ក្រិក

FMI៖« ជំនួយ​ជួយ​ស្រោច​ស្រង់​សេដ្ឋកិច្ច​ប្រទេស​ក្រិកត្រូវ​តែ​មាន​លក្ខខណ្ឌ »

លោកGeorges Papaconstantinou (រូប​ខាង​ស្តំា) រដ្ឋមន្រ្តី​ក្រសួង​ហិរញ្ញវត្ថុ​នៃ​ប្រទេស​ក្រិក
លោកGeorges Papaconstantinou (រូប​ខាង​ស្តំា) រដ្ឋមន្រ្តី​ក្រសួង​ហិរញ្ញវត្ថុ​នៃ​ប្រទេស​ក្រិក ©Reuters /Jonathan Ernst
១៦ នាទី

នៅ​ក្នុង​កិច្ចប្រជុំ​របស់​អង្គការ​ មូលនិធិរូបិយវត្ថុ​អន្តរជាតិ (FMI) និង​ធនាគារ​ពិភពលោក​នា​ចុង​សប្តាហ៍​នេះ នៅ​ទីក្រុង​វ៉ាស៊ីនតោន​សហរដ្ឋអាមេរិក ប្រទេស​ក្រិក​ទទួល​បាន​ព័ត៌មាន​លំអិត​បន្ថែម​ជុំ​វិញ​ជំនួយ​ ហិរញ្ញវត្ថុ ដែល​ខ្លួន​បាន​សុំ​ពី FMI និង​សហភាពអឺរ៉ុប។ កិច្ច​ព្រមព្រៀង​នឹង​ត្រូវ​សម្រេច​នៅ​ថ្ងៃ​ខាង​មុខ តែ​ជា​ជំនួយ​មួយ ដែល​មាន​លក្ខខណ្ឌ​ត្រឹមត្រូវ។

ផ្សាយពាណិជ្ជកម្ម

 

សេចក្តី​រាយការណ៍​របស់ គួច គន្ធារ៉ា

លោក Georges Papaconstantinou រដ្ឋមន្រ្តី​ក្រសួង​ហិរញ្ញវត្ថុ​នៃ​ប្រទេស​ក្រិក​បាន​បញ្ជាក់​ថា អ្វី​ដែល​លោក​បាន​ទទួល​ពី​កិច្ច​ប្រជុំ​រវាង​អង្គការ​មូលនិធិរូបិយវត្ថុ​អន្តរជាតិ ហៅ​កាត់​ថា FMI និង​ធនាគារ​ពិភពលោក​នៅ​ទីក្រុង​វ៉ាស៊ីនតោន​សហរដ្ឋអាមេរិក គឺ​ជា​ការ​ធានា​មួយ​គ្រប់​គ្រាន់ ទំាង​ពី​ អង្គការ​មូលនិធិរូបិយវត្ថុ​អន្តរជាតិ និង​ពី​ប្រទេស​ជា​ដៃគូ​នៅ​ក្នុង​សហភាពអឺរ៉ុប។ លោក Papaconstantinou បាន​បញ្ជាក់​បន្ថែម​ថា ចាប់​ពី​ពេល​នេះ​ត​ទៅ អ្នក​ដែល​បាន​ភ្នាល់​គ្នា​នៅ​លើ​ទីផ្សារ​ហិរញ្ញវត្ថុ​ស្តីពី​ភាព​ក្ស័យធន​របស់​ប្រទេស​ក្រិក​នោះ នឹង​ត្រូវ​ទទួល​បរាជ័យ។

សូម​ជម្រាប​ជូន​ថា កាល​ពី​ថ្ងៃ​សុក្រ​កន្លង​ទៅ​នេះ ប្រទេស​ក្រិក​បាន​សម្រេច​ចិត្ត​ប្រកាស​រក​ជំនួយ ដោយ​បាន​សុំ​ខ្ចី​ប្រាក់​ចំនួន ៤ម៉ឺន ៥ពាន់លានដុល្លារ ក្នុង​នោះ ១ម៉ឺន ៥ពាន់លានដុល្លារ​ពី​អង្គការ​មូលនិធិរូបិយវត្ថុ​អន្តរជាតិ និង ៣ម៉ឺន​លាន​ដុល្លារ​ពី​ប្រទេស​ជា​ដៃគូ​នៅ​ក្នុង​សហភាពអឺរ៉ុប។ លោក Dominique Strauss-Kahn អគ្គនាយក FMI បាន​ថ្លែង​ឲ្យ​ដឹង​ថា នឹង​មាន​កិច្ច​ព្រមព្រៀង​មួយ​ក្នុង​ពេល​ឆាប់ៗ​ខាង​មុខ​រវាង​ក្រិក និង FMI ជុំ​វិញ​លក្ខខណ្ឌ​មួយ​ចំនួន​ដែល​ប្រទេស​ក្រិក​ត្រូវ​គោរព​ក្នុង​ការ​ស្រោចស្រង់​ស្ថានភាព​ហិរញ្ញវត្ថុ​របស់​ខ្លួន​ឡើង​វិញ។

មិន​មែន​ជា​គំនាប​ទេ តែ​ជា​សារ​មួយ​ដែល​គេ​ចង់​ប្រាប់​ទៅ​ប្រទេស​ក្រិក​ថា ជា​ជំនួយ​មួយ​ដែល​មាន​លក្ខខណ្ឌ។ លោក​ស្រី Christine Lagarde រដ្ឋមន្រ្តី​ក្រសួង​សេដ្ឋកិច្ច​បារំាង​បាន​គូស​បញ្ជាក់​ថា ការ​ដែល​ប្រទេស​អឺរ៉ុប​បាន​រួម​សាមគ្គី​គ្នា​ជួយ​ប្រទេស​ក្រិក​ពេល​នេះ មិន​មែន​ដើម្បី​ផ្គាប់​ចិត្ត​ប្រទេស​ក្រិក​ទេ។ ចំណែក​ប្រទេស​អាឡឺម៉ង់​វិញ ទីក្រុង Berlin បាន​គំរាម​នឹង​រារំាង​មិន​ឲ្យ​អឺរ៉ុប​ជួយ​ក្រិក​ទេ ប្រសិន​ណា​បើ​គម្រោង​ផែនការ​លើ​ឡើង​ដោយ​ប្រទេស​ក្រិក ពុំ​មាន​លក្ខណៈ​ប្រាកដប្រជា​នោះ​ទេ។

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI