អានតួអត្ថបទ
កម្ពុជា

កម្មករ​កាន់​តែ​ច្រើន​ធ្វើ​ការ​តវ៉ា​តម្លើង​ប្រាក់​ខែ​១៦០​ដុល្លារ​

កម្មករ-ការនី ចូលរួម​បាតុកម្មនៅ​មុខ​រោងចក្រពួកគេ ជាមួយ​លោក​សម រង្ស៊ី នៅ​ថ្ងៃទី២៦ធ្នូ២០១៣។
កម្មករ-ការនី ចូលរួម​បាតុកម្មនៅ​មុខ​រោងចក្រពួកគេ ជាមួយ​លោក​សម រង្ស៊ី នៅ​ថ្ងៃទី២៦ធ្នូ២០១៣។ @Facebook
ដោយ៖ ញឹម សុផល
១៧ នាទី

កម្មករ​ដែល​បំរើ​ការងារ​ជាច្រើន​រោងចក្រ នៅ​ព្រឹក​ថ្ងៃ​ព្រហស្បតិ៍​នេះ ឈប់​ពី​ការងារ​របស់​​ពួក​គេ​​ចុះ​ហែរ​ក្បួន​​តាម​ផ្លូវ និង​​ធ្វើ​​កូដកម្ម​​នៅ​មុខ​​រោងចក្រ​រៀងៗ​ខ្លួន ដើម្បី​​តវ៉ា​​ឲ្យ​​មាន​ការ​​តម្លើង​​ប្រាក់​​ឈ្នួល​​អប្បបរមា​១៦០ដុល្លារ​ក្នុង​មួយខែ។មន្ត្រី​សហជីព​នៅថ្ងៃនេះ​បាន​អះអាង​ថា ​កម្មករ​​​ស្ទើរ​គ្រប់​រោងចក្រ​បាន​គាំទ្រ​ដល់​ការតវ៉ា ដែល​ដឹកនាំ​ដោយ​គណបក្ស​សង្គ្រោះ​ជាតិ ​និង​​មន្ត្រី​សហជីព​មិន​គាំទ្រ​រដ្ឋាភិបាល។ក៏ប៉ុន្តែ​មន្ត្រី​រដ្ឋាភិបាល​បាន​បដិសេធ ហើយ​ថា​​សភាពការណ៍​​ត្រូវ​បាន​​គ្រប់គ្រង​​ដោយ​​រដ្ឋាភិបាល។

ផ្សាយពាណិជ្ជកម្ម

ភាព​ប្រសេចប្រសាច​ដែល​បណ្តាលមកពី​កម្មករ​កាត់ដេរ​និង​ដេរ​ស្បែកជើង​បានកើត​មាន​ម្តង​ទៀតហើយ​ចាប់តាំងពី​ព្រឹក​ព្រលឹម​ដោយ​ពួកកម្មករ​ដែល​ដឹកនាំ​ដោយ​មេដឹកនាំ​សហជីព បាន​ផ្អើល​ចេញពី​រោងចក្រ ហើយ​ចុះ​ដើរ​តាមផ្លូវសំខាន់ៗមួយចំនួន​ពី​ជាយក្រុង​ឆ្ពោះទៅកាន់​ទិសដៅ​រាជធានី​ភ្នំពេញ។ ខណៈពេល​ដូចគ្នានេះដែរ កំណាត់​ផ្លូវ​ចូល​ក្រុង​មួយចំនួន​ត្រូវបាន​បិទ និង​កកស្ទះ​ដោយ​ក្បួន​បាតុកម្ម​របស់​កម្មករ។

 
គេ​នៅ​មិនអាច​វាយតម្លៃ​ច្បាស់លាស់​ថា​មាន​កម្មករ​ប៉ុន្មាន​រោងចក្រ ហើយ​មនុស្ស​ប៉ុន្មាន​នាក់ បានចេញ​ធ្វើការ​តវ៉ា​នៅថ្ងៃនេះ​នោះទេ។ ក៏ប៉ុន្តែ​លោក រ៉ុង ឈុន ប្រធាន​សហភាព​សហជីព
កម្ពុជា បាន​ថ្លែង​ជាមួយនឹង​សម្លេង​ដោយ​ការដើរ​នាំ​ក្បួន​កម្មករ​តម្រង់​ទៅកាន់​ទីស្នាក់ការ​សមាគម​ន៍​ថៅកែ​រោងចក្រ​កាត់ដេរ(GMAC) យ៉ាង​ត្រហេបត្រហប​ថា នៅថ្ងៃនេះ​រោងចក្រ​ស្ទើរតែ​ទាំងអស់​បាន​បិទទ្វារ ហើយ​កម្មករ​រាប់ម៉ឺន​នាក់​បាន​ចូលរួម​ធ្វើបាតុកម្ម​ទាមទារ​ការ​តម្លើង​ប្រាក់ខែ​គោល ១៦០ដុល្លារ។

នៅឯ​តាម​បណ្តា​ខេត្ត​មួយចំនួន​វិញ​មេដឹកនាំ​សហជីព​បាន​រាយការណ៍​ថា យ៉ាងហោច​មាន
កម្មករ ជិត១០រោងចក្រ​ដែរ ដែល​បានធ្វើ​កូដកម្ម​មិន​ធ្វើការ​នៅមុខ​រោងចក្រ​របស់​ពួកគេ ដោយ​មិនមាន​ការ​ហែរ​ក្បួន​នៅ​ខេត្តកំពង់ឆ្នាំង, នេះ​បើតាម​លោក ម៉ាន់ សេង​ហាក់ អគ្គលេខាធិការ
សហជីព​សេរី​នៃ​ព្រះរាជាណាចក្រ​កម្ពុជា។

ងាក​ទៅ​មើល​មេដឹកនាំ​គណបក្សប្រឆាំង លោក សម រង្សី ថ្ងៃ​នេះដែ​បាន​ដឹកនាំ​បាតុករ​តាម
ផ្លូវជាតិ​លេខ៤ ដើរ​តម្រង់​មក​ភ្នំពេញ​ស្រប​ពេលដែល​សមាជិក​ជាន់​ខ្ពស់​របស់​គណបក្ស​នេះ
បាន​ចែក​មុខសញ្ញា​គ្នា​តវ៉ា​ជាមួយ​កម្មករ​តាម​គោលដៅរៀងៗខ្លួន។ គ្មាន​អំពើរ​ហឹ​ង្សា​រណា​មួយ
បាន​កើតឡើង​នោះទេ ក្រៅពី​គេ​ឃើញ​មាន​វត្តមាន​សមត្ថកិច្ច​ចំរុះ នៅតាម​តំបន់​ដែលមាន​ការ
តវ៉ា។ជាមួយគ្នានេះដែរ​កម្មក​រ​ជាច្រើន​ពាន់​នាក់​បាន​មាន​វត្តមាន​រួម​មកហើយ​នៅលើ​ទីលាន
ប្រជាធិបតេយ្យ។

មន្ត្រី​រក្សា​សន្តិសុខ​រដ្ឋាភិបាល​ក៏ដូចជា​មន្ត្រី GMAC មិនអាច​សុំ​ធ្វើការ​ពន្យល់​ឬក៏​ប៉ាន់ប្រមាណ​បាន​នោះទេ​នៅថ្ងៃនេះ។ ក៏ប៉ុន្តែ​អ្នកនាំពាក្យ​រដ្ឋាភិបាល​និង​ជា​រដ្ឋមន្ត្រីក្រសួង​ព័ត៌មាន លោក ខៀវ កាញារិទ្ធ បាន​ប្រាប់​អ្នកកាសែត​នៅ​ព្រលានយន្តហោះ​កាលពី​ព្រឹក​មិញ​ថា រដ្ឋាភិបាល​បាន​គ្រប់គ្រង​សភាពការណ៍​ទាំងស្រុង។ លោក រដ្ឋមន្ត្រី​បាន​ចោទ​ជា​សំណួរ​ថា ប្រសិនបើ
រោងចក្រ​បិទ​តើ​លោក សម រង្សី មេដឹកនាំ​គណបក្សប្រឆាំង​អា​ចរក​ការងារ​ឲ្យ​កម្មករ​ធ្វើ​បានដែរ
ឬទេ? 

ជាមួយគ្នានេះ​សាលាខេត្ត​ស្វាយរៀង​បានប្រកាស់​ទំលាក់​ការទទួលខុសត្រូវ​ទៅលើ ប្រធាន​គណបក្ស​សង្គ្រោះ​ជាតិ​លោក សម រង្សី និង​មន្ត្រី​គណបក្សប្រឆាំង ដែល​បាន ញុះញុង​ដល់ក​ម្មករ​នៅ​ទីនោះ រយៈពេល​បី​ថ្ងៃ​កន្លងមក ដែល​ធ្វើ​ឲ្យ​មានការ​ប៉ះពាល់​យ៉ាងខ្លាំង​ដល់​សង្វាក់​ផលិតកម្ម​នៃ​តំបន់ឧស្សាហកម្ម​មេន​ហា​ធេ​ន​ខេត្តស្វាយរៀង។
សូមបញ្ជាក់ថា​កាលពី​ថ្ងៃ​អង្គារ​ដើម​សប្តាហ៍​នេះ គណកម្មការ​ប្រឹក្សា​ការងារ​បានសម្រេច​តាមរយៈ​កិច្ចប្រជុំ​ត្រីភាគី​មួយ​ថា នឹង​តម្លើង​ប្រាក់ខែ​គោល​ដល់​កម្មករ​កាត់ដេ​រ​និង​ដេរ​ស្បែកជើង ៩៥ដុល្លារ នៅ​ឆ្នាំ២០១៤ ហើយ ឡើងដល់ ១៦០ ដុល្លារ​នៅ​ឆ្នាំ២០១៨ ក៏ប៉ុន្តែ​សហជីព​មួយចំនួន​មិនអាច​ទទួលយកបាន ហើយ​បាតុកម្ម​និង​កូដកម្ម​ក៏បាន​ចាប់​ផ្ទុះឡើងភ្លាមៗបន្ត​រហូតមក​ដល់ពេលនេះ៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ