អឺរ៉ុប​-វិបត្តិសេដ្ឋកិច្ច​

ជំនួប​កំពូល​ព្រុចសែល៖​ កិច្ចព្រមព្រៀង​តែ១៧​ប្រទេស​ដោយហេតុតែ​អង់គ្លេស​ពុំយល់ព្រម​

​លោក​ប្រធានាធិបតី​​បារាំង​​នីកូឡា​​សាកូហ្ស៊ី​នៅ​ជំនួប​​កំពូល​​នៅ​ទីក្រុង​​ព្រុចសែល​នៅ​​ថ្ងៃ​ព្រហស្បតិ៍​​ទី៨ធ្នូ​ឆ្នាំ២០១១
​លោក​ប្រធានាធិបតី​​បារាំង​​នីកូឡា​​សាកូហ្ស៊ី​នៅ​ជំនួប​​កំពូល​​នៅ​ទីក្រុង​​ព្រុចសែល​នៅ​​ថ្ងៃ​ព្រហស្បតិ៍​​ទី៨ធ្នូ​ឆ្នាំ២០១១ REUTERS/Francois Lenoir

ប្រមុខដឹកនាំ​អឺរ៉ុប​ដែល​ចូលរួម​ប្រជុំ​ជំនួប​កំពូល​នៅ​ទីក្រុង​ព្រុចសែល​តាំងពី​ថ្ងៃព្រហស្បតិ៍​ទី៨ធ្នូ​ម្សិលមិញ​ ​ ​ ពុំ​សម្រេច​បាន​កិច្ចព្រមព្រៀង​ស្ដីពី​ការ​ប្តូរប្រែ​សន្ធិសញ្ញា​នៃ​សហភាព​អឺរ៉ុប​២៧​ប្រទេស​​ដើម្បី​ធ្វើការ​កែទម្រង់​តំបន់​អឺរ៉ូ​ឡើយ​ ​ ដោយហេតុតែ​មាន​ការ​ជំទាស់​ពី​សំណាក់​ប្រទេស​​អង់គ្លេស។​នៅទីបំផុត​ ​ កិច្ចព្រមព្រៀង​មាន​ការគាំទ្រ​ពីសំណាក់​២៣ប្រទេស​ដែល​ក្នុងនោះ​មាន​ប្រទេស​សមាជិក​១៧ប្រទេស​នៃ​តំបន់​ចាយប្រាក់​អឺរ៉ូ​ ​ ទាំងនេះ​ក្នុង​គោល​បំណង​ពង្រឹង​វិន័យ​ពាក់ព័ន្ធ​នឹង​បញ្ហា​ថវិកា​នៅក្នុង​សហភាព​អឺរ៉ុប។

ផ្សាយពាណិជ្ជកម្ម

កិច្ចព្រមព្រៀង​ដែល​សម្រេច​បាន​ដោយ​ជំនួប​កំពូល​នៅ​ទីក្រុង​ព្រុចសែល​កាលពី​យប់​ថ្ងៃ​ព្រហស្បតិ៍​ម្សិលមិញ​សម្រាប់​ប្តូរប្រែ​សន្ធិសញ្ញា​នៃ​សហភាព​អឺរ៉ុប​២៧ប្រទេស​ដើម្បី​ធ្វើការ​កែទម្រង់​តំបន់​អឺរ៉ូ​ ដោយមាន​ការ​ប្រឆាំង​ពី​សំណាក់​ប្រទេស​អង់គ្លេស។​ មូលហេតុ​គឺ​មកពី​ប្រទេស​អង់គ្លេស​ប្រឆាំង​ពុំព្រម​ឲ្យ​មាន​ការ​ត្រួត​ពិនិត្យ​ទៅលើ​សកម្មភាព​ហិរញ្ញវត្ថុ​របស់​ខ្លួន​នៅ​ទីក្រុង​ឡុងដ្រឹ៍​ ​ ដែលបាន​បណ្តាល​ឲ្យ​លោក​ប្រធានាធិបតី​បារាំង​នីកូឡា​សាកូហ្ស៊ី​ថ្លែង​ប្រឆាំងថា​ ​ “ ការទាមទារ​របស់​អង់គ្លេស​ជា​លក្ខខណ្ឌ​មួយ​ពុំ​អាច​ទទួលយក​បាន​ឡើយ​ ​ ពីព្រោះ​វានាំ​បង្កើត​ឲ្យ​មាន​អឺរ៉ុបមួយ​ដែល​មាន​ល្បឿនពីរ​ខុសគ្នា”។

 
ដូច្នេះ​ ​ នៅខណៈនេះ​គ្មានឡើយ​ កិច្ចព្រមព្រៀង​ស្ដីពី​ការ​ប្តូរប្រែ​សន្ធិសញ្ញា​នៃ​សហភាព​អឺរ៉ុប​២៧ប្រទេស​ដើម្បី​ធ្វើការ​កែទម្រង់​តំបន់​អឺរ៉ូ​។​ ប្រទេស​បារាំង​និង​ប្រទេស​អាល្លឺម៉ង់​ដែល​ទាមទារ​ចង់បាន​ការដាក់​ទណ្ឌកម្ម​ជា​ស្វ័យប្រវត្ត​ទៅលើ​ប្រទេស​ណា​ដែល​ពុំ​គោរព​វិន័យ​ពាក់ព័ន្ធ​នឹង​បញ្ហា​ថវិកាជាតិ​ ​ បានត្រូវ​ជួបនឹង​ការ​ប្រឆាំង​ពី​សំណាក់​ប្រទេស​អង់គ្លេស។

លោក​ប្រធានាធិបតី​បារាំង​នីកូឡា​សាកូហ្ស៊ី​បាន​ថ្លែង​ឲ្យ​ដឹងទៀតថា​ ​ ប្រទេស​ទាំង១៧​នៃ​តំបន់​ចាយប្រាក់​អឺរ៉ូ​នឹង​សិក្សា​ពី​លទ្ធភាព​ជួយ​ផ្តល់​មូលនិធិ​ប្រមាណ​២០០ពាន់លាន​អឺរ៉ូ​ឲ្យ​មូលនិធិ​រូបិយវត្ថុ​អន្តរជាតិ​ FMI ​ដែល​មាន​ការខ្វះខាត​ ​ ​សម្រាប់​ជាជំនួយ​គាំទ្រ​ដល់​ប្រទេស​ទន់ខ្សោយ​នៃ​តំបន់​ចាយប្រាក់​អឺរ៉ូ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI