អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អ៊ុយក្រែន ៖ តើ​ទណ្ឌកម្ម​ថ្មី​របស់​អឺរ៉ុប និង​អាមេរិក​ នឹង​ធ្វើ​ឱ្យ​រុស្ស៊ី​ញញើត​ដែរ​ឬទេ ?

សំឡេង ០៥:៣៦
សកម្មជនគាំទ្រ​រុស្ស៊ី នៅ​ Donetsk នៅ​ភាគ​ខាង​កើត​អ៊ុយក្រែនថ្ងៃ​ទី ២៧ មេសា ២០១៤
សកម្មជនគាំទ្រ​រុស្ស៊ី នៅ​ Donetsk នៅ​ភាគ​ខាង​កើត​អ៊ុយក្រែនថ្ងៃ​ទី ២៧ មេសា ២០១៤ REUTERS/Baz Ratner
ដោយ៖ អៀង សុខម៉ិញ

មាន​ហេតុការណ៍​ហិង្សា​ច្រើន​ បាន​ផ្ទុះ​ឡើង​ច្រើន​ នៅ​ភាគ​ខាងកើត​អ៊ុយក្រែន៖ នៅ​ខាគីវ (Khakiv) មាន​ការ​ប៉ះទង្គិច​គ្នា​រវាង​ក្រុម​អ្នក​គាំទ្រ​​កីឡា​បាល់​ទាត់ ការពារ​ប្រយោជន៍​ជាតិ​អ៊ុយក្រែន និង​ក្រុម​សិទ្ធ​នឹង​រុស្ស៊ី បង្ក​ឱ្យ​មានអ្នក​រង​របួស​ជា​ច្រើន​នាក់។ ក្រុម​ផ្តាច់​ទឹក​ដី កំពុង​ស្វែង​រក​ការ​ត្រួត​ត្រា​មតិ​សាធារណៈ ដោយ​វាយ​លុក​លើ​ប្រព័ន្ធ​ផ្សព្វផ្សាយ​ព័ត៌មាន​​តំបន់​ ទីស្នាក់ការ​ទូរទស្សន៍​ក្រុង​ដូណេត (Donetsk)ត្រូវ​រង​ការ​លុក​លុយ​ឈ្លានពាន ... កង​កម្លាំង​អ៊ុយក្រែន​មិន​អាច​ធ្វើ​អ្វី​កើត ... ចំណែក​ក្រុម​អ្នក​សង្កេតការណ៍​អង្គការ​សន្តិសុខ​និង​សហប្រតិបត្តិការ​អឺរ៉ុប OSCE មិន​ទាន់​ត្រូវ​បាន​ដោះលែង​អស់​ទេ។ ប្រឈម​មុខ​នឹង​ស្ថានការណ៍​ជាប់​គាំង​ដូច្នេះ សហរដ្ឋ​អាមេរិក​ និងសហភាព​អឺរ៉ុបគ្មាន​អ្វី​ក្រៅ​អំពី​​​ពង្រឹង​ទណ្ឌកម្ម​បន្ថែម​លើ​រុស្ស៊ី​។ អាមេរិក​អាច​នឹង​ដៅ​លើ​វិស័យ​ឧស្សាហកម្ម  ឯ​ចំណែក​សហភាពអឺរ៉ុបវិញ ប្រមុខ​ការទូត​ទាំង​២៨​ត្រូវ​សម្រេច​ផែនការ​ដាក់ទណ្ឌកម្ម​រុស្ស៊ី នៅ​ថ្ងៃ​ចន្ទទី​២៨ មេសា​នេះ។

ផ្សាយពាណិជ្ជកម្ម

ក្រុម​បះបោរ​នៅ​ភាគ​ខាងកើត កំពុង​លេង​ល្បែង​ដេញ​ថ្លៃ ! បន្ទាប់​ពីបាន​សម្តែង​ល្ខោន​រៀប​ឆាក​ធ្វើ​សន្និសីទ​កាសែត ប្រាប់​ថា​អ្នក​សង្កេត​ការណ៍​អឺរ៉ុប កំពុង​ជាប់​ក្នុង​ក្រញាំ​ដៃ​ពួកគេមក គឺ​ដល់​វេន​​តថ្លៃ​ដោះដូរ​ចំណាប់​ថ្នូរ​សង្គ្រាម​ម្តង។ សមាជិក​អង្គការ​OSCE ម្នាក់​ជា​ជនជាតិ​ស៊ុយអែត ដែល​មាន​ជំងឺ​ទឹក​នោម​ផ្អែម​ ត្រូវ​បាន​ដោះលែង ប៉ុន្តែ​ ​សម្រាប់​៧​នាក់​ទៀត ទំនង​ជាមិន​ងាយ​ចរចា​ត្រូវ​ទេ។ ព្រោះ​ស្ថានភាព​កាន់​តែ​តាន​តឹង​ខ្លាំង ក្រុម​អ្នក​បះបោរ​កំពុង​ត្រៀម​ផែនការ​វាយ​សម្រុក​ដោយ​ប្រើ​កម្លាំង​ពិសេស នៅ​ក្រុង​តូច​ៗ​ជិត​នោះ។

 
គម្រោង​ចរចា​គ្មាន ផ្ទុយ​ទៅ​វិញ យោធាមាន​ថាន្តរសក្តិ​​​អ៊ុយក្រែន​បី​នាក់ ត្រូវ​បាន​ពួក​ឧទ្ទាម​ចង់​ផ្តាច់​ទឹកដី​នៅ​ស្លាវីយ៉ង់ ចាប់​បាន​យក​ទៅឃុំ​ឃាំងបន្ថែម​ទៀត។ ទូរទស្សន៍​រុស្ស៊ី បាន​បង្ហាញ​រូបភាព​គួរ​ឱ្យ​អាម៉ាស បុរស​បី​នាក់​ មាន​តែ​ខោ​ក្នុង ចង​បំបិទ​ភ្នែក​ ដោយ​រុំ​ស្តុត។ ទីស្នាក់ការ​ទូរទស្សន៍​អ៊ុយក្រែន​ប្រចាំ​ក្រុង​ដូណេស បានក្លាយ​ជា​លាន​ដ្ឋាន លុកលុយ​និង​ចូល​​​គ្រប់គ្រង​ដោយ​គ្មាន​ប៉ូលិស​ណា​ចូល​ធ្វើ​អន្តរាគមន៍។ មេដឹកនាំ​ថ្មី​តំបន់​ភាគ​ខាងកើត កំពុង​ត្រៀម​បង្កើត​កម្មវិធី​ទូរទស្សន៍​ដោយ​ខ្លួន​ឯង​លែង​រំពឹង​លើ​ក្រុង​គៀវ ហើ​យ​ក្នុង​ពេល​រង់ចាំ​ ប៉ុស្តិ៍​​​នេះ​​ ​ផ្សាយ​បន្តពីរុស្ស៊ី។

​សហរដ្ឋ​អាមរិក និង​សហភាព​អឺរ៉ុប បន្ថែម​ទណ្ឌកម្ម​ ប្រឆាំង​នឹង​ម៉ូស្គូ​

​​ទណ្ឌកម្ម​អាមេរិក​នឹង​ត្រូវ​ប្រកាស​ជា​ផ្លូវ​ការ​នៅ​ថ្ងៃ​នេះ ប៉ុន្តែ​បើ​តាម​ការ​បង្ហើប​របស់​ទីប្រឹក្សា​រង ផ្នែក​សន្តិសុខ​ជាតិ​អាមេរិក ​ទណ្ឌកម្ម​ថ្មី​​នេះ នឹង​ដៅ​ដាក់​ប្រឆាំង​លើ​មនុស្ស​ជំនិត​ លំដាប់​ទី​មួយ​នៃ​ត្រកូល​ វ្លាដេមៀពូទីន​តែ​ម្តង ​និង​ក្រុមហ៊ុន​របស់​ពួកគេ ដើម្បី​ឱ្យ​មាន​​ទម្ងន់​ ប៉ះពាល់​ខ្លាំង​ដល់​សេដ្ឋកិច្ច​ជាតិ​រុស្ស៊ី។ ប្រភព​ខ្លះ​ទៀត បាន​លើក​ឡើង​អំពី​ឈ្មោះ​ក្រុម​ហ៊ុន​ថាមពល​ Rosnef ឬ Gazprom។ ពី​ប្រទេស​ហ្វីលីពីន លោក​អូបាម៉ា​បាន​ឲ្យដឹង​ថា ទណ្ឌកម្ម​ដែល​អាមេរិក​នឹង​ដាក់​បន្ថែម​នេះ មានសំដៅ​លើ​បុគ្គល​ផ្ទាល់ផង ក្រុមហ៊ុនផង និង​ការ​នាំ​ចូល​​ផង ដោយ​​​រាប់បញ្ចូល​ទាំង​ការ​នាំចេញ​វិស័យ​បច្ចេកវិទ្យាការពារជាតិ​របស់​អាមេរិក​ទៅកាន់​រុស្ស៊ី។

ចំណែក​ខាង​អឺរ៉ុបវិញ គ្រប់​ប្រទេស​ជា​សមាជិក​សុទ្ធ​តែ​បាន​យល់​ច្បាស់​ ថា​ត្រូវ​រឹត​បន្តឹង​ទណ្ឌកម្ម​ប្រឆាំង​នឹង​រុស្ស៊ី។ ប្រមុខ​ការទូត​ទាំង​២៨​ នៃ​រដ្ឋ​ជា​សមាជិក​ ត្រូវ​ជួប​ប្រជុំ​គ្នា​ ពិភាក្សា​ បង្កើន​ឈ្មោះ​អ្នក​ទទួល​ខុស​ត្រូវ​រុស្ស៊ី និង​អ៊ុយក្រែន នៅគ្រីមេ ក្នុង​បញ្ជី​ទណ្ឌកម្ម ដែល​មាន​រួច​ស្រាប់។ នេះ​បើ​តាម​ការ​បញ្ជាក់​របស់​ប្រមុខ​​ការទូត​អង់គ្លេស។

ដូច​៥៥នាក់​មុន​ដែរ អ្នក​ទទួល​ខុស​ត្រូវ​រុស្ស៊ី​ដែល​​នឹងមាន​​ឈ្មោះ​ក្នុង​បញ្ជី​ខ្មៅអឺរ៉ុប​ នឹង​ត្រូវ​ហាម​ឃាត់​មិន​ឱ្យ​ធ្វើ​ដំណើរ​មក​អឺរ៉ុប ទ្រព្យ​ធន​នៅក្នុង​ធនាគារ​អឺរ៉ុប​ត្រូវ​បង្កក​ផ្អាប់​ទុក​មិន​ឱ្យ​ប្រើ​ប្រាស់​បាន។ ប៉ុន្តែ​សហភាព​អឺរ៉ុប បាន​ទុក​ផ្លូវ​ដើរ​ខ្លះ​ ដោយ​ចេតនា ដោយ​មិន​ដៅ​ទណ្ឌកម្ម​ឱ្យ​ចំ​លើ​ប្រធានាធិបតី​រុស្ស៊ី ពូទីន ឬ​សមាជិក​រដ្ឋាភិបាល​កំពុង​កាន់​អំណាច​ទេ។ ព្រោះ​ថ្វី​បើ​អឺរ៉ុប​ដឹង​ថា​ត្រូវ​ដំឡើង សំឡេង​និងបង្កើន​សម្ពាធ ​ ដាក់​រុស្ស៊ី តែគ្មាន​ផ្លូវ​ដែល​អឺរ៉ុប​ត្រូវ​គិត​គូរ​ដាក់​ទណ្ឌកម្ម​សេដ្ឋកិច្ច​លើ​​ម៉ូស្គូ​ឡើយ ព្រោះ​អឺរ៉ុប​មាន​ពាក់​ព័ន្ធ​ដោយ​ផ្ទាល់​ខ្លាំង​ពេក​ជាមួយ​រុស្ស៊ី មិន​ដូច​សហរដ្ឋ​អាមេរិក​ឡើយ។​

►សូម​អាន ៖ ក្រុមហ៊ុន​ដែកថែប យក្ស​រុស្ស៊ី គំរាម​លុច​ការងារ​នៅ​អឺរ៉ុប ករណី​មាន​ទណ្ឌកម្ម​សេដ្ឋកិច្ចប្រឆាំង​រុស្ស៊ី

សហភាព​អឺរ៉ុប មិន​ស្រុះ​ស្រួល​ត្រូវរ៉ូវ​គ្នាសោះ លើ​គំនិត​ចង់​បង្ក​ក​ទំនាក់ទំនង​ពាណិជ្ជកម្ម​ជាមួយ​រុស្ស៊ី ដែល​ជា​ដៃគូ​ពាណិជ្ជកម្ម​លំដាប់​ទី​បី​របស់​ខ្លួន។ ទោះ​បី​ជា​សមាជិក​សហភាព​ភាគ​ច្រើន គិត​ថា​ទណ្ឌកម្ម​សេដ្ឋកិច្ច​នេះ ជាអាវុធ​​តែ​មួយ​គត់​ដែល​អាច​បំបាក់​លោក​វ្លាដេមៀពូទីន​ក៏​ដោយ។

តើ​ទណ្ឌកម្ម​អន្តរជាតិ​អាច​បញ្ឈប់​​​លោក​ពូទីន​បាន​ទេ ?

សម្រាប់​ទីប្រឹក្សា​ប្រធានាធិបតី អាមេរិក ចម្លើយ គឺ​ បាន ! ព្រោះ​លោក​មាន​សំអាង​ថា សេដ្ឋកិច្ច​រុស្ស៊ី​ចាប់​ផ្តើមធ្លាក់​ចុះ​ តាំង​ពី​វិបត្តិ​នៅ​អ៊ុយក្រែន​ផ្ទុះ​ឡើងនៅគ្រីមេ។ រដ្ឋមន្ត្រី​ក្រសួង​ហិរញ្ញវត្ថុ​រុស្ស៊ី​ផ្ទាល់​ធ្លាប់​បាន​សម្តែង​ក្តី​ព្រួយ​បារម្ភ​ជា​សាធារណៈ​ ចំពោះ​ឥទ្ធិពលមិន​ល្អ​នៃ​វិបត្តិ​អ៊ុយក្រែន​លើ​សេដ្ឋកិច្ច​រុស្ស៊ី។ អីចឹង​ហើយ បានជា​ក្រុម​ការងារ​របស់​លោក​អូបាម៉ា មួយ​ភាគ​ចង់​ឱ្យ​អាមេរិក​ដាក់​ទណ្ឌកម្ម​សេដ្ឋកិច្ច​រុស្ស៊ី ជា​ឯកតោភាគី​​មុន​ ដើម្បី​ធ្វើ​ជា​គំរូ​ឱ្យ​អឺរ៉ុប​សម្រេច​ចិត្ត​ក្រោយ។

ប៉ុន្តែ​អ្នក​វិភាគ​ខ្លះ​ទៀត​យល់​ផ្សេង​។ ជាក់​ស្តែង ​អតីត​​មហាសេដ្ឋី​ប្រេង Mikhail Khodorkovski មេបក្ស​ប្រឆាំង​​រុស្ស៊ី ដែល​លោក​ពូទីន​បាន​ចាប់​ឃុំឃាំង​អស់​១០​ក្នុង​ពន្ធនាគារ លោក​យល់​ថា​ គ្មាន​ទណ្ឌកម្ម​ណា​អាច​បញ្ឈប់​លោក​ពូទីន​បាន​ឡើយ។ ទីមួយ​វិធានការ​បែប​ដាក់​ទណ្ឌកម្ម​សេដ្ឋកិច្ច មិន​ឆ្លើយ​តប​នឹង​ចរិត​របស់​លោកពូទីន។ ហើយ​ម្យ៉ាង​ទៀត ទណ្ឌកម្ម​សេដ្ឋកិច្ច ពាណិជ្ជកម្ម គ្មាន​ឥទ្ធិពល​ភ្លាមៗ​លើ​សេដ្ឋកិច្ច​រុស្ស៊ី​ទេ។ នេះ​បើ​ផ្អែក​ទៅ​លើ​ ធនធាន​បំរ៉ុង​ជា​មាស លទ្ធភាព​បង្វែរ​ទីផ្សារ​ថាមពល ប្តូរ​អ្នកផ្គត់ផ្គង់​ ... ក្នុង​រវាង​ពី​៣ ទៅ​៥​ឆ្នាំ​ទៀត សេដ្ឋកិច្ច​រុស្ស៊ី អាច​ធ្លាក់​ចុះ​អន់​បន្តិច​មែន ប៉ុន្តែ​មិន​អាច​ដល់​ថ្នាក់​វីវរ​ឡើយ៕​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ