ​កម្ពុជា​ផ្តន្ទាទោស​ពី​បទ​ឆ្លងដែន​ខុសច្បាប់ និង​បទ​ចារកម្ម
ជនជាតិ​ថៃ​ដែល​ត្រូវ​តុលាការ​កម្ពុជា​ផ្តន្ទាទោស​ពី​បទ​ឆ្លងដែន​ខុសច្បាប់ និង​បទ​ចារកម្ម ©វណ្ណារ៉ា/RFI
ដោយ៖ លាង ដឺលុច
១៦ នាទី

លិខិត​ស្នើសុំ​លើកលែងទោស​របស់​ជនជាតិ​ថៃ​២នាក់​បាន​មកដល់​ដៃ​នាយកដ្ឋាន ​ព្រហ្មទណ្ឌ​ នៃ​ក្រសួង​យុត្តិធម៌​ហើយ។ នាយកដ្ឋាន​នេះ​នឹង​ធ្វើ​របាយការណ៍​ទៅ​រដ្ឋមន្ត្រី​ក្រសួង​យុត្តិធម៌​វិញ មុននឹង​ដាក់​ទៅ​អោយ​លោក​នាយករដ្ឋមន្ត្រី​សម្រេច​ដាក់សំណើ​ថ្វាយ​ទៅ​ ព្រះមហាក្សត្រ។ ប៉ុន្តែ នីតិវិធី​នេះ​អាច​ត្រូវ​ប្រើ​ពេលយូរ​ នៅពេល​ដែល​ប្រធាន​នាយកដ្ឋាន​ព្រហ្មទណ្ឌ​អះអាង​ថា លោក​មិនបាន​ទទួល​ឯកសារ​គ្រប់​ជ្រុងជ្រោយ។

ផ្សាយពាណិជ្ជកម្ម

សេចក្តីរាយការណ៍​របស់​លាង ដឺលុច ពី​ភ្នំពេញ

ព្រឹក​ថ្ងៃ​អង្គារ ​ទី២២​មីនា​នេះ រដ្ឋមន្ត្រី​ក្រសួង​យុត្តិធម៌ លោក​អង្គ វង្សវឌ្ឍនា បាន​ធ្វើ​ចំណារ​លើ​ឯកសារ​នៃ​ការ​ស្នើសុំ​ការ​លើកលែងទោស​របស់​ជនជាតិ​ថៃ​២នាក់ អោយ​ទៅ​នាយកដ្ឋាន​កិច្ចការ​ព្រហ្មទណ្ឌ ដើម្បី​សិក្សា​លើ​សំណើសុំ​របស់​ជនជាតិ​ថៃ​នេះ។

លោ​កពៅ ប៊ុនធឿន ប្រធាន​នាយកដ្ឋាន​កិច្ចការ​ព្រហ្មទណ្ឌ​នៃ​ក្រសួង​យុត្តិធម៌​បាន​អះអាង​ថា លោក​បាន​ទទួល​សំណុំឯកសារ​នៃ​ពាក្យ​ស្នើសុំ​ការ​លើកលែងទោស​របស់​ជនជាតិ​ថៃ​ទាំងពីរ​នាក់​នោះ​ហើយ។ ប៉ុន្តែ​ថា ឯកសារ​ដែល​លោក​ទទួលបាន​នោះ នៅ​ខ្វះចន្លោះ​សាលក្រម​របស់​តុលាការ​ដែល​ជា​មូលដ្ឋានគ្រឹះ​ដើម្បី​ពិចារណា​លើ​សំណើសុំ​លើកលែងទោស​នេះ។ លោក​ពៅ ប៊ុនធឿន បាន​បញ្ជាក់​ថា លោក​បាន​ឃើញ​តែ​ឯកសារ​៣ច្បាប់​ប៉ុណ្ណោះ រួមមាន លិខិត​ស្នើសុំ​លើកលែងទោស របស់​អ្នកទោស​ជនជាតិ​ថៃ កំណត់ទូត​របស់​ស្ថានទូត​ថៃ និង​លិខិត​របស់​ក្រសួង​ការបរទេស​កម្ពុជា។

ប្រធាន​នាយកដ្ឋាន​ព្រហ្មទណ្ឌ​ថ្លែង​ថា លោក​នឹង​ស្នើសុំ​យក​សាលក្រម​ពី​តុលាការ ដើម្បី​ផ្តើម​ធ្វើ​ការ​សិក្សា​លើ​ករណី​នេះ។ ទោះយ៉ាងណា​ក៏ដោយ លោក​ពៅ ប៊ុនធឿន បញ្ជាក់​ថា លោក​មិនមែន​ជា​អ្នក​ធ្វើ​សេចក្តី​សម្រេច​លើ​ពាក្យ​ស្នើសុំ​របស់​ជនជាតិ​ថៃ​នោះ​ឡើយ។ នាយកដ្ឋាន​របស់​លោក​មាន​តួនាទី​ពិនិត្យ​លទ្ធភាព​តាម​ផ្លូវច្បាប់​ ចំពោះ​ករណី​ស្នើសុំ​នីមូយៗ ហើយថា គឺ​រដ្ឋមន្ត្រី​ក្រសួង​យុត្តិធម៌​ ដែល​ជាអ្នក​ធ្វើ​សេចក្តី​សម្រេច​នោះ។

ជនជាតិ​ថៃ​២នាក់ ត្រូវ​បាន​សាលាដំបូង​រាជធានី​ភ្នំពេញ​កាត់ទោស​អោយ​ជាប់​ពន្ធនាគារ​ម្នាក់​៨ឆ្នាំ និង​ម្នាក់ទៀត​៦ឆ្នាំ​ ពីបទ​ឆ្លងដែន​ខុស​ច្បាប់​ចូលក្នុង​ទឹកដី​កម្ពុជា និង​បទចារកម្ម​។ ប៉ុន្តែ ទណ្ឌិត​ទាំងពីរ​រូប​មិនបាន​ប្តឹង​ឧទ្ធរណ៍​ជំទាស់​សាលក្រម​នេះ​ទេ ហើយ​បាន​ធ្វើ​លិខិត​ស្វែងរក​ការ​លើកលែងទោស​ពី​ព្រះមហាក្សត្រ​ខ្មែរ។ លិខិត​សុំ​ការ​លើកលែងទោស​ត្រូវបាន​ផ្ញើ​មក​ក្រសួង​ការបរទេស​កម្ពុជា ជាមួយ​កំណត់ទូត​របស់​ស្ថានទូត​ថៃ កាលពី​ថ្ងៃ​ពុធ​សប្តាហ៍​មុន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ