អានតួអត្ថបទ
ទស្សនៈព្រឹត្តិការណ៍ពិភពលោក

មហា​ផ្លូវដែក​កាត់តំបន់​ស៊ីបេរី ​ដែល​ត្រូវ​គេ​ហៅថា​ អច្ឆរិយវត្ថុ​រុស្ស៊ី ​អាយុ​បាន​១២​៥​ឆ្នាំ

សំឡេង ០៦:៤២
ខ្សែររថភ្លើង Transsib របស់រុស្ស៊ី ក្នុងរដូវធ្លាក់​ទឹកកក
ខ្សែររថភ្លើង Transsib របស់រុស្ស៊ី ក្នុងរដូវធ្លាក់​ទឹកកក
ដោយ៖ កែវ ឆាយា
៣៨ នាទី

កាល​ពី​១២៥​ឆ្នាំ​មុន ​ថ្ងៃ ​២៩​មីនា​ឆ្នាំ​១៨៩១ ​អធិរាជ​ចក្រភព​រុស្ស៊ី ​ព្រះបាទ ​Alexandre ​ទី III​ទ្រង់​បាន​ចេញ​រាជក្រិត្យ ​ឲ្យ​សង់​ឡើង​ជា ​ខ្សែ​ផ្លូវអយស្ម័យយាន​វែង​សំបើម ​កាត់ ​តំបន់​ស៊ីបេរី​ទាំងមូល ​ក្រោម​ឈ្មោះ​បំព្រួ្ថញ ​ថា​ TransSib។ តាម​មតិ ​ពួក​ប្រវត្តិវិទូ​បច្ចុប្បន្ន ​មហា ​ផ្លូវដែក​ TransSib​បាន​ញ៉ាំង​ឲ្យ​ប្រទេស​រុស្ស៊ី​មាន​ មោទនភាព ​មិន​តិច​ជាង​ ការ​ដែល​រុស្ស៊ី ​កាល​ក្នុង​ឆ្នាំ​១៩៥៧​ បាន​បង្ហោះ​មុន​គេ​បង្អស់ ​គឺ​ ផ្កាយ​រណប​សិប្បនិម្មិត ​របស់ ​ផែនដី​យើង។

ផ្សាយពាណិជ្ជកម្ម

ទោះ​បី​ខួប​១២៥​ឆ្នាំនេះ​ សង្គម​និង​រ​ដ្ឋរុស្ស៊ី ​មិន​បាន​ប្រារព្ធ​យ៉ាង​អ៊ឹកធឹក​ក្តី ​ដោយគេ​ទម្លាប់​ ​ទៅ​ហើយ​នឹង​ វត្តមាន​នៃ​ខ្សែ​ផ្លូវអយស្ម័យយាន​សែនវែង​នេះ ​ក៏​មតិ​ជា​ច្រើន​សម័យ​បច្ចុប្បន្ន​ តែង​ហៅ​វា​ថា​ជា ​អច្ឆរិយវត្ថុ​រុស្ស៊ី ​តែម្តង  ព្រោះវា​ជា​សមិទ្ធិផល​បច្ចេកទេស​មួយ​ដ៏​អស្ចារ្យ​របស់​មនុស្សលោក ​ដោយ​ថែម​ទាំង​ប្រៀប​ប្រដូច​វា ​ទៅនឹង​ការ​ដាក់​ឲ្យ​ប្រើប្រាស់ ​ព្រែក​ជីក Suez ​ដែល​ទម្រាំ​សង់រួច ​គឺ​បាន​ស៊ី​ពេល​អស់​១០​ឆ្នាំ​ពី​ឆ្នាំ​១៨៥៩​ដល់​ឆ្នាំ​១៨៦៩​ ព្រមទាំង​ប្រៀប​ប្រដូច​ទៅ​នឹង​ ការ​លុកបើក ​រក​ឃើញទ្វីប​ថ្មី​ គឺ​ ទ្វីប​អាមេរិក ​កាល​ពី​ជាង​ ៥​សតវត្ស​មុន។

 
ជាការ​កត់​សម្គាល់ ​នៅ​រុស្ស៊ី ​គេ​បាន​នាំគ្នា​ហៅ ​រទេះភ្លើង​ប៉ុន្មាន​ដំបូង​ដើរ​ដោយ​ថាមពល​ធ្យូងថ្ម​ ​ថា​ជា​ កប៉ាល់​រត់​លើ​ផ្លូវដែក។ ក្នុង​អំឡុង​ពេល ​៤០​ឆ្នាំ ​រាប់​ពី​ឆ្នាំ​១៨៧៧ ​ដល់ឆ្នាំ​១៩១៧ ​ជា​ឆ្នាំ ​ដែល​មាន​ផ្ទុះឡើង ​បដិវត្តន៍​ផ្តួល​របប​រាជា​និយម​ មាន​សង់​បាន​ផ្លូវដែក​ ប្រវែង​៨ម៉ឺន​១ពាន់​គ.ម. ​ហើយ​ក្រោយ​ពី​បដិវត្តន៍​នោះ ​គឺ​ពី​ឆ្នាំ​១៩២០​ ដល់​១៩៦០​ មាន​សង់​បាន​ផ្លូវដែក​ ៤ម៉ឺន​៤ពាន់ ​គ.ម​.ទៀត។ ដូច្នេះ ​សរុបទៅ ​គឺ​មាន​ប្រវែង​ជាង​ ១សែន​២ម៉ឺន​៥ពាន់​គ.ម​. ដែល​ពី​ក្នុង​នោះ ​ជាង​ ពាក់​កណ្តាល ​គ្រប់គ្រង​ដោយ ​ក្រុមហ៊ុន​អយស្ម័យយាន​រដ្ឋរុស្ស៊ី ​ហៅ​ថា ​RZD។

សម្រាប់​ប្រទេស​រុស្ស៊ី​មាន​ផ្ទៃដី​សែន​ល្វឹងល្វើយ ​ការ​សាងសង់​ផ្លូវដែក ​គឺ​ជា​តម្រូវការ​ចាំបាច់​ ចោទ​ដោយ​ជីរិត​រស់នៅ​របស់​អ្នក​ស្រុក។ កាល​ពី​កណ្តាល​សតវត្ស​ទី​១៩   ​ដើម្បី​ដឹក​ធ្យូងថ្ម ​ក្នុង​១តៅៗ​រុស្ស៊ី​ទម្ងន់​១៦​គីឡូក្រាម​កន្លះ ​​ពី​ប្រទេស​អង់គ្លេស​មក​ ត្រូវ​ចំណាយ​តែ​០,១២​រូប្ល ​តែបើ​ដើម្បី​ដឹក​វា​ក្នុង​បរិមាណ​ប៉ុនគ្នា​ ​ពី​តំបន់​ដុនបាស ​ ប៉ែក​ខាង​ត្បូង​រុស្ស៊ី ​គឺ​ត្រូវ​ចំណាយ​ ៨ដង​ ច្រើន​ជាង​ដល់​ទៅ​១រូប្ល​ឯណោះ។ ហើយ​ការ​ដែល​ពី​មួយ​ពេល​ទៅ​មួយ​ពេល​ មាន​ផ្ទុះឡើង​ជា​ គ្រោះ​ខ្វះស្បៀង អត់ឃ្លាន ​ក៏​​មិនមែន​មក​ពី ​ខ្វះ​នំប៉័ង​ទេ ​ តែ​គឺ​មក​ពី​គ្មាន​ផ្លូវដែក ​សម្រាប់​ដឹក​ស្រូវ​សាលី ​ចេញ​ពី​តំបន់​សំបូរ​ផល​ដំណាំ ​ទៅ​កាន់​តំបន់​ដែល​គ្មាន​កសិផល​នេះ។

គិតមក​ទល់​ថ្ងៃ​១៥​មិថុនា​ឆ្នាំ​១៨៦៥​ បណ្តាញ​ផ្លូវដែក​នៅ​រុស្ស៊ី ​មាន​ប្រវែង​តែ​ជាង​ ៣ពាន់​គ.ម.។
ស្រប​នឹង​ផែនការ​ ផ្លូវ​ដែក​ដែល​ដើរ​ដោយ​ចរន្ត​អគ្គិសនី​មុន​គេ​បង្អស់ ​គឺ​ត្រូវ​លេច​ចេញ​មក​ ពិត​ ​ជា​នៅ​ រុស្ស៊ី។ គម្រោង​នោះ​ចែង​ថា ​ក្នុង​ឆ្នាំ​១៩១៣ ​ក្បួន​រថភ្លើង​ទីមួយ ​ដើរ​ដោយ​អគ្គិសនី​ ត្រូវ​បើក​ចេញ ​ពី​រាជធានី​រុស្ស៊ី ​ក្រុង​ Saint-Petersbourg​ ទៅ​កាន់​ ក្រុង​ Helsinki​ រដ្ឋធានី​ហ្វាំងឡង់ ​ប៉ុន្តែ ​ផែនការ​នេះ​មិន​អាច​សម្រេច​ទៅ​កើត ​ដោយ​មក​ពី​សង្គ្រាម​លោក​លើក​ទី១​ បាន​ផ្ទុះឡើង។

បើនិយាយ​ពី ​មហា​ខ្សែ​ផ្លូវដែក ​កាត់​តំបន់​ស៊ីបេរី​ទាំង​មូល​ ហៅថា​ TransSib​ នោះ​វា​ត្រូវ​បាន ​ចាប់ផ្តើម​សង់ឡើង​ ​គឺ​នៅ​ថ្ងៃ​ ៣១​ឧសភា​ឆ្នាំ​១៨៩១ ​ដោយ​ស្ថិត​នៅ​ក្រោម​ការ​ត្រួតពិនិត្យ ​នៃ ​អនាគត​អធិរាជរុស្ស៊ី ​ព្រះបាទ ​Nicolas ​ទី II ។

មកទល់​ពេលនោះ ​នៅ​ក្នុង​លោក ​ខ្សែ​ផ្លូវដែក​វែង​ជាង​គេ ​គឺ​ស្ថិត​នៅ​ស.រ.អា.​ ដែល​បែក​ចេញ​ពី​ ក្រុង​ Omaha​ រដ្ឋ​ Nebraska​ ទៅក្រុង ​San Francisco ​ នៃរដ្ឋ​ California ​ ប្រវែង​ ២.៩៧៤គ.ម. ​ដាក់​ឲ្យ​ដំណើរការ​ ក្នុង​ឆ្នាំ​១៨៧០ ​ក្រោមឈ្មោះ​ថា​ Union Pacific។ ជាការ​ប្រៀបធៀប ​ផ្លូវដែក​ដ៏​មហិមា​នៅ​រុស្ស៊ី ​ក្រោម​ឈ្មោះថា​ TransSib​ មាន​ប្រវែង​ដល់​ទៅ ​៧.៥២៨គ.ម. ​ប៉ុន្តែ ​ខ្សែផ្លូវ ​Union Pacific ​បាន​លូន​ឆ្លងកាត់ ​តំបន់​ភ្នំ​ដែល​មាន​កំពស់​ដល់​ ២.១៩១ម៉ែត្រ ​ចំណែក​ខ្សែ​ផ្លូវដែក​ TransSib ​លូន​ឆ្លង​កាត់​តំបន់​ភ្នំ ​កំពស់​តែ​ ១.០៤០​ម៉ែត្រ។ ប៉ុន្តែ ​TransSib​ ត្រូវ​លូន​តាម​រូង​ឧម្មង្គ ​ចំនួន​ដល់​ទៅ​៣៩ ក្រោម​ចង្កេះ​ភ្នំ។ បូកទាំង​ផ្លូវ​ដែក​បន្ទាប់​បន្សំ ​ដែល​បែក​ចេញ​ពី​មហាខ្សែ​ផ្លូវ​នេះ ​TransSib ​មាន​ប្រវែង​សរុប​ទៅ​ដល់​ ១ម៉ឺន​២​ពាន់​៣៩០​គ.ម.។
 

ពីចុងម្ខាងទៅចុងម្ខាង​ ខ្សែររថភ្លើង Transsib របស់រុស្ស៊ីព័ទ្ធសឹងតែពាក់​កណ្តាល​ផែនដី
ពីចុងម្ខាងទៅចុងម្ខាង​ ខ្សែររថភ្លើង Transsib របស់រុស្ស៊ីព័ទ្ធសឹងតែពាក់​កណ្តាល​ផែនដី

មហាផ្លូវដែក​ TransSib ​បាន​តម្រូវ​ឲ្យ​រដ្ឋ​ចំណាយ​តាម​តម្លៃ​កាលណោះ ​គឺ​អស់​ ១.៤៥៥​លានរូប្ល​ឬ​ ស្មើ​នឹង​ប្រាក់​ដុល្លារ​បច្ចប្បន្ន ​ក្នុង​ទំហំ ​២៥.០០០​លាន​ដុល្លារ។ ល្បឿន​មធ្យម​ នៃ​ការ​សាងសង់ ​គឺ​រំកិល​ទៅ​មុខ​បាន​ប្រវែង​ ១គ.ម​.កន្លះ ​ក្នុង​១ថ្ងៃ។ ស្ថានកម្ម​នោះ ​បាន​ស៊ីពេល​អស់ ​២៥​ឆ្នាំ។ សំណង់​ចុងក្រោយ ​គឺ​កំណាត់​ផ្លូវដែក​នៃ​ស្ពាន ​កាត់​លើ​ទន្លេ ​អាមួរ ​ មាន​ប្រវែង​ ២,៦គ.ម.​ ត្រូវ ​បាន​ដាក់​ឲ្យ​ដំណើរការ​ គឺ​នៅ​ថ្ងៃ​ ១៨​តុលា​ឆ្នាំ​១៩១៦។

ស្ថាបនកម្ម​នេះ​ ​បាន​ប្រើ​កម្លាំង​ពលករ ​ចំនួន​២០.០០០​នាក់។ ដោយ​មក​ពី​មូលហេតុ​នយោបាយ ​ឥត​មាន​ប្រើ​ទេ ​ពលករ​ជាតិ​ចិន​ និង​ កូរ៉េ។ មិន​តែ​ប៉ុណ្ណោះ ​អាជ្ញាធរ​រុស្ស៊ី​ចាត់ទុក​ជា ​អភូតកថា ​សុទ្ធសាធ​ ការ​ឃោសនា​ដែល​ថា ​ក្នុង​ការសាង​សង់​នោះ ​មាន​ប្រើ​កម្លាំង ​ពួក​អ្នក​ទោស​ស្អីណា។

ស្ពាន​កាត់​លើ​ទន្លេ ​អាមួរ ​ នោះ​ ត្រូវ​បាន​សង់ឡើង​ទាំង​ត្រដាបត្រដួស​ លុះ​ទាល់តែ​ស៊ី​ពេល​ អស់​ ៣ឆ្នាំ​ ពី​ព្រោះ​កប៉ាល់ដែល​ដឹក​សម្ភារៈ​សម្រាប់​សង់​ស្ពាន​នោះ ​បើក​ចេញ​ពី​ក្រុង​ផែ ​Odessa ​ត្រូវ​ បាន​បាញ់​ពន្លិច​ក្នុង​មហាសមុទ្រ​ឥណ្ឌា ​ដោយ​នាវា​មុជទឹក​អាល្លឺម៉ង់ ​សម័យ​សង្គ្រាម​លោក ​លើក​ទី១។ ហេតុ​ដែល​បណ្តាល​ឲ្យ​ការងារ​សាងសង់​ ខាត​ពេល​ អស់​១១​ខែ។

អ្វីដែល​គួរឲ្យ​កត់​សម្គាល់ ​គឺថា ​រុស្ស៊ី​បាន​លើក​យក​ទៅ​តាំង​បង្ហាញ​ក្នុង​ពិព័រណ៏​សកល​ឆ្នាំ​១៩០០​ នៅក្រុង​ប៉ារីស​ ក្បាល​រទេះភ្លើង ​ទូររទេះ​ភ្លើង ​និង​រូប​សំណាក​នៃ​ស្ពាន​កាត់​លើ​ទន្លេ ​យេនីស៊ៃយ  ​ហើយ​បាន​ទទួល​រង្វាន់​ទី​១ ​នៃ​ពិពរ័ណ៏​នេះតែ​ម្តង។ ពួក​អ្នក​កាសែត​បារាំង ​កាលណោះ ​ហៅ ​ផ្លូវដែក​ TransSib​ ថាជា ​“ ឆ្អឹងខ្នង​របស់​យក្ស​រុស្ស៊ី “ ​និង​ ជា ​“ ការ​បន្ត​ទៅជា​ប្រពៃណី ​នៃ​យុគ​មហា​លុកបើក ​រក​ឃើញ​ផ្នែក​ភូមិសាស្ត្រ “។

ការ​ដឹក​ជញ្ជូន​ទំនិញ ​ពី​ចុង​បូព៏ា​ទៅ​ទ្វីប​អឺរ៉ុប​ តាម TransSib ​គឺ​ស៊ី​ពេល​តែ​១០​ថ្ងៃ ​បាន​ន័យ​ថា ​៣ដង ​លឿន​ជាង​ តាម​ផ្លូវ​សមុទ្រ។ បើ​កាល​មុន​ ដើម្បី​ធ្វើ​ដំណើរ​ពី​ក្រុង​ Sain Petersbourg ​ទៅក្រុង​ Vladivostok ​នៅ​ចុង​បូព៏ា ​គេត្រូវ​ចំណាយ​ពេល​អស់​១០​ថ្ងៃ ​នោះ​ក្រោយ​ពី​ខ្សែ​ផ្លូវ​ TransSib​ ដាក់​ ឲ្យ​ដើរ​ដោយ​ចរន្ត​អគ្គិសនី​បាន​១០០% ​តាំង​ពី​ ឆ្នាំ​២០០២​មក​ ​គឺ​ស៊ី​ពេលតែ​ ៧ថ្ងៃ​ប៉ុណ្ណោះ។ ក្នុង​ទូរ​រថភ្លើង​រត់តាម ​TransSib​ សម្រាប់​តម្រូវការ​អ្នក​ធ្វើ​ដំណើរ ​គឺ​មាន​ បណ្ណាល័យ ​ បន្ទប់​ងូត​ ទឹក​ សាលតន្ត្រី ​សាល​ហាត់​កីឡា ​សាឡុង​សម្រាក​លំហែកាយ ​ជាដើម៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ