អាមេរិក-ហ្សកហ្ស៊ី

ទាហាន​អាមេរិក​និង​ហ្សកហ្ស៊ី ​ធ្វើ​សមយុទ្ធ​យោធា​រួមគ្នា ​ដ៏​ធំ​មិន​ធ្លាប់​មាន

ទាហាបអង់គ្លេស ក្នុងក្រុុងកងកម្លាំង​​អូតង់ កំពុង​ត្រៀម​​​ចេញ​​ធ្វើ​​សមយុទ្ធ នៅហ្សកហ្ស៊ី ​ថ្ងៃទី ៣០ ​កក្កដា​ ២០១៧
ទាហាបអង់គ្លេស ក្នុងក្រុុងកងកម្លាំង​​អូតង់ កំពុង​ត្រៀម​​​ចេញ​​ធ្វើ​​សមយុទ្ធ នៅហ្សកហ្ស៊ី ​ថ្ងៃទី ៣០ ​កក្កដា​ ២០១៧ REUTERS/Irakli Gedenidze

ស្រប​ពេល​ដែល​លោក​ ម៉ាយឃ៍ ភែនស៍ ​អនុ​ប្រធានាធិបតី​សហរដ្ឋ​អាមេរិក ​បំពេញ​ទស្សនកិច្ច ​នៅ​តំបន់​អឺរ៉ុប​ខាង​កើត ​ កងទ័ព​អាមេរិក ​និង​កងទ័ព​ហ្សកហ្ស៊ី ​បាន​ចាប់​ផ្តើម​ធ្វើ​សមយុទ្ធ​យោធា​រួមគ្នា ​ដ៏​ធំ​មួយ ​ ដោយ​មាន​ការ​ចូលរួម​ពី​កងទ័ព ​នៃ​ប្រទេស​សមាជិក​អូតង់​ មួយ​ចំនួន​ផងដែរ។ សមយុទ្ធ​យោធា​នេះ​​ ធ្វើឡើង​ក្នុង​បរិបទ​មួយ ​ដែល​ហ្សកហ្ស៊ី ​កំពុង​ជាប់​ជំលោះ​ជាមួយ​រុស្ស៊ី​ ​ហើយ​ថែម​ទាំង​បាន​បង្ហាញ​បំណង​ចង់​ ក្លាយ​ជា​សមាជិក​អង្គការ​អូតង់​ទៀត​ផង។

ផ្សាយពាណិជ្ជកម្ម

លោក ​ម៉ាយឃ៍ ភែនស៍​ អនុប្រធានាធិបតី​អាមេរិក​ បាន​មក​​បំពេញ​ទស្សនកិច្ច ​នៅ​ប្រទេស​អេស្តូនី ​ដែល​ស្ថិត​នៅជាប់​រុស្ស៊ី​ក្នុង​តំបន់​បាល់ទិក។ ទស្សនកិច្ច​នេះ ​ត្រូវ​បាន​គេ​មើល​ឃើញ​ថា ​សហរដ្ឋ​អាមេរិក ​បាន​ចេញ​ប្រតិបត្តិការ​ដើរ​លួងចិត្ត​ ប្រទេស​តូចៗ​ក្នុង​តំបន់​អឺរ៉ុប​ នៃ​តំបន់​បាល់ទិក ​និង​តំបន់​បាល់កង់​ ដែល​ជា​សមាជិក​នៃ​អង្គការ​អូតង់ ​ថា​កុំ​ឲ្យ​បារម្ភ​ ព្រោះ​អាមេរិ​ក នៅតែ​មាន​កំលាំង ​ហើយ​បើ​មាន​ការ​អី ​ អាមេរិក​ នឹង​មក​ជួយ​ភ្លាម។

បន្ទាប់​ពី​អេស្តូនី​ លោក​ អនុប្រធានធិបតី​អាមេរិក ​បាន​ទៅ​ដល់​ប្រទេស​ហ្សកហ្ស៊ី ​ជា​ទី​ដែល​កងទ័ព​អាមេរិក​ បាន​ចាប់​ផ្តើម​ធ្វើ​សមយុទ្ធ​យោធា​ជាមួយ​កងទ័ព​ហ្សកហ្ស៊ី។ អាមេរិក​បាន​បញ្ជូន​រថក្រោះ​ទំនើប​របស់​ខ្លួន ​ប្រភេទ ​M1A2 ​Abrams ​និង​ប្រភេទ​ M2​ Bradley​.មក​បង្អួត​ទៀត​ផង។ សមយុទ្ធ​យោធា ​ដែល​ត្រូវ​បន្ត​ធ្វើ ​រហូត​ដល់ថ្ងៃ​ទី​ ១២ ​សីហា​នេះ ​មាន​ការ​ចូលរួម​ពី​ទាហាន​ហ្សកហ្ស៊ី​ចំនួន​៨០០​នាក់ ​ទាហាន​អាមេរិក​១៦០០​នាក់។ ក្រៅពី​នេះ​ នៅមាន​ទាហាន​ប្រទេស​សមាជិក​អូតង់​ប្រមាណ ​៤០០​នាក់​ទៀត​ មាន​ដូចជា ​ទាហាន​អាល្លឺម៉ង់ ​អង់គ្លេស ​ អ៊ុយក្រែន ​ អាកម៉េនី ​តួកគី ​និង​ស្លូវ៉េនី។

លោក​ Levan Izoria ​ រដ្ឋមន្ត្រី​ក្រសួង​ការពារជាតិ​ហ្សកហ្ស៊ី ​បាន​ចាត់ទុក​ថា ​នេះគឺ​ជា​សមយុទ្ធ​យោធា​ដ៏​ធំ​បំផុត​មិន​ធ្លាប់​មាន​ទេ ​នៅ​លើ​ទឹកដី​ហ្សកហ្ស៊ី។ តាម​រយៈ​សមយុទ្ធ​យោធា​នេះ ​ហ្សកហ្ស៊ី ​បាន​បង្ហាញ​គោល​ជំហរ​យ៉ាង​ច្បាស់ ​ថា​ខ្លួន​គាំទ្រ​អាមេរិក ​ ហើយ​មាន​បំណង​ក្លាយ​ជា​សមាជិក​ថ្មី​ នៃ​អង្គការ​អូតង់។

គួរ​រំលឹក​ថា ​ហ្សកហ្ស៊ី ​បាន​ផ្តើម​មាន​ជំលោះ​ពេញ​មុខ​ជា​មួយ​រុស្ស៊ី ​នៅ​ឆ្នាំ២​០០៨។ គ្រា​នោះ ​ហ្សកហ្ស៊ី​ចង់ចរចា​ ចូល​ជា​សមាជិក​អូតង់ ​ ក៏​ប៉ុន្តែ​ អ្វីៗ​ត្រូវ​អាក់ខាន​ទៅ​វិញ​ ដោយ​សារ​រុស្ស៊ី​បាន​បញ្ជូន​ទ័ព​ គំរាម​ហ្សកហ្ស៊ី ​ហើយ​សង្រ្គាម​ផ្ទុះ​អាវុធ​ រវាង​ហ្សកហ្ស៊ី ​និង​រុស្ស៊ី ​បាន​កើតឡើង ​នៅ​តំបន់​ Ossétie ​ខាងត្បូង ​និង​តំបន់ ​Abkhazie។

ហ្សកហ្ស៊ី​ ដែល​ស្ថិត​ក្នុង​តំបន់​កូកាស ​ចន្លោះ​រវាង​តំបន់​បាល់កង់ ​អាស៊ី​ខាងត្បូង ​និង​ដើម​បូព៌ា ​គឺជា​តំបន់​យុទ្ធសាស្ត្រ​ដ៏​សំខាន់ ​សំរាប់​អាមេរិក ​និង​រុស្ស៊ី។ ការ​ពង្រឹង​កម្លាំង​របស់​អូតង់ ​នៅ​តំបន់​បាល់កង់ ​តំបន់​បាល់ទិក​ និង​ហ្សក​ហ្ស៊ី​នា​ពេល​នេះ ​ ប្រាកដ​ជា​នឹង​ធ្វើ​ឲ្យ​រុស្ស៊ី ​មាន​ប្រតិកម្ម​តបវិញ​មិន​ខា​ន ​ព្រោះ​រុស្ស៊ី​តែងតែ​ចាត់ទុក​ថា ​អូតង់​កំពុង​ពង្រាយ​ទ័ព ​ព័ទ្ធ​ជុំវិញ​ព្រំដែន​ខាង​លិច​របស់​រុស្ស៊ី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI