អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អង់គ្លេស​ខឹង មិន​ចង់​បង់​លុយបន្ថែម​ទៅឲ្យ​​កេសថវិកា​អឺរ៉ុប

សំឡេង ០៦:៣០
នាយករដ្ឋមន្រ្តី​អង់គ្លេស ដាវីដ កាមឺរ៉ុន​ខឹងនឹង​គណៈកម្មការ​អឺរ៉ុប​ដែល​ទាមទារ​ឲ្យ​អង់គ្លេស​បង់​ថវិកា​បន្ថែម ជាង​២ពាន់​លាន​អឺរ៉ូ កាលពីថ្ងៃ​ទី ២៤ តុលា ២០១៤
នាយករដ្ឋមន្រ្តី​អង់គ្លេស ដាវីដ កាមឺរ៉ុន​ខឹងនឹង​គណៈកម្មការ​អឺរ៉ុប​ដែល​ទាមទារ​ឲ្យ​អង់គ្លេស​បង់​ថវិកា​បន្ថែម ជាង​២ពាន់​លាន​អឺរ៉ូ កាលពីថ្ងៃ​ទី ២៤ តុលា ២០១៤ ©REUTERS/Christian Hartmann
ដោយ៖ ឈាង បុប្ផា
៣៣ នាទី

កិច្ចប្រជុំកំពូល​អឺរ៉ុប​បាន​បិទ​បញ្ចប់ កាលពី​ល្ងាច​ថ្ងៃ​សុក្រ​ម្សិលមិញ ជាមួយ​នឹង​ភាព​តានតឹង នៅពេល​ប្រទេស​សមាជិក​ជជែក គ្នា យ៉ាង​តឹង​សសៃក ទៅលើ​ការបង់​បន្ថែម​របស់​ប្រទេស​សមាជិក​មួយ​ចំនួន ទៅក្នុង​កេសលុយ​អឺរ៉ុប។ លោក នាយករដ្ឋមន្រ្តី​អង់គ្លេស ​ដាវីដ កាមឺរ៉ុន​បាន​ដើរ​ចេញ​ពី​កិច្ចប្រជុំ បន្ទាប់ពី​ អង់គ្លេស ត្រូវ​បាន​ទាមទារ​ឲ្យ​បង់​លុយ​បន្ថែម ប្រមាណ​២​ពាន់​លាន​អឺរូ ចូល​ក្នុង​កញ្ចប់​ថវិកា​ប្រចាំ​ឆ្នាំ ២០១៤​របស់​សហភាព​អឺរ៉ុប។ នៅក្នុង​សន្និសីទ នា​ល្ងាច​ថ្ងៃ​ម្សិលមិញ នាយករដ្ឋមន្រ្តី​អង់គ្លេស​បាន​ប្រកាស​រួចហើយ ថា អង់គ្លេស​នឹង​មិន​បង់​ លុយ​បន្ថែម ដាច់ខាត​ទៅតាម​ការទាមទារ​របស់​សហភាព​អឺរ៉ុប។ 

ផ្សាយពាណិជ្ជកម្ម

នាយករដ្ឋមន្រ្តី​អង់គ្លេស លោក​ដាវីដ កាមឺរ៉ុន ស្រែក​បញ្ចេញ​កំហឹង បន្ទាប់​ពី​ដើរ​ចេញ​ពី​កិច្ចប្រជុំ​កំពូល​អឺរ៉ុប ដែល​នៅក្នុង​នោះ គណៈកម្មការ​អឺរ៉ុប​បាន​ទាមទារ​ឲ្យ​អង់គ្លេស​បង់​លុយ​បន្ថែម​ប្រមាណ ២​ពាន់​លាន​អឺរូ ចូល​ក្នុង​កេស​ថវិកា​របស់​សហភាព​អឺរ៉ុប សម្រាប់​ឆ្នាំ ២០១៤។

 
ក្នុង​មួយ​ឆ្នាំៗ អង់គ្លេស ក៏​ដូច​ជា​ប្រទេស​សមាជិក​សហភាព​អឺរ៉ុប ចំនួន ២៧​ប្រទេស​ទៀត ត្រូវ​ចូលរួម​ធ្វើ​វិភាគទាន បង់​ប្រាក់​សម្រាប់​ថវិកា​សហភាព​អឺរ៉ុប។ ថវិកា​ដែលគណៈកម្មការ​អឺរ៉ុប​ត្រូវ​ប្រើ​សម្រាប់​ចំណាយ ទៅលើ​ហេដ្ឋារចនាសម្ព័ន្ធ​អឺរ៉ុប ជំនួយ ទៅ​បរទេស សម្រាប់​ដោះស្រាយ​បញ្ហា​ហិរញ្ញវត្ថុ អន្តោប្រវេសន៍ ឬ​ការបង្កើត​ការងារ​ដល់​ពលរដ្ឋ​អឺរ៉ុប ជាដើម។

ថវិកា​សម្រាប់​ឆ្នាំ ២០១៤ បាន​អនុម័ត​រួចហើយ កាលពី​ខែ​វិច្ឆិកា​ឆ្នាំ​២០១៣។ នៅ​ចុង​ឆ្នាំ​២០១៣ ប្រទេស​សមាជិក​អឺរ៉ុប​បាន​យល់ព្រម​រួមគ្នា បោះឆ្នោត ឲ្យ​អឺរ៉ុប​មាន​កញ្ចប់​ថវិកា​ប្រមាណ ១៣៥,៥​ពាន់​លាន​អឺរ៉ូ។ ការចូលរួម​ធ្វើ​វិភាគទាន​របស់​ប្រទេស​សមាជិក ត្រូវ​គន់គូរ ទៅតាម​ទំហំ​សេដ្ឋកិច្ច របស់​ប្រទេស​សមាជិក​នីមួយៗ ឬ​អាច​និយាយ​ម្យ៉ាងទៀត​ថា ​គេ​ពឹងផ្អែក​ទៅលើ​លទ្ធផល​នៃ​កំណើន​សេដ្ឋកិច្ច ឬ ទំហំ​ផលិតផល​ក្នុង​ស្រុក​សរុប​របស់​ប្រទេស​នីមួយៗ។ បើ​ប្រទេស​ណា​ធំ មាន​សេដ្ឋកិច្ច​ល្អប្រសើរ និង​សារៈសំខាន់ នោះ​ប្រទេស​នោះ ត្រូវ​ចូល​រួម​ធ្វើ​វិភាគទាន​ច្រើន​ជាងគេ។

រហូតមកដល់​ពេលនេះ គឺ​បារាំង និង​អាល្លឺម៉ង់​ដែល​ចូលរួម​ធ្វើ​វិភាគទាន​ច្រើន​ជាងគេ បើប្រៀបធៀប​នឹង​សមាជិក​អឺរ៉ុប​ដទៃទៀត។ ឧទាហរណ៍ជាក់ស្តែង នៅពេល​បារាំង ត្រូវ​បង់​ប្រមាណ ២៣​ពាន់​លាន​អឺរ៉ូ ក្នុង​មួយ​ឆ្នាំៗ សម្រាប់​កញ្ចប់​ថវិកា​អឺរ៉ុប អង់គ្លេស​ឯណោះវិញ បង់​ប្រមាណ ១១​ពាន់​លាន​អឺរ៉ូ។

កាលពី​ថ្ងៃ​សុក្រ ម្សិលមិញ មិនមែន​មាន​តែ​អង់គ្លេសទេ ដែល​ត្រូវ​បង់​ប្រាក់​បន្ថែម ចូល​ក្នុង​កេស​ថវិកា​របស់សហភាព​អឺរ៉ុប។ ប្រទេស​៤​ផ្សេងទៀត ដូចជា ហូឡង់ អ៊ីតាលី ក្រិក និង​ស្ហីប​ជាដើម សុទ្ធ​តែ​ទាមទារ​ឲ្យ​បង់​ប្រាក់​បន្ថែម​ចូលក្នុង​កេស​ថវិកា​របស់​សហភាព​អឺរ៉ុប។ ប្រទេស​ហូឡង់​ត្រូវ​តម្រូវ​ឲ្យ​បង់​៣០០​លាន​អឺរ៉ូ បន្ថែម​ពី​លើ​ចំនួន​វិភាគទាន​ដែល​ខ្លួន​ធ្លាប់​បង់ ទៅ​ក្នុង​កេស​ថវិកា​អឺរ៉ុប។ អង់គ្លេស​គ្រោង​កៀងគរ ប្រទេស​ហូឡង់​ឲ្យ​តវ៉ា​នឹង​ការទាមទារ​ថវិកា​បន្ថែម​ពី គណៈកម្មការ​អឺរ៉ុប។

ទីភ្នាក់ងារ​វាយតម្លៃ​ស្ថានភាព​សេដ្ឋកិច្ច​របស់​អឺរ៉ុប Eurostatបាន​បង្ហាញ​ថា សេដ្ឋកិច្ច​របស់​ប្រទេស​ទាំង​៥​ខាងលើ ជាពិសេស​អង់គ្លេស មាន​សេដ្ឋកិច្ច​ល្អ​ប្រសើរ ជាង​ការគ្រោងទុក​ពីមុន។ តាម​ប្រធាន​គណៈកម្មការ​អឺរ៉ុប លោក​បារ៉ូសូ ដែល​ត្រូវ​ចាកចេញ​ពីតំណែង​នៅ​ខែ​ក្រោយ វា​គ្មាន​រឿង​អ្វី​ដែល​អង់គ្លេស​ត្រូវ​ភ្ញាក់ផ្អើល ខឹងសម្បារ​មិន​ចង់​បង់​វិភាគទាន​បន្ថែម​ទៅ​កេសប្រាក់​អឺរ៉ុបទេ នៅពេលនេះទេ។ តាម​បារ៉ូសូ អង់គ្លេស​បាន​យល់ព្រមព្រៀង​ជាមួយ​ប្រទេស​សមាជិក​ផ្សេងទៀត ដើម្បី​ឲ្យ​គេ​ធ្វើការគន់ គណនា​បែបថ្មី។ តាម​ការគន់គូរ​ថ្មី អង់គ្លេស​មាន​គំរូ​សេដ្ឋកិច្ច​ល្អប្រសើរ​ជាងមុន ដោយ​ហេតុនេះហើយ ទើប​គេ​ទាមទារ​ឲ្យ​អង់គ្លេស​បង់​វិភាគទាន ទៅតាម​កំណើន​សេដ្ឋកិច្ច​ល្អប្រសើរ​របស់ខ្លួន។ សូមបញ្ជាក់ថា ខុសពី​ឆ្នាំមុនៗ នៅឆ្នាំនេះ អង់គ្លេស​បាន​បូកបញ្ចូល​ចំណូល នៅក្នុង​ផ្នែក​ជួញដូរ​ថ្នាំញៀន និង​ចំណូល​ខាងផ្នែក​ពេស្យាចារ ចូល​ក្នុង​ខ្ទង់​ចំណូល​រក​បាន​របស់​ប្រជាជន​អង់គ្លេស។ គឺ​ការបញ្ចូល​ចំណូល​ទាំងពីរ​ខាងលើ បើ​ទោះជាតិចតួច ប៉ុន្តែ វា​បាន​ធ្វើ​ឲ្យ​អ្នកជំនាញ​អឺរ៉ុប​វាយតម្លៃថា ចំណូល​ប្រជាជន​អង់គ្លេស​មាន​ល្អ​ប្រសើរ ដូច្នេះ​ត្រូវ​បង់​វិភាគទាន​បន្ថែម។

ពាក្យ​ដែលថា សោយ​សុខ លើ​គំនរ​ទុក​អ្នកដទៃ
តាំងពី​ឆ្នាំ ២០០៨ អង់គ្លេស​ធ្លាប់​តែ​សុខស្រួល ដោយ​បង់វិភាគទាន​កាន់តែ​តិច នៅពេល​ប្រទេស​ផ្សេងទៀត ដូចជា​បារាំង ឬ​អាល្លឺម៉ង់ ត្រូវ​បង់​វិភាគទាន​ច្រើន​ជាង​អង់គ្លេស ដល់​ទៅ​២​ដង ដើម្បី​បង្គ្រប់​ថវិកា​សហភាព​អឺរ៉ុប។ លើកនេះ ទៅតាម​ការសើរើ គន់គូរ​ឡើងវិញ លើ​ទំហំ​សេដ្ឋកិច្ច​របស់​ប្រទេស​សមាជិក​អឺរ៉ុប ប្រទេស​៥​ផ្សេងទៀត ដែល​ធ្លាប់​បង់​ច្រើន​កន្លងមក ចំនួន ៥​ត្រូវ​បាន​គណៈកម្មការ​អឺរ៉ុប​សង​ប្រាក់​មកវិញ។ ក្រៅតែ​ពី​អូទ្រីស ប៉ូឡូញ និង​ដាណឺម៉ាក បារាំង បាន​ទទួល​ប្រាក់​សង​មកវិញ មួយ​ពាន់​លាន​អឺរ៉ូ ក្នុង​ពេល​ដែល អាល្លឺម៉ង់​ បាន​មកវិញ ទឹកប្រាក់​៧៨០​លាន​អឺរ៉ូ​ពី​សហភាព​អឺរ៉ុប។

នាយករដ្ឋមន្រ្តី អង់គ្លេស បាន​បាន​ទាមទារ​ឲ្យ​រដ្ឋមន្រ្តី​សេដ្ឋកិច្ច​អឺរ៉ុប​ជួប​ពិភាក្សា​គ្នា​ជាបន្ទាន់ ដើម្បី ពិនិត្យ​មើល​ទៅលើ​ដំណើរ​គន់គូរ ដែល​ធ្វើ​ឲ្យ​អង់គ្លេស​ត្រូវ​បង់​ប្រាក់​បន្ថែម​ច្រើន​ជាងគេ ទៅក្នុង​កេស​លុយ​អឺរ៉ុប។ នាយករដ្ឋមន្រ្តី អាល្លឺម៉ង់ យល់ស្រប​តាម​ការទាមទារ​របស់​នាយករដ្ឋមន្រ្តី អង់គ្លេស នៅពេល​ដែល​ប្រធានាធិបតី​បារាំង និង​អៀរឡង់ ទាមទារ​ឲ្យ​អង់គ្លេស គោរព​តាម​កិច្ចព្រមព្រៀង គោរព​កាតព្វកិច្ច ដូចដែល​ប្រទេស​ផ្សេងទៀត ធ្លាប់​បាន​ធ្វើ​កន្លងមក។

សម្រាប់​អ្នកជំនាញ សេដ្ឋកិច្ច វិញ អង់គ្លេស តែងសំងំ​ស្ងៀម នៅពេល​ខ្លួន​បង់​ថវិកា​តិចជាង​គេ។ ប៉ុន្តែ គ្រាន់​តែ​ដឹងខ្លួន​ថា ត្រូវ​បង់​បន្ថែម អង់គ្លេស ស្រែក​ប្រកូកប្រកាស​ថា គ្មាន​យុត្តិធម៌។ តាមអ្នកវិភាគ​ខ្លះវិញ នាយករដ្ឋមន្រ្តី អង់គ្លេស បង្ហាញ​ការមិនពេញចិត្ត​របស់ខ្លួន ស្រែក​ក្តែង ពី​ភាព​អយុត្តិធម៌​របស់​សហភាព​អឺរ៉ុប ក៏ដោយសារ​តែ ហេតុផល​នយោបាយ​ក្នុង​ស្រុកដែរ។ នៅប៉ុន្មាន​ថ្ងៃ​ខាងមុខ នៅក្នុង​ការបោះឆ្នោត ថ្នាក់​មូលដ្ឋាន គណបក្ស​អភិរក្ស​និយម​របស់​លោក​នាយករដ្ឋមន្រ្តី អង់គ្លេស អាច​ប្រឈម​នឹង​ការបាត់បង់​កៅអី ទៅ​ឲ្យ​គណបក្ស​ប្រឆាំង ដែល​មាន​និន្នាការ ចង់ឲ្យ​អង់គ្លេស​ដក​ខ្លួន​ចេញ​ពី​សមាជិក​របស់​​សហភាពអឺរ៉ុប៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ