ភូមា

រញ្ជួយដី​នៅ​តំបន់​ត្រីកោណ​មាស មាន​កម្រិត ៦.៨មាត្រដ្ឋាន​រិចទែរ

វត្ត និង​ប្រាសាទ​ក្នុង​ខេត្ត​ឈៀងរ៉ៃ​រលំ​បាក់បែក​ដោយសារ​គ្រោះរញ្ជួយ​ដី​ ដែល​កើតមាន​ក្នុង​ប្រទេស​ភូមា នៅ​យប់​ថ្ងៃ​ព្រហស្បតិ៍ ទី ២៤ មីនា ២០១១
វត្ត និង​ប្រាសាទ​ក្នុង​ខេត្ត​ឈៀងរ៉ៃ​រលំ​បាក់បែក​ដោយសារ​គ្រោះរញ្ជួយ​ដី​ ដែល​កើតមាន​ក្នុង​ប្រទេស​ភូមា នៅ​យប់​ថ្ងៃ​ព្រហស្បតិ៍ ទី ២៤ មីនា ២០១១ ©REUTERS/Chaiwat Subprasom

គ្រោះរញ្ជួយដី​កើតមាន​ឡើង នៅយប់​ថ្ងៃ​ព្រហស្បតិ៍​ទី ២៤ មីនា នៅភាគ​ខាងកើត​ប្រទេស​ភូមា គឺ​ជិត​ព្រំដែន​ភូមា​ជាមួយ​ថៃ ឡាវ និង​ចិន។ កម្រិត​រញ្ជួយ ៦.៨​មាត្រដ្ឋាន​រិចទែរ​បាន​សម្លាប់​មនុស្ស​យ៉ាងហោច ៦០​នាក់ របួស​ជាង​១០០​នាក់ ក្នុង​ប្រទេស​ភូមា និង​ម្នាក់​ក្នុង​ប្រទេស​ថៃ។ បើទោះបី​ជា​​គ្រោះរញ្ជួយដី​លើកនេះ​មាន​កម្រិត​រញ្ជួយ​ខ្លាំង ក្នុង​ប្រទេស​ភូមា ប៉ុន្តែ អ្នកព្យាករ​ឧតុនិយម​អះអាង​ថា វា​មិន​អាច​បង្ក​ជា​គ្រោះរលក​យក្ស​ស៊ូណាមី​បានទេ។

ផ្សាយពាណិជ្ជកម្ម

សេចក្តីរាយការណ៍​របស់​ឈាង បុប្ផា

គ្រោះរញ្ជួយដី​កាលពីយប់​ថ្ងៃ​ព្រហស្បតិ៍ទី ២៥ មីនា បាន​​បង្ក​ឲ្យ​មាន​ការខូចខាត​ធ្ងន់ធ្ងរ ក្នុង​ប្រទេស​ភូមា។ មន្រ្តី ភូមា​ដែល​សុំ​​មិន​បញ្ចេញ​ឈ្មោះ បាន​និយាយ​ថា ចំនួន​អ្នកស្លាប់​នឹង​អាច​មាន​ច្រើន​ជាង ៦០​នាក់ ជាពិសេស ជនរងគ្រោះ​ដែល​អាច​​នៅកប់​ក្រោម​គំនរ​អគារបាក់បែក​ជាង ១០០​កន្លែង។

 
ចំណុច​រញ្ជួយដី កម្រិត ៦.៨​មាត្រដ្ឋានរិចទែរ កើតមាន​នៅ​តំបន់​ភ្នំ ក្នុង​ប្រទេស​ភូមា និង​ស្ថិតនៅ​ប្រមាណ ជាង ១០០​គីឡូម៉ែត្រ​ពីខេត្ត​ឈៀងម៉ៃ​របស់ប្រទេស​ថៃ។ កម្រិត​រញ្ជួយ​ខ្លាំង​បាន​ធ្វើ​ឲ្យ​រញ្ជួយ​​ដល់​ទីក្រុង​ធំៗ​របស់​ឥណ្ឌូចិន ដូចជា​ហាណូយ វៀងច័ន្ទ ខេត្ត​យូណាន​របស់​ប្រទេស​ចិន។ អ្នកឆ្លើយឆ្លង​ព័ត៌មាន​របស់​វិទ្យុបារាំង​អន្តរជាតិ ក្នុង​ប្រទេស​ថៃ បាន​រាយការណ៍​ដែរថា ការរញ្ជួយ​បន្តិចបន្តួច មាន​មកដល់​ក្រុង​បាងកក ដែល​ស្ថិតនៅ​ប្រមាណ ៨០០​គីឡូម៉ែត្រ​ពី​ចំណុច​រញ្ជួយ។ នៅថ្ងៃ​សុក្រនេះ អ្នកឧតុនិយម​ថៃ បាន​ប្រកាស​ផងដែរ ពី​ការរញ្ជួយដី​ជា​ថ្មី កម្រិត​៥.៥​មាត្រដ្ឋាន​រិចទែរ នៅខេត្ត​ឈៀងម៉ៃ ភាគខាងជើង​ប្រទេស​ថៃ ដែល​ស្ថិតនៅ​មិនឆ្ងាយ​ប៉ុន្មាន​ពី​ចំនុច​រញ្ជួយ ម្សិលមិញ។

គួររំលឹកថា កាលពី​១៥​ឆ្នាំមុន ប្រទេស​ថៃ និង​ភូមា​ធ្លាប់​រងគ្រោះ​រញ្ជួយដី កម្រិត ពី៥ ទៅ ៧​មាត្រដ្ឋាន​រិចទែរ ប៉ុន្តែ វា​មិន​ដែល​ធ្លាប់បង្ក​ឲ្យ​មាន​ការបាត់បង់​ជីវិត​មនុស្ស​ច្រើន​ដូច​លើក​នេះ​ទេ។

វិទ្យាស្ថាន​ភូគវិទ្យា​អាមេរិកាំង​ដែល​តាមដាន​មើល​ការរញ្ជួយដី បាន​ប្រកាស​ថា ចំណុចរញ្ជួយ​ស្ថិត​នៅជម្រៅ ក្រោមដី ប្រមាណ ១០ គីឡូម៉ែត្រ ក្នុង​ទឹកដី​ភាគខាងជើង​ភូមា ហើយ វា​នឹង​មិន​បង្ក​ឲ្យ​មាន​ការរញ្ជួយ​ដល់​មហាសមុទ្រ​ឥណ្ឌា រហូត​បង្ក​ជា​រលកយក្ស​ស៊ូណាមី ដូច​នៅ​ជប៉ុន។ ប៉ុន្តែ គេ​បាន​វាយតម្លៃ​ថា ការរញ្ជួយដី និង​ស្ថិតក្នុង​ជម្រៅ​១០​គីឡូម៉ែត្រ នៅភូមា​មាន​លក្ខណៈ​ស្រដៀងគ្នា​ទៅ​ស្ថានភាព​នៅ​ប្រទេស​ហៃទី ដែល​នៅទីនោះ គ្រោះរញ្ជួយដី​បាន​សម្លាប់​មនុស្ស​ជិត ២សែននាក់។

ចាប់ពីព្រឹក​ថ្ងៃ​សុក្រ​នេះ អាជ្ញាធរ ក្រុង​​វៀតណាម និង​អាជ្ញាធរ​ថៃ បាន​ប្រាប់​ប្រជាជន​ខ្លួន​ឲ្យ​រាយការណ៍​ពី​ការបែកប្រេះស្រាំ​លំនៅឋាន និង​ចាកចេញ​ជា​បន្ទាន់​ពីផ្ទះ និង​ពី​អគារខ្ពស់ ប្រសិន​បើ​ដឹងថា មាន​ការរញ្ជួយដី ទោះកម្រិត​ខ្សោយ​ក៏ដោយ។ ប្រជាជន​ថៃ វៀតណាម ឡាវ បាន​ធ្វើ​តាម​ការប្រកាស​របស់​អាជ្ញាធរ ដោយ​ពួកគេ​ភ័យខ្លាច​កើត​រងគ្រោះ​ដោយ​​គ្រោះ​មហន្តរាយ​រលក​យក្ស​ស៊ូណាមី​ដូច​នៅជប៉ុន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI