រុស្ស៊ី

មិទ្ទិញ​ដ៏ខ្លាំងក្លា​ជាថ្មី​ប្រឆាំងនឹង​លទ្ធផល​នៃ​ការបោះឆ្នោត​សភា​កន្លង​ទៅ​

មិទ្ទិញ​​ប្រព្រឹត្ត​ទៅ​​ក្នុង​​សង្កាត់​​មួយឆ្ងាយ​​បន្តិច​​ពី​វិមាន​​ក្រេមឡាំង​​នៅ​ម​ហា​វិថី​​ឈ្មោះ​ ​Sakharov​ ​
មិទ្ទិញ​​ប្រព្រឹត្ត​ទៅ​​ក្នុង​​សង្កាត់​​មួយឆ្ងាយ​​បន្តិច​​ពី​វិមាន​​ក្រេមឡាំង​​នៅ​ម​ហា​វិថី​​ឈ្មោះ​ ​Sakharov​ ​ © កែវ​ ឆាយា

មិទ្ទិញ​ដ៏គគ្រឹក​គគ្រេង​ថ្ងៃនេះ​ដូចកាលពី​២សប្តាហ៍​មុន​អ៊ីចឹង​ ប្រព្រឹត្ត​ទៅ​ក្រោម​បាវចនាថា​ “ដើម្បី​ការបោះឆ្នោត​សុចរិត”​។​ ចូលរួម​គឺ​មនុស្ស​ជាច្រើន​ម៉ឺននាក់​ដែល​តាម​សំដី​គេ​គឺគេ​ក្តៅ​ក្រហាយ​ដោយ​សំឡេង​ដែល​គេបាន​បញ្ចេញ​ក្នុង​ការបោះឆ្នោត​សភា​កន្លង​ទៅ​សម្រាប់​គាំទ្រ​បក្ស​ផ្សេង​សោះ​បែរទៅ​ត្រូវបាន​ក្លែង​បន្លំ​ទៅជា​សំឡេង​គាំទ្រ​បក្សកាន់​អំណាច​ទៅវិញ។

ផ្សាយពាណិជ្ជកម្ម

ដោយហេតុថា​មិទ្ទិញ​ថ្ងៃនេះ​ប្រព្រឹត្ត​ទៅ​តាមការ​អនុញ្ញាត​របស់​អាជ្ញាធរ​បានជា​តាំង​ពី​ព្រលឹម​មក​ឡានធំ​តូច​ជាច្រើន​គ្រឿង​របស់​ប៉ូលីស​មាន​ពង្រាយឲ្យ​ប្រចាំការ​ជាស្រេច​នៅតាម​បរិវេណ​នៃទីលាន​មិទ្ទិញ​ក្រោមលេសថា​ សម្រាប់​ធានា​សន្តិសុខ​និង​សុវត្ថិភាព​ពួក​អ្នក​ចូលរួម។

 
មិនតែ​ប៉ុណ្ណោះ​ដើម្បី​ចូលទៅ​ក្នុង​បរិវេណ​នោះ ​គេត្រូវ​ឆ្លង​កាត់​របាំង​ពិសេស​របស់​ប៉ូលីស​ដែល​ឆែកឆេរ​មិនឲ្យ​គេយកតាម​ខ្លួន​ឡើយ​នូវ​រាល់​វត្ថុ​ណាដែល​អាច​ជាគ្រោះថ្នាក់​ដល់ទី​ប្រជុំ​ច្រើន​កុះករ​នោះ។​ វិថី​ធំ​តូច​នៅជុំវិញ​ត្រូវបិទ​សម្រាប់​ចរាចរណ៍។

អ្វីដែល​គួរឲ្យ​កត់សម្គាល់​គឺ​មិទ្ទិញ​ប្រព្រឹត្ត​ទៅ​ក្នុង​សង្កាត់​មួយឆ្ងាយ​បន្តិច​ពី​វិមាន​ក្រេមឡាំង​នៅមហាវិថី​ឈ្មោះ ​Sakharov ​ដែល​ជំនាន់​សូវៀត​ជាអ្នកប្រាជ្ញ​ម្នាក់​បង្កើត​គ្រាប់បែក​ Hydrogene ​ហើយ ដែល​ល្បី​ខាង​ប្រឆាំង​នឹងការ​រឹតត្បិត​សិទ្ធិមនុស្ស​ដោយ​អំណាច​សូវៀត​លុះ​ទាល់តែ​ក្នុងឆ្នាំ​១៩៧៥​បាន​ទទួល​”រង្វាន់​ណូបែល​សន្តិភាព”​តែម្តង។

ស្របនឹង​ការប្រកូក​ប្រកាស​តាម​បណ្តាញ ​Facebook ​និង​Twitter​ មាន​រៃ​លុយ​បាន​ប្រមាណ​៤លានរូប្ល​ ឬជិត​ ១៣ម៉ឺន​ដុល្លារ​ ហើយ​ដោយ​ដក​ពិសោធន៍​ពីមិទ្ទិញ​លើកមុន​ លើកនេះ​ត្រូវពួក​អ្នក​ចាត់ចែង​មិទ្ទិញ​ប្រើ​សម្រាប់​ដំឡើង​ជា​មហាឆាក​វេទិកា​ជា​អេក្រង់​២ដ៏ធំ បង្ហាញ​រូប​វាគ្មិន​ដែល​ឡើងថ្លែង​ជាឧគ្ឈោសនស័ព្ទ​បំពង​សំឡេងគេ។​ លើ​ឆាក​វេទិកា​គេអាច​អាន​ផ្ទាំងបដា​ដ៏ធំ​ដែលចារ​ទៅដោយ​ឃ្លាថា​ “ រុស្ស៊ី នឹង​ក្លាយជា​ប្រទេស​មាន​សេរីភាព​ពិតប្រាកដ”។

ក្នុងចំណោម​វាគ្មិន​ជាអ្នក​នយោបាយ​ ជា​ឥស្សរជន​សង្គម​ ជា​សិល្បករ​ ជា​អ្នកនិពន្ធ​ អ្នក​ចម្រៀង ​តូឯកកុន​។ល។​ ដែល​មាន​ឈ្មោះ​ក្នុង​បញ្ជី​សម្រាប់​ឡើងថ្លែង​ ចំនួន​៣០នាក់​ គឺមាន​ទាំង​រូបអតីត​មេ​ដឹកនាំ​សូវៀត​ល្បីខាង​ធ្វើ​កំណែ​ទម្រង់​ លោក ​Gorbatchev ​ដែល​ទាមទារ​ឲ្យធ្វើការ​បោះឆ្នោត​សភា​សាឡើងវិញ​ និង​ថែមទាំង​សំដែង​ការអៀនខ្មាស​ជួស​លោក​ពូទីន​ទៅផង​ដែល​ធ្លាប់ធ្វើ​ជា​ប្រធានាធិបតី​រុស្ស៊ី​អស់​២អាណត្តិ​ទៅហើយ​ស្រាប់តែ​បណ្តោយ​ខ្លួន​ឈរ​ឈ្មោះ​ដើម្បី​ជាប់ក្នុង​តំណែង​នេះ​មួយ​អាណត្តិទៀត។​ ពាក្យ​ស្លោក​ចម្បង​បន្លឺ​ឡើង​ដោយ​អង្គ​មិទ្ទិញ​លើកនេះ​គឺ​ “ធ្វើ​សព្វបែប​យ៉ាង​ដើម្បី​កុំឲ្យ​លោកពូទីន​ត្រឡប់​ទៅកាន់​អំណាច​កំពូល​នៅវិមាន​ក្រេមឡាំង”​ វិញ។​ យ៉ាងណាមិញ​តបនឹង​សំនួរ​មួយ​បន្លឺ​ឡើង​ដោយ​វាគ្មិន​ម្នាក់​ “តើ​ពួកយើង​ចង់ឲ្យ​លោកពូទីន​ធ្វើជា​ប្រធានាធិបតី​ទៀតទេ”​?​ ស្រាប់តែ​មាន​លាន់​ទ្រហឹង​ពេញ​លើ​ទីលាន​តែម្តង​នូវ​សម្រែក​ស្រុះៗ​គ្នាថា​ “ទេ ទេ​ ទេ​ជាដាច់ខាត”។

ក្រៅពី​មិទ្ទិញ​នៅម៉ូស្គូ​ ដែលចាប់​ផ្តើម​១ម៉ោង​មុន​ហើយ​ដែលកំពុង​បន្ត​ទៅនៅ​ឡើយ​មិទ្ទិញ​តវ៉ា​របស់​អ្នកស្រុក​ក៏ប្រព្រឹត្ត​ទៅថ្ងៃនេះ នៅតាម​ក្រុង​ប្រមាណ​មួយរយ​ទៀត​នៃ​ប្រទេស​រុស្ស៊ី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI