ទស្សនៈព្រឹត្តិការណ៍ពិភពលោក

ហេតុអ្វី​អាល្លឺម៉ង់​មិន​សូវ​ស្វាគមន៍ លោក បារ៉ាក់ អូបាម៉ា ?

សំឡេង ០៤:០២
លោក Barack Obama លើក​ដៃ​ស្វាគមន៍​មហាជន​ពេល​ទៅ​ដល់​ ក្រុង​ Berlin ល្ងាច​ថ្ងៃ​ទី ១៨​មិថុនា ២០១៣
លោក Barack Obama លើក​ដៃ​ស្វាគមន៍​មហាជន​ពេល​ទៅ​ដល់​ ក្រុង​ Berlin ល្ងាច​ថ្ងៃ​ទី ១៨​មិថុនា ២០១៣ REUTERS/Wolfgang Rattay

នៅ​ថ្ងៃ​ពុធ​ម្សិលមិញ​ លោក​ប្រធានាធិបតី​អាមេរិក​ បារ៉ាក់ អូបាម៉ា អញ្ជើញ​ទៅ​បំពេញ​ទស្សនកិច្ច​​ផ្លូវ​រដ្ឋ ជា​លើកទី​មួយ​នៅ​ប្រទេស​អាល្លឺម៉ង់ ក្នុងនាម​ជា​ប្រធានាធិបតី។ ទោះ​បី​ជាមិន​ទាន់​បាត់​បង់​​ប្រជាប្រិយភាព​ ទាំងស្រុង​​​ក្តី ក៏​បណ្តា​ជន​អាល្លឺម៉ង់​ ទទួល​ស្វាគមន៍​លោក បារ៉ាក់ អូបាម៉ា​ យ៉ាង​សោះកក្រោះ ខុ​ស​ពី​ប្រធានាធិបតី​អាមេរិក​មុនៗ។ មិន​តែ​ប៉ុណ្ណោះ បែរ​ជា​មាន​បាតុកម្ម​ប្រឆាំង​នឹង​លោក​ប្រធានាធិបតី​អាមេរិកទៀត។​ ហេតុអ្វី​បាន​ជា​ដូច្នេះ ?! 

ផ្សាយពាណិជ្ជកម្ម

គ្រប់​ប្រធានាធិបតី​អាមេរិក ក្នុង​រយៈ​ពេល​ជាង​១០​ទសវត្សរ៍​ចុងក្រោយ​នេះ សុទ្ធ​តែ​អញ្ជើញ​មក​បំពេញ​ទស្សនកិច្ច និង​ថ្លែង​សុន្ទរកថា​ នៅប៊ែរឡាំង និមិត្ត​សញ្ញា​នៃ​សង្គ្រាម​ត្រជាក់​ផង ការ​ប្រយុទ្ធ​តស៊ូ​ដើម្បី​សេរីភាព​ជាទូទៅ​ផង និង​​សម្ព័ន្ធ​ភាពរវាង​​​​អាមេរិកនឹង​​អាល្លឺមង់​ ឬ​អឺរ៉ុប​ទាំង​មូល​ទេ។

 
យ៉ាងណា​មិញ សុន្ទរកថា​របស់​លោក​អូបាម៉ា នៅ​ថ្ងៃ​ពុធ​ម្សិលមិញ ក៏​ជាការ​​រង់​ចាំ​មួយ​ ប៉ុន្តែ​ សន្ទុះ​នៃ​ការ​ទទួល​​​ស្វាគមន៍​ ហាក់​ដូច​ជាមិន​សូវ​កក់​ក្តៅ​ដូច​មុន​ទេ ឯ​អ្នក​ចូល​រួម​ស្តាប់​ក៏​ដូច​ជា​មិន​សូវ​ឆូឆរ​ ​ដូច​កាល​លោកនៅ​ជា បេក្ខជន​ប្រធានាធិបតី​ ​​ឆ្នាំ​២០០៨ ដែល​កាលណោះ​ លោក បារ៉ាក់​អូបាម៉ា គ្មាន​ទាំង​សិទ្ធិ​​ឡើង​ធ្វើ​សុន្ទរកថា នៅ​ទី​លាន​ ច្រក​Brandebourg ដ៏​ល្បីល្បាញ​លើ​ពិភពលោក តំណាង​ឱ្យ​ការ​បង្រួបបង្រួម​​អាល្លឺម៉ង់​ផង។

លើក​នេះ លោក​បារ៉ាក់​ អូបាម៉ា អាច​ឡើង​លើ​វេទិកា​ ដូច​អតីត​ប្រធានាធិបតី​មុនៗ និង​ចំ​ខួប​៥០​ឆ្នាំ នៃ​សុន្ទរកថា​ដ៏​ល្បីល្បាញ របស់​ ប្រធានាធិបតី​អាមេរិក​ទី ៣៥ ដែល​កាលណោះ ដែល​ប្រធានាធិបតី​អាមេរិក Kennedy បាន​ពង្វក់​ចិត្ត​បណ្តា​ជន​ក្រុង​បែរឡាំង​ទាំង​មូល ឱ្យ​ចង​ចាំ​ជា​និច្ច​ក្នុង​​បេះដូង​​ ជាមួយ​សុន្ទរកថា មួយ​ឃ្លាថា Ich Bin Ein Berliner “ខ្ញុំ​ជា​អ្នក​បែរឡាំង”។ ប៉ុន្តែ​សម្រាប់​លោក​អូបាម៉ា​វិញ​ ជោគជ័យ​ហាក់​ដូច​ជា​នៅ​ឆ្ងាយ​ណាស់។ លោក ទំនង​ជា​បាន​ធ្វើ​ឱ្យ​បណ្តា​ជន​អាល្លឺម៉ង់ ខក​ចិត្ត។ នេះ​បើ​គេ​ជឿ​តាម​សារព័ត៌មាន​ក្នុង​ស្រុក។ បណ្តា​ជន​អាល្លឺម៉ង់ បន្ទោស​លោក​អូបាម៉ា ក្នុ​ងសំណុំ​រឿង​ជា​ច្រើន ដូច​ជា​ ការ​រក្សា​ទុក​ពន្ធនាគារ Guantanamo និង​ការ​ប្រើ​ប្រាស់​យន្តហោះ​​គ្មាន​មនុស្ស​បើក Drone ដើម្បី​ប្រឆាំង​នឹង​ភេរវនិយម។ ពិសេស​ទៅ​ទៀត​ គឺ​សំណុំ​រឿង​តាម​ដាន​ លួចយក​ការណ៍​តាម​ប្រព័ន្ធ​អ៊ីនធ័រនែត ដែល​ទើប​ធ្លាយ​អាស្រូវ​ក្នុង​ពេល​ថ្មីៗ​នេះ។ ទង្វើ​របស់​អាមេរិក ដែល​អាល្លឺម៉ង់​មិន​ពេញ​ចិត្ត​ព្រោះ​ជា​ការ​រំលោភ​សិទ្ធិ​ជីវិត​ឯកជន។ លោកស្រី​ប្រមុខ​រដ្ឋាភិបាល​អាល្លឺម៉ង់​ បាន​ថែមទាមទារ​ឱ្យ​រដ្ឋាភិបាល​វ៉ាស៊ីនតោន​បំភ្លឺ​សំណុំរឿង​នេះ​ជា​លាយ​លក្ខណ៍​អក្សរ​ទៀតផង។

ក្រៅ​អំពី​ការ​រិះគន់​​ប្រឆាំង​នឹង​នយោបាយ​របស់​លោក​ បារ៉ាក់​ អូបាម៉ា អាល្លឺម៉ង់​អាក់​អន់​ចិត្ត​​នឹង​ទំនាក់​ទំនង​កាន់​តែ​សោះ​កក្រោះ​រវាង​​ប្រទេសទាំង​ពីរ។ ចំពោះ​អាមេរិក អាល្លឺម៉ង់​ ឬ​អឺរ៉ុប​លែង​សូវ​មាន​សារៈសំខាន់ដូច​សម័យ​សង្គ្រាម​ត្រជាក់​ហើយ​ ប៉ុន្តែ​ទោះ​ជា​យ៉ាង​នេះ​ក្តី​ក៏​អាល្លឺម៉ង់​និង​អឺរ៉ុប​ នៅ​តែ​ជា​ដៃគូ​​មិន​អាច​ខ្វះ​បាន​ដដែល។ អាល្លឺម៉ង់​​ដែល​​ជា​​ប្រទេស​មាន​ឥទ្ធិពលជា​ង​គេ​នៅ​អឺរ៉ុប​នេះ​ នៅ​តែ​សំខាន់​សំរាប់​អាមេរិក ដែល​មិនគួរ​នឹង​មើល​រំលង​បាន​ជា​ដាច់​ខាត។

តាំង​ពីទទួល​តំណែង​ជា​ប្រធានាធិបតី​អាមេរិក​មក នយោបាយ​ការបរទេស​មាន​ការ​ប្តូរ​ផ្លាស់​និងវិវឌ្ឍន៍ លោក​អូបាម៉ា បាន​ផ្តល់​អាទិភាព​​ដល់​តំបន់​អាស៊ី ក្នុង​នាម​ជា​ប្រធានាធិបតី​សន្តិភាព​និយម។ ប៉ុន្តែ​ធ្វើ​ការ​ជាមួយ​បណ្តា​ប្រទេសមហាអំណាច​ទើប​​មាន​សេដ្ឋកិច្ច​លូត​លាស់​ខ្លាំង ដូច​យ៉ាង​ចិន ប្រេស៊ីល​ ឬ ឥណ្ឌា មិន​មែន​ជា​​ការ​ងាយ​​ស្រួល​ ឡើយ។ រាល់​ប្រធាន​បទ​អន្តរជាតិ ពិភពលោក​សំខាន់ៗ ត្រូវ​ដោះស្រាយ ឧទាហរណ៍​សំណុំ​រឿង ប្រទេស​ស៊ីរី អ៊ីរ៉ង់ ឬ​ការ​ប្រយុទ្ធ​ប្រឆាំង​នឹង​ការ​សាយភាយ​អាវុធ​នុយក្លេអ៊ែរ​។ល។ និង​។ល។ អាមេរិក​ចាំ​បាច់​ត្រូវ​ការ​ការ​សហការ​ពី​អឺរ៉ូប។ ទម្រាំ​យល់​ ហើយ​ងាក​រក​សម្ព័ន្ធ​មិត្ត​ចាស់ លោក​អូបាម៉ា បាន​អូស​បន្លាយ​ពេល​វេលា​យូរបន្តិច​ទៅ​ហើយ។

ជា​សរុប​មក អឺរ៉ុប នៅ​តែ​ជា​ដៃគូ​ដ៏​ប្រសើរ​បំផុត របស់​សហរដ្ឋ​អាមេរិក សម្រាប់​ប្រឈម​រាល់​ឧបសគ្គទាំង​ឡាយ​ ក្នុង​ពេល​អនាគត។​ នេះ​ហើយ​ជា​សារ​ដែល​លោក ប្រធានាធិបតី​អាមេរិក​ត្រូវ​ផ្សព្វផ្សាយ​ក្នុង​សុន្ទរកថា​ល្ងាច​មិញ។ ដើម្បី​ស្តារ​​ជំនឿ​ទុក​ចិត្ត​ឡើង​វិញ​ លោក​អូបាម៉ា ក៏​នាំ​ទៅ​មួយ​នូវ​​​កិច្ច​ព្រមព្រៀង​ជាមួយ​រុស្ស៊ី ​កាត់​បន្ថយ​បរិមាណ​សព្វាវុធ​នុយក្លេអ៊ែរ​ ចំនួន​មួយ​ភាគ​បី និង​ប្រកាស​បើក​ជំនួប​ចរចា​ស្តី​ពី​ការ​ផ្តោះ​ប្តូរ​ពាណិជ្ជកម្ម​​ដោយ​សេរី​​រវាង​អឺរ៉ុប​និង​សហរដ្ឋ​អាមេរិក។ លើស​ពី​នេះ​ទៅទៀត លោក​អូបាម៉ា បាន​ប្រកាស​ពង្រឹង​ភាព​ជា​ដៃគូ​ ស្មើ​ភាពគ្នា​ជាមួយ​អឺរ៉ុបនិង​​ ​អាល្លឺម៉ង់​ នៅ​លើ​ឆាក​អន្តរជាតិ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI