ហាអ៊ីទី

ទិវា​បោះឆ្នោត​វគ្គ​ទី១​ដ៏​តានតឹង

ប្រជាជន​ហៃទី​ចូលទៅ​បោះឆ្នោត​នៅ​ថ្ងៃ​អាទិត្យ​ទី​២៨ វិច្ឆិកា ២០១០
ប្រជាជន​ហៃទី​ចូលទៅ​បោះឆ្នោត​នៅ​ថ្ងៃ​អាទិត្យ​ទី​២៨ វិច្ឆិកា ២០១០ Reuters/ Eduardo Munoz

ការបោះ​ឆ្នោត​វគ្គ​ទី១​ជ្រើស​រើស​ប្រធានាធិបតី​ ​ សមាជិក​ព្រឹទ្ធសភានិង​អ្នក​តំណាង​រាស្ត្រ​ប្រព្រឹត្ត​ទៅ នៅ​ថ្ងៃ​អាទិត្យ​២៨​វិច្ឆិកា​នេះ​ នៅ​ប្រទេស​ហាអ៊ីទី​នៃ​ទ្វីប​អាមេរិក​កណ្តាល។រយៈពេល​ជាង​១០​ខែ​បាន​កន្លង​ផុត​ទៅ​ បន្ទាប់​ពី​មាន​គ្រោះ​រញ្ជួយដី និង​សព្វថ្ងៃ​ ប្រកប​ដោយ​គ្រោះ​អាសន្នរោគ​រាត​ត្បាត​ពេញ​ផ្ទៃ​ប្រទេស​ ​ ការបោះ​ឆ្នោត​ពុំ​ធ្លាប់​ដែល​ប្រព្រឹត្ត​ទៅ​ក្នុង​បរិយាកាស​ដ៏​ពិបាក​អ្វី​ម៉្លេះ​ទេ!

ផ្សាយពាណិជ្ជកម្ម

សេចក្តី​​រាយការណ៍របស់​Amélie BARON, ពី​Port-au-Prince​ប្រែ​សម្រួល​ដោយ​វីនស្តុន​រតនា

មាន​បេក្ខជន​១៨រូប​ប្រាថ្នា​ចង់​បន្ត​តំណែង​ពី​លោក​ប្រធានាធិបតី​ផុត​អាណត្តិ​ René​ Préval។ ក្នុង​ចំណោម​បេក្ខជន​ទាំង​នេះ​ ​ ឈ្មោះ​បី​លេច​ធ្លោ​ជាង​គេ​ ​ ផែនការ​បី​ខុស​គ្នា​សំរាប់​អនាគត​នៃ​ប្រទេស​ហាអ៊ីទី​ ជាបឋម​ វិស័យ​អប់រំ។

 
សំរាប់​អ្នក​ស្រី​ Mirlande​ Manigat​ ​ ប្រទេស​ជាតិ​ត្រូវ​ខំ​ប្រឹង​បណ្តុះ​បណ្តាល​អប់រំ​យុវជន​របស់​ខ្លួន។ ស្ត្រី​បណ្ឌិត​សាស្ត្រាចារ្យ​សកលវិទ្យាល័យ​អាយុ​៧០ឆ្នាំ​នេះ​ត្រូវ​សាធារណជន​ស្គាល់​ច្បាស់​ណាស់។ ជាអតីត​លោក​ជំទាវ​ទី១​ នៅ​ឆ្នាំ១៩៨៨​ ក្រោម​របប​លោក​ប្រធានាធិបតី Leslie​ Manigat​ជា​ស្វាមី​របស់​គាត់​ ​ អ្នកស្រី​ជា​អនុនាយិកានៃ​សកល​វិទ្យាល័យ​Kiskaya​នៅ​ទីក្រុង​Port-au-Prince។

សំរាប់​បេក្ខជន​Michel​ Martelly​ ​ ពាក្យ​សំគាល់​គ្នា​មាន​លក្ខណៈ​សាមញ្ញ​ណាស់​គឺ​គេ​ត្រូវ​តែ​ផ្លាស់​ប្តូរ​សភាពការណ៍​សព្វថ្ងៃ។បេក្ខភាព​របស់​គាត់​ធ្វើ​ឱ​គេ​ភ្ញាក់​ផ្អើល​ ​ ពី​ព្រោះ​រហូត​មក​ទល់​ពេល​នេះ​ ​ បុគ្គល​អាយុ​៤៩ឆ្នាំ​នេះ​ល្បី​ឈ្មោះ​ដោយ​សារ​តែ​បទ​ចម្រៀង​របស់​ខ្លួន​ ​ ប៉ុន្តែ​ពី​មួយ​ថ្ងៃ​ទៅ​មួយ​ថ្ងៃ​ទៀត​ ​ គាត់​ចេះ​បង្ហាញ​ឱ​ឃើញ​ថា​ គាត់​មាន​កម្មវិធី​មួយ​សំរាប់​ប្រទេស​ជាតិ។ ទោះ​បី​ជា​គាត់​ជា​មនុស្ស​ថ្មី​ក្នុង​វិស័យ​នយោបាយ​ក្តី​ ​ គាត់​ត្រូវ​ចិត្ត​ពួក​អ្នក​ដែល​ជិនណាយ​នឹង​ពួក​អ្នក​ដឹក​នាំ​ជា​ប្រពៃណី​ទៅ​ហើយ។

ហើយ​ក្នុង​ចំណោម​បេក្ខជន​អាច​មាន​ភ័ព្វ​ច្រើន​នឹង​ឈ្នះ​ឆ្នោត​គឺ​បេក្ខជន​នៃ​គណបក្ស​កាន់​រដ្ឋ​អំណាច​លោក​Jude​ Célestin​ អាយុ​៤៨ឆ្នាំ។ គេ​ឃើញ​រូបភាព​របស់​គាត់ នៅ​គ្រប់​ទីកន្លែង ក្នុង​ប្រទេស។ ប័ណ្ណ​ប្រកាស​រាប់ម៉ឺន​សន្លឹក ប្រកប​ដោយ​រូបសញ្ញា​គណបក្ស Unité( ឯកភាព)​ត្រូវ​គេ​បិទ​នៅ​នឹង​ជញ្ជាំង​នានា។ លោក​Jude Célestin ជា​បេក្ខជន​ដែល​បាន​ចាយវាយ​ប្រាក់​ច្រើន​ជាងគេ នៅ​ក្នុង​យុទ្ធនាការ​ឃោសនា​បោះឆ្នោតនេះ។ ប្រសិន​បើ​ឥស្សរជន​បីរូបនេះ​លេច​ធ្លោ​ត្រដែត​ជាង​បេក្ខជន​ដទៃ​ទៀត​មែន ប៉ុន្តែ ទំនង​ជា​គ្មាន​បេក្ខជន​ណាម្នាក់​ក្នុង​ចំណោម​អ្នកទាំងបី​នេះ​អាច​នឹង​ឈ្នះ​ឆ្នោត​ចាប់​តាំងពី​វគ្គ​ទី​មួយ​នេះទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI