រុស្ស៊ី និង ស.រ.អា. សាកល្បងតថ្លៃគ្នាឬ?
ចុះផ្សាយនៅថ្ងៃ៖ កែប្រែថ្ងៃទី៖
សាច់រឿងមួយជាគន្លឹះនៃកិច្ចចរចាដែលលោកអនុប្រធានាធិបតីអាមេរិកាំង Joseph Biden ធ្វើនៅរសៀលថ្ងៃនេះក្នុងក្រុងម៉ូស្គូជាមួយលោកប្រមុខរដ្ឋរុស្ស៊ី Medvedev គឺជុំវិញបញ្ហាទទួលរុស្ស៊ីឲ្យបានចូលជាសមាជិកអង្គការពាណិជ្ជកម្មពិភពលោក។ ប៉ុន្តែ នៅលើផ្លូវនេះនៅមានឧបសគ្គរាំងរាពីខាងរដ្ឋGeorgieដែលតែងចាត់ទុករុស្ស៊ីជាសត្រូវខ្លួន។ ម៉ូស្គូសង្ឃឹមថា រដ្ឋបាលអាមេរិកនឹងប្រើទឹកមាត់ប្រៃរបស់ខ្លួនបង្ខំGeorgieឲ្យលុបឧបសគ្គនោះទៅវិញទៅ ហើយជាថ្នូរក៏នឹងមានការធ្វើសម្បទានដែរពីខាងម៉ូស្គូក្នុងរឿងលីប៊ី។
សេចក្តីរាយការណ៍របស់ កែវ ឆាយា
តាមដែលកាសែតនៃមជ្ឈដ្ឋាន Business រុស្ស៊ី ឈ្មោះ Kommersant លេខថ្ងៃនេះចុះផ្សាយ យោងទៅលើសំដីជំនួយការប្រធានាធិបតីរុស្ស៊ីខាងកិច្ចការអន្តរជាតិ លោក Serguei Prikhodko៖ពីខាងភាគីអាមេរិកាំងមានទៅហើយ សញ្ញាស្តីអំពី ភាពត្រៀមខ្លួនជួយជ្រោមជ្រែងរុស្ស៊ីក្នុងបុព្វហេតុនេះ។ ភាពត្រៀមខ្លួននេះរបស់ទីក្រុងវ៉ាស៊ីនតោន គឺដោយសារគោលជំហរប្រកាន់យកដោយរុស្ស៊ីចំពោះវិបត្តិនៅប្រទេសលីប៊ី។
សំរាប់ជាការកត់សម្គាល់ ពេលថ្មីៗរុស្ស៊ីបានបោះឆ្នោតនៅឯក្រុមប្រឹក្សាសន្តិសុខអ.ស.ប.គាំទ្រដល់សេចក្តីសម្រេចដែលបំផុសមកដោយ ស.រ.អា បារាំង អង់គ្លេស អាល្លឺម៉ង់ ឆ្ពោះទៅដាក់ទណ្ឌកម្មលើរបប Kadhafi នៅលីប៊ី។ ប៉ុន្តែ រុស្ស៊ីនៅជំទាស់នៅឡើយទល់នឹងអន្តរាគមន៍ពីក្រៅក្នុងរូបភាពណាក៏ដោយបូកទាំងរូបភាពយោធាផងចូលក្នុងស្ថានការណ៍នៅលីប៊ី។ ដូច្នេះ សម្បទានមួយជំហានទៀត ពីខាងម៉ូស្គូគឺអាចមានន័យជាការកែប្រែឥរិយាបថនេះ។
និយាយពី Georgie វិញ គឺចងជាល័ក្ខខ័ណ្ឌមករុស្ស៊ីថា ខ្លួននឹងឈប់ខាឃាំងផ្លូវរបស់រុស្ស៊ី ដើម្បីចូលជាសមាជិកអង្គការពាណិជ្ជកម្មពិភពលោក OMC លុះណាតែរុស្ស៊ីសុខចិត្តចែករំលែកឲ្យបានស្មើជាមួយ Georgie នូវអំណាចត្រួតពិនិត្យលើការងារនៃ“ប៉ុស្តកុងត្រូលគយ” នៅតំបន់ព្រំដែនរុស្ស៊ីជាប់នឹង Georgie ត្រង់ដែនដី Abkhazie និង Ossetieខាងត្បូង។ គួររំលឹកថា ក្រោយពីទីក្រុងម៉ូស្គូ ទទួលស្គាល់ឯករាជ្យដែនដីអបគមទាំង២នេះរបស់ Georgie មក គឺតែគយរុស្ស៊ីប៉ុណ្ណោះ ដែលមានសិទ្ធិផ្តាច់មុខតាំងការត្រួតពិនិត្យនេះ។
ដោយពន្យល់បំភ្លឺអំពីការទាមទារនេះ Georgie យោងទៅលើ ក្បួនច្បាប់របស់ OMC ដែលថា ពាណិជ្ជកម្ម រវាងប្រទេសមួយនិងប្រទេសមួយតម្រូវឲ្យមានតម្លាភាព។ ក្នុងករណីដែលមាន គឺថា ៖ តើទំនិញណាខ្លះដែលនាំចេញពីរុស្ស៊ីទៅក្នុងដែនដី Abkhazie និងOssetieខាងត្បូង ដែនដីដែល Georgie នៅបន្តចាត់ទុកជារបស់ខ្លួន ដោយសំអាងលើច្បាប់អន្តរជាតិ និងតើទំនិញណាខ្លះដែលដែនដីទាំង២នេះ នាំចូលប្រទេសរុស្ស៊ី។ រុស្ស៊ីជាមហាអំណាចសេដ្ឋកិច្ចតែមួយគត់ ដែលមិនទាន់បានចូលជាសមាជិកនៃ “អង្គការពាណិជ្ជកម្មពិភពលោក” OMC ទោះបីខ្លួនធ្វើកិច្ចចរចាដើម្បីចូលនេះអស់១៧ឆ្នាំទៅហើយក្តី។
ស្របនឹងលក្ខន្តិកៈអង្គការនេះ ដើម្បីទទួលឲ្យចូលទៅកើត គឺត្រូវមានការយល់ព្រមពីសំណាក់គ្រប់តែ១៥៣ប្រទេសសមាជិករបស់វា។ រុស្ស៊ីសង្ឃឹមថា គឺក្នុងឆ្នាំ២០១១នេះតែម្តងដែលខ្លួននឹងក្លាយជាសមាជិក OMC ក្រោយពីបានទទួល ”ភ្លើងខៀវ” ពីខាង ស.រ.អា. និង សហភាពអឺរ៉ុបទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ