អានតួអត្ថបទ

ហេតុ​អ្វី​ប្រធាន​ FiFA លាលែង​ចេញពី​តំណែង ក្រោយ​ជាប់​ឆ្នោត​ជា​ថ្មី​​បាន​បួន​ថ្ងៃ ?

លោក Joseph "Sepp" Blatter
លោក Joseph "Sepp" Blatter REUTERS/Ruben Sprich/Files
ដោយ៖ អៀង សុខម៉ិញ
៣១ នាទី

ប្រធាន​សហព័ន្ធ​បាល់​ទាត់​ពិភពលោក​ (FIFA) លោក​ Sepp Blatter ​បាន​សម្រេច​ចិត្ត​លា​ចេញ​ពី​តំណែង នៅ​ល្ងាច​ថ្ងៃ​អង្គារ​ម្សិលមិញ​។ ជា​ការ​សម្រេចចិត្ត​ ដ៏​គួរ​ឱ្យ​​ភ្ញាក់​ផ្អើល​បំផុត ! ព្រោះ​ថា​រឿង​អាស្រូវ​ពុក​រលួយ ​បាន​ផ្ទុះ​ឡើង​យ៉ាងកក្រើក​ពិភព​បាល់ទាត់ តាំង​ពី​ជាង​មួយ​សប្តាហ៍​មកហើយ ការ​អំពាវនាវ​​ឱ្យ​លោក សេប ប្លាធ័រ ចុះ​ចេញ​ពី​តំណែង​ ឱ្យ​ពន្យារ​បោះឆ្នោត​ក៏​មាន​ពី​គ្រប់​ទិស ប៉ុន្តែ​ព្យុះ​ភ្លៀង​នេះ​មិន​អាច​ធ្វើ​លោក សេប ប្លាធ័រ​បាន​សោះ។ លោក បាន​ជាប់​ឆ្នោត​​ជា​​ថ្មី​ដឹកនាំ​FiFA អាណត្តិ​ទី ៥ យ៉ាង​ភ្លូក​ទឹក​ភ្លូក​ដី ប៉ុន្តែ​បាន​តែ​ពីរ​ថ្ងៃ ស្រាប់​តែ​ប្រកាស​លា​លែង​ចេញពី​តំណែង​ដោយ​ខ្លួន​ឯង។

ផ្សាយពាណិជ្ជកម្ម

រឿង​អាស្រូវ​ពុក​រលួយ​ក្នុង​រង្វង់​សហព័ន្ធ​បាល់ទាត់​ពិភពលោក បាន​ផ្ទុះ​ឡើង​តាំង​ពី​ថ្ងៃ​ពុធ​ទី ២៧​ឧសភា​សប្តាហ៍មុន​ ដោយ​មាន​ការ​ចាប់​ខ្លួន​ថ្នាក់​ដឹកនាំ​ជាន់​ខ្ពស់ក្នុង​សហព័ន្ធ​​ដល់​ទៅ​៧​រូប ដល់​ស្ថាប័ន​នៅ​ស្វ៊ីស ដែល​កំពុង​ត្រៀម​ខ្លួន​រៀប​ចំ​បោះឆ្នោត​ជ្រើសរើស​ប្រធាន​ថ្មី​ផង។ ​​

 
រឿង​អាស្រូវ​ក្នុង​ពិភព​កីឡា រាលដាល​​ជា​​សម្ពាធ​អន្តរជាតិ​ ជា​​សម្ពាធ​ការ​ទូត។ ប្រធានាធិបតី​រុស្ស៊ី​ពូទីន​បាន​លូក​មាត់​ការពារ​ FiFA ដោយ​បន្ទោស​តុលាការ​អាមេរិក​ថា​ចង់​បន្ទុច​បង្អាក់​ការ​បោះឆ្នោត​ ប្រមុខ​ដឹកនាំ​​បារាំង អង់គ្លេស​​ និង​ប្រទេស​ផ្សេង​ទៀត សំណូម​ពរ​ឱ្យ​លើក​ពេល​បោះឆ្នោតសិន- សូម្បី​តែ​មិត្ត​ដ៏​ជំនិត​ក្នុង​សហព័ន្ធ​ ក៏​ទាមទារ​ឱ្យ​លោក សេប ប្លាធ័រ លាលែង​ចេញ​ពី​តំណែង​ដែរ។ ប៉ុន្តែ​គ្មាន​រង្គើ ការ​បោះឆ្នោត​បាន​ប្រព្រឹត្ត​ទៅ​តាម​កាល​កំណត់ ហើយ​លោក ប្លាធ័រ​ បាន​ជាប់​ឆ្នោត​យ៉ាង​ត្រចះ​ត្រចង់​ ជា​ប្រធាន​សហព័ន្ធ​បាល់ទាត់ អាណត្តិ​ទី​៥ទៀត។


ហេតុអ្វី​ទើប​លាលែង​ពី​តំណែង​ថ្ងៃនេះ ?
លោក សេប ប្លាធ័រ បាន​ប្រកាស​ ដោយ​ភ្ញាក់ផ្អើល លាលែង​ចេញ​ពី​តំណែង! ការពារ​ចង់​ស្លាប់​បែរ​ជា​ត្រូវ​មក​បោះ​បង់​ចោល​ដោយ​ស្រួលៗ​ទៅ​វិញ។ ហេតុអ្វី ?! ​មាន​សេចក្តី​ពន្យល់​ពីរ​បែប​៖ ទី​មួយ គឺ​ប្រធាន​សហព័ន្ធ ដ៏​ចំណាស់​រូប​នេះ​ ទើប​ភ្ញាក់​ខ្លួន​យល់​ថា​អាណត្តិ​ថ្មី​មាន​អាសន្ន ! ព្រោះ​រឿង​អាស្រូវ​ត្រូវបាន​តុលាការ​អាមេរិក​បើក​កកាយ​ជា​បន្ត​បន្ទាប់​។ ឬ​ម្យ៉ាង​ទៀត ទំនង​មក​ឃើញ​គ្រោះថ្នាក់​ខិត​មក​ធ្លាក់​លើ​ខ្លួន​ផ្ទាល់។

សូម​បញ្ជាក់​ថា​រឿង​អាស្រូវ​ដែល​ផ្ទុះ​កន្លង​មក មាន​ពាក់​ព័ន្ធ​ជា​ទូទៅ​ក្នុង​សហព័ន្ធ ដោយ​មាន​ថ្នាក់​ដឹក​នាំ​សំខាន់​ៗជាប់​ចោទមែន តែ​មិន​បាន​ប៉ះពាល់​ដល់​រូប​លោក​ សេប ប្លាធ័រ​ទេ។ រឿង​រ៉ាវ​បាន​ដើរ​មក​ដល់​របត់​ថ្មី​ នៅ​ថ្ងៃចន្ទ​​ទី ១ មិថុនា អគ្គលេខាធិការ​ ​FiFA លោក Jerome Valcke​ដែល​ជា​មនុស្ស​ខ្លាំង​ទីពីរ​របស់សហព័ន្ធ និង​ជា​មនុស្ស​ជំនិត​របស់​លោក ប្លាធ័រ ត្រូវ​ជាប់​សង្ស័យ​ដោយផ្ទាល់ ថា​មាន​ជាប់​ពាក់​ព័ន្ធ​​នឹង​អំពើ​ពុក​រលួយ ទំហំ​ ១០​លាន​ដុល្លារ ពី​សំណាក់​​​តុលាការ​អាមេរិក​។ បើ​តាម​កាសែត​ញូវយ៉ក​ថែម​ ភ្នាក់ងារ​អង្កេត​អាមេរិក​FBI កំពុង​ភ្ជង់​​ការ​អង្កេត​ប្រឆាំង​លើ​រូប​លោក សេប ប្លាធ័រ​​ដោយ​ផ្ទាល់​តែ​ម្តង។

យោង​តាមកាសែត​ញូវយ៉ក​ថែមនិង​ទូរទស្សន៍​ABC  លោក ប្លាធ័រ បាន​សាក​ល្បង​តាំង​ពី​ច្រើន​ថ្ងៃ នៅ​ឱ្យ​ឆ្ងាយ​ពីការ​អង្កេត​​ពុក​​រលួយ​ តែ​អាជ្ញាធរ​អាមេរិក​សង្ឃឹម​លើ​កិច្ចសហប្រតិបត្តិការ​របស់​FiFA ដើម្បី​អាច​ឈាន​ដល់​ការ​ចោទ​ប្រកាន់​លើ​រូប​អតីត​ប្រធាន​សហព័ន្ធបាល់​ទាត់​​ពិភពលោក ជាតិ​​​ស្វ៊ីស​ សេប ប្លាធ័រ។ ដោយមាន​ការ​បង្ហើប​​ទម្លាយ​រឿង​អាស្រូវ​នេះ អាជ្ញាធរ​ពាក់ព័ន្ធ​មាន​​ជា​អាទិ៍​ស្វ៊ីស​ក៏​​ធ្វើ​ការ​អង្កេត​របស់​ខ្លួន​ដែរ។

លោក Michel Platini (ស្តាំ) អបអរ​​​លោក​Sepp Blatter ក្រោយ​ពេល​ជាប់​ឆ្នោត​ជា​ប្រធាន​FiFA
លោក Michel Platini (ស្តាំ) អបអរ​​​លោក​Sepp Blatter ក្រោយ​ពេល​ជាប់​ឆ្នោត​ជា​ប្រធាន​FiFA REUTERS/Arnd Wiegmann

អនាគត​ប្រធាន​ FiFA
ថ្វី​បើ​លោក សេប ប្លាធ័រ បាន​លា​លែង​ចេញ​ពី​តំណែង​មែន ប៉ុន្តែ​លោក មិន​បាន​រើ​ចេញ​ពី​ការិយាល័យភ្លាម នៅ​ព្រឹក​ថ្ងៃ​ពុធ​នេះ​ទេ។ លោក​ នៅ​តែ​បន្ត​ដឹកនាំ​ស្ថាប័ន​ដដែល រហូត​ដល់​មាន​ការ​បោះឆ្នោត​សមាជ​! ​តាម​គម្រោង​សមាជ​សហព័ន្ធ​ត្រូវ​ប្រព្រឹត្ត​ទៅ​នៅ​ខែ​ឧសភា​ឆ្នាំ​២០១៦ នៅ​ប្រទេស​ម៉ិចស៊ិក។ ប៉ុន្តែ​ដោយ​យល់​ថា​ជា​ពេលវេលា​យូរពេក ទើប​គណៈកម្មការ​FiFA បាន​បញ្ជាក់​ថានឹង​រៀប​ចំ​​សមាជ​វិសាមញ្ញ​​ ​នៅ​រវាង​ពី​ខែ​ធ្នូ ២០១៥ ដល់​ខែមីនា ២០១៦។

ចំពោះ​បេក្ខភាព​ជា​ប្រធាន​សហព័ន្ធ​វិញ មាន​មិន​ខ្វះ​ទេ ! គ្រាន់​តែ​បាន​ឮ​ការប្រកាស​ជា​ផ្លូវការ ការ​លាលែង​ចេញ​ពី​តំណែង​របស់​ប្លាធ័រ​ភ្លាម បេក្ខជន​ដែល​បាន​ចាញ់​ឆ្នោត​នៅកាលពី​ថ្ងៃ​សុក្រ​កន្លង លោកDavid Ginola បាន​ត្រៀម​ខ្លួន​ឈរ​ឈ្មោះ​ជា​ថ្មី។ ​រាជបុត្រ​ហ្ស័កដានី ​Ali Bin Hussein  បាន​បដិសេធ នៅ​ក្នុង​បទ​សម្ភាសន៍ជាមួយ​​ទូរទស្សន៍​CNN ​មិន​ផ្តល់​សេចក្តី​សម្រេចចិត្ត​នៅ​ពេល​នេះ ដូច​ដែល​សារព័ត៌មាន​ផ្សេង​បាន​លើក​ទេ។

បុគ្គល​ម្នាក់ទៀត ដែល​គ្រប់​គ្នា​កំពុង​ផ្តោត​ចក្ខុ គឺ​ប្រធាន​សហព័ន្ធ​បាល់ទាត់​អឺរ៉ុប ជាតិ​បារាំង លោក មីឆែល ប្លាទីនី (Michel Platini)។ ព្រោះ​នៅ​ពេល​ផ្ទុះ​រឿង​អាស្រូវ​ពុក​រលួយ​ភ្លាម លោក ប្លាទីនី បាន​ចេញ​មុខ​មុន​ជា​លក្ខណៈ​បុគ្គល​ សុំ​ឱ្យ​​លោក សេប ប្លាធ័រ លាលែង​ចេញ​ពី​តំណែង តែ​មិន​បាន​សម្រេច​ ! ​ក៏​ក្លាយ​ជាតំណាង​​ក្រុម​ប្រឆាំង​ និង​​​បាន​ប្រកាស​បើក​សមាជ​​​​វិសាមញ្ញ​នៅ​ទីក្រុង​ប៊ែរ​ឡាំង​ថ្ងៃ​សៅរ៍ទី ៦​មិថុនា ដើម្បី​ពិចារណា​អំពី​ទំនាក់​ទំនង​របស់​សហព័ន្ធ​បាល់ទាត់​អឺរ៉ុប​និង​FIFA មុន​នឹង​លើក​ពេល​ទៅ​វិញ បន្ទាប់​ពី​បាន​ឮលោក​ប្លាធ័រលាលែង​ចេញ​ពី​តំណែង។

គេ​មិន​ដឹង​ថា​លោក​ប្លាទីនី នឹង​ឈរ​ឈ្មោះ​ជា​បេក្ខជន​ឬ​អត់​ទេ ប៉ុន្តែ​ខាងអឺរ៉ុប​​ចាប់​ផ្តើម​​ទស្សទាយ​​ពី​លទ្ធភាព​ឈ្នះ​ឆ្នោត​របស់​លោក​ប្លាទីនី ដែល​ល្បី​ខាង​មាន​ចំណូល​ធ្វើ​កំណែទម្រង់ និង​ស្និទ្ធ​នឹង​កីឡាករ បើ​ទោះ​ដឹង​ថា​​ឧបសគ្គ​មាន​ច្រើន​ ​សំឡេង​អឺរ៉ុប​ក្នុង​FIFA តំណាង​ ឱ្យ​តែ​៥៣​លើ​២០៩​ប៉ុណ្ណោះក៏​ដោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ