ព្រឹត្តិការណ៍អន្តរជាតិប្រចាំថ្ងៃ

វិបត្តិ​នយោបាយ​ថៃ៖ សភា​បោះឆ្នោត​បន្ត​សេចក្តី​ទុកចិត្ត​លើ​លោកស្រី​យីងឡាក់ តែ​បាតុករ​អាវលឿង​បន្ត​បាតុកម្ម

សំឡេង ០៦:១៧
ក្រុម​បាតុករ​អាវលឿងថៃ
ក្រុម​បាតុករ​អាវលឿងថៃ
២៩ នាទី

នៅ​ប្រទេស​ថៃ ទីបំផុត ថ្ងៃ​ព្រហស្បតិ៍ ទី២៨ វិច្ឆិកា​នេះ លោកស្រី​នាយក​រដ្ឋមន្រ្តី​យីងឡាក់​បាន​រួចផុត​ពី​ការ​បោះឆ្នោត​ដក​សេចក្តីទុកចិត្ត​ពី​រដ្ឋសភា។ ក្រោយ​ពី​បាន​រួច​ខ្លួន​ភ្លាម លោកស្រី​យីងឡាក់​បាន​អំពាវនាវ​ឲ្យ​គណបក្សប្រឆំាង​ចូល​តុចរចា។ តែ​ក្រុមអាវលឿង​មិន​ព្រម និង​បាន​បន្ត​ក្បួនបាតុកម្ម​របស់​ខ្លួន​ជា​បន្ត​ទៀត។ ក្រោយ​ពី​បាន​ចូលកាន់កាប់​ក្រសួង​មួយ​ចំនួន​មក នៅ​ថ្ងៃ​នេះ ពួក​គេ​បាន​នំា​គ្នា​ទៅ​ជួបជុំ​នៅ​ពី​មុខ​ក្រសួង​ការពារជាតិ ក្រសួង​អប់រំ និង​ស្នងការដ្ឋាន​ប៉ូលិសជាតិ ព្រម​ទំាង​ផ្តាច់​ភ្លើង​អគ្គិសនី​ទៀត​ផង។

ផ្សាយពាណិជ្ជកម្ម

ដូច​ដែល​គ្រប់​គ្នា​បាន​រង់ចំា ទីបំផុត លោកស្រី​នាយករដ្ឋមន្រ្តី​យីងឡាក់​ត្រូវ​បាន​សភា​បោះឆ្នោត​បន្ត​ផ្តល់​សេចក្តីទុកចិត្ត​ដោយ​ទទួល​បាន​សម្លេង​គំាទ្រ​រហូត​ដល់​ទៅ ២៩៧​សម្លេង​នៅ​ក្នុង​ចំណោម​សម្លេង​សរុប ៤៩២សម្លេង​ដែល​មាន​នៅ​ក្នុង​រដ្ឋសភា។ ដូច្នេះ​ឃើញ​ថា លោកស្រី​យីងឡាក់​អាច​ប្រើ​លទ្ធផល​នៃ​ការ​បោះឆ្នោត​នេះ​ដើម្បី​ប្រាប់​ទៅ​ក្រុមបាតុករ​អាវលឿង​របស់​គណបក្សប្រឆំាង​ថា គ្មាន​ហេតុផល​ណា​មួយ​ដែល​លោកស្រី​ត្រូវ​លាចុះ​ចេញ​ពី​មុខតំណែង ហើយ​ក៏​គ្មាន​ហេតុផល​ណា​មួយ​ដែល​លោកស្រី​ត្រូវ​រំលាយ​សភា​ចោល​ដែរ។

ប៉ុន្មាន​ម៉ោង ក្រោយ​ពី​សភា​បាន​បោះឆ្នោត​មិន​ដក​សេចក្តី​ទុកចិត្ត​ពី​លោកស្រី​មក លោកស្រី​យីងឡាក់​ក៏​បាន​ប្រកាស​អំពាវនាវ​ដល់​ក្រុម​គណបក្សប្រឆំាង​ឲ្យ​ចូល​អង្គុយ​តុចរចា​ដើម្បី​ដោះស្រាយ​បញ្ហា ចៀសជាង​បន្ត​ធ្វើ​ការ​តវ៉ា​នៅ​តាម​ផ្លូវ។ តែ​មេបាតុករ​អាវលឿង​ដែល​ដឹកនំា​ដោយ​លោក​អតីត​ឧបនាយករដ្ឋមន្រ្តី​ស៊ូថេប​បាន​ឆ្លើយ​បដិសេធ​យ៉ាង​ដាច់​អហង្ការ។ ថ្លែង​នៅ​ចំពោះ​មុខ​ហ្វូង​បាតុករ​រាប់ម៉ឺននាក់​កាល​ពី​យប់​មិញ លោក​ស៊ូថេប​បាន​បញ្ជាក់​ថា លោក​មិន​ត្រូវ​ការ​ចរចា​ជាមួយ​រដ្ឋាភិបាល ឬមួយ​ក៏​ជាមួយ​ដៃគូ​ណា​ផ្សេង​ទេ។

ក្រុម​ឧត្តមសេនីយ​ថៃ​ជា​អ្នក​មាន​អំណាច​ពិត​ប្រាកដ​ក្នុង​ដៃ

តំាង​ពី​ក្រោយ​រដ្ឋប្រហារ​យោធា​ទម្លាក់​លោក​នាយករដ្ឋមន្រ្តី​ថាក់ស៊ីន​ក្នុង​ឆ្នំា ២០០៦ មក វិបត្តិនយោបាយ​ថៃ​ហាក់​ដូច​ជា​មិន​បាន​រលត់​សូន្យ​ឈឹង​ទំាង​ស្រុង​ទេ គឺ​ប្រៀប​ដូច​ជា​ពំនូកភ្លើង​មួយ​ដែល​កំពុង​បន្ត​ក្តៅងំ​ជា​អចិន្ត្រៃយ៍ រង់ចំា​តែ​ថ្ងៃ​ផ្ទុះ​ឡើង​ជា​ថ្មី​ប៉ុណ្ណោះ។ ភាព​ប្រទូស្ត្រាយ​គ្នា​បាន​កើត​មាន​ជា​ហូរហែរ​រវាង​ក្រុមសកម្មជន​អាវក្រហម​គំាទ្រ​លោក​ថាក់ស៊ីន និង​ក្រុម​អាវលឿង​ខាង​រាជានិយម និង​ដែល​មាន​ការ​គំាទ្រ​ពី​ក្រុម​ឧត្តមសេនីយ។

តាម​ការ​ពិនិត្យ​ជាក់ស្តែង​កន្លង​មក​បាន​បង្ហាញ​យ៉ាង​ច្បាស់​ថា យូរ ឬ​ឆាប់ ការ​កាន់​អំណាច​របស់​ក្រុម​ណា​មួយ​នឹង​ត្រូវ​ក្រុម​ផ្សេង​ទៀត​តាម​ធ្វើ​ទុក្ខបុកម្នេញ​រហូត​ដល់​ខ្ទាត​ចេញ​ពី​អំណាច ហើយ​ជា​ទូទៅ អ្នក​ដែល​ចេញ​មុខ​បិទបញ្ចប់​វិបត្តិ គឺ​គ្មាន​នរណា​ក្រៅ​ពី​ក្រុមឧត្តមសេនីយ​តាម​រយៈ​រដ្ឋប្រហារ​យោធា​ដោយ​សន្តិវិធី។ ចូរ​កុំ​ភ្លេច​ថា​នៅ​ប្រទេស​ថៃ អ្នក​ដែល​មាន​អំណាច​ពិតប្រាកដ​គឺ​ក្រុម​ឧត្តមសេនីយ។ និយាយ​ពី​រឿង​រដ្ឋប្រហារ​យោធា​វិញ គឺ​ថៃ​ជាប់​លេខ១ ព្រោះ​ថា តំាង​ប្រទេស​ផ្តើម​អនុវត្ត​របបនយោបាយ​រាជានិយម​អាស្រ័យ​រដ្ឋធម្មនុញ្ញ​ក្នុង​ឆ្នំា ១៩៣២ មក ថៃ​បាន​ស្គាល់​រដ្ឋប្រហារ​យោធា ឬមួយ​ក៏​ប៉ុនប៉ង​ធ្វើ​រដ្ឋប្រហារ​យោធា​ចំនួន ១៨ដង។ ចុងក្រោយ​គឺ​រដ្ឋប្រហារ​យោធា​ទម្លាក់​លោក​ថាក់ស៊ីន​ក្នុង​ឆ្នំា ២០០៦។

តែ​គេ​នៅ​មិន​ទាន់​ហ៊ាន​និយាយ​ទេ​ថា ជោគវាសនា​របស់​លោកស្រី​យីឡាក់​នឹង​ត្រូវ​បញ្ចប់​ដូច​ករណី​បងប្រុស​របស់​លោកស្រី គឺ​លោក​ថាក់ស៊ីន​នោះ។ តែ​នេះ ក៏​ជា​សម្មតិកម្ម​មួយ​ដែល​គេ​ពិបាក​នឹង​ទាត់ចោល​ដែរ ប្រសិន​បើ​វិបត្តិ​កាន់​តែ​ធ្ងន់ធ្ងរ អូសបន្លាយ​យូរ និង​មាន​ផ្ទុះ​ឡើង​នូវ​អំពើហិង្សា​នោះ។

ព្រះមហាក្សត្រ ព្រះចៅ ភូមិបុល អាឌូយ៉ាដេ ជា​ក្តី​សង្ឃឹម​តែ​មួយ​គត់​ដើម្បី​បញ្ចប់​វិបត្តិ

មាន​ព្រះជន្ម ៨៥ព្រះវស្សា ព្រះចៅភូមិបុល អាឌុលយ៉ាដេ​​ត្រូវ​បាន​ប្រជារាស្រ្ត​ថៃ​គ្រប់​ស្រទាប់​វណ្ណៈ​ចាត់​ទុក​ជា​តួ​អង្គ​សំខាន់​តែ​មួយ​អង្គ​គត់​ក្នុង​ការ​បញ្ចប់​វិបត្តិ ឬ​ក៏​ថា​យ៉ាង​ហោច​ណាស់ ក៏​អាច​រំងាប់​ភាព​ច្របូកច្របល់​នៅ​ក្នុង​ប្រទេស។ ចូរ​កុំ​ភ្លេច​ថា ព្រះចៅភូមិបុល អាឌុលយ៉ាដេ​ត្រូវ​បាន​ប្រជារាស្រ្ត​ថៃ​គោរព​ស្មើ​នឹង​ព្រះអាទិទេព។ គេ​មិន​ត្រូវ​ភ្លេច​ទេ​ថា កាល​ពី​វិបត្តិ​នយោបាយ​ធ្ងន់ធ្ងរ​ក្នុង​ឆ្នំា ១៩៩២ កុំ​តែ​មាន​អន្តរាគមន៍​ពី​ព្រះចៅ​ភូមិបុល ម្ល៉េះ​មិន​ដឹង​ជា​វិបត្តិ​ធ្លាក់​ដុន​ដាប​ដល់​កម្រិត​ណា​ទេ។ វិបត្តិ​នយោបាយ​ដែល​កាល​ណោះ ព្រះចៅភូមិបុល​បាន​កោះ​ហៅ​ភាគី​ជម្លោះ ទំាង​ស៊ីវិល និង​យោធា​ចូល​ក្នុង​វំាង។ មាន​បន្ទូល​តែ​មួយ​ម៉ាត់​ឲ្យ​បញ្ឈប់​ជម្លោះ ទំាង​អស់​គ្នា​ក៏​បាន​លត់​ជង្គន់​សន្យា​ឈប់​ឈ្លោះ​គ្នា​ភ្លាម។

តែ​សំណួរ​ដែល​ចោទ​នៅ​ពេល​នេះ គឺ​ថា តើ​ព្រះចៅភូមិបុល នៅ​តែ​មាន​ឥទ្ធិពល និង​ទឹក​មាត់​ប្រៃ​ដូច​កាល​ពី​ជាង ២០​ឆ្នំា​មុន ដែរ​ឬ​ទេ ?។
និយាយ​ជា​រួម គឺ​មិន​សូវ​មាន​ប៉ុន្មាន​ទេ នេះ​ក៏​ដោយសារ​តែ​ជំហរ​មិន​កណ្តាល​របស់​ព្រះអង្គ​នៅ​ក្នុង​ដំណោះស្រាយ​វិបត្តិ​នា​ពេល​កន្លង​មក ពិសេស​ក្នុង​វិបត្តិ​ធ្ងន់ធ្ងរ​ឆ្នំា ២០១០។ អ្នក​ដែល​តូចចិត្ត តូច​ថ្លើម​ខ្លំាង​ជាង​គេ​នោះ គឺ​ខាង​ក្រុមអាវក្រហម​របស់​លោក​ថាក់ស៊ីន។

យ៉ាង​ណា​ក៏​ដោយ នៅ​ពេល​នេះ គេ​នៅ​មិន​ទាន់​ឮ​ប្រតិមកម្ម​អ្វី​ពី​ព្រះអង្គ​នៅ​ឡើយ​ទេ ជុំវិញ​វិបត្តិ​សព្វថ្ងៃ។ តែ​លោក​អគ្គលេខាធិការ​អង្គការ​សហប្រជាជាតិ​បាន គីមូន​បាន​សម្តែង​ក្តីបារម្ភ​យ៉ាង​ខ្លំាង​ចំពោះ​វិបត្តិនយោបាយ​ដែល​បាន​និង​កំពុង​បន្ត​ហែកហួរ​សង្គមថៃ​កាន់​តែ​ជ្រៅ​ទៅៗ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI