អានតួអត្ថបទ

កតិកាសញ្ញាអន្តរ​ជាតិ​ស្តីពី​អន្តោប្រវេសន៍ បង្ក​ជាវិបត្តិ​នយោបាយ​នៅ​បែលហ្ស៊ិក

លោក Bart De Wever ប្រធានបក្ស N-VA ដែល​ជាបក្សស្អប់ជនអន្តោប្រវេសន៍​បែលហ្ស៊ិក។
លោក Bart De Wever ប្រធានបក្ស N-VA ដែល​ជាបក្សស្អប់ជនអន្តោប្រវេសន៍​បែលហ្ស៊ិក។ REUTERS/Francois Lenoir
ដោយ៖ ម៉ម ពិសី
១៤ នាទី

ប្រទេសសមាជិកអង្គការសហប្រជាជាតិ កំពុងតែត្រៀមខ្លួន បោះឆ្នោតសម្រេច លើអត្ថបទកតិកាសញ្ញាមួយ ស្តីពីអន្តោប្រវេសន៍។ ក៏ប៉ុន្តែកតិកាសញ្ញានេះ កំពុងធ្វើឲ្យប្រទេសបែលហ្ស៊ិក ជួបនឹងវិបត្តិនយោបាយ ដោយសារតែ គណបក្សជាតិនិយមហ្វ្លាម៉ង់ បានសម្រេចដើរចេញពីរដ្ឋាភិបាលចម្រុះ ព្រោះតែមិនចង់ឲ្យបែលហ្ស៊ិក បោះឆ្នោតគាំទ្រកតិកាសញ្ញានេះ។ លោក ហ្សាល មីឈែល នាយករដ្ឋមន្ត្រីបែលហ្សិក បានលើកឡើងថា លោកត្រៀមចំនួនរដ្ឋមន្រ្តីដែលចង់ដើរចេញរួចហើយ ហើយប៊ែលហ្ស៊ិក និងបោះឆ្នោតគាំទ្រ កតិកាសញ្ញាអន្តរជាតិដ៏សំខាន់នេះ។

ផ្សាយពាណិជ្ជកម្ម

កតិកាសញ្ញាអង្គការសហប្រជាជាតិស្តីពីអន្តោប្រវេសន៍ កំពុងក្លាយជាមូលហេតុ នៃវិបត្តិនយោបាយនៅបែលហ្ស៊ិក។ លោក Bart De Wever ប្រធានគណបក្ស N-VA ដែលជាគណបក្សជាតិនិយមហ្លាម៉ង់ បាននិយាយថា បើគេមិនស្តាប់យោបល់យើង យើងបន្តនៅទៀតក៏គ្មានន័យដែរ។ សម្តីនេះ មានន័យថា គណបក្ស N-VA នឹងដើរចេញពីរដ្ឋាភិបាលចម្រុះបែលហ្ស៊ិក ដឹកនាំដោយលោកនាយករដ្ឋមន្ត្រី ហ្សាល មីឈែន។

នៅព្រឹកថ្ងៃអាទិត្យ ទី៩ ធ្នូ មុននឹងចេញដំណើរទៅទីក្រុងម៉ារ៉ាកែច្ឆ ប្រទេសម៉ារ៉ុក ជាទីដែលប្រទេសសមាជិកអង្គការសហប្រជាជាតិជួបជុំគ្នា ដើម្បីពិភាក្សាស្តីពីកតិកាសញ្ញាអន្តោប្រវេសន៍ លោក ហ្សាល មីឈែល នាយករដ្ឋមន្ត្រីបែលហ្សិក បាននិយាយថា លោកបានទទួលដឹងឮហើយ ថាគណបក្ស N-VA នឹងដើរចេញពីរដ្ឋាភិបាល។ លោកនាយករដ្ឋមន្ត្រីបន្ថែមថា លោកនឹងតែងតាំងរដ្ឋលេខាធិកា ២រូប ឲ្យមកជំនួសការងាររដ្ឋមន្ត្រីទាំង៣រូប របស់គណបក្ស N-VA នេះ  ជាបណ្តោះអាសន្នសិន។ លោក ហ្សាល មីឈែល អះអាងថា កតិកាសញ្ញនេះ គឺជាការខំប្រឹងប្រែងរបស់បែលហ្ស៊ិក លើឆាកអន្តរជាតិ ដើម្បីចូលរួមដោះស្រាយបញ្ហាអន្តោប្រវេសន៍ដែលកំពុងតែបង្កបញ្ហានៅទូទាំងពិភពលោក។

សូមរំលឹកថា ក្នុងចំណោមគណបក្សទាំង៤ ដែលចូលរួមក្នុងរដ្ឋាភិបាលចម្រុះ គឺមានតែគណបក្ស N-VA មួយទេ ដែលមិនគាំទ្រកតិកាសញ្ញាស្តីពីអន្តោប្រវេសន៍នេះ។ វិបត្តិនយោបាយ ភាពមិនចុះសម្រុងគ្នា ទាក់ទិននឹងការទទួលយកកាតិកាសញ្ញានេះ បាន​ចោទឡើង ជាច្រើនសប្តាហ៍មកហើយ។ ដើម្បីបិទបញ្ចប់ភាពតានតឹង លោកហ្សាល មីឆែល បានសម្រេច ស្នើទៅរដ្ឋសភាបែលហ្សិក ឲ្យបោះឆ្នោតសម្រេ​ច ថាតើរដ្ឋាភិបាលគួរទទួល ឬមិនទទួលយកកតិកាសញ្ញានេះ។ ឆ្លងកាត់២ថ្ងៃនៃការជជែកដេញដោល យ៉ាងតឹងសរសៃកនៅក្នុងសភា ទីបំផុតសមាជិកសភាសម្លេងភាគច្រើន បានបោះឆ្នោតគាំទ្រ កតិកាសញ្ញានេះ។

គួរកត់សំគាល់ថា អត្ថបទកតិកាសញ្ញាស្តីពីអន្តោប្រវេសន៍នេះ បានចូលមកពន្លិចឲ្យភាពផុយស្រួយផ្នែកនយោបាយបែលហ្ស៊ិក រវាងក្រុមបក្សស្អប់ជនអន្តោប្រវេសន៍ និងក្រុមផ្តល់តំលៃដល់សិទ្ធិមនុស្សជាចំបង ឲ្យចេញ​ជារូបរាង្គ​។ ដោយឡែក ប្រទេសមួយចំនួននៅអឺរ៉ុបខាងកើត ដែលដឹកនាំដោយរដ្ឋាភិបាលប្រឆាំងជនអន្តោប្រវេសន៍ បានសម្រេចមិនគាំទ្រកតិកាសញ្ញានេះ រួចទៅហើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ