អានតួអត្ថបទ
World Cup 2010

បារាំង​និង​អាហ្វ្រិក​ខាង​ត្បូង​ចូល​ក្នុង​ប្រវត្តិសាស្រ្ត​បាល់ទាត់​ពិភពលោក

កីឡាករ​​ខ្សែបម្រើ​បារាំង​ត្រូវ​ទទួល​កាត​ក្រហម​តាំង​ពី​ដើមទី
កីឡាករ​​ខ្សែបម្រើ​បារាំង​ត្រូវ​ទទួល​កាត​ក្រហម​តាំង​ពី​ដើមទី REUTERS/Ivan Alvarado
ដោយ៖ សេង ឌីណា
២៦ នាទី

ក្រោយ​ពី​ការ​ប្រកួត​ចុងក្រោយ នៃ​ពូល A កាល​ពី​ថ្ងៃ​អង្គារ​ម្សិលមិញ ក្រុម​ជម្រើស​ ជាតិ​បារាំង និង​អាហ្វ្រិក​ខាង​ត្បូង ត្រូវ​ធ្លាក់មិន​បាន​ទៅប្រកួត​វគ្គ​បន្ទាប់​ទៀត​ទេ។ ការ​ប្រកួត​ពានរង្វាន់​ពិភពលោក​បាន​ត្រូវ​បញ្ចប់​ហើយ​ សម្រាប់​ក្រុម​ទាំងពីរនេះ។ ក៏ប៉ុន្តែ បរាជ័យ​របស់​ក្រុម​ទាំងពីរនេះ​នឹង​ត្រូវ​ដាន​ជាប់​ក្នុង​ប្រវត្តិ​បាល់ទាត់​ ពិភពលោក​។ អាហ្វ្រិក​ខាង​ត្បូង គឺ​ជា​ក្រុម​ម្ចាស់ផ្ទះ​ ដែល​​ធ្លាក់​នៅ​ជុំទី១។ ចំណែក​បារាំង​វិញ គឺ​ជា​ក្រុម​ជម្រើស​ជាតិ ដែល​កីឡាករ​នាំ​គ្នា​ធ្វើ​កូដកម្ម​មិនចូល​ហាត់។ ទាំងនេះ គឺ​សុទ្ធតែ​ជារឿង​​មិន​ធ្លាប់​ឃើញ​មាន​ ក្នុង​ប្រវត្តិ​បាល់ទាត់​ពិភពលោក ៨០​ឆ្នាំ​កន្លងមកនេះ។

ផ្សាយពាណិជ្ជកម្ម

ការពន្យល់​របស់​សេង ឌីណា

លាហើយ World Cup 2010!!! ខ្ញុំ​ត្រូវ​វេច​បង្វិច​ត្រឡប់​ទៅ​ផ្ទះវិញ​ហើយ!!! ក៏ប៉ុន្តែ សម្រាប់​ក្រុម​ជម្រើស​ជាតិ​អាហ្វ្រិក​ខាង​ត្បូង គេ​មិនចាំបាច់​ធ្វើ​ដំណើរ​ឆ្ងាយ​ត្រឡប់​ទៅ​ផ្ទះវិញ​ទេ ព្រោះ​ អាហ្វ្រិក​ខាង​ត្បូង គឺ​ជា​ម្ចាស់ផ្ទះ​ស្រាប់។

ចាប់តាំង​ពី​​ពេល​ដែល​ការប្រកួត​ពានរង្វាន់​ពិភពលោក (World Cup) ត្រូវ​បាន​បង្កើត​ឡើង​ នៅ​ឆ្នាំ​១៩៣០ នេះ​គឺ​ជា​លើក​ទី១​ហើយ ដែល​​ម្ចាស់ផ្ទះ​ឆ្លង​មិនផុត​វគ្គ​ទី១។ សម្រាប់​អាហ្វ្រិក​ខាង​ត្បូង នេះ​គឺ​ជា​រឿង​ដ៏​គួរ​ឲ្យ​សោកស្តាយ​មួយ។ ក៏ប៉ុន្តែ ទោះជាយ៉ាងណា ក្រុម​ជម្រើស​ជាតិ​អាហ្វ្រិក​ខាង​ត្បូង​ក៏​មាន​មោទនភាព​ខ្លះ​ដែរ ចំពោះ​លទ្ធផល​ ដែល​ពួក​គេ​ទទួលបាន ជាពិសេស នៅ​ក្នុង​ការ​ប្រកួត​ចុងក្រោយ​ ដោយ​អាហ្វ្រិក​ខាង​ត្បូង​យក​ឈ្នះ​​ក្រុម​ជម្រើស​ជាតិ​បារាំង ២​ទល់​នឹង ១។

ក្រុម​ដែល​ត្រូវ​ទទួល​រង​នូវ​ភាព​អាម៉ាស់​ជាងគេ គឺ​ក្រុម​ជម្រើស​ជាតិ​បារាំង។ ក្នុង​ចំណោម​៣​ប្រកួត​ បារាំង​​រក​ឈ្នះ​តែ​មួយ​ប្រកួត​ក៏​មិន​បាន​ផង (​ចាញ់​២ ស្មើ​១)។ សូម្បី​តែ​ជាមួយ​ក្រុម​អាហ្វ្រិក​ខាង​ត្បូង ដែល​អ្នកណា​ក៏​ដឹង​ថា​ជា​ក្រុម​ខ្សោយ ក៏​បារាំង​ទាត់​មិន​ឈ្នះ​ផង។ ជាងនេះ​ទៅទៀត នៅ​ក្នុង​ទីលាន​ប្រកួត មិន​ទទួល​បាន​លទ្ធផល​​ហើយ នៅ​ក្រៅ​ទីលាន​ប្រកួត​ កីឡាករ​បារាំង​​បង្ក​នូវ​ភាព​អាម៉ាស់​កាន់​តែ​ខ្លាំង​ដល់​ប្រជាជាតិ​ខ្លួន​ទៅទៀត។ កីឡាករ​​ (នីកូឡា អានែលកា កីឡាករ​ខ្សែប្រយុទ្ធ​លេង​ឲ្យ​ក្លឹប Chelsea) ជេរប្រមាថគ្រូ​បង្វឹក ​ហើយ​ត្រូវ​គេ​បណ្តេញ​ចេញ​ពីក្រុម។ កីឡាករ​​ទាំងក្រុម នាំ​គ្នា​ធ្វើ​បាតុកម្ម​​មិន​ចូល​ហាត់ ដើម្បី​ការពារ​អានែលកា ដែល​គេ​បណ្តេញចេញ។ បណ្តា​សារព័ត៌មាន​ស្ទើរតែ​គ្រប់ទិសទី​នាំ​គ្នា​សើច​ចំអក។

នៅឯប្រទេស​បារាំង​ឯណេះ​វិញ ប្រជាជន​បារាំង​ជា​ទូទៅ ទាំង​អ្នក​និយម​បាល់ទាត់ និង​អ្នក​មិន​និយម​បាល់ទាត់ ទាំង​ប្រជាជន​ធម្មតា រហូត​ដល់​អ្នក​នយោបាយ បាន​នាំគ្នា​បញ្ចេញ​ប្រតិកម្ម​ប្រកប​ដោយ​កំហឹង លាយឡំ​នឹង​ភាព​អាម៉ាស់ ចំពោះ​ទង្វើ​របស់​កីឡាករ​បារាំង​ទាំងនេះ។ គ្រប់គ្នា​បាន​ទាមទារ​ឲ្យ​ថ្នាក់ដឹកនាំ​សហព័ន្ធកីឡាបាល់ទាត់​បារាំង​លាឈប់​ទាំងអស់​គ្នា ហើយ​រើស​មេដឹកនាំ​ថ្មី។

ការប្រកួត​បាល់ទាត់​ពិភពលោក នៅ​អាហ្វ្រិក​ខាង​ត្បូង បាន​ឈាន​មក​ដល់​ទី​បញ្ចប់​ហើយ សម្រាប់​ក្រុម​ជម្រើស​ជាតិ​បារាំង។ ក៏ប៉ុន្តែ ព្យុះសង្ឃរា​នៃ​ពិភពបាល់ទាត់​បារាំង​ទើប​តែ​នឹង​ចាប់​ផ្តើម​ប៉ុណ្ណោះ។ សង្រ្គាម​ពាក្យសម្តី និង​ការទម្លាក់​កំហុស​ដាក់​គ្នា នឹង​ចាប់​កើត​មាន​កាន់តែ​ខ្លាំង នៅ​ក្នុង​រយៈពេល​ប៉ុន្មាន​ថ្ងៃ​ខាងមុខទៀតនេះ។ ការពិត​ មា​ន​អ្វី​កើត​ឡើង​ក្នុង​ក្រុម​ជម្រើស​ជាតិ​បារាំង អាច​នឹង​ត្រូវ​ផ្ទុះឡើង​នាពេល​ខាងមុខនេះ។ ក៏ប៉ុន្តែ នៅពេលនេះ អ្វី​ដែល​គេ​អាច​ដឹង​បាន​នោះ គឺ​ថា នៅចុង​បញ្ចប់​នៃ​ការ​ប្រកួត​ World Cup 2010 មាន​តែ​ក្រុម​ជម្រើស​ជាតិ​២​ប្រទេស​តែប៉ុណ្ណោះ ដែល​គេ​នឹង​ចងចាំ​​ជាងគេ គឺ​ក្រុម​ដែល​ប្រកួត​ឈ្នះ​ជា​ជើង​ឯក​ពិភពលោក​ប្រចាំ​ឆ្នាំ​២០១០ និង​ក្រុម​ជម្រើស​ជាតិ​បារាំង ដែល​នាំ​គ្នា​ធ្វើ​កូដកម្ម​​ចំកណ្តាល​ World Cup ។ កេរិ៍្តឈ្មោះ​បាល់ទាត់​បារាំង​បាន​ធ្លាក់​ដល់​កម្រិត​មួយ​ទាប​បំផុត​មិន​ធ្លាប់​មាន។ Allez les Bleus !!! Go home!!!

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ