រុស្ស៊ី

ប្រព័ន្ធ​នយោបាយ​ដែល​មិន​អត់ឱន​ចំពោះ​ពួក​ប្រឆាំង

លោក​នាយករដ្ឋមន្ត្រី​រុស្ស៊ី ពូទីន
លោក​នាយករដ្ឋមន្ត្រី​រុស្ស៊ី ពូទីន ©Reuters

ក្រោយ​ពី​ត្រូវ​បាន​បក្ស​កាន់អំណាច​ឈ្មោះ “ ប្រទេស​រុស្ស៊ី​រួម​ធ្លុង​មួយ” ដែល​មាន​រូប​គាត់​ជា​ប្រធាន អនុម័ត​ដោយ​សំឡេង​ជា​ឯកច្ឆ័ន្ទ​នៃ​ប្រតិភូ ១១.០០០នាក់ ក្នុង​មហាសន្និបាត​លើក​ទី១២ របស់​បក្ស ថ្ងៃ​អាទិត្យ ទី២៧ វិច្ឆិកា​ម្សិលមិញ ជា​បេក្ខជន​ផ្លូវការ​សម្រាប់​ចូល​ប្រឡូក​ក្នុង​ការ​បោះឆ្នោត​ប្រធានាធិបតី​នៅ​ថ្ងៃទី ៤ មីនា ឆ្នាំ២០១២ លោក​នាយករដ្ឋមន្ត្រី​រុស្ស៊ី ពូទីន បាន​ថ្លែង​ទិតៀន​ពួក​ប្រឆាំង​ទាំង​ឆ្វេង ទាំង​ស្តាំ ព្រម​ទាំង​រដ្ឋបរទេស​ខ្លះ ដែល​ជា​អ្នក​ផ្តល់​លុយ​ដើម្បី​ជះ​ឥទ្ធិពល​មក​លើ​យុទ្ធនាការ​ឃោសនា​បោះឆ្នោត​សភា​នៅ​ថ្ងៃទី៤ ធ្នូ​ខាងមុខ។

ផ្សាយពាណិជ្ជកម្ម

ចំពោះ​ពួក​ប្រឆាំង​ខាង​ឆ្វេង លោក​ពូទីន ដែល​ល្បី​ជា​”បុរស​ខ្លាំង​”នៅ​រុស្ស៊ី ធ្លាប់​ធ្វើ​ជា​ប្រធានាធិបតី​អស់​២អាណត្តិ ពី​ឆ្នាំ ២០០០ ដល់​២០០៨ ហើយ​ឥឡូវ​ឈរ​ឈ្មោះ​ជា​ថ្មី ដើម្បី​ជាប់​មួយ​អាណត្តិ​ថ្មី គឺ​លើក​នេះ​ពី ឆ្នាំ២០១២ ដល់​២០១៨ រួច​ថែម​ទាំង​អាច​បន្ត​មួយ​អាណត្តិ​ទៀត​ដល់​ឆ្នាំ ២០២៤ តែ​ម្ដង បាន​ថ្លែង​ដោយ​សំដី​ដៀមដាម​ថា៖ ពួក​គេ​នោះ​ដែល​ខំ​ទិតៀន​រដ្ឋអំណាច​រុស្ស៊ី​សព្វថ្ងៃ គឺ​តែ​ក្នុង​គោលដៅ​កេង​យក​ផលប្រយោជន៍​សម្រាប់​ខ្លួន​ផ្ទាល់។ តាម​ពិត ពួក​គេ​ធ្លាប់​បាន​កាច់​ចង្កូត​ដឹកនាំ​ប្រទេស​ទៅ​ហើយ ដឹកនាំ​ទាល់​តែ​បំផ្លាញ​សហភាព​សូវៀត​ឲ្យ​រលាយ​ទៅ​បាត់។

ចំពោះ​ពួក​ប្រឆំាង​ខាង​ស្តាំ​វិញ លោក​ពូទីន ដែល​ក្នុង​សម័យ​គាត់​ឈរឈ្មោះ​ជា​ប្រធានាធិបតី​ឆ្នាំ ២០០៤ បាន​ហៅ​ពួក​នោះ​ថា​ជា”ឆ្កែចចក” ដើរ​សុំ​ទាន​ស្ថានទូត​បស្ចិម​ប្រទេស​ខ្លះ លើក​នេះ​ហៅ​ពួក​គេ​ដោយ​មិន​ញញើត​មាត់​ឡើយ​ថា ជា ”ពួក​ក្បត់​មាតុភូម៌”។ ពួក​នេះ​តែង​ត្រូវ​រដ្ឋបរទេស ជា​អាណាព្យាបាល​ផ្តល់​លុយ​ដល់​ខ្លួន រួម​ប្រជុំ​ជា​រឿយៗ​ធ្វើ​ការ​ណែនាំ​ដោយ​ខ្សឹប​ប្រាប់​គេ តើ​អ្វី​ដែល​គេ​ត្រូវ​ធ្វើ ដើម្បី​ជះឥទ្ធិពល​ទៅ​លើ​លទ្ធផល​នៃ​ការ​បោះឆ្នោត​សភា នៅ​ថ្ងៃទី៤ ធ្នូ ខាង​មុខ។ ត្រង់​ចំណុច​នេះ លោកពូទីន​ដាស់​សតិ​រដ្ឋ​ទាំង​នោះ កុំ​ឲ្យ​ចំណាយ​លុយ​ឥត​ប្រយោជន៍​អី។

រីឯ​ខ្លឹមសារ​នៃ​ការ​ទិតៀន​ពី​ខាង​ពួក​ប្រឆាំង គឺ​ការ​ប្រមូល​ផ្តុំ​អំណាច​នៅ​ក្នុង​ដៃ​បក្ស​តែ​មួយ បក្ស​កាន់​អំណាច​ក្រោម​ឈ្មោះ​ថា “ ប្រទេស​រុស្ស៊ី​រួម​ធ្លុង​មួយ” ដែល​ដោយ​មាន​សំឡេង​ច្រើន​លើសលប់​ដល់​ទៅ ៣១៥ ឬ​ជាង​២/៣ នៃ​អាសនៈ​ទាំង​៤៥០​ក្នុង​សភា​ឌូម៉ា ជា​ទូទៅ​អនុម័ត​យក គឺ​ច្បាប់​ណា​ដាក់​ចេញ​ដោយ​ប្រធានាធិបតី ឬ​រដ្ឋាភិបាល​ដែល​ឆ្លើយ​ស្រប​នឹង​តម្រូវ​ការ​នៃ”សម្ព័ន្ធ​ទ្វេ​អំណាច​កំពូល​បច្ចុប្បន្ន” រវាង​លោក​ប្រធានាធិបតី​មេដវេដេវ និង​លោក​នាយករដ្ឋមន្ត្រី​ពូទីន។ បក្ស​៣ទៀត​ដែល​មាន​អាសនៈ​នៅ​សភា​ដែរ គឺ​គ្រាន់​តែ​ល្អ​មើល​សម្រាប់​ឲ្យ​អន្តរជាតិ​ឃើញ​ថា នៅ​រុស្ស៊ី មាន​“ប្រព័ន្ធ​ប្រជាធិបតេយ្យ​ពហុបក្ស ”ដំណើរការ​ដែរ។ ប៉ុន្តែ​ពួក​ប្រឆាំង​នៅ​តែ​ទាមទារ​ឲ្យ​ស្តារ​ឡើងវិញ​ទៅ ការ​ជ្រើសរើស​អភិបាល​ខេត្ត​តាម​ផ្លូវ​បោះឆ្នោត​សាកល​ដោយ​បណ្តាជន​របស់​សាមី​ខេត្ត​ផ្ទាល់ ដែល​ត្រូវ​បាន​លោកពូទីន​លុបចោល​ទៅ ក្នុង​អាណត្តិ​ដំបូង​របស់​គាត់។ រួច​ជា​ជំនួស អភិបាល​ខេត្ត គឺ​ជ្រើស​តាំង​ដោយ​ប្រធានាធិបតី​ទៅ​វិញ។

តាម​កាសែត​អង់គ្លេស The Financial Times លេខ​ថ្ងៃ​នេះ ការ​វិល​ត្រឡប់​របស់​លោក​ពូទីន​ទៅ​កាន់​វិមាន​ក្រេមឡាំង​វិញ គឺ​នឹង​មាន​ន័យ​ថា មួល​ខ្ចៅ​បន្តឹង​ទល់​នឹង​ពួក​ប្រឆាំង​ផ្ទៃក្នុង ហើយ​បង្កើន​ការ​ប្រឈមុខ​ខាង​នយោបាយ​ក្រៅប្រទេស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI