អានតួអត្ថបទ
អេហ្ស៊ីប-អាមេរិក

អេហ្ស៊ីប​បើក​ការ​ជំនុំជម្រះ​សកម្មជន​ប្រជាធិបតេយ្យ​ជាតិ​អាមេរិក​១៩​នាក់

លោក​ John McCain សមាជិក​ព្រឹទ្ធសភា​អាមេរិក និង​ជា​ប្រធាន​វិទ្យាស្ថាន IRI ជួបជាមួយ​មេទ័ព​អេហ្ស៊ីប កាលពីថ្ងៃ​ទី២០ កុម្ភៈ ២០១២
លោក​ John McCain សមាជិក​ព្រឹទ្ធសភា​អាមេរិក និង​ជា​ប្រធាន​វិទ្យាស្ថាន IRI ជួបជាមួយ​មេទ័ព​អេហ្ស៊ីប កាលពីថ្ងៃ​ទី២០ កុម្ភៈ ២០១២ REUTERS/Middle East News Agency (MENA)
ដោយ៖ សេង ឌីណា
១៣ នាទី

សកម្មជន​អង្គការ​ក្រៅរដ្ឋាភិបាល​​ចំនួន ៤៣​នាក់ ក្នុងនោះ ក៏​មាន​ជនជាតិ​អាមេរិក​ចំនួន ១៩នាក់​ផងដែរ ត្រូវ​​តុលាការ​អេហ្ស៊ីប​​បើក​សវនាការ​ជំនុំជម្រះ​ នៅថ្ងៃ​អាទិត្យ​នេះ។ រឿងក្តីក្តាំនេះ​កំពុង​តែ​ធ្វើ​ឲ្យ​សម្ព័ន្ធភាព​អាមេរិក-អេហ្ស៊ីប​ត្រូវ​រង្គោះរង្គើ។ ​អាមេរិក​បាន​គំរាម​​ថា​នឹង​ផ្តាច់​ជំនួយ​ទាំងអស់​ទៅ​ឲ្យ​អេហ្ស៊ីប ប្រសិនបើ​អេហ្ស៊ីប​នៅបន្ត​ដំណើរការ​កាត់ទោស​នេះ។

ផ្សាយពាណិជ្ជកម្ម

ជនជាតិ​អាមេរិក​ទាំង ១៩នាក់ ជាប់ចោទ​ពី​បទ​ល្មើស​ពីរ គឺ​ការ​​ធ្វើសកម្មភាព​អង្គការ​ក្រៅរដ្ឋាភិបាល​​ដោយ​គ្មាន​ច្បាប់​អនុញ្ញាត និង​ការ​​ទទួល​លុយ​ពី​បរទេស។ បទល្មើស​នីមួយៗ​អាច​​​ត្រូវផ្តន្ទាទោស​ដាក់ពន្ធាគារ​រយៈពេល ៦ឆ្នាំ។

ក្នុងចំណោមជនជាប់ចោទ​ទាំង ១៩នាក់​នេះ មាន​ខ្លះ​មិនស្ថិត​នៅ​ក្នុង​ប្រទេស​អេហ្ស៊ីបទេ នៅពេលនេះ។ ឯអ្នក​ដែល​កំពុង​ស្ថិត​នៅ​ក្នុង​ប្រទេស​អេហ្ស៊ីប បាន​រត់ទៅ​ជ្រក​នៅ​ក្នុង​ស្ថានទូត​អាមេរិក ដើម្បី​គេច​ពី​ការ​ចាប់ខ្លួន។

ជនជាប់ចោទ​ទាំងនេះ គឺ​ជា​បុគ្គលិក​របស់​អង្គការ​ក្រៅរដ្ឋាភិបាល​ដ៏មាន​ឥទ្ធិពល​ក្នុង​សភា​អាមេរិក គឺ​វិទ្យាស្ថាន IRI របស់​គណបក្ស​សាធារណរដ្ឋ និង​​វិទ្យាស្ថាន NDI របស់​គណបក្ស​ប្រជាធិបតេយ្យ។ ជនជាប់ចោទម្នាក់ គឺ​ជា​កូនប្រុស​របស់​រដ្ឋមន្រ្តី​ក្រសួង​ដឹកជញ្ជូន​​អាមេរិក។

សហរដ្ឋ​អាមេរិក​បាន​ចាត់ទុក​ការកាត់ទោស​សកម្មជន​ប្រជាធិបតេយ្យ​នេះ​ថា​ធ្វើឡើង​ក្នុង​គោលដៅ​នយោបាយ ហើយ​ព្រមាន​ថា​នឹង​កាត់ផ្តាច់​ជំនួយទាំងអស់​ទៅ​ឲ្យ​អេហ្ស៊ីប។ គួរ​បញ្ជាក់ថា អេហ្ស៊ីប​​ និង​អាមេរិក គឺ​ជា​សម្ព័ន្ធមិត្ត​នឹងគ្នា​អស់រយៈពេល​ប្រមាណ ៣០​ឆ្នាំ​មកហើយ។ ក្នុងមួយឆ្នាំៗ អាមេរិក​ផ្តល់​ជំនួយ​ជាង ១ពាន់ ៥រយលាន​ដុល្លារ ទៅ​ឲ្យ​អេហ្ស៊ីប ភាគច្រើន​គឺ​ជា​ជំនួយ​ផ្នែកយោធា។

ការ​កាត់ទោស​សកម្មជន​ប្រជាធិបតេយ្យ​អាមេរិក​នៅពេលនេះ មិនត្រឹមតែ​អាច​ធ្វើ​ឲ្យ​ប៉ះពាល់​ដល់​សម្ព័ន្ធភាព​អាមេរិក-អេហ្ស៊ីប​​ប៉ុណ្ណោះទេ។ វា​អាច​នឹង​ធ្វើ​ឲ្យ​ប៉ះពាល់​​ផងដែរ​ទៅដល់​​សន្ធិសញ្ញា​សន្តិភាព​រវាង​អេហ្ស៊ីប​ និង​អ៊ីស្រាអែល ដែល​ជា​​គ្រឹះ​ដ៏សំខាន់​មួយ នៃ​ស្ថិរភាព​នៅដើមបូព៌ា។

ហេតុដូច្នេះ​ហើយ​បាន​ជា​ កាលពីថ្ងៃ​សៅរ៍ ម្សិលមិញ មន្រ្តី​ការទូត​អាមេរិក​បាន​ខ្នះខ្នែង ដុតដៃ​ដុតជើង ​រក​វិធី​ដោះស្រាយ​បញ្ចប់​រឿងរ៉ាវ​ក្តីក្តាំ​នេះ ដើម្បី​ចៀសវាង​កុំ​ឲ្យ​វា​ក្លាយ​ទៅជា​វិបត្តិ​ការទូត។ ក៏ប៉ុន្តែ រហូតមកទល់ពេលនេះ​គេហាក់ដូចជា​មិនឃើញ​មាន​ដំណោះស្រាយ​អ្វី​នៅឡើយទេ។ ក្រុមប្រឹក្សា​កងទ័ព​អេហ្ស៊ីប ដែល​កំពុង​កាន់អំណាច​បណ្តោះអាសន្ន បាន​លើកឡើង​ថា គេ​មិនអាច​លូកដៃ​ចូល​ធ្វើ​អន្តរាគមន៍​ក្នុង​កិច្ចការ​តុលាការ​បានទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ