កម្ពុជា

សវនាការ​លើ​បណ្តឹង​សាទុក្ខ​ករណី ឌុច រយៈពេល ៣​ថ្ងៃ បាន​បិទ​បញ្ចប់

អតីត​មេគុក​ទួលស្លែង ឌុច ក្នុង​សវនាការ​ថ្ងៃ​ចុងក្រោយ ៣០ មីនា ២០១១
អតីត​មេគុក​ទួលស្លែង ឌុច ក្នុង​សវនាការ​ថ្ងៃ​ចុងក្រោយ ៣០ មីនា ២០១១ ©Reuters

ការពិភាក្សា​ដេញដោល​លើ​បណ្តឹង​សាទុក្ខករណី​សំណុំរឿង ០០១ របស់ កាំ​ង ហ្កេកអ៊ាវ ហៅ ឌុច រយៈពេល ៣ ថ្ងៃ បាន​បិទ​បញ្ចប់​នៅថ្ងៃ​ពុធ​ទី ៣០ មីនា​។ នៅ​ចុងបញ្ចប់​នៃ​សវនាការ ឌុ​ច បាន​សុំ​ឲ្យ​អង្គជំនុំជម្រះ​តុលាការ​កំពូល ដោះលែង​រូបលោក ដោយ​សំអាង​ថា ខ្លួន​មិន​ស្ថិត​ក្នុង​ចំណោម​មេដឹកនាំ​ខ្មែរក្រហម​ជាន់ខ្ពស់ និង​អ្នកទទួលខុសត្រូវ​ខ្ពស់បំផុត ដែល​ច្បាប់​កំណត់ កាត់ទោស​ឡើយ​។​

ផ្សាយពាណិជ្ជកម្ម

 

សេចក្តីរាយការណ៍​របស់ លី ម៉េងហួរ ពី​ភ្នំពេញ

មុន​ពេល​បិទ​បញ្ចប់​សវនាការ​លើ​បណ្តឹង​សាទុក្ខ នៅ​ថ្ងៃ​ពុធ​នេះ អតីត​មេ​គុក​ទួលស្លែង កាំ​ង ហ្កេ​ក​អ៊ា​វ ហៅ ឌុ​ច អង្គុយ​ក្នុង​រង្វង់​ក្រចកសេះ អាន​នូវ​សេចក្តីថ្លែងការណ៍ ដោយ​សម្លេង​ម៉ាត់ៗ ដូចដែល​គេ​បាន​ឮ​ក្នុង​សវនាការ​កន្លងមក​។​

​សេចក្តីថ្លែងការណ៍​ដែល​រៀបរៀង​ទុក​នោះ ឌុ​ច បានលើកឡើង​ពី​គោលការណ៍​មូលដ្ឋាន​របស់​ខ្លួន ដោយ​សូម​ឲ្យ​អង្គជំនុំជម្រះ​តុលាការ​កំពូល របស់​សាលាក្តី​ខ្មែរក្រហម ពិចារណា និង​សម្រេច​ថា ខ្លួន​ស្ថិតនៅ​ក្រៅ​យុត្តាធិការ​បុគ្គល​ ពោល​គឺ ឌុ​ច​បាន​សុំ​ឲ្យ​តុលាការ​ដោះលែង ក្នុងហេតុផល​ថា លោក​មិនមែន​ជា​មេដឹកនាំ​ជាន់ខ្ពស់ និង​មិនមែន​ជា​អ្នកទទួលខុសត្រូវ​ខ្ពស់បំផុត ក្នុង​របប​កម្ពុជា​ប្រជាធិបតេយ្យ ដែល​ត្រូវ​ចាប់​មក​កាត់ទោស​ឡើយ​។​

​ការស្នើ​សុំ​ដូច្នេះ ក៏​ត្រូវ​បាន​ ឌុ​ច អះអាង​ដែរ​ថា ជា​គោលការណ៍​សំខាន់ សម្រាប់​រក​យុត្តិធម៌​ជូន​ប្រជាជន​កម្ពុជា និង​អាច​ការពារ អតីត​មេដឹកនាំ​ខ្មែរក្រហម​ឲ្យ​ផុត​ពី​ហានិភ័យ​ផងដែរ​ ជាពិសេស ​គឺ​ការពារ​អតីត​កម្មាភិបាល​មធ្យម​របស់​ខ្មែរក្រហម ដែល​មិន​ស្ថិតនៅក្នុង​យុត្តាធិការ​របស់​សាលាក្តី​ចម្រុះ​កាត់ទោស​មេ​ខ្មែរក្រហម​។​

​​យ៉ាង​ក៏ដោយ ឌុ​ច​បានបញ្ជាក់​ថា ខ្លួន​នៅតែ​ទទួលខុសត្រូវ​ខាង​ផ្លូវចិត្ត និង​ខាង​ផ្លូវច្បាប់ ចំពោះ​ឧក្រិដ្ឋកម្ម​នៅ​គុក​ទួលស្លែង​។ ឌុ​ច​ក៏​រក្សា​ជំហរ​សុំ​ខ​មាទោស​ដល់​អ្នកស្លាប់​នៅ ស​ ២១ និង​សុំ​ឲ្យ​គ្រួសារ​អ្នកស្លាប់​ចំហ​ទ្វារ សម្រាប់​ខ្លួន​ចូល​សុំទោស​នៅ​ថ្ងៃ​ណាមួយ​។​

​សវនាការ​រយៈពេល ៣ ថ្ងៃ ចាប់ផ្តើម​កាលពី​ថ្ងៃ​ច័ន្ទ ទី​២៨​មីនា ត្រូវបាន​ប្រព្រឹត្តទៅ​ដោយ​មាន​ការចូលរួម​ធ្វើ​សេចក្តីថ្លែងការណ៍​អំពី​ទឡ្ហីករណ៍​នានា ទាក់ទង​នឹង​ផ្លូវ​ច្បាប់​របស់​សហ​មេធាវី​ការពារ ឌុ​ច សហ​ព្រះរាជអាជ្ញា សហ​មេធាវី​ដើម​បណ្តឹងរដ្ឋប្បវេណី ស្តីពី​យុត្តាធិការ​បុគ្គល ឧក្រិដ្ឋកម្ម​ប្រឆាំង​មនុស្សជាតិ និង​ការផ្តន្ទាទោស​។

នៅ​ថ្ងៃ​ទី​៣ នៃ​សវនាការ នា​ថ្ងៃ​ពុធ​នេះ សហ​មេធាវី​ដើម​បណ្តឹងរដ្ឋប្បវេណី​បាន​ស្នើ​ឲ្យ​តុលាការ​កំពូល ទទួលស្គាល់​អ្នកដាក់ពាក្យ​សុំ​តាំងខ្លួន​ជាដើម​បណ្តឹងរដ្ឋប្បវេណី ក្រុម​១ ក្រុម​២ និង​ក្រុម​៣ សរុប ២២ នាក់ ក្នុង​សំណុំរឿង ០០១​។ សហ​មេធាវី​ដើម​បណ្តឹងរដ្ឋប្បវេណី​ក៏​ស្នើសុំ​ឲ្យ​តុលាការ​កំពូល​កំណត់​ច្បាស់លាស់ ពី​បញ្ហា​សំណង​ជា​សមូហភាព និង​សំណង​ផ្លូវចិត្ត ដោយ​ការសាងសង់​ស្តូប​រម្លឹក​វិញ្ញាណក្ខន្ធ នៅ​គុក​ទួលស្លែង និង​វាលពិឃាត​ជើងឯក ជាដើម​។​

​លោក​ចៅក្រម គង់ ស្រ៊ី​ម ប្រធាន​អង្គជំនុំជម្រះ​តុលាការ​កំពូល ដែល​មាន​សមាសភាព ៧ រូប បានប្រកាស​បញ្ចប់​សវ​នា​ការ​លើ​បណ្តឹង​សាទុក្ខ ករណី ០០១ របស់ ឌុ​ច​។ រីឯ​សេចក្តីសម្រេច​បិទផ្លូវតវ៉ា ក្នុងសំណុំរឿង ឌុច នឹង​ត្រូវ​ប្រកាស​​នៅក្នុងរយៈពេល​ប្រហែល​ជា ២ ឬ​៣ខែ​ទៀត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI