ទស្សនៈព្រឹត្តិការណ៍ពិភពលោក

បារាំង៖ជម្រើសប្រើ​មាត្រា​៤៩-៣ ធ្វើ​ឲ្យ​រដ្ឋាភិបាល​បារាំង​កំពុង​ស្ថិត​នៅ​មាត់​ជ្រោះ

សំឡេង ០៤:២៥
បាតុកម្ម​ប្រឆាំង​នឹង​គម្រោង​ច្បាប់​​ការងារ​បារាំង
បាតុកម្ម​ប្រឆាំង​នឹង​គម្រោង​ច្បាប់​​ការងារ​បារាំង REUTERS/Pascal Rossignol
ដោយ៖ ម៉ម ពិសី
៣០ នាទី

វិបត្តិ​នយោបាយ​បារាំង ​កំពុង​ដើរ​មក​ដល់​កាលៈទេសៈ​មួយ​ថ្មីទៀត ​ដែល​តំណាងរាស្ត្រ​ក្នុង​សភា ​មាន​ភាពមិន​ចុះ​សម្រុង​នឹង​រដ្ឋាភិបាល ​កាន់តែ​ខ្លាំង។ ដើម្បី​ជំនះ​អនុម័ត​គម្រោង​ច្បាប់​ការងារ​ថ្មី ​ឲ្យខាង​តែ​បាន ​ រដ្ឋាភិបាល​លោក​ម៉ានុយអ៊ែល វ៉ាល្ស ​បាន​សុខចិត្ត​ប្រើ​មាត្រា​៤៩ ​កថាខណ្ឌ​ទី​៣ ​នៃ​រដ្ឋធម្មនុញ្ញ​បារាំង។ ប៉ុន្តែ​តសម្រាប់​តំណាង​រាស្ត្រ ​ដែល​ប្រឆាំង​នឹង​គម្រោង​ច្បាប់​នេះ​ ពួកគេ​កំពុងតែ​រិះរក​វិធី ​ដើម្បី​បោះឆ្នោត​ដាក់​ពិន័យ ​ហើយ​រំលាយ​រដ្ឋាភិបាល​ចោល ​ ដើម្បី​ទប់​កុំ​ឲ្យ​គម្រោង​ច្បាប់​ដ៏​ចំរូងចំរាស​នេះ​ចេញ​បាន។គ្រោះ​ថ្នាក់​កំពុង​រងចាំ​រដ្ឋាភិបាល​បារាំង។ រដ្ឋាភិបាល​ដែល​ប្រជាជន​បារាំង ​មិន​ពេញចិត្ត​កាន់តែ​ខ្លាំង។

ផ្សាយពាណិជ្ជកម្ម

នេះ​ជា​លើក​ទីពីរ​ហើយ​ដែល​រដ្ឋាភិបាល​បារាំង​ដឹកនាំដោយ​លោក​ប្រធានាធិបតី​ហ្វ្រង់ស័រ​ ហូឡង់​ បាន​ប្រើ​មធ្យោបាយ​រដ្ឋធម្មនុញ្ញ​ ត្រង់​មាត្រា​៤៩ ​កថាខណ្ឌ​ទី៣ ​ដើម្បី​ធ្វើការ​អនុម័ត​ច្បាប់​ ដោយ​មិន​ចាំបាច់​ឆ្លង​កាត់​ការ​បោះឆ្នោត​​របស់​តំណាងរាស្ត្រ។ យោង​តាម​មាត្រានេះ​ សេចក្តី​ព្រាងច្បាប់​មួយ​អាច​ត្រូវ​អនុម័ត​បាន​ជា​ស្ថាពរ​ ដោយ​មិន​ចាំបាច់​មាន​ការ​បោះឆ្នោត​ពី​សភា ​ក្នុង​ករណី​ដែល​រដ្ឋាភិបាល​គ្មាន​សម្លេង​ភាគច្រើន​ក្នុង​សភា​ដើម្បី​អនុម័ត​វា។

 
ក៏​ប៉ុន្តែ​គ្រោះថ្នាក់មួយ​របស់​រដ្ឋាភិបាល​ គឺបើ​ក្នុងករណី​សមាជិក​សភា​ជំទាស់ ​ហើយ​ប្រមូល​គ្នា​គ្រប់​៥៨​នាក់ ​ដើម្បី​ស្នើឲ្យ​សភា​ ធ្វើការ​បោះឆ្នោត​ដាក់​ពិន័យ ​នោះ​រដ្ឋាភិបាល​អាច​នឹង​ត្រូវ​សភា​រំលាយ​ចោល​មួយ​រំពេច។ ក្នុង​ករណី​នេះ​ សភា​ត្រូវការ​សម្លេង​២៨៩​សម្លេង ​ដើម្បី​បោះឆ្នោត​រំលាយ​រដ្ឋាភិបាល​ចោល។

ត្រលប់​មក​និយាយ​ពី​គម្រោង​ច្បាប់​ការងារ​ថ្មី នេះ​ ​សួរថា​ហេតុអ្វី​បាន​ជា​ច្បាប់​នេះ​បង្ករ​បញ្ហា ​បង្ករ​ការ​តវ៉ា​ខ្លាំង​សម្បើម​យ៉ាង​ដូច្នេះ? ហើយ​ហេតុអ្វី​បាន​ជា​រដ្ឋាភិបាល​បារាំង ​ដឹកនាំ​ដោយ​លោក​ប្រធានាធិបតី​ហូឡង់ ​និង​លោក​នាយករដ្ឋមន្ត្រី​ម៉ានុយអ៊ែល វ៉ាល្ស​ ចចេស​ចង់​ធ្វើ​ច្បាប់​នេះ​យ៉ាង​ដូច្នេះ?

សម្រាប់​ប្រជាជន ​សហជីព​កម្មករ​ នយោជិត​រាប់ម៉ឺន​នាក់​ ដែល​ចុះ​តវ៉ា​តាម​ផ្លូវ​ ជិត​២ខែ​មក​នេះ ​គម្រោង​ច្បាប់​ការងារ​ថ្មី​នេះ ​គឺ​ជា​ច្បាប់​ដែល​តាក់តែង​ឡើង​ ដើម្បីតែ​សម្រាល​បន្ទុក​របស់​ថៅកែ ​របស់​ម្ចាស់​សហគ្រាស​តែ​ប៉ុណ្ណោះ។ ផ្ទុយទៅ​វិញ ​សិទ្ធិ ​និង​ផល​ប្រយោជន៍​របស់​កម្មករ​បុគ្គលិក​ គឺ​នឹង​បាត់បង់​មួយ​ផ្នែក​ធំ។ នេះជា​ចំណុច​ស្នូល​ ដែល​បង្ហាញ​ពី​ទង្វើ​របស់​រដ្ឋាភិបាល​បារាំង​ ដែល​ជា​រដ្ឋាភិបាល​នៃ​គណបក្ស​សង្គម​និយម ​តែ​បែរ​ជា​ធ្វើ​រឿង​ដែល​ផ្ទុយ​ពី​ទ្រឹស្តី​សង្គម​និយម​ទៅវិញ។

ប៉ុន្តែ​សម្រាប់​រដ្ឋាភិបាល ​ច្បាប់នេះ​គឺ​ជា​វិធានការ​ចុងក្រោយ​របស់​ខ្លួន ​ ក្នុងការ​ធ្វើ​កំណែទម្រង់​ប្រទេស​ ដើម្បី​ឲ្យ​សេដ្ឋកិច្ច ​និង​ទីផ្សារ​ការងារ​នៅ​បារាំង​ ចាប់ផ្តើម​មាន​ដង្ហើម​ដក​ឡើងវិញ។ នៅ​សល់​តែ​មិន​ដល់​មួយឆ្នាំ​ទៀត​ផង​ទេ ​រដ្ឋាភិបាល​លោក​ហូឡង់ ​ នឹង​ត្រូវ​​ចប់​អាណត្តិ​ហើយ។ ដូច្នេះ​គ្មាន​រឿង​អ្វី​ចំលែក​ទេ​​ ដែល​រដ្ឋាភិបាល​នេះ ​ចចេស​មានៈ​ ចង់​អនុម័ត​ច្បាប់​នេះ​ឲ្យ​ខាង​តែបាន។

ទាំង​លោក​ហូឡង់ ​ទាំង​លោក​ ម៉ានុយអ៊ែល វ៉ាល្ស ​ធ្លាប់​បាន​បញ្ជាក់​ថា ​ជម្រើស​ប្រើ​មាត្រា៤៩ ​កថាខណ្ឌ​ទី​៣ ​នៃ​រដ្ឋធម្មនុញ្ញ​គឺជា​ជម្រើស​ចុងក្រោយ ​តែ​មិនមែន​ជា​ជម្រើស​ដែល​គេ​ចង់​បាន​ទេ។ ឆ្លង​កាត់​ប៉ុន្មាន​ម៉ោង​ចុងក្រោយ ​នៃ​ការ​ប្រជុំ​គណរដ្ឋមន្ត្រី​បន្ទាន់ ​កាល​ពី​រសៀល​ថ្ងៃ​១១ ​ឧសភា ​រដ្ឋាភិបាល​បារាំង ​ដឹង​ខ្លួន​ច្បាស់​ថា ​ខ្លួន​គ្មាន​ជំរើស​អ្វី​ផ្សេង​ទេ​ ក្រៅពី​ប្រើ​មាត្រា​ពិសេស​នេះ ​ព្រោះ​សម្លេង​ភាគច្រើន​ក្នុង​សភា ​ដែល​មក​ពី​គណបក្ស​ឆ្វេង​និយម ​មិនមាន​អ្នក​គាំទ្រ​ច្បាប់​នេះ​ទាំង​អស់​ទេ។ គ្រាន់តែ​បាន​បញ្ជូន​ទៅ​ដល់​សភាទើបតែ​មួយ​សប្តាហ៍​ប៉ុណ្ណោះ ​ច្បាប់នេះ​ត្រូវ​បាន​សមាជិក​សភា​ទាមទារ​ឲ្យ​កែប្រែ​ ​រហូត​ដល់​ទៅ​៥០០០​ចំណុច​ទៅហើយ​។ ដូច្នេះ​វាពិត​ណាស់ ​ថា​ច្បាប់​នេះ ​គ្មាន​ថ្ងៃ​ចេញ​ទៅ​រួច​ មុន​រដ្ឋាភិបាល​ចប់​អាណត្តិ​ទេ។

ការ​បែកបាក់​គ្នា ​គ្មាន​សម្លេង​ភាគច្រើន​ក្នុង​សភា ​ទើប​ជំរុញ​ឲ្យ​រដ្ឋាភិបាល​ជ្រើសរើស​យក​មធ្យោបាយ​ផ្លូវកាត់​នេះ។ ក៏​ប៉ុន្តែ​ជាមួយ​គ្នា​នេះ ​រដ្ឋាភិបាល​បារាំង​ ប្រហែល​ជា​មាន​យុទ្ធសាស្រ្ត ​​ដោយ​ចង់​ឆក់​យក​ភាព​បែកបាក់​គ្នា​ក្នុង​សភា​នេះ ​ដើម្បី​រក​ផ្លូវ​ចេញ​ដែរ​ ព្រោះ​បើតាម​ការសង្ឃឹម​ ក្រុម​តំណាងរាស្ត្រ​បារាំង​ ប្រហែល​​មិន​អាច​ប្រមូល​គ្នា​គ្រប់​ចំនួន​២៨៩​សម្លេង ​ដើម្បី​មក​បោះឆ្នោត​រំលាយ​រដ្ឋាភិបាល​បាន​ទេ។

សម្រាប់​ក្រុម​ឆ្វេង​និយម​ដែល​ផ្តាច់ខ្លួន​ឈប់​គាំទ្រ​រដ្ឋាភិបាល ​កុំថា​ឡើយ​ដល់​ទៅ​ប្រមូល​គ្នា​មក​បោះឆ្នោត​ដល់​ទៅ​២៨៩​នាក់ ​សូម្បីតែ​ហត្ថលេខា​៥៨​នាក់​ដំបូង​ដើម្បី​ផ្តើម​ស្នើ​នីតិវិធី​ ​ក៏​ប្រហែល​ជា​មិន​បាន​គ្រប់​ផង។ ក្រុម​ឆ្វេង​និយម​នេះ ​ ប្រកែក​ជា​ដាច់ខាត ​ មិន​ចូលរួម​បោះឆ្នោត​ទៅ​តាម​ការ​ស្នើរដាក់​ពិន័យ​លើ​រដ្ឋាភិបាល​ ដែល​ខាង​សមាជិក​សភា​ពួក​ស្តាំ​និយម​បាន​ស្នើ​ឡើយ។ ឯពួក​ស្តាំ ​ក៏​ត្រូវការ​តំណាង​រាស្ត្រ​ខាង​ឆ្វេង​និយម​ខ្លះដែរ ​ ដើម្បី​ឲ្យ​បាន​គ្រប់​២៨៩​សម្លេង។ ការ​បោះឆ្នោត​នឹង​ធ្វើ​ឡើង​នៅ​ថ្ងៃ​ព្រហស្បតិ៍​ទី​ ១២​នេះ​ហើយ។

ប៉ុន្តែ​បើយើង​សម្លឹង​មើល​ឲ្យ​ស៊ីជំរៅ ​ ទោះ​គម្រោង​ច្បាប់​ការងារ​ថ្មី​នេះ ​ត្រូវ​អនុម័ត​ជា​ស្ថាពរ ​រឺ​ក៏​អត់​ ទោះ​តំណាងរាស្ត្រ​បាន​ប្រមូល​គ្នា​គ្រប់​ដើម្បី​បោះឆ្នោត​រំលាយ​រដ្ឋាភិបាល​បាន​រឺ​ក៏អត់ ​ អ្វី​ដែល​យើង​ប្រាកដ​គឺ​ថា​មានតែ​អ្នក​ចាញ់​មួយ​គត់​ ក្នុង​ការ​ប្រកួត​នេះ ​ទោះ​ជា​លទ្ធផល​យ៉ាង​ណាក៏​ដោយ។ អ្នកចាញ់​នោះគឺ​ រដ្ឋាភិបបាល​បារាំង ​គឺ​គណបក្ស​សង្គមនិយម​ទាំង​មូល​ដែល​ចាញ់។ អ្នក​រិះគន់​មិន​ខ្លាច​នឹង​និយាយ​ទេ​ថា ​ ការ​ប្រើ​វិធី​ផ្លូវ​កាត់​ដើម្បី​អនុម័ត​ច្បាប់​មួយ ​ ដោយ​មិន​ស្តាប់​ការ​តវ៉ា​របស់​ប្រជាជន​ ​គឺ​ជា​ភាព​កំសាក​របស់​រដ្ឋាភិបាល​សង្គមនិយម។

ប្រជាជន​បារាំង ​មិនដែល​មាន​អារម្មណ៍​ស្អប់​រដ្ឋាភិបាល​ខ្លួន ​ ដូច​ពេល​នេះ​ទេ។ ឆ្នាំ​២០១៧ ​ជា​ឆ្នាំ​បោះឆ្នោត​ជ្រើសរើស​ប្រធានាធិបតី​អាណត្តិ​ថ្មី។ ដូច្នេះ​លទ្ធផល​បោះឆ្នោត ​ នឹង​គឺ​កញ្ចក់​ដែល​បញ្ចាំង​អំពី​ភាព​បរាជ័យ​ក្នុង​​ពេលនេះ ​របស់​រដ្ឋាភិបាល​គណបក្ស​សង្គម​និយម​ដែល​ដឹកនាំ​ដោយ​លោក ហូឡង់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI