លុយយ័ន​របស់​ចិន​កំពុង​បោះជំហាន​ទៅជា​រូបិយវត្ថុ​សម្រាប់​ពាណិជ្ជកម្ម​អន្តរជាតិ?

សំឡេង ០៣:៣០
ចិន​ចង់​ឲ្យ​លុយ​យ័ន​ក្លាយ​ជា​រូបិយវត្ថុ ដែល​គេ​ប្រើប្រាស់​ជា​ទូទៅ ក្នុងការ​ទូទាត់​ពាណិជ្ជកម្ម​អន្តរជាតិ
ចិន​ចង់​ឲ្យ​លុយ​យ័ន​ក្លាយ​ជា​រូបិយវត្ថុ ដែល​គេ​ប្រើប្រាស់​ជា​ទូទៅ ក្នុងការ​ទូទាត់​ពាណិជ្ជកម្ម​អន្តរជាតិ ©Reuters

នៅថ្ងៃ​សុក្រ​១​មិថុនានេះ គឺ​ជា​ថ្ងៃ​ដែល​ចិន និង​ជប៉ុន ចាប់ផ្តើម​បើក​ឲ្យ​មាន​ការ​ទិញដូរ​រូបិយវត្ថុ​​ដោយ​ផ្ទាល់​ រវាង​​លុយយ័ន​របស់​ចិន និង​លុយ​យេន​របស់​ជប៉ុន ដោយ​មិន​ចាំបាច់​ឆ្លងកាត់​លុយ​ដុល្លារ​របស់​អាមេរិក។ ប្រទេស​ទាំងពីរ​រំពឹង​ថា ការ​បើក​ឲ្យ​មាន​ការ​ទិញដូរ​រូបិយវត្ថុ​ដោយ​ផ្ទាល់នេះ នឹង​​​​ជំរុញ​ឲ្យ​ការ​ដោះដូរ​​ពាណិជ្ជកម្ម​ទ្វេភាគី​កាន់តែ​មាន​កំណើន​ខ្លាំងឡើង​ថែមទៀត។ ក៏ប៉ុន្តែ សម្រាប់​ចិន គោលដៅ​ចម្បង គឺ​ចង់​កាត់បន្ថយ​ឥទ្ធិពល​នៃ​លុយ​ដុល្លារ​អាមេរិក ហើយ​ជំរុញ​ឲ្យ​លុយ​យ័ន​ក្លាយ​ជា​រូបិយវត្ថុ​អន្តរជាតិ។

ផ្សាយពាណិជ្ជកម្ម

នេះ​គឺ​ជាលើក​ដំបូង​បង្អស់ ដែល​ចិន​បើក​ឲ្យ​មាន​ការ​ជួញដូរ​ដោយ​ផ្ទាល់​រវាង​លុយ​យ័ន និង​រូបិយវត្ថុ​បរទេស ក្រៅ​ពី​លុយ​ដុល្លារ​អាមេរិក។ ចាប់​ពី​ថ្ងៃ​សុក្រ​នេះ​ទៅ ការ​ទិញដូរ​លុយ​យ័ន​របស់​ចិន និង​លុយ​យេន​របស់​ជប៉ុន​​ នឹង​អាច​ត្រូវ​​ធ្វើ​ឡើង​ដោយ​ផ្ទាល់ ដោយ​មិន​ចាំបាច់​ឆ្លងកាត់​លុយ​ដុល្លារ​អាមេរិក​ដូច​ពីមុន​ទៀត​ទេ។ អត្រា​ប្តូរប្រាក់​យេន-យ័ន​​នឹង​ត្រូវ​គេ​កំណត់​ដោយ​ផ្ទាល់ នៅ​លើ​ទីផ្សារ​ប្តូរប្រាក់ ពោល​គឺ​ ខុស​ពី​ពេល​កន្លងទៅ ដែល​អត្រា​ប្តូរប្រាក់​​រវាង​យេន និង​យ័ន ត្រូវ​គណនា​ជា​ពីរ​ដំណាក់​កាល ដោយ​យោង​ទៅលើ​អត្រា​ប្តូរប្រាក់​​យេន-​ដុល្លារ និង​​​អត្រា​ដុល្លារ-យ័ន។

ការជួញដូរ​លុយ​យេន និង​យ័ន នឹង​ត្រូវ​ធ្វើ​ឡើង នៅ​ក្នុង​ទីផ្សារ​ហិរញ្ញវត្ថុ​ធំៗ​ពីរ គឺ​ទីផ្សារ​តូក្យូ នៅ​ជប៉ុន និង​ទីផ្សារ​សៀងហៃ នៅ​ចិន។

រដ្ឋាភិបាល​ជប៉ុន និង​រដ្ឋាភិបាល​ចិន​រំពឹង​ថា ការ​បើក​ឲ្យ​មាន​ការ​ជួញដូរ​យេន-យ័ន ដោយ​ផ្ទាល់​បែបនេះ នឹងជួយ​កាត់បន្ថយ​ហានិភ័យ និង​កម្រៃ​ជើងសា​នៃ​ការ​ប្តូរប្រាក់ របស់​ក្រុមហ៊ុន​​របស់​ចិន និង​ជប៉ុន ដែល​រកស៊ី​ជាមួយគ្នា ហើយ​ជួយសម្រួល​ដល់​ការ​ប្រើប្រាស់​លុយ​យេន និង​លុយ​យ័ន ក្នុងការ​ធ្វើ​ពាណិជ្ជកម្ម និង​វិនិយោគ​ទ្វេភាគី។

ក៏ប៉ុន្តែ សម្រាប់​ចិន យុទ្ធសាស្រ្ត​​សម្រាប់​រយៈពេលវែង គឺ​ចង់​កាត់បន្ថយ​ឥទ្ធិពល​លុយ​ដុល្លារ​អាមេរិក ក្នុង​ទំនាក់ទំនង​ពាណិជ្ជកម្ម​អន្តរជាតិ។ ចិនតែងតែចិញ្ចឹមចិត្ត​ចង់​ឃើញ​លុយ​យ័ន​របស់​ខ្លួន ក្លាយ​ជា​រូបិយវត្ថុ​​ចម្បងមួយ ដែល​គេ​​ប្រើប្រាស់ នៅ​ក្នុងការ​ទូទាត់​ពាណិជ្ជកម្ម​នៅ​ទូទាំង​ពិភពលោក។

ចិន​ប្រហែល​ជា​យល់ថា ការ​កាត់បន្ថយ​ឥទ្ធិពល​លុយ​ដុល្លារ​អាមេរិក ក្នុង​ទំនាក់ទំនង​ពាណិជ្ជកម្ម​ទ្វេភាគី​ចិន-ជប៉ុន​ គឺ​ជា​ចំណុច​ចាប់ផ្តើម​ដ៏​សំខាន់​មួយ ដើម្បី​ឈាន​ទៅ​សម្រេច​គោលដៅ​របស់​ខ្លួន ពីព្រោះ​ថា ប្រទេស​ទាំងពីរ​នេះ​មាន​ការដោះដូរ​ពាណិជ្ជកម្ម​ជាមួយ​គ្នា​ច្រើន។

គួរ​បញ្ជាក់ថា នៅ​ពេលនេះ ចិន​បាន​​ប្រជែង​ឈ្នះ​​​អាមេរិក ហើយ​ក្លាយ​ជា​​​ដៃគូ​ពាណិជ្ជកម្ម​ធំបំផុត​របស់​ជប៉ុន។ កាល​ពី​ឆ្នាំ​២០១១​កន្លងទៅ ការដោះដូរ​ពាណិជ្ជកម្ម​ទ្វេភាគី​រវាង​ចិន និង​ជប៉ុន មាន​រហូតដល់​ទៅ​ជិត ៣៤៥ពាន់លាន​ដុល្លារ។ ក៏ប៉ុន្តែ នៅ​ក្នុង​ការ​ដោះដូរ​ពាណិជ្ជកម្ម​ទ្វេភាគី​នេះ មាន​មិនដល់ ១%ផង ដែល​ទូទាត់​ជា​លុយ​យ័ន​របស់​ចិន។

ការ​បើក​ឲ្យ​មាន​ការ​ជួញដូរ​ដោយ​ផ្ទាល់​រវាង​លុយ​យ័ន និង​លុយ​យេន​របស់​ជប៉ុន អាច​នឹង​ជួយ​ឲ្យ​ចិន​ពង្រីក​​​ការ​ជួញដូរ​រវាង​លុយ​យ័ន និង​រូបិយវត្ថុ​បរទេស​ផ្សេងទៀត ដើម្បី​បោះ​ជំហាន​ទៅមុខ​មួយ​ជំហាន​ទៀត គឺ​​​បង្កើន​ឥទ្ធិពល​លុយ​យ័ន នៅ​ក្នុង​តំបន់​អាស៊ី។

នៅ​ពេល​បច្ចុប្បន្ន​នេះ គេ​សង្កេតឃើញ​ថា ការ​ប្រើប្រាស់​លុយ​យ័ន ក្នុងការ​ទូទាត់​ពាណិជ្ជកម្ម​ក្រៅ​ប្រទេស​របស់​ចិន មាន​ការ​កើនឡើង​គួរ​ឲ្យ​កត់សម្គាល់។ កាល​ពី​ឆ្នាំ​២០១១​កន្លងទៅនេះ ពាណិជ្ជកម្ម​ក្រៅប្រទេស​របស់​ចិន​ជាង ៩% ត្រូវ​ទូទាត់​ដោយ​ប្រើ​លុយ​យ័ន ធៀប​នឹងឆ្នាំ​២០១០ ដែលមាន​ត្រឹមតែ ០,៧%។

ក៏ប៉ុន្តែ គោលដៅ​របស់​ចិន ដែល​ចង់​ឲ្យ​លុយ​យ័ន​ក្លាយ​ជា​រូបិយវត្ថុ​អន្តរជាតិ ជំនួស​លុយ​ដុល្លារ​អាមេរិក នឹង​ត្រូវ​ប្រឈមមុខ​នឹង​ឧបសគ្គ​ចម្បង​មួយ គឺ​នយោបាយ​រឹតត្បឹត​របស់​ចិន ដែល​មិន​បណ្តោយ​ឲ្យ​តម្លៃ​លុយ​យ័ន​ប្រែប្រួល​ទៅ​តាម​ច្បាប់​ទីផ្សារ​សេរី។ រហូត​មកទល់​ពេលនេះ អាជ្ញាធរ​ចិន​នៅតែ​បន្ត​ធ្វើ​អន្តរាគមន៍ ទប់​លុយយ័ន​មិន​ឲ្យ​ឡើង​ថ្លៃ ដើម្បី​ជួយ​ឲ្យ​ផលិតផល​ចិន​ងាយស្រួល​ក្នុងការ​ប្រកួត​ប្រជែង​នៅលើ​ទីផ្សារ​អន្តរជាតិ ហើយ​ជំរុញ​កំណើន​សេដ្ឋកិច្ច​ចិន។

នៅពេលនេះ បើទោះជា​ចិន​បើក​ឲ្យ​មាន​ការ​ជួញដូរ​ដោយ​ផ្ទាល់​រវាង​លុយ​យ័ន និង​លុយ​យេន​ជប៉ុន​ក៏ដោយ ក៏​មិនមែន​មានន័យថា តម្លៃ​លុយ​យ័ន​នឹង​អាច​ប្រែប្រួល​ទៅតាម​ច្បាប់​ទីផ្សារ​សេរីនោះដែរ។ ការ​ជួញដូរ​ផ្ទាល់​រវាង​លុយ​យ័ន និង​លុយ​ដុល្លារ​អាមេរិក គឺ​ជា​ភស្តុតាង​ស្រាប់។

ដរាបណា​រដ្ឋាភិបាល​ចិន​នៅតែ​មិន​បើក​ឲ្យ​លុយ​យ័ន​ឡើងចុះ​ទៅតាម​តម្លៃ​ទីផ្សារ គេ​ប្រាកដ​ជា​ពិបាក​នឹង​មាន​ទំនុកចិត្ត​លើ​លុយ​យ័ន។ ការ​ខ្វះ​ទំនុកចិត្ត​ពី​បរទេស​នេះ​ហើយ ដែល​ជា​ឧបសគ្គ​ចម្បងមួយ​ ធ្វើ​ឲ្យ​គេ​មាន​ការ​រារែក​ក្នុងការ​ប្រើប្រាស់​លុយ​យ័ន ក្នុងការ​ទូទាត់​ការ​ដោះដូរ​ពាណិជ្ជកម្ម​ជា​ទូទៅ នៅលើ​ពិភពលោក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI