សិង្ហបុរី

ការបោះឆ្នោត​ដែល​អាច​ធ្វើ​ឲ្យ​នយោបាយ​ផ្លាស់ប្តូរ​ក្នុង​ប្រទេស​ផ្តាច់ការ​សិង្ហបុរី

លោក​នាយក​រដ្ឋមន្រ្តី​សិង្ហបុរី Lee Hsien Loong (រូបកណ្តាល) ដើរ​ជាមួយ​បេក្ខជន​របស់​គណបក្ស​សកម្មភាព​ប្រជាជន​ នៅថ្ងៃ​បោះឆ្នោត នៅ​សិង្ហបុរី នៅ​ថ្ងៃ​សៅរ៍​ទី ៧ ឧសភា ២០១១
លោក​នាយក​រដ្ឋមន្រ្តី​សិង្ហបុរី Lee Hsien Loong (រូបកណ្តាល) ដើរ​ជាមួយ​បេក្ខជន​របស់​គណបក្ស​សកម្មភាព​ប្រជាជន​ នៅថ្ងៃ​បោះឆ្នោត នៅ​សិង្ហបុរី នៅ​ថ្ងៃ​សៅរ៍​ទី ៧ ឧសភា ២០១១ ©Reuters

នៅថ្ងៃសៅរ៍ ទី ៧ ឧសភា ប្រជាជន​សិង្ហបុរី ជាង ២​លាន​នាក់​ត្រូវ​ចូល​ទៅ​បោះឆ្នោត​ជ្រើសរើស​អ្នកតំណាងរាស្រ្ត​ចំនួន ៨២ ក្នុង​ចំណោម​អ្នកតំណាងរាស្រ្ត​សរុប ៨៧​រូប​របស់​​សភា ដែល​មានអំណាច​តែមួយ​គត់​ក្នុង​ប្រទេស។ ក្នុង​រយៈពេល ១០​ថ្ងៃ​នៃ​យុទ្ធនាការ​ឃោសនា​បោះឆ្នោត នេះជា​លើកទីមួយ ដែល​គណបក្ស​នយោបាយ ជាពិសេស​គណបក្ស​ប្រឆាំង​ទាំង​៦ អាច​ឃោសនា ប្រកួតប្រជែង​គ្នា​ខ្លាំង និង​មិន​ទទួល​រងការបិទ​សេរីភាព​បញ្ចេញមតិ។ ខុសពី​ការបោះឆ្នោត​មុនៗ គណបក្ស​ប្រឆាំង​​បាន​ប្រើ​ប្រព័ន្ធ​Facebook និង​Twitter ដើម្បី​ទាក់ទាញ​ប្រជាជន​សិង្ហបុរី ​និង​បាន​រិះគន់​យ៉ាងចាស់ដៃ​ដល់​ គណបក្ស​សកម្មភាព​ប្រជាជន (People’s Action Parti) ដែល​កាន់​អំណាច​តែឯង តាំងតែ​ពី​៥២​ឆ្នាំមក។

ផ្សាយពាណិជ្ជកម្ម

“វា​មិន​មែន​ជា​ការបោះឆ្នោត​ធម្មតាទេ។ ការបោះឆ្នោត​លើកនេះ នឹង​អាច​ផ្លាស់ប្តូរ​ចរិតលក្ខណៈ និង​ខ្លឹមសារ​នយោបាយ​នៅ​សិង្ហបុរី”។ ការថ្លែង​បែបនេះ​របស់​បេក្ខជន​គណបក្ស​ពលករ ដែល​ជា​គណបក្ស​ប្រឆាំង ​បាន​ទាក់ទាញ​អ្នកស្តាប់ច្រើន នៅក្នុង​ការប្រជុំ​ចុងក្រោយ នៅ​មុន​ការរៀបចំ​បោះឆ្នោត ដែល​ប្រព្រឹត្ត​ទៅ នៅថ្ងៃសៅរ៍នេះ។

នៅក្នុង​អាកាសធាតុ​ក្តៅហួតហែង មនុស្ស​ជាង​៣ម៉ឺននាក់​បាន​ប្រជ្រៀត​គ្នា នៅក្នុង​ពហុកីឡាឋាន ដើម្បី​ឈរស្តាប់​កម្មវិធី​ឃោសនា​របស់​គណបក្ស​ពលករ ដែល​ជាគណបក្ស​​ប្រឆាំង។ ព្រឹត្តិការណ៍​បែបនេះ ដែល​កម្រ​នឹង​កើត​មាន នៅក្នុង​ប្រវត្តិបោះឆ្នោត នៅសិង្ហបុរី អាច​នឹង​ធ្វើ​ឲ្យ​ប៉ះពាល់​ដល់ គណបក្ស​សកម្មភាព​ប្រជាជន PAP ដែល​កាន់អំណាច​ តែម្នាក់ឯង នៅសិង្ហបុរី ចាប់តាំង​ពី​ប្រទេស​នេះ​រួច​ពី​នឹម​អាណានិគមនិយម​អង់គ្លេស។

គណបក្ស​PAP​​ជា​ក្បាលម៉ាស៊ីន​របស់​Lee Kuan Yew ដែល​ជា​ស្ថាបនិក​ ប្រទេស​សិង្ហបុរី ដំបូងគេ។ គណបក្ស​នេះ​មិន​ជឿ​ថា ទ្រឹស្តី​ប្រជាធិបតេយ្យ​នឹង​អាច​ជួយ​កសាងប្រទេស​បានទេ។ ផ្ទុយទៅវិញ សិង្ហបុរី នៅពេលនេះ មាន​មោទនភាព​ខ្លាំង ព្រោះ​ ដោយ​ចេញពី​បាតដៃទទេ គេ​បាន​បង្កើត​ប្រទេស​មួយ​ស្អាតស្អំ និង​មាន​សេដ្ឋកិច្ច​រីកចម្រើន។

ទោះយ៉ាងណា សេដ្ឋកិច្ច​រីក​លូតលាស់​ខ្លាំងរបស់​ប្រទេស លែង​ទាក់ទាញ​ប្រជាជន​សិង្ហបុរី​ទៀតហើយ។ ប្រជាជន​សិង្ហបុរី​កាន់តែ​ច្រើន​មិនសប្បាយ​ចិត្ត​​នឹង​ជីវភាព​រស់នៅ​ដែល​កាន់តែ​ថ្លៃ និង​គម្លាត​រវាង​អ្នកមាន និង​អ្នកក្រ​ក្នុង​ប្រទេស។ មួយវិញទៀត ប្រជាជន​សិង្ហបុរី ជាពិសេស ក្រុមយុវជន​មិន​ពេញចិត្ត​នឹង​រដ្ឋាភិបាល​ដែល​បំបិទ​សិទ្ធិ​សេរីភាព បញ្ចេញមតិ និង​ហាម​មិន​ឲ្យ​មាន​ការពិភាក្សា​សាធារណៈ​ទាំងឡាយ​ណា ​ដែល​មាន​លក្ខណៈ​រិះគន់​រដ្ឋាភិបាល។ ដូច្នេះ អ្វី​ដែល​ថ្មី នៅក្នុង​យុទ្ធនាការ​ឃោសនា​បោះឆ្នោត​លើកនេះ គឺ​ប្រព័ន្ធ​ផ្សព្វផ្សាយ​ឯករាជ​បាន​ដើរតួនាទី​សំខាន់ ហ៊ាន​និយាយ​បកស្រាយ​ដើម្បី​ដាស់​ស្មារតី​​នយោបាយ​របស់​ប្រជាជន​ឡើងវិញ។

ចំណុចមួយ​ទៀត​ដែល​ធ្វើ​ឲ្យ​ការបោះឆ្នោតនៅ​សិង្ហបុរី​លើកនេះ គួរ​ឲ្យ​ចាប់អារម្មណ៍​ខ្លាំង គឺជម្រើស។ ជាទម្លាប់​កន្លងមក គណបក្ស​ប្រឆាំង​តែងតែ​បាក់គ្នា ដែល​ធ្វើ​ឲ្យ​គណបក្ស​កាន់អំណាច​អាច​ឈ្នះ​ឆ្នោត ដោយ​សំឡេង​ច្រើន​លើសលុប។ ប៉ុន្តែ លើកនេះ គណបក្ស​ប្រឆាំង​ទាំង​អស់​បាន​ចុះ​សម្រុង រួបរួម​គ្នា ដើម្បី​ផ្ចាញ់​គណបក្ស​កាន់អំណាច។

ការប្រមូល​កម្លាំង​គ្នា របស់​គណបក្ស​ប្រឆាំង អាច​ធ្វើ​ឲ្យ​មាន​ការផ្លាស់ប្តូរ​បន្តិចបន្តួច នៅក្នុង​សំឡេងឆ្នោត និង មិន​អាច​ផ្តួល​ទាំងស្រុង​គណបក្ស​កាន់អំណាច​ដែល​បាន​ចាក់គ្រឹះ នៅ​សិង្ហបុរី តាំងពីយូរមកហើយ​នោះទេ។ ប៉ុន្តែ ទោះជា​យ៉ាងណា វា​ជា​ព្រឹត្តិការណ៍សំខាន់​ដែល​បើក​សករាជ​នយោបាយ​បែបថ្មី នៅសិង្ហបុរី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI