ព្រឹត្តិការណ៍អន្តរជាតិប្រចាំថ្ងៃ

លោកអូបាម៉ា​ចង់ឲ្យ​អាមេរិក និង​រុស្ស៊ី​កាត់បន្ថយ​ចំនួន​គ្រាប់នុយក្លេអ៊ែរ

O presidente dos EUA, Barack Obama durante discurso em Berlim
O presidente dos EUA, Barack Obama durante discurso em Berlim REUTERS/Fabrizio Bensch

លោកប្រធានាធិបតី​បារ៉ាក់ អូបាម៉ា បាន​អំពាវនាវ កាលពីថ្ងៃ​ពុធ ទី ១៩​មិថុនា ចង់​ឲ្យ​មាន​ការកាត់បន្ថយ​អាវុធ​នុយក្លេអ៊ែរ នៅក្នុង​ប្រទេស​អាមេរិក និង​រុស្ស៊ី។ នៅ​ក្លោងទ្វារ Brandebourg ដែល​កំណត់​ពុះចែក​ទឹកដី​ប៊ែឡាំង​ជាពីរ កាលពី​សម័យ​សង្រ្គាមត្រជាក់ លោកបារ៉ាក់ អូបាម៉ា ថ្លែង​ចង់​បាន​ការកាត់បន្ថយ​អាវុធនុយក្លេអ៊ែរ ដើម្បី​បាន​ពិភពលោក​មួយ មាន​សន្តិភាព​ពិតប្រាកដ។

ផ្សាយពាណិជ្ជកម្ម

 

កាលពី​អាណត្តិ​មុន លោកបារ៉ាក់ អូបាម៉ា​បាន​ធ្វើ​នយោបាយ​គួរ​ឲ្យ​កត់សំគាល់​មួយ​ទាក់ទង​នឹង​ការកាត់បន្ថយ​អាវុធ​នុយក្លេអ៊ែរ។ គាត់​បាន​ជំរុញ​ឲ្យ​មាន​ការចុះសន្ធិសញ្ញា​Newstart រវាង​អាមេរិក និង​រុស្ស៊ី ដើម្បី​កាត់បន្ថយ​ក្បាលគ្រាប់​នុយក្លេអ៊ែរ និង​សព្វាវុធ។ ប៉ុន្តែ ក្រោយមក បញ្ហា​នុយក្លេអ៊ែរ​ក៏​បាន​ស្ងាត់​ទៅវិញ។

លោក​ប្រធានាធិបតី អាមេរិក​បាន​អះអាង​ថា អាមេរិក​នឹង​អាច​កាត់បន្ថយ រហូត​ដល់​មួយ​ភាគបី នៃ​អាវុធ​នុយក្លេអ៊ែរ​របស់ខ្លួន។ បើ​តាម​ការអះអាង​របស់​លោក​អូបាម៉ា កាត់បន្ថយ​គ្រាប់​នុយក្លេអ៊ែរ​របស់​អាមេរិក នឹង​មិន​ប៉ះពាល់​ដល់​សមត្ថភាព​របស់​អាមេរិក ក្នុង​ការ​ធានាសុវត្ថិភាព និង​សន្តិសុខ​ដល់​ប្រជាជន​អាមេរិក និង​ប្រជាជន​របស់​សម្ព័ន្ធមិត្ត ទេ។

ប៉ុន្តែ អ្វី​ដែល​សំខាន់ គឺ​អាមេរិក​មិន​មែនកាត់បន្ថយ​ទេ​តែម្នាក់​ឯងទេ ហើយ​អាមេរិក​ប្រឆាំង​ដាច់ខាត​នឹង​កម្មវិធី​ផលិត​អាវុធនុយក្លេអ៊ែរ​របស់​អ៊ីរ់ង់ និង​កូរ៉េខាងជើង។ លោក​អូបាម៉ា​ចង់​ឲ្យ​ប្រទេស​នៅ​អឺរ៉ុប កាត់បន្ថយ​ក្បាលគ្រាប់នុយក្លេអ៊ែរ ដែរ ជាពិសេស​រុស្ស៊ី​តែ​ម្តង ដែល​ធ្លាប់​ជាអតីត​សត្រូវ​របស់​អាមេរិក​ក្នុង​សង្រ្គាមត្រជាក់។ លោក​អូបាម៉ា​ថ្លែងថា លោក​នឹង​ស្វែងរក​ការចរចា​ជាមួយ​រុស្ស៊ី​ដើម្បីឲ្យ​រុស្ស៊ីកាត់បន្ថយ​អាវុធ​នុយក្លេអ៊ែររបស់ខ្លួនដែរ។

ទីក្រុងម៉ូស្គូ​វិញ​មិន​សូវ​ស្វាគម​នយោបាយ​របស់​លោកអូបាម៉ា​ប៉ុន្មានទេ។ បើតាម​លោក​ឧបនាយក​រដ្ឋមន្រ្តី​រុស្ស៊ី ម៉ូស្គូ​មិន​ទាន់​អាច​ចាត់ទុក​ការថ្លែង​របស់​លោក​អូបាម៉ា​ថា ជា​បានការ ឬ​ការធានាមួយ​ច្បាស់លាស់ទេ។ ព្រោះថា រហូតមក អាមេរិក និយាយ​ផ្សេង តែ​ធ្វើ​ផ្សឹង។ តាម​រុស្ស៊ី អាមេរិក នៅ​តែ​ចំណាយ​លុយ​អភិវឌ្ឍ និង​ពង្រឹង​ប្រព័ន្ធ​ខែលមីស៊ីល ដែល​អាមេរិក​កំពុង​ដាក់​ពង្រាយ នៅ​អឺរ៉ុប។ រុស្ស៊ី ចង់​សំដៅ​ប្រព័ន្ធ​ខែលមីស៊ីល​ដែល​អាមេរិក​បាន​ដាក់​ពង្រាយ​តាំង​នៅ​ក្នុង​ប្រទេស​ប៉ូឡូញ និង​រ៉ូម៉ានី ដែល​រុស្ស៊ី​ចាត់ទុកថា ជា​គ្រោះថា្នក់​សម្រាប់​សន្តិសុខ​របស់ខ្លួន។

រុស្ស៊ី និង​អាមេរិក នៅតែ​មិន​ទាន់​និយាយ​ត្រូវគ្នា ពី​ប្រព័ន្ធ​ខែលមីស៊ីល ដោយរុស្ស៊ី ចង់​បញ្ចូល​សព្វាវុធនេះ ទៅក្នុង​សន្ធិសញ្ញា​ New Start ដែល​មាន​គោលដៅ​កាត់បន្ថយ​អាវុធនុយក្លេអ៊ែរ។ អាមេរិក​វិញ តែងតែ​បដិសេធ ដោយ​លើកហេតុផលថា ប្រព័ន្ធ​ខែល​មីស៊ីល​គ្មានតួនាទី​សម្រាប់​បាញ់​អាវុធ​នុយក្លេអ៊ែរ ប៉ុន្តែ មាន​នាទី​សម្រាប់​បាញ់​ស្ទាក់ទប់​មីស៊ីល​ដែល​សំដៅ​សហរដ្ឋអាមេរិក និង​បណ្តា​អឺរ៉ុប​ដែល​ជា​សម្ព័ន្ធមិត្ត​របស់​អាមេរិក។

គួរដឹងថា នៅក្នុង​សន្ធិសញ្ញា​New Start រុស្ស៊ី និង​អាមេរិក​បាន​យល់ព្រមព្រៀងគ្នា ​កាត់បន្ថយ​ក្បាលគ្រាប់​នុយក្លេអ៊ែរ ៣១​ភាគរយ​របស់ខ្លួន គឺ​ពី​ជាង ២០០០គ្រាប់ មក​នៅ​ត្រឹម ១៥៥០គ្រាប់ ចំណែក​សព្វាវុធ​ដែល​គេប្រើ​បាញ់​គ្រាប់​នុយក្លេអ៊ែរ ដូចជា ​មីស៊ីល​អន្តរទ្វីប នាវា​មុជទឹក ក៏​ត្រូវ​គេ​កាត់បន្ថយ ឲ្យ​មក​នៅ​ត្រឹម​ចំនួន ៧០០​ដែរ សម្រាប់​ប្រទេស​នីមួយៗ។

បើ​ទោះជា​សន្ធិសញ្ញា​តម្រូវ​ឲ្យ​អាមេរិក និង​រុស្ស៊ី​កាត់បន្ថយ​អាវុធ​នុយក្លេអ៊ែរ ក៏​ប្រទេស​ទាំងពីរ​នៅតែ​មាន​អាវុធ​នុយក្លេអ៊ែរ​ច្រើន​ដដែល។ ឧទាហរណ៍​ជាក់ស្តែង នៅពេល​គេ​និយាយ​ពី​ក្បាល​គ្រាប់​នុយក្លេអ៊ែរ​ដែល​គេ​ត្រូវ​កាត់បន្ថយ គឺ​គេ​សំដៅ​ក្បាលគ្រាប់​ដែល​គេ​ដំឡើង​ដាក់​រួចហើយ នៅ​លើ​មីស៊ីល ឬ​លើ​យន្តហោះ​ទម្លាក់គ្រាប់។ ប៉ុន្តែ គេ​មិន​បាន​រាប់បញ្ចូល​ក្បាលគ្រាប់​នុយក្លេអ៊ែរ ដែល​គេ​ស្តុក​ទុក ក្នុង​ឃ្លាំងទេ។ មួយវិញទៀត គេ​គិត​ថា មីស៊ីល​មួយ​នាំ​ក្បាលគ្រាប់​នុយក្លេអ៊ែរ​មួយ ចំណែក​យន្តហោះ​ក៏​អាច​ដឹកគ្រាប់បែក​នុយក្លេអ៊ែរ តែ​មួយគ្រាប់ដែរ។ ប៉ុន្តែ គេ​មិន​បាន​គិតទេថា យន្តហោះ​អាច​ដឹកគ្រាប់ធុន​B 52​ដល់​ទៅ ២០ ហើយ​គ្រាប់​B 52 ក៏​មាន​សមត្ថភាព​ដឹក​ក្បាល​គ្រាប់នុយក្លេអ៊ែរ ទៅ​ជាមួយផងនោះទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI