បារាំង

អនុប្រធានសភាបារាំង ចុះចេញ​ពី​តំណែង​ក្រោយ​បទចោទ​ប្រកាន់​ថា​បំពាន​ផ្លូវភេទ​លើ​ស្ត្រី

លោក Denis Baupin អនុប្រធានសភា ដែលលាលែង​ពីតំណែង បន្ទាប់​ពី​រង​ការចោទប្រកាន់​​ពីបទ​បៀតបៀន​​ផ្ឡុវភេទ​
លោក Denis Baupin អនុប្រធានសភា ដែលលាលែង​ពីតំណែង បន្ទាប់​ពី​រង​ការចោទប្រកាន់​​ពីបទ​បៀតបៀន​​ផ្ឡុវភេទ​ JEAN-SEBASTIEN EVRARD / AFP
ដោយ៖ ម៉ម ពិសី
២១ នាទី

លោក ​ដេនី បូប៉ាំង ​អនុប្រធាន​រដ្ឋសភា​បារាំង ​ត្រូវបាន​ស្ត្រី​ជា​ច្រើន​នាក់ ​ដែល​ក្នុង​នោះ ​មាន​ខ្លះជា​តំណាងរាស្ត្រ​ស្ត្រី​ផង ​ នាំគ្នា​ចោទ​ប្រកាន់​ ពី​បទ​បំពារបំពាន​ផ្លូវភេទ។ រឿង​អាស្រូវ​នេះ ​បាន​តំរូវឲ្យ​លោក​ អនុប្រធាន​សភា​រូប​នេះ ​ចុះ​ចេញ​ពី​តំណែង ​ដើម្បី​ត្រៀម​ការពារ​ខ្លួននៅ​ចំពោះ​មុខ​តុលាការ។ ពាក្យ​បណ្តឹង​ត្រូវបាន​ដាក់​ ហើយ​ការ​ស៊ើបអង្កេត​ក៏​បាន​ចាប់ផ្តើម​ផងដែរ ​នៅ​ថ្ងៃ​អង្គារ​ទី​ ១០​ឧសភា​នេះ។ បញ្ហា​ ដែល​កំរ​មាន​នរណា​ហ៊ាន​លើក​មក​និយាយ ​ពេល​នេះ​បាន​ក្លាយ​ជា​ចំណុច​ក្តៅ ​ដើម្បី​រើ​កកាយ​អំពី​អកប្បកិរិយា​មិន​គប្បី​ របស់​អ្នក​នយោបាយ​ជា​មនុស្ស​ប្រុស ​ធ្វើ​ទៅ​លើ​អ្នក​រួម​ការងារ​ជា​មនុស្ស​ស្រី។

ផ្សាយពាណិជ្ជកម្ម

លោក ​Denis Baupin ​គឺ​ជា​អនុប្រធាន​រដ្ឋសភា​បារាំង ​ហើយ​ជា​អតីត​សមាជិក​គណបក្ស ​Europe Ecologie le Vert​ តែបាន​ចាក​ចេញ​ពី​គណបក្ស​នេះ ​កាល​ពី​ខែ​មេសា​ថ្មីៗ​នេះ ​បន្ទាប់​ពី​មាន​ភាព​មិន​ចុះ​សម្រុង​នឹង​គ្នា។ រឿង​អាស្រូវ​បាន​ផ្ទុះឡើង ​កាល​​ពី​ល្ងាច​ថ្ងៃ​ចន្ទ​ទី​៩​ឧសភា ​ ដោយ​មាន​មនុស្ស​ស្រី​៨នាក់ ​ បាន​ធ្វើការ​ចោទប្រកាន់​ទៅ​លើ​លោក​អនុប្រធាន​សភា​រូប​នេះ ​ពី​បទ​គំរាម​កំហែង ​ និង​បំពារបំពាន​ផ្លូវភេទ។ ក្នុង​ចំណោម​ស្ត្រី ​ដែល​អះអាង​ខ្លួន​ថា​ជា​ជន​រងគ្រោះនោះ​ គឺ​មាន​៤នាក់ ​ក៏​ជា​តំណាងរាស្ត្រ ​និង​ធ្លាប់​ជា​មិត្ត​រួម​ការងារ​នៅ​ក្នុង​គណបក្ស ​របស់​លោក​ម្នាក់​នេះ​ផងដែរ។

 
លោកស្ត្រី ​Sandrine Rousseau ​តំណាងរាស្ត្រ ​និង​ជា​អ្នក​នាំ​ពាក្យ​គណបក្ស ​EELV​ បាន​ចោទ​ប្រកាន់​ថា​ នៅ​រវាង​ខែ​តុលា ​ឆ្នាំ​២០១១​ លោកស្រី​ត្រូវ​បាន​លោក ​Denis Baupin​ ចាប់​រុញ​ផ្ទប់​នឹង​ជញ្ជាំង ​រួចយក​ដៃ​មក​ស្ទាប​ដើមទ្រូង ​ហើយ​បំរុង​នឹង​ចាប់​ថើប​លោក​ស្រី ​តែ​លោកស្រី​បាន​រុញច្រាន​ត្រលប់​ទៅ​វិញ។ លោកស្រី​បាន​បញ្ជាក់​ថា​ ភ្លាមៗ​នោះ ​លោកស្រី​មិន​បាន​គិត​ទៅ​ដល់​ការ​ប្តឹងប្តល់ ​ឲ្យកើត​ជា​បញ្ហា​ក្នុង​គណបក្ស​ទេ ​ហើយ​លោកស្រី​គិត​ថា​វា​អាច​ជា​រឿង​សាមញ្ញ​ដែល​ខ្លួន​ជាស្រី​ ត្រូវ​មនុស្ស​ប្រុស​មើល​ងាយ​បែបនេះ។

លោកស្រី​អ្នក​តំណាងរាស្ត្រ ​Isabelle Attard​ ដែល​ជា​អតី​សមាជិក​គណបក្ស ​EELV ដែរ​ បាន​អះអាងថា​ នៅ​រវាង​ឆ្នាំ​២០១២​និង​ ២០១៣ ​លោកស្រី​តែងតែ​ទទួល​បាន​នូវ​សារ​តាម​ទូរស័ព្ទ ​ដែល​លោក​Denis Baupin ​ផ្ញើរ​មក​សឹងតែ​រៀងរាល់​ថ្ងៃ ​ដែល​សារ​ទាំង​នោះ ​មាន​ខ្លឹមសារ​អាសអាភាស ​ស្រើបស្រាល ​និង​ថោកទាប​ជា​ទី​បំផុត។ ដូចគ្នា​ដែរ​ លោកស្រី ​Elen Debost ​ជំនួយការ​ចៅហ្វាយ​ក្រុង ​Le Mans ​បាន​រាយការណ៍​ថា​ នៅ​រវាង​ឆ្នាំ​២០១១ ​លោក​ស្រី ​បាន​ទទួល​សារ​តាម​ទូរស័ព្ទ​ជា​ញឹកញាប់ ​អស់​រយៈពេល​៦ខែ ​ពី​លោក​Denis Baupin ​ដែល​រៀប​រាប់​អំពី​ចំណង់​តណ្ហា ​និង​ភាព​ស្រើបស្រាល​របស់​ខ្លួន។

សូម​បញ្ជាក់ថា​ មូល​ហេតុ​ដែល​ជំរុញ​ឲ្យ​ស្ត្រី​រងគ្រោះ ​សម្រេច​ចិត្ត​ដាក់​ពាក្យ​ប្តឹង​ ដោយសារ​ពួក​គេ​បាន​ឃើញ​រូបថត​មួយ​សន្លឹក ​ដែល​លោក ​Denis Baupin ​បាន​ថត​ជាមួយ​តំណាងរាស្ត្រ​ផ្សេងទៀត ​ដោយ​យក​ក្រែម​ក្រហម​លាប​មាត់ ​ដើម្បីជា​សារនយោបាយ​ ប្រយុទ្ធ​ប្រឆាំង​នឹង​អំពើ​ហឹង្សា ​ធ្វើ​ទៅ​លើ​ស្ត្រី។ សារនយោបាយ​ ដែល​ផ្ទុយ​ស្រលះ​ពី​ទង្វើ​និង​អត្តចរិក​ជាក់ស្តែង​របស់​លោក ​Denis Baupin​ របៀប​នេះ ​បាន​ធ្វើ​ឲ្យ​ក្រុម​ស្រ្តី​រងគ្រោះ​អត់ទ្រាំ​លែង​បាន ​ទើប​សម្រេច​ទំលាយ​រឿង​អាស្រូវ។

នៅ​ថ្ងៃ​អង្គារ​នេះ ​ ចៅក្រម​ស៊ើបអង្កេត​បារាំង ​បាន​ចាប់​ផ្តើម​បើក​ការស៊ើបអង្កេត​ជា​បឋម ​ ទៅ​លើ​បទ​ចោទ​ប្រកាន់​ទាំងនេះ។ មេធាវី​របស់​លោក​ Denis Baupin ​បាន​ធ្វើការ​បរិហារ​ថា ​ពាក្យ​បណ្តឹង​ទាំង​នោះ ​គ្មាន​មូលដ្ឋាន​ច្បាស់លាល់ ​ ហើយ​វា​ជា​លេស​ដើម្បី​បំផ្លាញ​ជីវិត​នយោបាយ​របស់​កូនក្តី​លោក​ច្រើន​ជាង។ យ៉ាងណាក៏​ដោយ ​ នេះ​មិន​មែន​ជា​លើក​ទីមួយ​ទេ ​ដែល​មាន​រឿង​អាស្រូវ​ស្តី​ពី​អាកប្បកិរិយា​មិន​សមរម្យ​របស់​អ្នក​នយោបាយ​បារាំង ​ទៅ​លើ​ស្តី្រ។ ជាក់ស្តែង​ករណី​លោក ​Domonique Struss-Kahn​ ដែល​ជាប់​ចោទ​ពី​បទ​រំលោភ​សេព​សន្ទវៈ​ នៅ​ក្នុង​សណ្ឋាគារ។ រឿង​អាស្រូវ​ទាំងនេះ ​ បាន​រំលេច​ចេញ​នូវ​អត្តចរិក​របស់​អ្នក​នយោបាយ ​អ្នក​មាន​អំណាច​បារាំង ​ដែលជា​មនុស្ស​ប្រុស​ ហើយ​ដែល​មាន​ចរិក​លែបខាយ ​មាត់ថា​ ដៃលូក​ បំពារបំពាន​ទៅ​លើ​មនុស្ស​ស្រី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI