ទស្សនៈព្រឹត្តិការណ៍ពិភពលោក

តើបារាំង​បន្ត​រក្សា​ឋានៈ​ជា​ជើង​ឯក​មាន​កូន​ច្រើន​ដល់​ពេល​ណា ?

សំឡេង ០៤:៥៤
© AFP

រដ្ឋាភិបាល​បារាំង បាន​សម្រេចចិត្ត​​សន្សំ​សំចៃ​ថវិកា ដោយ​ធ្វើ​កំណែទម្រង់​នយោបាយ​គ្រួសារ តាម​រយៈ​ការ​កាត់​បន្ថយ​ជំនួយ​ឧបត្តម្ភ​ដល់​គ្រួសារ​អ្នក​មាន មិន​ថា​មាន​កូន​ច្រើន​ឬ​តិច​នោះ​ឡើយ។ ពាក្យ​ថា​ ​អ្នក​មាន គឺ​ជា​គ្រួសារ​ដែល​បង់​ពន្ធ​ជូន​រដ្ឋ មាន​ប្រាក់​ចំណូល​ចាប់​ពី​៥៣០០​អឺរ៉ូ​ឡើង​ទៅ​ក្នុង​មួយ​ខែ។ ​នយោបាយ​សង្គម និង​ជួយ​គ្រួសារ​នេះ ត្រូវ​​បាន​គេ​ចាត់​ទុក​ថា ​ជា​កត្តា​សំខាន់​មួយ​ ​ជំរុញ​ឱ្យ​​បារាំង​​​បង្កើត​​កូន​​ច្រើន រហូត​ក្លាយ​ជា​ជើង​ឯក​លេខ​ពីរ បន្ទាប់ពី​ប្រទេស​អៀឡង់ ​! ចុះ​បើ​រដ្ឋាភិបាល​កាត់​បន្ថយ​និង​រឹតត្បិត​ជំនួយ​ តើ​បារាំង​នឹង​លែង​សូវ​​បង្កើត​កូន​ ឬ​យ៉ាងណា ?!

ផ្សាយពាណិជ្ជកម្ម

 

ប្រទេស​បារាំង​ស្ថិត​នៅ​ក្នុង​លំដាប់​ទីពីរ ក្នុង​អឺរ៉ុប ផ្នែក​បង្កើត​កូន បន្ទាប់​ពី​ស្ត្រី​ជាតិ​អៀរឡង់។ ពោល​គឺ​ ​ ជាមធ្យម ក្នុង​ស្រ្តី​ម្នាក់ មាន ​កូន​២​នាក់ ក្នុង​ខណៈ​ដែល​ប្រទេស​ជិត​ខាង​ ដូច​យ៉ាង​អាល្លឺម៉ង់ ឬ​អ៊ីតាលី ឬ​អេស្ប៉ាញ​ជា​ច្រើន។ល។ មាន​កូន​ជា​មធ្យម​តែ ១,៤​នាក់​តែ​ប៉ុណ្ណោះ។ លក្ខណៈពិសេសនេះ​ ​ជា​មោទនភាព​ផង និង​ជា​​​ក្តី​សង្ឃឹម​​នា​ពេល​អនាគតរបស់​អ្នក​ចូលនិវត្តន៍​ផង។

ស្ត្រី​បារាំងមាន​​​​កូនបាន​​ច្រើន​ តើនេះ​​​ផល​អនុគ្រោះ​នៃ​នយោបាយ​គ្រួសារ​របស់​បារាំងឬ ?! នយោបាយ​ជួយ​បញ្ចុះ​បញ្ចូល លើក​ទឹក​ចិត្ត​ និង​ឧបត្តម្ភ​ ដល់​គ្រួសារ ឱ្យ​​បង្កើត​កូន មាន​តាំង​ពី​ក្រោយ​សម័យ​សង្គ្រាមលោក​លើក​ទី​មួយ​ (១៩៤០)​ និង​កាត់​បន្ថយ​ពន្ធ​ចំពោះ​គ្រួសារ​មាន​សមាជិក​ច្រើន។ រហូត​មកទល់​នឹង​ឆ្នាំ​១៩៨១ ​ការ​បង់ពន្ធ ​ទៅ​តាម​ចំនួន​សមាជិក ត្រូវ​បាន​កែ​លម្អ​បន្ថែម​ទៀត។ ឧទាហរណ៍​ គ្រួសារ​មួយ មាន​កូន​ពីរ​នាក់​ ការ​បង់​ពន្ធ​អាស្រ័យ​ទៅ​លើ​លទ្ធផល​នៃ​ប្រាក់​ចំណូល​សរុប​ ចែក​នឹង​​បី​ ​ឪពុក-១ភាគ​ និង​ ម្តាយ -១ភាគ​ និង​កូន-១​ភាគ (កូន​មួយ​​កន្លះ​ភាគ) ប៉ុន្តែ​ សំរាប់​គ្រួសារ​មាន​កូន​បី​នាក់ ការ​បង់ពន្ធ​ គឺ​អាស្រ័យ​ទៅ​លើ​លទ្ធផល​នៃ​ប្រាក់​ចំណូល​សរុប​របស់​ឪពុក​ម្តាយ ចែក​នឹង​បួន ព្រោះ​ចាប់​ពី​កូន​ទី​បី​ទៅ កូន​​ម្នាក់ត្រូវ​គិត​ថា​ជា​​​​ចំណែក​មួយ​ដែរ។ ដូច្នេះគ្រួសារ​ណា​មាន​កូន​ច្រើន ត្រូវ​បង់ពន្ធ​តិច ឬ​មិន​បង់​ពន្ធ​សោះ​ផង បើ​ប្រាក់​ចំណូល​គាត់​ទាប​ជាង​ការ​កំណត់​របស់​រដ្ឋ។ ប៉ុន្តែ​អ្នក​វិភាគ​សេដ្ឋកិច្ច​យល់​ថា​ នយោបាយ​នេះ​បន្ថែម​កន្លះ​ភាគ​ដល់​កូន​ទី​បី ស្ទើរ​តែ​គ្មាន​ឥទ្ធិពល​សោះ​ទៅ​លើ​ការ​បង្កើត​កូន។

នយោបាយ​គ្រួសារ​ មិន​មែន​មាន​ត្រឹម​ការ​ផ្តល់​ប្រាក់​ឧបត្ថម្ភ ឬ​កាត់​បន្ថយ​ពន្ធ​តាម​ចំនួន​សមាជិកទេ។ ជំនួយ​នេះ​តំណាង​ឱ្យ​តែ​៤%​នៃ​ផលិតផល​សរុប​របស់គ្រួសារ​តែ​ប៉ុណ្ណោះ។ ខុស​ពី​នោះ​គឺការ​បង្កើត​រចនា​សម្ព័ន្ធ​ថែកុមារ ទារក​ដ្ឋាន មតេយ្យសាលា និង​ជំនួយ​សិក្សា​… ​កត្តា​ ដ៏​ចម្បង​ ដែល​អនុញ្ញា​ត​ឱ្យ​អ្នក​ជា​ម្តាយ​អាច​ចេញ​​ធ្វើ​ការ​ក្រៅ​ផ្ទះ​បាន។ ផ្នែក​នេះ​បារាំង​ជា​គំរូ​ដ៏​ប្រពៃ សូម្បី​តែ​អាល្លឺម៉ង់​ក៏​ចង់​ធ្វើ​ឱ្យ​ដូច​ដែរ។

កំណត់​សម្គាល់​មួយ​ទៀត គឺ​គេ​តែ​ង​ចោទ​ប្រកាន់​ថា​បារាំង​ក្លាយ​ជា​ជើង​ឯក​ខាង​បង្កើត​កូន​ មក​ពី​​មាន​ជន​អន្តោប្រវេសន៍ច្រើន​ ស្ត្រីសញ្ជាតិ​​បារាំង​ដើម​កំណើត​បរទេស​បង្កើត​កូន​ច្រើន​ ទើប​ធ្វើ​ឱ្យ​អត្រា​បង្កើត​កូន​ជា​មធ្យម​កើន​ឡើង​ដូច្នេះ។ ប៉ុន្តែ​បើ​តាម​កា​រ​សិក្សា​នៅ​ឆ្នាំ​២០១១ ថ្វី​ដ្បិត​​តែ​ស្ត្រីបារាំង​ដើម​កំណើត​ចាម​ មាន​កូន​ច្រើន​​ជាង​ស្រ្តី​កាន់​សាសនា​កាតូលិក ក៏​ពិត​មែន​ ក៏​អត្រា​មាន​កូន​របស់​បារាំង​នៅ​តែ​ខ្ពស់​ជាង​ប្រទេស​ជិត​ខាង​ដដែល ដោយ​មិន​រាប់​ ​វត្តមាន​ស្ត្រី​ចាមចូល​ទេ។ ស្ត្រី​ចាម​ កើត​ជំនាន់១៩៥៨ -១៩៦៨ បង្កើត​កូន​ជា​មធ្យម​២,៨​នាក់ ពោល​គឺ​ច្រើន​ជា​មធ្យមភាគ​ជាតិ​ឆ្ងាយ​ណាស់។ ចំពោះ​ស្ត្រី​កាតូលិក ឬ​អ្នក​គ្មាន​សាសនា ឬ​សាសនា​ផ្សេងៗ​ទៀត​វិញ ម្នាក់ៗ​បង្កើត​កូន​ជា​មធ្យម ១,៩ នាក់និង​១,៧​នាក់។ ​តួលេខ​នេះ​ សបញ្ជាក់​ឱ្យ​ឃើញ​ថា​ស្ត្រី​បារាំង​មាន​កូន​ច្រើន​លើ​ស្ត្រី​អាល្លឺម៉ង់​ និង​អេស្ប៉ាញ​បាត់​ទៅ​ហើយ។

សម្រាប់​អ្នក​វិភាគ​សេដ្ឋកិច្ច កត្តា​នយោបាយ​គ្រួសារ​មាន​ទម្ងន់​តិច​ជាង​ កត្តា​វប្បធម៌​ ឆ្ងាយ​ណាស់​ក្នុងការ​បង្ក​បង្កើត​គ្រួសារ។ នៅ​ក្នុង​សង្គម​លោក​ខាង​លិច ដែល​ស្ត្រី​និងបុរស​ ជាទូទៅ ខ្លាច​រអា​ មិន​សូវ​ចង់​​រៀប​​​អាពាហ៍ពិពាហ៍នោះ បណ្តា​ជន​បារាំង​វិញ មិន​ខ្វល់​នឹង​បង្កើត​កូន​ក្រៅ​ខាន់​ស្លា​ឡើយ។ គេ​សង្កេត​ឃើញ​មាន​កូន​ក្មេង​ចំនួន​ ៥៥% មាន​ម្តាយ​ឪពុក​ដោយ​អត់​រៀប​ការ។ ចំណង​អាពាហ៍ពិពាហ៍​ នៅ​ជា​រនាំង​​ទប់​ការ​បង្កើត​កូន​នៅ​ឡើយ​ នៅ​តាម​បណ្តា​ប្រទេស​អឺរ៉ុបដទៃ​មួយ​ចំនួន​។ ​ម្យ៉ាង​វិញ​ទៀត នៅ​ប្រទេស​បារាំង ម្តាយ​ចេញ​ទៅ​ធ្វើ​ការ​ចោល​កូន មិន​សូវ​ទទួល​បាន​ការ​រិះគន់​ តិះដៀល​អ្វី ដូច​ជា​ស្ត្រី​អ្នក​ម្តាយ​នៅ​អាល្លឺម៉ង់​ទេ។ អាល្លឺម៉ងនៅមាន​គំនិត​​ប្រកាន់​ខ្លះ​នៅ​ឡើយ​ថា​ ជា​ម្តាយ​មិន​សក្តិសម​ ប្រសិន​បើ​បង្កើត​កូន​ហើយ​មិន​មើល​ការ​ខុស​ត្រូវ​ឱ្យ​បាន​ល្អ គិត​តែ​ពី​ទៅ​ធ្វើ​ការ​នោះ។

កត្តា​មួយ​ទៀត​ដែល​រដ្ឋាភិបាល​ពិបាក​នឹង​គិត​គូរ​ដល់​នោះ គឺ​កំណើន​សេដ្ឋកិច្ច​ដើរ​ថយ​ក្រោយ ដែល​ជា​ទូទៅ​ ​មាន​ឥទ្ធិពល​​អាក្រក់លើ​ការ​​បង្ក​កំណើត ​នៅ​មួយ​ឆ្នាំ​ក្រោយ។ នេះ​ជា​ឧទាហរណ៍​ជាក់​ស្តែង​ ដែល​សម្គាល់​ឃើញ​នៅ​ក្នុង​ប្រទេស​ជិត​ខាង​បារាំង និង​នៅ​សហរដ្ឋ​អាមេរិក។ ប៉ុន្តែ​ប្រទេស​បារាំង​ដែល​មាន​ផលិតផល​សរុប​មិន​ឡើង​មិន​ចុះ​ អាច​គេច​​ផុត​ពី​គ្រោះ​សេដ្ឋកិច្ច​ដើរ​ថយ​ក្រោយ​​ បូក​ផ្សំ​​​នឹង​មាន​នយោបាយ​​សង្គម និង​គ្រួសារ​អនុគ្រោះ​ផង​ ទើប​ការ​បង្ក​កំណើត​កូន​នៅ​តែ​មានអត្រា​ខ្ពស់។​ ផ្ទុយ​ទៅ​វិញ​បើ​សកម្មភាព​សេដ្ឋកិច្ច​នៅ​បន្ត​ជួបការ​លំបាក​ដូច​ពេល​បច្ចុប្បន្ន​នេះ នយោបាយ​គ្រួសារ​ក៏​មាន​ការ​ធ្វើ​កំណែទម្រង់ នោះ​បណ្តា​ជន​បារាំង​ទំនង​ជា​លែង​ហ៊ាន​មាន​​កូន ​ ក៏​ថា​បាន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI